Kafɔɔ wu ɲɛ wu ɲìi fyaara fɛɛ wo tadaŋa
25
Tɛhɛnɛ Baa Kilɛ, mu wu ɲɛ nɛ wo Kilɛ we.Nɛ na da ma sɔni, di da ma mɛgɛ ki pɛlɛ.
Bani mʼa ma kagbɔhɔɔ nizaaŋaa ki pye na ki fa.
Mʼa bi kiimu wo bye funŋɔ yaha mayɛ mu fo taatuunnɔ ni ge,
kee ya kori yaha ki siimɛ na, ki ya ɲɛri wɛ.
2 Mʼa kulo li ɲɛri pye kataha,
mʼa le kulo baraga wuu le kyɛɛgiguunɔ kyɛɛgi.
Shi watii shɛɛn pu wo fanha kugbɔɔ li ɲɛ nige kulo wɛ,
lʼi wa da ga guri zin nige bada wɛ.
3 Lee wuu na shi baraga wo wu na ba ma sɔni,
sipyigagaya yi wo kulogoo ki na ba fyagi ma ɲaha na.
4 Mʼa pye baraga baa fɔɔ wo talaraga,
mʼa pye la baa fɔɔ wo talaraga wu kanhama tuun wu ni.
Zangbɔhɔ tuun ni, ma ɲɛ tajege zanha ɲaha na,
ma ɲɛ ɲimɛ pemu ya caŋa kafugo ɲaha kɔɔn ge.
Bani sipyigagaya yi wo loyire li ɲɛ
ba zanha kafɛɛgɛ ɲɛ wɛ, kemu ya kasɔrɔgɔ sani ge.
5 Kelee ba caŋa kafugo ɲɛ wɛ,
kemu ya daraa waga ɲiŋɛ na ge.
Mʼa sipyigagaya yi wo tunmɔ pu yereŋɛ,
ba ɲahaŋa ma caŋa kafugo yereŋɛ mɛ wɛ.
mʼa sipyigagaya yi wo setaara ciire ti pye tʼa yere.
6 Kasɛhɛn Keye yi Fɔɔ Tɛhɛnɛ Baa Kilɛ wu na ba
sìnmɛ xaara wo ligbɔhɔ ka gbegele shi wu bɛɛri mu
ke faaboboŋɔ ke na, na fara duvɛn nidan bɛ na.
Sìnmɛ xaara temu ya kemɛ shɔhɔ ge,
ni duvɛn nidan wemu ya kemɛ yàa, na wu kemɛ fiinni ge.
7 Kpɔn wo fàŋa kemu kʼa fiiye yatii wo ɲahaya yi tɔ ge,
ni fatɔŋɔ kemu kʼa bi buri fiiye yatii wo ɲuyɔ yi ni ge,
Kafɔɔ, Tɛhɛnɛ Baa Kilɛ na ba
yee shɛɛngi laha wà ke faaboboŋɔ ke na.
8 Wu na ba xu ɲuŋɔ tugo fɛɛfɛɛ.
Kafɔɔ Kilɛ, Tɛhɛnɛ Baa Kilɛ na ba ɲɛsinmɛ pu bɛɛri tuu
na laha pu ɲahaya yi ni.
Wu na ba wu sipyii pu wo fanhara ti bɛɛri xɔ,
ɲiŋɛ ki kabaya yi bɛɛri na, bani Tɛhɛnɛ Baa Kilɛ wʼa jo mua.
Izirayɛli wo ɲaɲiŋɛ ni Mowabu wo bɔɔngɔ
9 Kee caŋa, pu na ba jo na: «We wu ɲɛ wèe wo Kilɛ we,
wèe ya wu pye wù tadaŋa, a wu wèe shɔ.
Tɛhɛnɛ Baa Kilɛ wèe ya pye wù tadaŋa,
wù funŋɔ taan xuuni, wù da muguri bani wʼa wù ɲuŋɔ wolo.»
10 Bani Tɛhɛnɛ Baa Kilɛ na ba wu keŋɛ taha ke faaboboŋɔ ke na.
Ga wu na ba Mowabu fiige ki tɔnhɔnɔ taapile ni,
ba pu ma ɲà forogi mɛ yafɔɔnrɔ wege ni wɛ.b
11 Na pu yaha kee wege ki ni, pu na ba pu keye yi sanha,
ba loɲama ma wu keye sanha mɛ loɲana kaa na wɛ.
Ga Kafɔɔ na ba wu tabaara ti xɔ,
na wu keye yi tifuupɛrɛyɛ yi bɛɛri kyɛɛgi.
12 Kafɔɔ na ba yee Mowabu shɛɛn wo kulo li
kashɛn ɲaha kɔn kɔn kasɔɔtɔɔnyɔ baraga woyo yi shan,
na yi ja ja, na yi bɛɛri pye puuro.