Kilɛ na ba ɲiŋɛ ki bɛɛri kyɛɛgɛ fɛɛfɛɛ
24
Li wii, Tɛhɛnɛ Baa Kilɛ na ba ɲiŋɛ ki kyɛɛgi, na ki pye tatiige.Wu na ba ɲiŋɛ ki ɲɛri buri,
na sipyiire ti bɛɛri caaga.
2 Kanunɔ na ba nɔ sipyiire ti bɛɛri na.
Ma saraya ɲaha shɔɔnrivɔɔ fara ma sipyitiimɛ na,
ma ɲuŋɔfɔɔ fara ma kapyebye na,
ma kalaanu fara ma kapyebyezhɔ na,
ma yapɛrɛmɛ fara ma shɔ-shɔ na
mu wemu mu pʼa yaŋmuyɔ cinni ge, ni mu wemu wʼa yi cinni ge,
ma foolemɛ fara ma fookɔnvɔɔ na.
3 Ɲiŋɛ ki bɛɛri na ba gyɛɛgi fɛɛfɛɛ, na ki ɲɛri tatiige.
Bani Tɛhɛnɛ Baa Kilɛ wʼa yi jo.
4 Ɲiŋɛ kʼa yamɛɛ suu, ki baraga kʼa xɔ.
Koŋɔ ki ɲaha kʼa tanha, ki yaŋmuyɔ yi bɛɛri yʼa kyɛɛgi.
Piimu pu wa ɲiŋɛ ki sipyigbɔɔ pu ge,
pee bɛ ya kyɛɛgi.
5 Ɲiŋɛ ki sipyii pʼa ki nɔhɔ, bani pʼa saliyaa pu she.
Pʼa ɲɔmɛjogoo ki fanha,
na kariɲɛɛgɛ ɲɔmɛɛ nixhɔbaana li kyɛɛgi.
6 Lee wuu na laŋi wu wa na ɲiŋɛ ki kyɛɛgi.
Ki sipyii pu bɛɛri wo tiibaara
ti wo jaagi wu na ba do pu ɲuŋɔ ni.
Lee wuu na ɲiŋɛ ki sipyii pu bɛɛri wa xhuu,
tuun watii wa nige pu ni wɛ.
7 Duvɛnfomɔ wu keree ya ɲɛri ɲatanha kaaa,
a ɛrɛzɛn tiire tʼi fanhaŋa.
Fundanga bye piimu ni ge, pee bɛɛri wa zhiin.
8 Yatinyɛ yi wo mɛtangaa kʼa yere,
piimu pʼa kaleŋɛɛ gbuu ge, a pee wo tunmɔ pʼi yere,
a kɔnɔɔ pu wo mɛtangaa ki bɛ di yere.
9 Wa ya duvɛn gbuu na ciire cɛɛ nige wɛ.
A kafugo yagbaya yʼi soro yi gbavɛɛ pu ɲuyɔ ni.
10 Kulo lʼa ja, na bye yaaga baa.
Piyɛyɛ yi bɛɛri yʼa tɔ tɔ, sipya bɛ ya jin nige yi ni wɛ.
11 Sipyiire ti wa xhuulo kakuuyo yi ni na duvɛn wʼa xuuŋɔ.
Fundanga ki bɛɛri ya xɔ, fundanga ciire mujoŋɔɔ kʼa xɔ fiige ki ni.
12 Yaaga ɲɛ nige kulo li ni wɛ, fo kataha,
kulo li tajege ki gburaya yʼa kpɔn kyɛɛgi.
13 Oo dɛ, tuun watii da ba gori sipyiire ti ni fiiye yi ni,
ni ɲiŋɛ ki na wɛ.
Ma na jo ba pu ma oliviye tige ɲahara, na ki nagoo wo wɛ,
kelee ɛrɛzɛn bu gɔn xɔ, ba pu ma wu furi mɛ wɛ.
Sipyiire tʼa Kilɛ sɔ
14 Wee tuun wu ni, piimu na ba shɔ ge,
pee na ba xhuulo fundanga keŋɛ ni,
na Tɛhɛnɛ Baa Kilɛ wo nɔɔrɔ wu wo
pɛɛŋɛ ki keree kaa caaga ni fundanga ni
na yìri caŋatomɔ kacɛ ki na na:
15 «Yʼa pɛɛŋɛ tɛri Tɛhɛnɛ Baa Kilɛ na, yee Kilɛ-nɔhɔ shɛɛn!
Tɛhɛnɛ Baa Kilɛ, Izirayɛli wo Kilɛ we,
wu mɛgɛ kʼa bɛlɛ suumɔ lɔhɔ ki niŋɛ takpiiye yi na.»
16 Piimu pu wa fo ɲiŋɛ ki tɛhɛnɛ li na ge,
wèe wa pee wo ciire mujoŋɔɔ nuri na:
«Pɛɛŋɛ kʼa dɛri tiimɛ fɔɔ Kilɛ wu na.»
Ga a nɛ jo: «Nɛ woyo yʼa xɔ! Nɛ woyo yʼa xɔ!
Bɔɔngɔ ki wa nɛ wogo!»
Java fɛɛ pʼa pu java wu ɲɔ kɔn. Java! Pu wa na pu java wu pyi.»
17 Yee piimu pu wa ɲiŋɛ ki na ge,
Fyaara niguuro, ni wecogoŋɔ, ni tifuuyo yi wa yee ɲaha na.
18 Wemu bu baa fyaara niguuro ti ɲaha na,
wee na ba do wecogoŋɔ ki ni.
Wemu bu ja foro wecogoŋɔ ki ni, wee na ba jo tifuugo ki na.
Fugba lɔhɔ ki tayahaya yi ɲɔ wa mugi,
a ɲiŋɛ ki nɔhɔshanma pʼi jɛlɛ.
19 Ɲiŋɛ kʼa ja ja.
Ɲiŋɛ kʼa shɛɛngi shɛɛngi, ɲiŋɛ kʼa cɛlɛguunɔ cɛlɛ.
20 Ɲiŋɛ kʼa totani ba singba ɲɛ wɛ,
kʼa figi na yeree ba gba ɲɛ wɛ.
Ki tiibaara ti wo tuguro tʼa pɛlɛ ki na.
Ki na ba do fo ki da já yìri nige wɛ.
Kafɔɔ Kilɛ wu da ba bye saan we Zheruzalɛmu ni
21 Kee caŋa Tɛnɛnɛ Baa Kilɛ na ba fugba wu wo kashɛn keye ye ni ɲiŋɛ ki wo saannaa pu foo tɔ pu mu. 22 Pu na ba binnɛ puyɛ ɲuŋɔ ni wege ni ba kasolemɛɛ ɲɛ mɛ wɛ. Pu na ba dɔ kaso ni. Pu bu taatuunnɔ pye, pu na ba pu wo jurumu wu foo tɔ pu mu.
23 Yeŋɛ ki na ba ɲaaŋa,
caŋa ki wa da ba kpɛɛngɛ yeege wɛ.
Kashɛn Keye yi Fɔɔ Tɛhɛnɛ Baa Kilɛ wu da ba saanra ti pyi
Zheruzalɛmu ni, Siyɔn wo faaboboŋɔ ki na.
Wu nɔɔrɔ wu na ba ɲi wu fiige ki nɔhɔlɛɛ pu ɲaha tàan.