Ezayi 4

Ke caŋa ke na, cèe gbarashuun na ba na nigin co na jo:

«Wù na ba wùyɛ pyaa wo yalige li, na wùyɛ pyaa wo fàya leni,

ga sɔɔ yɛ wù da yiri ma mɛgɛ na, mʼa shiige laha wù ɲuŋɔ ni.»

Kilɛ na ba Izirayɛli nagoo pusamaa ɲuŋɔ wolo

2 Kee caŋa ke na, Tɛhɛnɛ Baa Kilɛ wo fige kemu na ba fin voro ge, kee na bye saama ni nɔɔrɔ. Fiige ki yasɛyɛ bɛ na ba bye fɛrɛmɛ ni gbɔɔrɔ Izirayɛli nagoo pusamaa mu, pee piimu pʼa kori ge. 3 Kee caŋa ke, sipyii piimu na ba gori Siyɔn ni ge, wee Siyɔ wemu wu ɲɛ Zheruzalɛmu ge, pee na ba yiri fɛfɛɛrɛ sipyii, pee piimu bɛɛri wo mɛyɛ yi da ba ga ɲiifɛɛrɛ ti kaa na Zheruzalɛmu ni ge. 4 Kafɔɔ ga ba Siyɔn gbagashaa pu wo fɔɔnrɔ ti je laha pu na, na Zheruzalɛmu bɛ wo gbuuro ti wo shishan pu je laha wu na ni wu tiimɛ kiiri we, ni wu na kafɛɛgɛ kakara wogo ki ni tuun wemu ni, 5 wee tuun wu ni Tɛhɛnɛ Baa Kilɛ da ba ɲahaŋa ni wurege pye Siyɔ faaboboŋɔ ki bɛɛri, ni ki sipyii pu ɲuŋɔ ni caŋa ni, na naɲiŋɛ wo kpɛɛngɛ yeege piige ni. Bani wu nɔɔrɔ wu na ba ɲaa yaŋmuyɔ yi bɛɛri ɲuɲɔ na. 6 Wu na ba bye ba bugi ɲɛ wɛ, na ɲimɛ kaan caŋa ni, kafuyo tuun ni, na bye taŋmɔhɔŋɔ ni tajege zanha kafɛɛgɛ ni zanha bɛ ɲaha na.