Bɔɔngɔ ki ɲɛ Dawuda wo kulo li wogo
29
Bɔɔngɔ ki ɲɛ Ariyɛlia, wogo, Ariyɛli, kulo lemuDawuda ya kuuri ni wu kashɛn keŋɛ ki ni ge.
Yee bɛɛri yee wa yi yee li wo Kilɛ koro kaleŋɛɛ ki pyi.
2 Lee bɛ na, nʼa da ba Ariyɛli yugi,
mɛsulo ni shiinnɛ na ba bye ma funŋɔ ni,
ma na ba bye nɛ mu ba saraya tawologo ɲɛ wɛ, (Ariyɛlib).
3 Nɛ na ba kashɛn keŋɛ sin na ma maha,
nɛ na ba shɛ kashɛn keye taga ma ɲɔ tɔ,
di taduguyo yereŋɛ ma fɛni.
4 Ma na ba dirige,
ma mujuu li na ba bye kanna ɲiŋɛ ke nɔhɔdaan lʼa fòro.
Ma jomɔ Pu na ba bye kana ɲiŋɛ puuro ti ni pʼa fòro,
pu da da fòro xuuni wɛ.
Ma mujuu li na ba fòro ɲiŋɛ ki ni ba yafugunɔ mujuu ɲɛ wɛ.
Ma jomɔ pu na ba yìri ɲiŋɛ ke ni na duri kalɔhɔrɔ ni.
5 Sipyiɲɛhɛnɛ lemu bɛɛri li wa ma pɛɛn pu ge,
pee bɛɛri na ba bye ba kafunnuŋɔ ɲɛ wɛ.
Yee sipyigagaya yi ni yi ɲɛhɛŋɛ ki ni,
yi na ba bye ba shushɔn ɲɛ wɛ,
pemu ya gaaŋi kafɛɛgɛ ni sasa na, taapile nigin ni ge,
6 Tɛhɛnɛ Baa Kilɛ,
Kashɛn Keye yi Kafɔɔ wʼa da ba yi shɔ.
Wu na ba ba ni Kilɛ-sɛlɛŋɛɛ, ni ɲiŋɛ cɛlɛŋɛ,
ni tunmɔ nigbɔ, ni kafɛnaɲile,
ni zanha kafɛɛgbɔhɔ ni naɲiŋɛ ni kemu ya kakara pyi ge.
7 Fiiye shɛɛn niɲɛhɛmɛɛ piimu pʼa kashɛn kɔɔn Ariyɛli na ge,
piimu pʼa ma di ba do wu na,
pʼi do wu maha maha kasɔrɔyɔ yi na, pʼi wu cɔnri ge,
pee bɛɛri na ba biin ba ŋmunɔgɔ ɲɛ wɛ, ba piige kashɛɛ ɲɛ wɛc.
8 Ba xuugo fɔɔ ma ŋmunɔgɔ ŋmunɔ
na wuyɛ ta wu na li wɛ, ga wu ba ɲɛ,
wʼa yacɛrɛ li ta yaaga ɲɛ li funŋɔ ni wɛ,
kelee ba waga fɔɔ ma ŋmunɔgɔ ŋmunɔ
na wuyɛ ta wu na lɔhɔ gbuu wɛ, ga wu ba ɲɛ,
wʼa wu geŋmaga ta kʼa waha, wu fanha dʼa xɔ wɛ ;
shi niɲɛhɛmɛ wemu bɛɛri wʼa kashɛn kɔɔn
Siyɔn faaboboŋɔ ki na ge, mu wee bɛɛri da ba bye.
Kilɛ wo sipyii pu ya keree ɲaha cɛni wɛ
9 Le li pye kakanhana yi mu, lʼi yi ɲaha wɔ!
Yi pye fyɛnmɛɛ, yi ganha ba ɲaa nige wɛ!
Ɲawɔhɔ ki jé yi ni, ga duvɛn wogo bɛ wɛ.
Yʼa totani, ga kafugo yagbaga kabee bɛ wɛ.
10 Bani Tɛhɛnɛ Baa Kilɛ ya ŋmunumɔ nigbɔd wá yee na,
na yee ɲìi ki tɔ, yee Kilɛ-tudunmɔɔ pee.
Wʼa fàŋa pari yee ɲahaya ni, yee keree ɲavɛɛ pee.e
11 Ayiwa, kii kashɛgɛɛ kii bɛɛri ya pye yee mu ba sɛmɛ ɲɛ wɛ, wemu ɲɔ ya koli ni keŋɛ fɛ ni ge. A pʼi wu kan sɛmɛcɛmɛ mu, na wu pye na wu wu kalaa. Ga a wu jo na wee da já wɛ, na bani sɛmɛ wu ɲɔ kʼa koli ni keŋɛ fɛ ni. 12 A pʼi shɛ wu kan sɛmɛ cɛbaama mu, na wu pye na wu wu kalaa. A wee di jo na wee ya sɛmɛ cɛ wɛ.
