Piimu pʼa Misira fiige ki pye pu tataŋa ge, bɔɔngɔ ki wa pee wogo
31
Piimu pʼa se Misira ni na pʼi shɛ dɛgɛ sha wà ge,bɔɔngɔ ki wa pee wogo.
Pee wa shɔnyɔ pye pu tadaŋa.
Kashɛn wotoriyo yi ɲɛhɛŋɛ ke na pʼa daa.
Shɔnduguloo pu na pʼa daa na bani pu baraga kʼa pɛlɛ.
Ga pu ya wii Izirayɛli wo Fɛfɛɛrɛ Kilɛ wu yíri wɛ.
Pu ya Tɛhɛnɛ Baa Kilɛ shaa wɛ.
2 Na ta wee di ɲɛ bɛ fungɔngɔ fɔɔ. Wu na já kanhama yaha ba.
Wu ya wu ɲɔmɛɛ ɲɛri wɛ. Wʼa yìri sipyikuuyo yi wo
puga ki fɛni, ni piimu pʼa kakuubyii pu wo dɛgɛ wu shaa ge.
3 Sipyiyawegee ki ɲɛ Misira shɛɛn, pu ɲɛ Kilɛ wɛ.
Pu shɔnyɔ yi ɲɛ ceexaara yɛ, yi ɲɛ munahaa wɛ.
Tɛhɛnɛ Baa Kilɛ ba wu keŋɛ ki sanha,
tɛgɛvɔɔ wu na do, wemu pʼa dɛri ge, wu bɛ na do.
Pu shuun wu bɛɛri na binnɛ kyɛɛgi.
Tɛhɛnɛ Baa Kilɛ yɛ wu ɲɛ Zheruzalɛmu shɔvɔɔ
4 Ayiwa, yemu Tɛhɛnɛ Baa Kilɛ ya jo ge, yee yi wa mɛ:
«Cɛnri kelee cɛnripepinŋɛ ba guuri ki yacoŋɔ kaa na,
Ali yatoonahamaa niɲɛhɛmɛɛ mɛhɛ faara pinnɛ ki fɛni,
pu mɛkaaya wa da fyaara leŋɛ ki ni wɛ.
Pu tunmɔ pu wa da ki xakili wu yirige wɛ.
Mu na Tɛhɛnɛ Baa Kilɛ, Kashɛn Keye yi Fɔɔ wu bɛ
wʼa da ba digi Siyɔn wo faaboboŋɔ ke
ni ki yaŋaboyo yi na, wu kashɛn ŋmɔ.
5 Ba shazhiga ma ki kapaya pii mɛ ki biye na wɛ,
mu na Tɛhɛnɛ Baa Kilɛ, Kashɛn Keye yi Fɔɔ
wʼa da ba wu keye yi pii na Zheruzalɛmu mara.
Wu na ba kasɛɛgɛ yaha wu na, na wu ɲuŋɔ wolo.
Wu na ba wu mara, na wu shɔ.»
6 Ayiwa, Izirayɛli nagoo, Kilɛ na yee yʼa ɲuŋɔ nari fɛɛfɛɛ ge, yi kuri pa wu mu. 7 Kee caŋa ke, yee wa bɛɛri na ba wu warifyɛn yapɛrɛɛ ni wu sanni yapɛrɛɛ wá, wʼa kiimu yàa ni wu jurumu keye yi ni ge.
8 Asiri shɛɛn na ba gbo ni ŋmɔpara ni
lemu ɲɛ sipyiyawyii wuu wɛ.
Ŋmɔpara na ba pu kyɛɛgi lemu ɲɛ sipyi yawyii wuu wɛ.
Pu na ba baa ŋmɔpara li ɲaha na,
pʼa pu lɛvɛɛ pu co na le bulooro kapyeŋɛɛ ni.
9 Fyaara niguuro na ba pu kashɛnŋmuu lowagaa wuu pu pye pʼa paa.
Pu kashɛn ɲuŋɔfɛɛ pu na ba baa na darapo wu yaha.
Tɛhɛnɛ Baa Kilɛ wʼa jo mu, wee wemu wo na kʼa ɲi Siyɔn ni,
wu kanra nagbɔhɔ kʼi ɲɛ Zheruzalɛmu ni ge.