Misira fiige ki wo dɛgɛ wu ɲɛ yaaga bɛ wɛ
30
Tɛhɛnɛ Baa Kilɛ ya jo na:«Bɔɔngɔ ki ɲɛ yee nʼa she fɛɛ pu wo jalaa pu wogo!
Yee wa keree kii wo bye funŋɔ yaha yiyɛ mu,
kiimu ya bɛ ni nɛ ɲidaan ni wɛ.
Yee wa kariɲɛɛgɛ ɲɔmɛhɛɛ luu,
na ta kee fungɔngɔ kʼi ya ta yìri nɛ yíri wɛ.
A yʼi ganha na jurumu faraa jurumu na na byi.
2 Yee wa gaaŋi Misira ni, na ta yee ya nɛ yege bɛ wɛ.
Yee wa gaaŋi di zhɛ yiyɛ kaa le Farawɔn keŋɛ ni,
na Misira wo ɲimɛ pu ni yʼa da zhɛ lara.
3 Farawɔn na yee wa daa yi talaraga ki ge,
kee na ba ɲɛri yee mu shiige.
Misira wo ɲimɛ pu yee ya pye yi talaraga ge,
kee na ba ɲuzogoro wá yee na.
4 Yee ɲahagbaa fɛɛ pʼa nɔ xɔ Tanisi kulo li ni.
Yee wo kayahamaa pʼa jé Anɛsi kulo li ni.
5 Ga shiige na ba pu bɛɛri ta we shi we keree na,
bani wʼa da já pu keree yàa wɛ.
We shi we wʼa da já pu tɛgɛ wɛ, wʼa da já pu shɔ wɛ.
Ga wu na ba shiige ni ɲuzogoro wá pu na.»
6 Kilɛ Kafila na ɲaha tii Nɛgɛvu koomɔ pu wo naŋayaaya yi na.
Pʼa pu naafuu wu tɛri kafaya na,
na pu pɛɛwa yaŋmuyɔ yi tɛri ɲɔhɔyɔ na,
na kanhama ni cɔnrɔmɔ fiige ki jii na doroo,
Cɛnrizhaa ni cɛnribee fiige ke.
Matɔnmɔɔ ni wɔlɔɔ piimu pʼa yìri kapaya na ge,
pee wo fiige ke, na kee jii na doroo,
na se na yi kaan shi wa mu, wee wemu da já ba yafiin bɛ ɲɔ pu na-ɛ ge.
7 Misira fiige ki wo dɛgɛ wu ɲɛ ɲuŋɔ baa, kaɲɔɔ ɲɛ wu na wɛ.
Lee wuu na nɛ wu mɛgɛ yiri: «Tunmɔgbɔ fɔɔ tayerege baa.a»
Kilɛ wo sipyii pʼa ɲɛri nʼa she fɛɛ
8 A Tɛhɛnɛ Baa Kilɛ di Ezayi pye:
«Nimɛ, shɛ mʼa shɛ pe jomɔ pe ka pu ɲii na kɔɔrɔ la na,
mʼa yi ka sɛmɛ wa bɛ ni.
Cabaya na, lee na ba bye sɛɛri kaa lemu na gori yaha gbee ge.
9 Bani nʼa she fɛɛ pu ɲɛ we shi we.
Kafinɛjuu pu ɲɛ pii, nɔhɔpiire ti ɲɛ tii
temu ya sɔɔ tʼa Tɛhɛnɛ Baa Kilɛ wo saliya wu nuri wɛ.
10 Piimu pʼa keree ɲaa ge, pu ma pee pyi na:
‹Yi ganha ba keree ɲaa nige da yu wù mu wɛ!›
Na yi yu Kilɛ tudunmɔɔ pu mu na:
‹Yi ganha ba Kilɛ tuduro ti wo can wu yu wù mu wɛ!
Ga yʼa kafilatan yɛ yu wù mu, yʼa laaya yɛ yu wù mu!
11 Yi kozaana li yaha, yi fiin foro koodiinɛ li tàan,
yi ganha ba Izirayɛli wo Fɛfɛɛrɛ Kilɛ wu keree yu nige wù mu wɛ.›»
12 Lee wuu na Izirayɛli wo Fɛfɛɛrɛ Kilɛ wʼa jo:
«Yee ya nɛ jomɔ pu she, na yiyɛ kan fanhaɲɛhɛŋɛ keree
ni naŋmahara mu, na yee pye yi tadaŋa.
