Setaara wo yocɛɛgɛ
26
Kee caŋa ke, pu na ba ke yogo ke cɛɛZhuda fiige ki ni na: «Kulo baraga wuu li ɲɛ wèe mu,
Kilɛ yɛ pyaa kʼa ɲuwuuro kan wèe mu
na pye wèe maha maha kasɔrɔgɔ
ni kashɛn ɲaha kɔn kɔn kasɔrɔgɔ.
2 Yi kulo li kuɲɔyɔ yi mugi,
shi wemu wʼa tii, na ɲɛ ɲɔmɛɛ fɔɔ ge, wee di jé.
3 Sipya wemu zɔ wʼa mara ge,
ma na ba ɲaɲiŋɛ kan weefɔɔ mu, na ɲaɲiŋɛ kan wu mu,
bani wʼa mu pye wu tadaŋa.
4 Yi Tɛhɛnɛ Baa Kilɛ pye yi tadaŋa tuun bɛɛri ni.
Bani Tɛhɛnɛ Baa Kilɛ, Tɛhɛnɛ Baa Kilɛ wu ɲɛ
faaga ke, kemu ki ɲɛ wà gbee ge.
5 Piimu wo tatɛɛngɛ ki bye faaboboyo yi na ge,
wʼa pee tirige.
Kulo lemu lʼa sin fugba lii lii wu ni ge, wʼa lee tirige,
wʼa li tirige na pa yaha ɲiŋɛ ke na, na li shan puuro ni.
6 La baa fɛɛ na ba li forogi pu tɔɔyɔ ni,
kanhama fɛɛ na ba li forogi pu tɔɔyɔ ni.»
Kilɛ shavɛɛ pu wo Kilɛ-ɲɛrɛgɛ
7 Sipya wemu wʼa tii ge,
kodiinɛ mu Kilɛ ma leni weefɔɔ tàan.
Mu wemu wʼa tii ge,
mu ma sipyitiimɛ wo koo li yàa na li taanna.
8 Na wèe yaha mu wo saliya wu wo kodoronɔ li ni,
wèe tadaŋa ki ɲɛ mu Tɛhɛnɛ Baa Kilɛ.
Lemu li ɲɛ wèe wo ɲidaan wu ge,
lee li wa mɛ na ma mɛgɛ ki pɛlɛ.
9 Piige ni nɛ ma mu la pyi xuuni,
nɛ ma mu shaa ni na zɔ wu bɛɛri ni.
Ma kiiri wu keree ki ba byi ɲiŋɛ ki sipyii pu na tuun wemu ni,
lee ma bye kaɲuŋɔ ɲiŋɛ ki sipyii pu na ɲɔ kɔn na katiigee pyi.
10 Ga, ma bu ɲuŋɔ ɲaari sipyikuuŋɔ na, ki da katiinɛ taanni wɛ.
Wʼa ganha na kuumɔ pu pyi ali sipyitiimɛɛ pu bɛ wo fiige ki ni.
Wu da ga Tɛhɛnɛ Baa Kilɛ wo bɛlɛ wu wii yaaga wɛ.
11 Tɛhɛnɛ Baa Kilɛ, mʼa keŋɛ yirige sipyikuuŋɔ fɛni
ga pu ya lee cɛ wɛ.
Ma sipyii pu kaa ya waha ma mu wahagana lemu na ge,
pu na ba lee cɛ, lee ma shiige wá pu na.
Na kemu kʼa gbegele ma pɛɛn pu kaa na ge,
kee na ba pu sorogo na pu xɔ fɛɛfɛɛ.a
12 Ɲaɲiŋɛ mu ya gaan wèe mu Tɛhɛnɛ Baa Kilɛ,
kiimu bɛɛri wèe ya byi ge, mu wʼa ki ɲɔ fani wèe mu.
13 Tɛhɛnɛ Baa Kilɛ, wù Kilɛ we,
ɲuŋɔfɛɛ piitiilee pu bi wèe mara piimu ɲɛ mu wɛ.
Ga mayɛ pyaa ki baraga ni, mu yɛ nigin wèe wa bɛlɛ.
14 Pee kunni ya xu, pu wa da ɲiifɛɛrɛ pye nige wɛ,
pʼa kari, pu wa da guri ɲɛ nige wɛ.
Bani mʼa yìri pu fɛni, na pu kyɛɛgi,
na sipyii pu funŋɔ wɔ pu na fɛɛfɛɛ.
15 Tɛhɛnɛ Baa Kilɛ, mʼa wèe shi wu pye wʼa ɲɛhɛ,
Oo dɛ, mʼa wèe shi wu pye wʼa ɲɛhɛ.
Mʼa pɛɛŋɛ taha ma mɛgɛ ki na,
na wu fiige ki kodɛhɛnɛ li nuruŋɔ, na la fara fiige ki pɛɛrɛ ti na.
16 Tɛhɛnɛ Baa Kilɛ, pʼa mu sha pu cɔnrɔmɔ pu tuun wu ni,
Tuun wemu ni mʼa bi pu karaŋa ge, pʼa ma ɲɛɛri.
17 Tɛhɛnɛ Baa Kilɛ, ba cee ma gala-gala,
na xhuulo wu laa keŋɛ ni li yiriduun ni wɛ,
mu wèe di bye mu ɲaha tàan.
18 Wèe ya yere yacɛrɛ na, na laa li yá,
ga wèe ya yaaga bɛ se kafɛɛgɛ kadugo na wɛ.
Wèe ya já fiige ki ɲuŋɔ wolo wɛ,
wèe di ya já sipyifomɔɔ se na fara ɲiŋɛ ki sipyii pu na wɛ.
Xuu pu na ba ɲɛ
19 Na shi shɛɛn pee, yee wo xuu pu na ba ɲɛ.
Nɛ wo shi wu wo sipyixuyo yi na ba ɲɛ.
Piimu pu wa ɲiŋɛ ki nɔhɔdaan ge,
yi ɲɛ foro, yʼi da fundanga ciire cee!
Bani mu Kilɛ wo mɛŋɛ ki ɲɛ ba ɲisɔɔgɔ mɛŋɛ ɲɛ wɛ,
ɲiŋɛ ki na ba xuu pu yiige.b
20 Na shi shɛɛn, yi shɛ jé yi piyɛyɛ yi ni,
yʼi gburaya yi tɔ wá yiyɛ na.
Yi shɛ lara jɛri, fo Kilɛ wo loyire li ba xhɔ.
21 Bani Tɛhɛnɛ Baa Kilɛ we, wʼa foro wu tatɛɛngɛ ki ni,
na ma di ba ɲiŋɛ ki sipyikuuyo yi wo jurumu wu foo tɔ yi mu.
Ɲiŋɛ ki na ba pee wo shishan pu shɛ kpɛɛngɛ na,
Sipyii piimu ya gbo ge, ki da ba pee ŋmɔhɔ nige wɛ.