Wemu wʼa kakara ti pyi ge, wu bɛ na ba gyɛɛgi
33
Bɔɔngɔ ki wa mu wogo, mu wemu wʼa kakara ti pyi,na ta wa sanha kakara pye mu mu-i ge,
Bɔɔngɔ ki wa mu wogo, mu wemu wʼa java wu pyi,
na ta wa sanha java pye ma na-ɛ ge.
Ma ba xhɔ kakara ti na tuun wemu ni,
wee tuun wu ni mu bɛ wʼa da gyɛɛgi.
Ma ba xhɔ java wu ni tuun wemu ni,
wee tuun wu ni pʼa da mu bɛ java.
2 Ee, Tɛhɛnɛ Baa Kilɛ, ɲuŋɔ ɲaari wù na.
Mu wu ɲɛ wèe tadaŋa.
Pye wèe wo ɲisɔɔgɔ bɛɛri wo fanha ke,
mʼa bye wù shɔvɔɔ wù kanhama tuun ni.
3 Ba mu ya sɛlɛ wɛ, sipyiire ti ma baa.
Ba mu ya yìri wɛ, fiiye yatii shɛɛn pu ma jaaga.
4 Pu pɛɛn pʼa pu yaŋmuyɔ yi kuu ba kabeeŋɛ ma tɛgɛ li mɛ wɛ.
Sipyii na ba din dɔ yi na ba kabeeŋɛ ma din tɔ mɛ tɛgɛ na wɛ.
5 Tɛhɛnɛ Baa Kilɛ ya pɛlɛ! Wu nidɛɛngɛ ki wa fugba wu ni.
Wʼa Siyɔn kulo li ɲini can ni tiimɛ na.
6 Tɛhɛnɛ Baa Kilɛ wo sipyii pee,
yi na ba yi shi wu caŋa ɲɛhɛɛ ki torogo ɲaɲiŋɛ na.
Yi ɲuwuuro ti wo lobulowii li na ba bye fungɔngɔ fɛɛrɛ ni cɛmɛ.
Tɛhɛnɛ Baa Kilɛ wo ɲìi fyaara ti na ba bye yi naafuu.
Tɛhɛnɛ Baa Kilɛ na ba wu wo sipyii pu tɛgɛ
7 Li wii, naŋmaya yi wa sipyaa waa kulo li kakuuyo yi ni.
Tudunmɔɔ piimu pʼa bi kari di zhɛ ɲaɲiŋɛ sha ge,
pee wa mɛhɛɛ suu fo xuunia.
8 Korogoo ki bɛɛri niwaya yʼa kori.
Sipya ya doroo nige kofɛnhɛfɛnhɛŋɛɛ ki ni wɛ.
Kariɲɛɛgɛ ɲɔmɛɛ lʼa kyɛɛgi, kugbɔhɔɔ kʼa fanha,
sipya wa shishiin ya jateni nige wɛ.
9 Kpɔn daaŋa na fiige ki ɲɛ, ki wa na zhiin.
Liban fiige kʼa shiige, wu tiire tʼa fanhaŋa.
Sarɔn fadaaŋa kʼa ɲɛri ba siwaga ɲɛ wɛ.
Bashan fiige ke ni Karimɛli faaboboŋɔ ke,
yi tiire ti wɛrɛ tʼa wo.
10 Tɛhɛnɛ Baa Kilɛ ya jo: «Nimɛ nʼa da yìri,
nimɛ nʼa da yìri yere, nimɛ pɛɛŋɛ da ba daha nɛ na.
11 Ɲà laa na yee ya yere, yʼi ba li se ɲasigire.
Yeeyɛ pyaa wo ŋmɔgaŋa ki kafɛɛgɛ ki na ba ɲɛri na,
na yee sòrogo.
12 Fiiye yi shɛɛn pu na ba sòrogo ba lasho ɲɛ wɛ.
Pu na ba bye ba xhuyo ɲɛ wɛ,
pʼa yemu cere cere, na yi sòrogo ge.
13 Yee piimu sanha kʼa lii ge, lemu nʼa pye ge,
yi ɲuwegee shan, yʼi lee logo.
Yee piimu pʼa tɛrɛŋɛ ge, yi na wo sefɛɛrɛ ti cɛ.»
14 Jurumupyii pʼa fya Siyɔn kulo li ni,
Kilɛ ɲìi fyaara baa fɛɛ pu wa na jɛlɛ.