13 Kafɔɔ ya jo na:
«Ɲɔyɔ yɛ ni pii sipyii pii ya fuloo nɛ na,
ɲɔjomɔ yɛ ni pʼa nɛ pɛlɛ,
na ta pu zɔlɔɔ pu sanha dʼa lii nɛ na.
Temu pʼa wii pu Kilɛ ɲìi fyaara ge, tee ɲɛ yɛ
sipyii wo kalɛgɛɛ yɛ nigin, pʼa pu taanni kiimu ni ge.f
14 Lee wuu na, nɛ na ba shɛ ɲaha na di da ɲawɔɔrɔ waa
we shi we na, ni kakanhaŋaa ni kagbɔhɔɔ ni.
Fungɔnyɔ fɛɛ pu wo fungɔngɔ fɛɛrɛ ti na ba biin,
cɛmɛ fɛɛ pu wo cɛmɛ pu na ba xhɔ.»g
15 Sipyii piimu pʼa pu nibyegee ŋmɔhɔni Kafɔɔ na
na pu keree pyi womɔ ni ge, bɔɔngɔ ki ɲɛ pee wogo.
Pu ma yu na: «Jɔgɔ wʼa wèe ɲaa wɛ? Jɔgɔ wu da wèe cɛ wɛ?
16 Yee fungɔnyɔ baa fɛɛ piiri,
yee wa giin na cogo ki faanrivɔɔ ni cogo ki bɛɛri ki ɲɛ nigin.
Yaaga na já ki yaavɔɔ wu pye na wu ya ta kee yaa-i ya?»
Shɔɔ na já li faanrivɔɔ pye na wu ya yaaga cɛ-ɛ ya?h
17 Jɛɛrɛ yɛ bu bye, ta Liban fiige ki da ba ɲɛri mɛ tiire tɛgɛ,
tiire tɛgɛ ki ma ɲɛri tuu wɛ?
18 Yee caya yi na, ɲudunnɔɔ na ba sɛmɛ wu jomɔ pu logo.
Fyɛnmɛɛ na ba foro nibiige ni nibiicogoŋɔ ki ni,
pu ɲìi ki ma ganha na ɲaa.
19 Piimu pʼa puyɛ tirige ge, pee wo fundanga ki na ba se
ɲaha na Tɛhɛnɛ Baa Kilɛ gbɔɔrɔ ni.
Sipyiire ti wo la baa fɛɛ pu na ba funŋɔ taan fo xuuni
Izirayɛli wo Fɛfɛɛrɛ Kilɛ wu baraga ni.
20 Bani sipyigagaŋa ki da ba bye wà nige wɛ.
Lawuu fɛɛ pu na ba xhɔ.
Piimu pʼa sipyii pu fuunnɔ ni kakuuŋɔɔ ni ge,
pee bɛɛri na ba gyɛɛgi,
21 pee piimu pu ma kaɲɛŋɛɛ fɛɛ pu jaagi ge.
Pu ma tifuuyo shaan kiirikɔɔn pu tàan, kulo li tajege ki ni,
piimu pʼa tii ge, na jaagi kilee na zhaan pee ɲuŋɔ ni ɲuŋɔ baa.
22 Lee wuu na, Tɛhɛnɛ Baa Kilɛ wemu wʼa Ibirayima ɲuŋɔ wolo ge, yemu wee ya jo Yakuba puga ki mu ge, yee yi wa mɛ:
«Yakuba wo puga ki da ba zhiige nige wɛ,
pu ɲuŋɔ da ba sogi nige wɛ.
23 Bani pu nagoo pu ba nɛ keŋɛ ki wo
sefɛɛrɛ keree ki ɲa puyɛ niŋɛ ni tuun wemu ni,
pu na ba nɛ mɛgɛ ki pye fɛɛfɛɛ.
Pu na ba pɛɛŋɛ taha nɛ Tɛhɛnɛ Baa Kilɛ na,
Yakuba wo Fɛfɛɛrɛ Kilɛ we,
na gbɔɔrɔ tɛri Izirayɛli wo Kilɛ wu na.
24 Piimu ɲɛ fungɔnyɔ baa ge, pee na ba fungɔnyɔ ta.
Piimu pʼa kalɔhɔrɔ ti yu ge, pee na ba kalaa ta.»