Efirayimu fiige ki na ba ja
28
Bɔɔngɔ ki ɲɛ Samaria wogo!Lee kulo lemu li ɲɛ ba saanra ɲudɔnɔ ɲɛ-ɛ ge.
Li nidɛɛngɛ ki wa fadaan nijenɛ li fugba wu ni,
na ɲɛ Efirayimu wo singbaa pu wo tabaara ti kaɲuŋɔ.
Li yalere ti ɲɛ tatii wɛ fo fyɛɛnrɛ, temu ya fanhaŋa
li singbaa pu ɲuŋɔ ni ge.
2 Li wii, Kafɔɔ ya sefɔɔ,b baraga wo wa yirige,
wʼa ma ba zanha kagereye ɲɛ wɛ.
Wu ɲɛ ba kafɛɛgbɔhɔ ɲɛ wɛ, kemu ya kakara pyi ge,
wu ɲɛ ba zangbɔhɔ ɲɛ wɛ, kemu ki ma duyo yi pye yʼa ɲi fo na sɛri ge.
Wu na ba kulo li shan ɲiŋɛ na ni kafugo ni.
3 Efirayimu wo singbaa pu wo
tabaara saanra ɲudɔnɔ li kunni, li na ba dɔnhɔnɔ sipyii tɔɔyɔ ni.
4 Li yalere temu ti ɲɛ fyɛɛnrɛ nivanhara ti ge,
ni ti nidɛɛngɛ wa fadaan nijenɛ li fugba wu ni ge,
ti na ba dɔnhɔnɔ sipyii tɔɔyɔ ni.
Li na ba bye ba nitoroŋɔ ɲɛ wɛ
kemu ya wɛri lɛ na ta nitoroŋɔ lɛduun sanha nɔ-ɛ ge.
Wemu bu ki ɲa, ba wʼa ki kɔn yɛ wɛ,
taapile ni wʼa ki wá wu ɲɔ ni, na ki li.
5 Kee caŋa ke, Kashɛn keye yi Fɔɔ Tɛhɛnɛ Baa Kilɛ wo sipyii piimusamaa pu da ba gori ge, wuyɛ pyaa ki da ba bye pee wo saanra ɲudɔnɔ nɔɔrɔ wuu ni pu ɲuŋɔ yaleye yemu yʼa ɲí xuuni ge. 6 Wu na ba tiimɛ munaa kan kiirikɔɔn pu mu, kɔnhɔ pu da kiiri wu kɔɔn ni tiimɛ ni. Piimu pu ma pɛɛn pu wo kashɛn keŋɛ ki kuruŋɔ fo na shɛ nɔ pu wo tajege ki ɲɔ na ge, wu na ba nara le pee ni.
Singbaa pʼa zhɛhɛni Kilɛ tudunmɔ wu na
7 Duvɛn wa Zhuda shɛɛn piimu piinŋɛ ge,
kafugo yagbaya yʼa piimu pye pu na totani ge.
Oo dɛ, saraya ɲaha shɔɔnrivɛɛ ni Kilɛ tudunmɔɔ pee,
kafugo yagbaya yʼa pu piinŋɛ, duvɛn wʼa pu ciraŋi,
a pʼi ganha na totani kafugo yagbaya yi keŋɛ ni.
Kashɛgɛɛ kii pʼa ɲaa ge, pu ma bɛnri kee wo jogana ni,
na bɛnri pu kiiri wu bɛ kɔngaŋaa ni.
8 Pu lili tabalaa pu bɛɛri pʼa ɲi tuguro
ni pu nɔrɔmɔ keree ki na, ali tawara bɛ ɲɛ tabali wa na wɛ.
9 Pu jomɔ pu ɲɛ na:
«Jɔgɔ we Ezayi we di wa zhaa di galaa lajɛ ni wɛ?
Jɔgɔ mu wʼa giin di wu kaɲagaa ki ɲaha jo wɛ?
Pʼa nɔhɔpiire temu ɲɔ wolo jirimɛ ni nimɛ ge, pere gɛ?
Pʼa nɔhɔpiire temu laha jire na nimɛ ge, pere gɛ?
10 Yi wu jomɔ logo na: ‹Awa wa wa wa, owo wo wo wo.
Jɛri naha, jɛri wake› »
11 Ayiwa, fiiye yemu wo shi jomɔ pu ɲɛ pii ya pu nuri-i ge,
shi watii shiin wo jomɔ,
pee ni Tɛhɛnɛ Baa Kilɛ da ba jo ni pii sipyii pii ni.
12 Wee wemu wʼa bi pu pye na:
«Naha ɲɛ taŋmɔŋɔ, yi kanhama fɛɛ pu yaha pʼi ŋmɔ.
Yee wo taaŋmɔnɔ li wa nimɛ.»
Ga pu ya sɔɔ na logo wɛ.c
13 Lee wuu na, Tɛhɛnɛ Baa Kilɛ jomɔ pu na ba bye pu mu:
«Awa wa wa wa, owo wo wo wo. Jɛri naha, jɛri wà.»
Lee funŋɔ ni, pu na ba guruŋɔ,
na wá ma ɲɛri, na ba jaa na pu sɛrɛɛ kɛgi.
Pu na ba jé tifuugo ni, kʼa pu co.
Puga gunŋmii kagereŋɛ ke
14 Lee wuu na, yee piimu ɲɛ sipyii lawuuvɛɛ, na fanha ki pyi
we shi we ɲuŋɔ ni Zheruzalɛmu ni ge,
yi Tɛhɛnɛ Baa Kilɛ wo jomɔ pu logo.