Pʼa yu na: «Sipya wekɛ wu wa wèe ni
wu já yere ke nagbɔhɔ ke tàan wɛ?
Sipya wekɛ wu wa wèe ni,
wu já yere kii naganɲigaa tɛhɛnɛ baa wogoo kii tàan wɛ?»
15 Sipya wemu wʼa tiimɛ koo ɲaari, na can yu,
kuduun wemu wʼa daa naŋmahara funŋɔ ni ge, na wee shege,
wʼi ya gbara wa wu yaaga taga wu ɲɔ fɔrɔgɔ wɛ,
na wu ɲuwegee tɔni,
kɔnhɔ sipya gbo gbo jomɔ ganha bu jé ki ni wɛ,
na wu ɲìi tɔni, kɔnhɔ wu ganha bu kakuunɔ ɲa-ɛ ge,
16 Weefɔɔ na ba diin fugba wu ni.
Faatabaaya yi na ba bye wu kashɛn ɲuŋɔ círi círi kasɔɔgɔ.
Yaligee na ba gaan wu mu, logbaga di wa da wu xuuŋɔ wɛ.
Zheruzalɛmu wo ɲuwuuro ti keree
17 Ma ɲii na ba saan we ni wu saana li ɲa.
Ma na ba fiige ke ni ki pɛɛrɛ ti bɛɛri ɲa.
18 Ma funŋɔ na ba do ni taatoronɔ li wo fyaara keree ki ni,
mʼa ganha na yu: «Kama kavɔɔ wu wʼa munaa pɛrɛmɛ
pu kani ge, mii wu wa wɛ?
Wemu wʼa munaa pɛrɛmɛ pu shuu ge, mii wu wa wɛ?
Wemu wʼa zangasotɔɔnyɔ yi kasɛɛgɛ pyi ge, mii wu wa wɛ?»
19 Ma da ba pii tabaara fɛɛ pii ɲa nige wɛ,
pee piimu wo shi jomɔ pu ɲɛ pu ya shɔɔnri-i ge.
Pu jomɔ pu ya fiinŋɛ wɛ, a pu ɲaha cɛmɛ bɛ di bɛn.
20 Yi Siyɔn kulo li wii, wèe wo Kilɛ koo li wo kaleŋɛɛ kulo le.
Yi ɲii taha Zheruzalɛmu na, kulo lemu ɲaha kʼa ɲiŋɛ ge.
Li fàya puga ki da ga ba gɔɔngi laha ki tasinŋɛ ni nige wɛ.
Li sikaŋaa ki da ga ba gɔɔngi nige wɛ,
li pɔ pɔ mɛɛrɛ ti da ga ba sanha nige wɛ.
21 Wà Tɛhɛnɛ Baa Kilɛ wʼa da ba wu sefɛɛrɛ ti shɛ wèe na.
Gbagbɔɔ ni dunagaya na ba bye wee xuu wu ni.
Kashɛn wo kɔrɔyɔ yi da ba doroo wà wɛ.
Kɔɔgbɔyɔ yi bɛ wa da ba yi wo ɲaagaa ki pyi wà wɛ.
22 Oo dɛ, Tɛhɛnɛ Baa Kilɛ wu ɲɛ wèe wo kiiri kɔnvɔɔ we.
Tɛhɛnɛ Baa Kilɛ wu ɲɛ wèe wo saliya wu teŋɛvɔɔ we.
Tɛhɛnɛ Baa Kilɛ wu ɲɛ wèe wo saan we, wee wʼa wèe shuu.
23 Wèe pɛɛn pu wo kɔrɔyɔ yi mɛɛrɛ tʼa sanha.
Kɔrɔyɔ yi fàya yʼa buu tiin kiimu na ge,
mɛɛrɛ ti ya já kee co wɛ.
Kɔrɔyɔ yi fàya yi ya já yìri dugi nige fugba wu ni wɛ.
Ayiwa, wèe na ba wù pɛɛn pu wo
yaŋmuyɔ niɲɛhɛyɛ loolo wùyɛ na.
Ali tɔrɔɔ nigin nigin fɛɛ bɛ pu da ba guu
ye yaŋmuyɔ ye ni.
24 Zheruzalɛmu shɛn nigin bɛ da ba jo wɛ na: «Nɛ yá.»
Kulo li shɛɛn pu wo tiibaara ti bɛɛri na ba yafa pu mu.