Kawagaa kiimu na ba nɔ Zhuda wo koomɔ pu na ge
3
Wii, Kafɔɔ Kilɛ, Kashɛn Keye yi Fɔɔ Tɛhɛnɛ Baa Kilɛ na baZhuda wo koomɔ pe, ni Zheruzalɛmu shɛɛn wo tadaya yi bɛɛri, ɲuŋɔ tugo.
Wu na ba pu yaligee tadaya ye, ni pu lɔhɔ tadaya yi bɛɛri, ɲuŋɔ tugo.
2 Wu na ba naŋmaga ke ni kashɛnŋmɔ we,
ni kiiri kɔnvɔɔ we ni Kilɛ tundunmɔ we, ni celɔbye we, ni nɔhɔlɛ wu ɲuŋɔ tugo.
3 Wu na ba sipyii kɛlɛɛ kaguro (50) wo ɲuŋɔfɔɔ we ni sipyigbɔ we, ni yɛrɛ kanvɔɔ we,
ni kacɛbye kabesinnɛ fɔɔ wu ɲuŋɔ tugo, ni wemu wʼa siganma cɛ fo xuuni ge, wu na ba pee bɛɛri ɲuŋɔ tugo.
4 Nɛ na ba lɛvɛpiire kan pu mu na pye pu ɲuŋɔfɛɛ,
nɔhɔpiire na ba fanha pyi pu ɲuŋɔ ni.
5 Sipyii pu na ba yìri puyɛ fɛni. Wa bɛɛri na ba wu sipyiɲii kana.
Lɛvɔɔ na ba do nɔgɔlɛ na, sipyipopaga na ba do sipyigbɔ na.
6 Ayiwa, wa na ba wu ceborona co wu to wu puga ki ni, na jo:
«Fadegbɔhɔ wa mu mu, pye wù ɲuŋɔfɔɔ, ma da ɲuŋɔfɛɛrɛ pyi ye pukoloyo ye ɲuŋɔ ni.»
7 Weefɔɔ na ba wu ceborona wu pye kee caŋa ke na:
«Nɛ ɲɛ jɔgɔtɔri wɛ, yalige ni fadegbɔhɔ bɛ di wa na puga wɛ. Yi ganha bu na pye sipyiire ti ɲuŋɔfɔɔ wɛ.»
8 Zheruzalɛmu ya kuruŋɔ, Zhuda dʼa to xɔ. Bani pu ɲilee kee ni pu kapyegee ki wa Tɛhɛnɛ Baa Kilɛ kaala.
Pʼa nʼa she le puyɛ ni wu nɔɔrɔ wu ɲaha tàan.
9 Pu ɲawii li yahagana wa sɛɛri keree yu pu fɛni.
Pʼa pu wo jurumu wu shɛɛ kpɛɛngɛ na
ba Sodɔmu shɛɛn ɲɛ wɛ, pu ya wu ŋmɔhɔni wɛ.
Bɔɔngɔ ki ɲɛ pu wogo, bani kapegee pu wa gbegele puyɛ kaa na.
10 Yʼa yi yu na: «Sipyitiimɛ na ba fɛrɛmɛ ta
bani, wu na ba wu kapyegee nizaaŋaa ki kuduun ta.
11 Bɔɔngɔ ki ɲɛ sipyikuuŋɔ wogo. Kapii li da ba wu ta.
Wuyɛ pyaa ki keye ya lemu pye ge, lee ninunɔ li da ba bye wu bɛ na.»
12 Piimu pʼa nɛ sipyii pu ɲaani ge, nɔhɔpiire ti ɲɛ tii.
Cèe pu wa fanha ki na nɛ sipyii pu ɲuŋɔ ni. Na sipyii,
piimu pʼa yee ɲaha co ge, pʼa yee piinŋɛ. Pu wa na yee sanha liigi yi kozhɛɛ li na.
Kilɛ na ba kiiri kɔn ɲahagbaa fɛɛ pu na
13 Tɛhɛnɛ Baa Kilɛ ya gbegele xɔ kiiri wu kaa na.
Wʼa yìri xɔ, kɔnhɔ wu kiiri kɔn sipyiire ti na.
14 Tɛhɛnɛ Baa Kilɛ ya kiiri kɔɔn
wu sipyii pu wo nɔhɔlɛɛ pee ni pu ɲuŋɔfɛɛ pu na na:
«Yee pʼa ɛrɛzɛn tiire kɛrɛyɛ yi kyɛɛgi.
Funmɔ fɛɛ pu wo keŋɛ yaŋmuyɔ
yemu yee ya shɔ pu na ge, yee yʼa yee piyɛyɛ yi ɲi.
15 Ɲaha na yʼi na sipyii pu tɔɔri wɛ,
na na funmɔ fɛɛ pu ɲaani wɛ?»
Kafɔɔ Kilɛ, Kashɛn Keye yi Fɔɔ Tɛhɛnɛ Baa Kilɛ wʼa jo mu.
Lemu na ba nɔ Zheruzalɛmu gbagashaa pu na ge
16 Tɛhɛnɛ Baa Kilɛ ya jo:
«Bani Siyɔn gbagashaa pʼa puyɛ pɛlɛ.
Pu ba ɲaari, pʼa pu katiye yi sanha.
Pʼa sipyii wii na waa puyɛ na ni pu wiigana li ni,
na pushaga ɲara ɲaari, na pu tɔɔyɔ yi wo wiiŋɛɛ ki tinni.
17 Kafɔɔ na ba Siyɔn gbagashaa pu ɲuyɔ yi pye ɲuŋmaya.
Tɛhɛnɛ Baa Kilɛ na ba pu gbahaa ki yiige kpɛɛngɛ na.»
18 Kee caŋa ke, Kafɔɔ na ba pu pushaga yalere ti bɛɛri wolo pu na: tɔɔyɔ tɔɔrɔ te ni ɲuŋɔ yaleye ye ni pu katiye yi wo kuun we, 19 ni pu fegemɛɛ pee ni pu kaŋmegee kee, ni fàya ye pʼa dagaa na pu ɲahaya yi tɔni ge, 20 ni pu ɲubɔhɔɔ nizaaŋaa kee, ni pu tɔɔyɔ yi wo ɲɔhɔrɔ te ni, pu kiriye ye, ni nudanga sìnmɛ gbogoo kee, ni pu zeelee pee, 21 ni pu kabeleŋɛɛ kee, ni pu munatuuŋɔɔ kee, 22 ni pu kaleŋɛɛ wo fazaaya ye, ni pu fadegbɔyɔ ye, ni pu kapadahaya ye, ni pu wari yaleye ye, 23 ni pu jaawiiye ye, ni pu fadepilɛpilɛgɛɛ kee, ni pu ɲumigiŋɛɛ kee, ni pu kapadahaya ye.
24 Yafɔnhɔ nugo na ba nudanga ki faa.
Mɛɛrɛ na ba kiriye yi faa.
Ɲumuuyo na ba ɲubɔyɔ yi faa.
bɔrɔyɔ fàya†a na ba fazaaya yi faa.
Ŋmaɲiga wo fɛ pu na ba saana li faa.
Zheruzalɛmu cèe pu na ba ɲɛri naxhugoshaa
25 Siyɔn kulo le, ŋmɔpara na ba ma namaa pu gbo.
Ma kashɛn naŋmaya yi na ba gori kashɛn ni.
26 Kulo li sipyii pu bɛɛri na ba gɔnhɔri na yamɛhɛɛ suu.
Pu yaaga baa wuu na ba diin ɲiŋɛ na.