13 Lee wuu na lee kanahana li na ba bye yee mu
ba kasɔɔtɔɔngɔ wo jama ɲɛ wɛ.
Ba kʼa ja wɛ, kʼa gbogolo, taapile ni na do.
14 Ki na ba ja, na dɔnhɔnɔ ba kuzhɔ ɲɛ wɛ.
Ali sisɛɛrɛ bɛ da ba da ki ni wa wu li taga na lɔ kpɔnhɔɔ ni,
kelee wa wu li taga lɔhɔ ko canga ni wɛ.»
Yi tiin tanugo ni, yʼi dà na na
15 Ayiwa, Tɛhɛnɛ Baa Kilɛ, wù Kafɔɔ we,
Izirayɛli wo fɛfɛɛrɛ wo we, wʼa jo na:
«Na kuri pa nɛ mu, na yiyɛ tirige, lee li da yee shɔ.
Na yi xakilee pu teŋɛ, na nɛ pye yi tadaŋa,
lee li da fanha kan yee mu. Ga yee ya ta sɔɔ lee na wɛ.
16 Yee ya jo na: ‹Bada! Shɔnyɔ na wèe wa da baa gbii!›
Cɔ! Yi na ba baa gbii kunni!
Yee ya jo na: ‹Shɔnyɔ na wèe da ba dugi, yemu tɔrɔ lʼa taan ge.›
Oo, ga yi li cɛ na yee niinɛvɛɛ pu wo
shɔnyɔ yi tɔɔyɔ na ba wɛri ye yee woyo yi na.
17 Shɛn nigin na ba kafugo le sipyii kabɔfonɔ nigin tàan, pʼa baa.
Shiin kaguro na ba kafugo le yee tàan, yee bɛɛri na baa
fo na ba yisamaa yaha ba pubiin nigin ɲɛ ma sin mɛ
faaboboŋɔ ɲuŋɔ ni wɛ, ba jirapo ma bye mɛ boboŋɔ na wɛ.»
Kilɛ wo ɲiɲaara tʼa pɛlɛ
18 Lee bɛ na Tɛhɛnɛ Baa Kilɛ wʼa yee ɲaha wii,
kɔnhɔ wu wu saama pu shɛ yi na.
Wu na ba yìri wu ɲuŋɔ ɲaari yi na, bani Tɛhɛnɛ Baa Kilɛ ya tii.
Piimu bɛɛri pʼa wu pye pu tadaŋa ge, pee ɲɛ duba nagoo.
19 Siyɔn shɛɛn, yee piimu pu wa Zheruzalɛmu ni ge,
yee da ba mɛhɛɛ suu nige wɛ.
Yi ba mɛyire wá wu mu, wu na ɲuŋɔ ɲaari yi na.
Ba wʼa yi mujuu li logo yɛ wɛ, mu wʼa yi ɲɔ shɔ.
20 Kafɔɔ na ba yalige kan yi mu yi cɔnrɔmɔ tuun ni,
na lɔhɔ kan yi mu yi kanhama tuun ni.
Wemu wʼa ma kalaa ge, wee da ga ba lara nige ma ɲaha na wɛ.
Ma ɲii li na ba daha wu na.
21 Yi bu da yʼa yaa na shɛ kanige, kelee kamɛnɛ, yi na wu mujuu li logo yi kadugo yíri na:
«Koo li le, ta se le ni.»
22 Warifyɛn wu yee yʼa ɲa taga yi jaalaa pu tɔ ge,
ni sanni wu yee ya shɔhɔ wo yi yapɛrɛɛ ki na ge,
yee na ba yee wii yaŋmunɔrɔyɔ.
Yee na ba yi wá ba yaŋmunɔrɔgɔ ɲɛ wɛ, na jo:
«Yi laha na tàan!»
23 Yi ba yara lemu nugi ɲiŋɛ ke ni,
Kafɔɔ na ba zanha shan lee na.
Shinma wemu ɲiŋɛ ki da ba gan yi mu ge,
wee na ba ɲɛhɛ, na daan.
Kee caŋa yi yapɔrɔyɔ yi tanahaŋa ki na ba sii bɛlɛ fo xuuni.
