Saan wemu wʼa tii ge, wee wo keree
32
Li wii, saan wa na ba wu wo saanra ti pyi ni tiimɛ ni.Wu fiige ki ɲuŋɔfɛɛ pu na ganha na pu wo ɲuŋɔfɛɛrɛ ti tiini na byi.
2 Wa bɛɛri na ba bye talaraga, kafɛɛgbɔhɔ ɲaha na.
Wa bɛɛri na ba bye talaraga zangbɔhɔ ɲaha na.
Wa bɛɛri na ba bye ba dugoro ɲɛ wɛ,
lemu ya fúu waga ɲiŋɛ na ge.
Wa bɛɛri na ba bye ba faatabaaga wo ɲimɛ ɲɛ wɛ
fiige ka ni, kemu ɲɛ waga wogo ge.
3 Piimu pʼa bi yaa pʼa ɲaa ge, pee da ba bye nige fyɛnmɛɛ wɛ.
Piimu ɲuwegee kʼa nuri ge, pee na ba ɲuwegee shan.
4 Piimu ɲɛ pu ya pu funyɔ kɔɔn wɛ ge,
pee na ba pu funyɔ kɔn, na kaa cɛ.
Piimu pʼa biini na yu ge,
pee wo jomɔ pu na ba wɛri na bahala.
5 Pu da ba nahanaha pyi nige fanhafɔɔ wɛ.
Pu da ba naŋmahara fɔɔ pyi nige see fɔɔ wɛ.
6 Fungɔngɔ baa fɔɔ ma fungɔngɔ baara jomɔ yu,
na kakuuŋɔɔ kɔɔn wuyɛ funŋɔ ni.
Wu ma Tɛhɛnɛ Baa Kilɛ ɲìi fyaara baa keree pyi,
na Kilɛ mɛkyɛɛgɛrɛ jomɔ yu.
Wu ma kuugo fɔɔ kunni yaligee ni,
na waga fɔɔ kunni lɔhɔ ni.
7 Naŋmahara fɔɔ, wu kapyegee ki ma golo.
Wu ma kuumɔ keree gbegele,
kɔnhɔ wu da kanhama fɛɛ pu kyɛɛgi ni kafinɛyɛ ni,
ali na ta la baa fɛɛ pu kaɲii di ɲɛ bɛ.
8 Ga sipyisaama, kasaŋaa wo bye funŋɔ wu ma yari wuyɛ mu,
wʼa ganha na kasaaŋaa yɛ pyi.
Zheruzalɛmu cèe pu wo kiiri we ni Kilɛ wo ɲiɲaara te
9 Yee cèe, yee piimu pʼa fɛrɛ ge, yi yìri yʼi logo na ɲɔ na!
Yee pushaa, yee piimu ɲɛ funzhaga wa yee ni-i ge,
yi ɲuwegee shan ni na jomɔ pu ni!
10 Yee nigin ni cabyaa dama dama funŋɔ ni,
yee piimu pu ɲɛ funzhaga wa yee ni-i ge, yee na ba jɛlɛ.
Bani ɛrɛzɛn nilɛ wa da ba da di gɔn wɛ,
yalɔɔrɔ bɛ di wa da ba da di lɔ wɛ.
11 Yee piimu pʼa fɛrɛ ge, yʼa jɛlɛ fyaara keŋɛ ni!
Yee piimu pu ɲɛ funzhaga baa ge, yʼa jɛlɛ!
Yi foro yi fàya yi ni, yʼi bye ni ceepilegee ni,
yʼi bɔrɔyɔ fàya†a taga yiyɛ niŋɛ pɔ.
12 Yʼa yi dodoyo yi kpuun, yʼi da tataara pyi
yi kɛrɛyɛ yi wuu na yee yemu yʼa ɲɔ xuuni ge,
ni yi ɛrɛzɛn wu wuu na, wee wemu wʼa sɛ xuuni ge,
13 Yʼi da tataara pyi na shi shɛɛn pu wo ɲiŋɛ ki wuu na,
kee kemu kʼa xhuyo ni xhuyo tayaya yiige ge.
Yʼi da tataara pyi pu piyɛyɛ yi bɛ wuu na,
yee yemu yʼa ɲi fundanga mujoŋɔɔ na ge,
ni lee kulo li bɛ wuu na, lee lemu lʼa taan ge.
14 Bani saanra puga ki niwaga na ba gori.
Kulo lemu bɛɛri li ma bye tunmɔ ge, li niwaa na ba gori.
Ofɛlib wo boboŋɔ ke, ni kulo li kasɛɛgɛ tapyege
zangasotɔɔngɔ ke, yee na ba ɲɛri katahaya fo gbee.
Yi na ba bye sige kafaya taxɔnhɔŋɔ ni yapɔrɔyɔ tanahaŋa.
Tiimɛ wo kuduun wu ɲɛ ɲaŋaiŋɛ
15 Mu na lee wa da ba bye, fo Kilɛ Munaa li ba shɛ digi wù na
na yìri fugba we ni.
Wee tuun wu ni siwaga na ba ɲɛri na pye tiire tɛgɛ,
tiire tɛgɛ ma ɲɛri na pye taha.
16 Tiimɛ na ba byi siwaga ki ni,
Tiimɛ na ba byi tiire tɛgɛ ki ni.
17 Tiimɛ pu wo kuduun na ba bye ɲaɲiŋɛ.
Tiimɛ pu na ba bye ni fɛrɛmɛ, ni tifahama ni tuun bɛɛri ni.
18 Nɛ wo sipyii pu na ba diin ɲaɲiŋɛ xuu ni.
Kaa la shishiin da ga ba pu ɲɛhɛ pu tatɛɛngɛ ni wɛ,
Pu tatɛɛngɛ ki ɲaha na ba ɲiŋɛ na bye taŋmɔŋɔ.
19 Ali zanha kagereye mɛhɛ ba taha ki kyɛɛgi,
na kulo li bɛ shan fɛɛfɛɛ.
20 Yee na ba bye duba nagoo.
Lɔhɔ ɲɛ xuu wemu bɛɛri ni ge, yee na ba yemɛ nuri wà.
Yi na ba yi niiyɛ ye ni yi kafaya yi yaha yi na ɲaari yiyɛ mu.