15 Yee wa yu na: «Wèe ya kariɲɛɛgɛ ɲɔmɛɛ lɔ ni xu ni,
wèe ya tɔngbaara pye ni xuu kulo ni.
Ali kafɛɛgɛ yama mɛhɛ yìri na kakara pyi, pu da nɔ wèe na wɛ.
Bani wèe ya kafinɛyɛ pye wù talaraga,
na laaya pye wù taŋmɔhɔŋɔ.»
16 Lee wuu na Kafɔɔ Kilɛ Tɛhɛnɛ Baa Kilɛ wʼa jo:
«Li wii, nɛ kagereŋɛ ka sin Siyɔn ni na pye puga ɲidaa.
Nɔwuuro kagereŋɛ ki ɲɛ kii, pɛɛwa wogo,
gunŋmii li kagereŋɛ nijeŋɛ ki ɲɛ kii.
Sipya wemu bu ki pye wu tadaŋa,
weefɔɔ da ga ba ɲɛhɛ wu tatɛɛngɛ ni wɛ.*
17 Nɛ na ba can pye na wo daanna wu wo mɛɛ le,
na tiimɛ pye na kasɔrɔgɔ ki wo tii tii mɛɛ le.»
Ga kafinɛyɛ yemu yee ya pye yi talaraga ge,
zanha kagereye na ba yee fɔ lɔ.
Logbɔhɔyɔ na ba kee talaraga ki lɔ.
18 Yee ya kariɲɛɛgɛ ɲɔmɛɛ lemu lɔ ni xu ni ge, lee ma gyɛɛgi.
Yee ya tɔngbaara temu lɔ ni xuu kulo ni ge, tee ma gyɛɛgi.
Kafɛɛgɛ yama pu ba yìri na kakara ti pyi tuun wemu ni,
pu na ba yee tɔnhɔnɔ.
19 Tuun bɛɛri ni pʼa doroo ge, pu na yee co.
Bani ɲisɔɔgɔ bɛɛri pʼa da ba doroo, caŋa fara piige na.
Na kee keree kii logo yɛ, lee na ba bye fyaara kagbɔɔ.
20 Kajazinnɛgɛ ki na ba gbere doro
fo sipya da já zinnɛ wu wuyɛ sanhana ki na wɛ.
Fatɔŋɔ ki bɛ na ba jɛrɛ fo sipya da já mayɛ tɔ ni ki ni wɛ.
21 Tɛhɛnɛ Baa Kilɛ na ba yìri,
ma na jo ba wʼa bi li pye Perasimu faaboboŋɔ ki na wɛ.d
Wu na ba wu loyire li shɛ, ma na jo ba wʼa bi li pye
Gabawɔn fadaaŋa ki na wɛe,
kɔnhɔ wu wu labye wu pye,
labye wemu wu ɲɛ wu ya tee na wu pyi-i ge,
kɔnhɔ wu wu labye wu pye,
labye wemu wu ɲɛ kakanhana ge.
22 Ayiwa, nimɛ, yi lawuu wu ɲɔ yaha, kɔnhɔ yi wo pɔɔrɔ ti ganha ba fiin yi na wɛ. Bani nɛ yi logo Kafɔɔ Kilɛ, Kashɛn keye yi Fɔɔ Tɛhɛnɛ Baa Kilɛ wu ɲɔ na na ɲiŋɛ ki bɛɛri wo gyɛɛgi wa teŋɛ xɔ.
Faapye wo fungɔngɔ fɛɛrɛ te
23 Ayiwa, yi ɲuwegee shan yʼi logo na ɲɔ na.
yemu nʼa da jo ge, yi kasɛɛgɛ yaha yi na.
24 Sipya wemu wʼa faa pyi ge,
ta wu ma gori yaha na ɲiŋɛ ki suu na binnɛ yɛ?
Ta wu ma gori yaha na ɲiŋɛ ki poyo yi yɛ jii?
25 Wu bu ɲiŋɛ ki taanna xɔ,
ta wu ma shiga yalere ta wo cege wá, na ta wo cege nugi wɛ?
Ta wu ɲɛ ma shoo nugi ki yɛ,
na fenɛ li bɛ wá li yɛ,
na kalaga le na taga ki maha wɛ?
26 Wu Kilɛ wʼa wu taanni kee keree kii wo pyegana ni,
wee wʼa lee ɲaha shɛ wu na.
27 Shiga yalere cegee ya wo ni shinmasa pubiin ni wɛ,
shiga yalere ya wo ni wotori gɔrɔgɔ ni wɛ.
Ga shoo pʼa zani ni pubiin ni
na fenɛ bɛ sani ni pubiin ni.
28 Pu ma alikama tire na pye myɛ, na pee pye buuri.
Ga wa shishiin ya alikama sani gbee wɛ.
Pu ma wotori taga wu tanhana tanhana,
ga wotori wu wo yapɔrɔyɔ yi di wa da wu tanhana ja di bye myɛ wɛ.
29 Lee bɛɛri wʼa foro Tɛhɛnɛ Baa Kilɛ,
Kashɛn Keye yi Kafɔɔ wu ni.
Wʼa bi keree kiimu wo bye funŋɔ yaha wuyɛ mu ge,
ki bɛɛri ki ɲɛ kakanhaŋaa, wu fungɔngɔ fɛɛrɛ tʼa pɛlɛ.