Se ya ta suumɔ lɔhɔ yakanhaŋa ki na
27
Kee caŋa ke, Tɛhɛnɛ Baa Kilɛ na ba wu ŋmɔpara nigbɔɔ ɲɔtaan wuu li lɔ, lee lemu tɔɔrɔ tʼa waha ge ; wu na ba li lɔ yakanhaŋa ki fɛni, kee kemu ki ɲɛ Leviyatan wu ge, wɔlɛgɛ ke, kee kemu kʼa fe ge, kee wɔlɛgɛ kemu kʼa nahana nahana ge. Wu na ba kee suumɔ lɔhɔ yakanhaŋaa ki gbo.Kafɔɔ ni wu Ɛrɛzɛn tɛgɛ ki keree
2 Kee caŋa ke, yʼi ba ke yogo ke le ɛrɛzɛn tige ki na,
kee kemu ni duvɛn nidan wʼa fòro ge.
3 Nɛ Tɛhɛnɛ Baa Kilɛ yɛ pyaa ki ɲɛ ki kasɛɛgɛ pyevɔɔ.
Nɛ na ba ki lɔhɔ leni tuun bɛɛri ni.
Nɛ na ba ki kasɛri caŋa fara piige na,
kɔnhɔ yaaga ka shishiin ganha bu ki kyɛɛgi wɛ.
4 Loyire la yafiin wa nige nɛ ni wɛ.
Ga nɛ bu xhuyo ni xhuyo tahaya ta ki ni,
nɛ na kashɛn kɔn yi na, na yi bɛɛri sòrogo.
5 Fo pu bu nɛ pye pu talaraga, na ɲaɲiŋɛ sha nɛ mu,
oo dɛ, na ɲaɲiŋɛ sha nɛ mu.
Izirayɛli nagoo pu wo jurumu wu na ba yafa pu mu
6 Caya ya wa ma, Yakubab shi wu niyɛ yi na ba juri.
Izirayɛli shi wu na ba fun, na fyɛɛnrɛ pye,
wu nagoo pu na ba koŋɔ ki bɛɛri ɲi.
7 Ta Tɛhɛnɛ Baa Kilɛ ya wu sipyii pu kpɔn
pu pɛɛn pu wo kpɔngana li na?
Pu pɛɛn pu bi pu xuli gbogana lemu na ge,
ta lee gbogana li na wʼa pu gbo?
8 Ahayi! Kilɛ ya kiiri kɔn pu na,
na pu yaha kari bulooro ni taliige ni.
Mʼa pu lɔ kari ni kafugo ni ba Kilɛ-nɔhɔ kafɛɛgɛ ɲɛ wɛ,
ga ma ya ta li kasa ye wɛ.
9 Lee yafagana li na Yakuba wo tirige shɛɛn pu wo
jurumu wʼa da ba yafa wu mu.
Le li ɲɛ wu jurumu yafa wu wo kuduun we:
Pu na ba pu saraya tawoloyo yi kagereye yi bɛɛri ja ja,
na yi tɔnhɔnɔ tɔnhɔnɔ ba kɔri kagereye ɲɛ wɛ.
Sipya di wa da ga yapɛrɛzhɔ Asera wo jaa wa shishiin ɲa nige wɛ,
sipya di wa da ga wu yawurire shɔɔ la bɛ ɲa nige wɛ.
10 Kulo baraga wuu li na ba yaha li yɛ.
Li sipyii pu bɛɛri ya fo, na li niwaa yaha ba sipoŋɔ ɲɛ wɛ.
Niiyɛ na ba naha wake, na ŋmɔni wake,
na tiye wɛrɛ ti li wake.
11 Ki geye yi ba waha, pʼa ba yi kɔn,
cèe na ba ma, na na leni yi na.
Bani li sipyii pu ɲɛ fungɔnyɔ fɛɛ wɛ,
lee na pu yaavɔɔ wu da ba ɲuŋɔ ɲaari pu na wɛ,
pu davɔɔ wu da ba ɲuŋɔ ɲaari pu na wɛ.
12 Kee caŋa ke, Tɛhɛnɛ Baa Kilɛ na ba
wu wo shinmasana li ɲɔ kɔn, na lɔ Efurate gba wu ɲɔ ki na,
fo na shɛ nɔ Misira dugoro li ɲɔ na.
Wu na ba yee Izirayɛli nagoo pu fugi nigin nigin.
13 Kee caŋa ke, maga nigbɔhɔ ki na ba wi.
Piimu pʼa piin Asiri fiige ki ni ge,
ni piimu pu pʼa kɔri wá Misira fiige ki ni ge,
pee bɛɛri na ba guri ba, na ba nuguro sin
Tɛhɛnɛ Baa Kilɛ ɲaha tàan,
fɛfɛɛrɛ faaboboŋɔ ki na Zheruzalɛmu ni.