Kiiri wemu wʼa to Edomu shɛɛn pu ɲuŋɔ ni ge
34
Fiiye yatii shɛɛn pee, yi fulo, yʼi ye logo.Shi shɛɛn pu bɛɛri, yi ɲuwegee shan.
Ɲiŋɛ ke ni ki yaŋmuyɔ yi bɛɛri, yi ye logo.
Koŋɔ ke ni ki funŋɔ yaŋmuyɔ yi bɛɛri, yi ye logo.
2 Tɛhɛnɛ Baa Kilɛ luu lʼa yìri fiiye yatii shɛɛn pu bɛɛri tàan.
Wu luu lʼa tanha pu kashɛn keye yi bɛɛri tàan.
Wu na ba pu kyɛɛgi fɛɛfɛɛ.
Wu na ba pu ɲɔ yaha pʼi pu gbo.
3 Piimu pʼa gbo ge, pʼa pee wá kpɛɛngɛ ki na.
Pu nixhuyo yi nugo ki wa fòro.
Pu shishan pu wa fuu na diri faaboboyo yi na.
4 Fugba wɔrɔɔ ki bɛɛri na ba juri.
Fugba wu na ba gurulo ba fuugo ɲɛ wɛ.
Fugba wɔrɔɔ ki na ba do do
ba ɛrɛzɛn wɛwaya, kelee nitoroŋɔ woyo ɲɛ wɛ.a
5 Tɛhɛnɛ Baa Kilɛ ya jo:
«Nɛ ŋmɔpara lʼa li labye wu ɲɔ fa fugba wu ni.
Nimɛ lʼa da digi Edomu shi wu fɛni.
Wee shi we, nɛ kiiri shan xɔ wu ɲuŋɔ ni,
nɛ na ba wu kyɛɛgi fɛɛfɛɛ.»b
6 Tɛhɛnɛ Baa Kilɛ wo ŋmɔpara lʼa ɲi shishan na,
li bɛɛri li ɲɛ sìnmɛ:
Dubyapiye ni sikapee shishan,
ni dubyapee zanlogoo sìnmɛ.
Bani saraga ki da ba wolo Tɛhɛnɛ Baa Kilɛ mu Bɔsira† kulo li ni,
sɛɛ sɛɛ gbuuro ti da ba bye Edomu fiige ki ni.
7 Seniiyɛc yi na ba do ni pu ni shiizhan,
na fara nupepinyɛ ye ni nupelɛyɛ yi na.
Pu ɲiŋɛ ki na ba gba shishan na,
ɲiŋɛ ki puuro ti bɛɛri na ba ɲi sìnmɛ na.
8 Bani kee na ba bye Tɛhɛnɛ Baa Kilɛ wo goo wu cawuugo.
Wu na ba Siyɔn wo pɛɛn pu foo tɔ pu mu lee yee le.
9 Edomu fiige ki duyo yi lɔhɔyɔ yi na ba ɲɛri kuro,
ɲiŋɛ ki puuro ti ma ɲɛri kirimu.
Fiige ki na ba ɲɛri kuro temu ya sori ge.
10 Caŋa fara piige na, kee na ki da ga fugi wɛ,
wurege ki na ba duri gbee.
Fiige ki niwaga na ba yaha wà tuun bɛɛri ni fo gbee,
sipya bɛ da ba doroo ki ni bada wɛ.d
11 Ki na ba bye totoroyo ni tinnirigee fiige,
totooɲaŋmɛɛgɛɛ ni kanriya tatɛɛngɛ.
Tɛhɛnɛ Baa Kilɛ na ba wu kakara ti wo daanna mɛɛrɛ ti taga ki taanna,
na ki kyɛɛgi, na ki pye kataha.
12 Shɛngbɔɔ da ba da nige pu teŋɛ saan wɛ,
ɲuŋɔfɛɛ pu bɛɛri na ba xhɔ.
13 Xhuyo tahaya na ba foro pu saannaa piyɛyɛ yi ni,
ŋmaara tiye ni xhuyo tiye na ba fin
pu kashɛn ɲaha kɔn kɔn kulogoo ki funŋɔ ni.
Fiige ki na ba bye ɲabunnɔɔ tatɛɛngɛ,
kɔnɔsogoyo takorogo.
14 Naŋayaraya ye ni sadoyo na ba yiyɛ ɲuŋɔ cirini.
Sikapee pu na ba puyɛ yiri.
Jinashɔ Liliti bɛ na ba se da ŋmɔni wà,
wu na ba taŋmɔŋɔ ta wà.
15 Wɔ na ba wu tashanga yàa wà, na zhan wà, na jiri wà,
na wu biire ti mara wuyɛ tàan.
Wà tobinyɛ yi bɛ wa da ba yiyɛ pinnɛɛ,
ka bɛɛri ni ki kariɲii.
16 Yi Tɛhɛnɛ Baa Kilɛ wo sɛmɛ wu lɔ yʼi wu kalaa. Lʼa ka wà na:
«Ke ka nigin bɛ da ba fɔ wɛ,
ka da ba ki kariɲii sha ganha wɛ.»
Bani Tɛhɛnɛ Baa Kilɛ yɛ pyaa kʼa yee jo.
Wu Munaa lʼa da ba yi pinnɛ.
17 Wuyɛ pyaa kʼa kagaanshaan li pye,
na yi bɛɛri wo tahaa kan yi mu.
Wʼa wu daanna mɛɛ li shan fiige ki na, na ki taa taa yi na.
Ki na ba bye yaha yi shi nibama wu bɛɛri wogo.
Yi na ba diin yaha wà fo gbee.