24 Niiyɛ ni kafaya yemu yʼa faa wu pyi ge,
yee na ba ɲawaara suumɔ wuuro kuri.
Pu na ba pɛlɛɛ ni ŋmahaa taga na tee caaga yi mu.
25 Gbuuro ti see see wuuro ti na ba bye caŋa kemu
yi pɛɛn pu na ge, kashɛn ɲuŋɔ círi círi kasɔrɔyɔ yi ba do,
dugorogoo niɲɛhɛŋɛɛ na ba fuu na fòro
faabobotɔɔnyɔ yi bɛɛri, ni yaŋaboyo yi bɛɛri ni.
26 Caŋa kemu Tɛhɛnɛ Baa Kilɛ da ba wu sipyii pu wo
nɔɔyɔ yi wɛrɛ pye, wu pu kpɔɔnrɔ ti wo tabanaya yi cuuŋɔ ge,
kee caŋa ke, yeŋɛ ke kpɛɛngɛ ki na ba bye
ba caŋa ke wogo ki ɲɛ wɛ.
Caŋa ki wogo ki na bɛlɛ fo na nɔ ki tɛhɛɛ gbarashuun na, ma na jo
ba cabyaa gbarashuun wo kpɛɛngɛ da ba fara kiyɛ na mɛ wɛ.
Kilɛ na ba kashɛn kɔn Asiri shɛɛn na
27 Li wii, wemu mɛgɛ ki ɲɛ Tɛhɛnɛ Baa Kilɛ ge,
wʼa ma na yìri fo taliige ni.
Kafugo ki wa wu loyire li ni, lʼa sorogi.
Wu ɲɔsɛɛyɛ yi bɛɛri yʼa ɲi loyire na,
wu ɲile li ɲɛ ba na ɲɛ wɛ, kemu ya yaara sòrogo ge.
28 Wu ɲɔ kafɛɛgɛ ki ɲɛ ba gba ɲɛ wɛ, wemu ya ɲi fo na sɛri
a wu lɔhɔ kʼi dugi fo na nɔ sipya katige na ge.
Wu na ba fiiye yatii shɛɛn pu suguri ni wu kakara tɛmɛ wu ni.
Wu na ba kɔrɔfɛ le pu ɲɔyɔ na, kɔnhɔ wu pu piinŋɛ.
29 Ayiwa yee Zheruzalɛmu shɛɛn, yee na ba ciire cɛɛ ba pu ma kalenɛ ciire cɛɛ mɛ piige ni wɛ. Fundanga na ba bye yee zɔlɔɔ pu ni, ba sipyii ɲɛ wɛ, faangaa ya wi piimu fɛni, pʼi duri na se Tɛhɛnɛ Baa Kilɛ wo faaboboŋɔ ki na ge, kee faaga kemu kʼa Izirayɛli mara ge.
30 Tɛhɛnɛ Baa Kilɛ na ba jo ni wu saanra mujuu li ni.
Wu na ba wu keŋɛ baraga wogo ki fɛ pu shɛ ni loyire nigbɔɔ ni,
ni naɲiŋɛ ni kemu kʼa sori ge, ni zanha kafɛɛgbɔɔ ni zanha kagereye.
31 Tɛhɛnɛ Baa Kilɛ wo mujuu li na ba Asiri wo jaa wu yirige.
Wu na ba Asiri kpɔn ni wu pubiin li ni.
32 Pubiin ɲìi kiimu bɛɛri Tɛhɛnɛ Baa Kilɛ wʼa da ba zhan wu na ge,
wu ba da la bɛɛri shan, taya ni gboyo mɛhɛɛ na foro.
Kilɛ yɛ pyaa kʼa da ba wu keŋɛ yirige wu fɛni, na kashɛn kɔn wu na.
33 Nagbɔhɔ ka ya gbegele kajiipoyo ya na lʼa mɔ,
Asiri wo saan wu wuu na kʼa gbegele yaha.
Wecogoŋɔ tabaaga ka kʼa gbegele,
na ni kajiipoyo niɲɛhɛyɛ yi wa ki funŋɔ ni.
Tɛhɛnɛ Baa Kilɛ wo ɲɔ kafɛɛgɛ ki na ba na le yi na
ba kirimu nagbɔhɔ ma fuu mɛ wɛ.