Tɛhɛnɛ Baa Kilɛ wo ɛrɛzɛn kɛrɛgɛ ke
5
Yi yere dɛ, di yogo cɛɛ na naɲii mu,na naɲii wo yogo, wu ɛrɛzɛn kɛrɛgɛ ki shizhaa na.
Ɛrɛzɛn kɛrɛgɛ ka bye nɛ naɲii wu mu.
Yaŋaboŋɔ ka wo tigitigimɛ ni
ki bye taceŋɛ ka ni.
2 Wʼa bi ɲiŋɛ ki yàa, na yaŋa kagereye yi lɔ laha wà,
na ɛrɛzɛn tiye nijeye ya nɔri wà.
A wu putɔɔngɔ ka yereŋɛ ki niŋɛ ni shazhɔn wu kaa na,
na ɛrɛzɛn lɔhɔ tawologo ka tugi wà.
Wu bi daa na wu ɛrɛzɛn kɛrɛgɛ ki na ba nagoo nizaama pye,
ga a kʼi ɛrɛzɛn nagoo niguumɔɔ pye.
3 Ayiwa nimɛ, Zheruzalɛmu shɛɛn ni Zhuda shɛɛn,
na yi ɲɛɛri jo yi kiiri kɔn na ni na ɛrɛzɛn kɛrɛgɛ ki tɛ ni.
4 Lekɛ li dʼa fɔ, nɛ ya lemu pye na ɛrɛzɛn kɛrɛgɛ ki mu-i wɛ?
Ɛrɛzɛn nizaama ɲaha nɛ bi wii ki mu.
Ɲaha na ki dʼa ɛrɛzɛn niguumɔ pye wɛ?
5 Ayiwa nimɛ, lemu nʼa da bye na ɛrɛzɛn kɛrɛgɛ ki na ge, nʼa da lee shɛ yi na.
Nɛ na ba ki kamahaŋa ki lɔ laha wà, kɔnhɔ yatɔɔyɔ di ki li.
Nɛ na ba kasɔɔgɔ kamahaŋa ki shan,
kɔnhɔ pʼi tɔɔyɔ taga ki forogi.
6 Nɛ na ba ki kyɛɛgi, Ki geye yi da ba yiile wɛ, ki nɔhɔ bɛ da ba yari wɛ.
Xhuyo tiye, ni xhuyo tahaya na ba foro ki ni. Nɛ na ba jo ni ɲahaya yi ni,
kɔnhɔ yi ganha bu zanha shan ki na nige wɛ.
7 Ayiwa, Kashɛn Keye yi Fɔɔ Tɛhɛnɛ Baa Kilɛ
wo ɛrɛzɛn kɛrɛgɛ ki ɲɛ Izirayɛli wo puga ke.
Zhuda wo sipyii pu pʼa pye
wu wo ɛrɛzɛn tige ke, kemu kʼa dan wu ni fo xuuni ge.
Wu bi daa na pu na ba tiimɛ koo ɲaari,
ga li wii, sipyii shishanwonɔ.
Wu bi tifire ɲaha wii,
ga sipyii piimu pʼa ɲaani ge, pee wo mɛhɛɛ yɛ kʼa fòro.
Keree kiimu kʼa bɔɔngɔ nɔni sipya na ge
8 Bɔɔngɔ ki ɲɛ yee wogo,
yee piimu pʼa piyɛyɛ faraa piyɛyɛ na,
na kɛrɛyɛ faraa kɛrɛyɛ na,
fo na shɛ tɛyɛ yi bɛɛri lɔ ge.
A yee yɛ nigin di bye ni tatɛɛngɛ ni fiige ki ni.
9 Pe jomɔ pe Kashɛn Keye yi Fɔɔ Tɛhɛnɛ Baa Kilɛ ya jo nɛ mu, ni kaaga ni na:
«Nakaara baa ye puɲɛhɛyɛ ye na ba gyɛɛgi,
ye pugbɔyɔ nizaaya ye na ba bye sipyii baa.
10 Bani etaaraa taanri ɛrɛzɛn kɛrɛgɛ na ba ɛrɛzɛn litiree kɛlɛɛ sishɛɛrɛ (40) yɛ kan.
Kilo xhuu nigin (100) nuguzhi na ba kilo kɛ yɛ kan.»
11 Bɔɔngɔ ki ɲɛ yee wogo,
yee piimu pu ma sɔɔ yìri na shɛ kafugo yagbaya shaa,
na mɔni ɲìi na piige ni gba fɛni
fo na kafugo leni yiyɛ ni ni duvɛn ni ge.
12 Konɔyɔ ni gboyo ni taya pu ma gbɔɔn,
na sibeŋɛɛ wi pu duvɛn wu tagbaya yi ni, na fundanga pyi.
Ga pʼi da kasɛɛgɛ yaha Tɛhɛnɛ Baa Kilɛ wo nibyii li ni wɛ,
Wu keŋɛ kʼa lemu pye ge, pu ya lee ɲaa wɛ.
13 Lee wuu na, pu na ba nɛ wo sipyii pu kuu na kari bulooro na,
bani pu ya nɛ cɛ wɛ.
Xuugo na ba pu sipyigbɔɔ pu gbo,
waga na fiige ki funŋɔ sipyiire ti kanha.
14 Lee wuu na yaŋa kanha da ba ki tajege ki ɲɔ ki pɛlɛ,
ki na ba ki ɲɔ ki mugi tɛhɛnɛ baa.
Ayiwa, kulo li sipyigbɔɔ, ni sipyiire tisara,
ni pu fundanga keree ki bɛɛri na ba digi wà.
15 Sipyiyawyii ɲuŋɔ na ba sogi, sipya na ba dirige.
Piimu pʼa puyɛ pɛlɛ ge, pee ɲuyɔ na ba guri.
16 Gbɔɔrɔ na ba daha Kashɛn Keye yi Fɔɔ
Tɛhɛnɛ Baa Kilɛ na wu wo can wu wuu na.
Fɛfɛɛrɛ Kilɛ wu na ba wu wo fɛfɛɛrɛ ti shɛ
wu wo tiimɛ pu cɛ fɛni.
17 Dubyaa na ba ɲà li wà ba pu tanahaŋa ɲɛ wɛ,
Dubyapɔrɔyɔ na ba li wà yee pukoloyo yi ni.
18 Bɔɔngɔ ki ɲɛ yee wogo,
yee piimu pʼa kafinɛyɛ pye mɛɛrɛ na daga na tiibaara kilee,
na jurumu kilee ba wotori ɲɛ-ɛ ge.
19 Yee piimu pʼa yu na: «Kilɛ wu tɔɔyɔ lɔ,
Wu fyaala wu wo nibyii li pye, kɔnhɔ wù li ɲa.
Izirayɛli wo Fɛfɛɛrɛ Kilɛ wʼa keree kiimu ɲɔ wolo ge,
na ki fa foro, kɔnhɔ wù li cɛ.»
20 Bɔɔngɔ ki ɲɛ yee wogo,
yee piimu pʼa kakuuŋɔɔ pyi nizaaŋaa,
na kasaaŋaa pyi niguuŋɔɔ ge.
Yee piimu pʼa nibiige pyi kpɛɛngɛ,
na kpɛɛngɛ pyi nibiige ge.
Yee piimu pʼa yatanga pyi yasorogo,
na yasorogo pyi yatanga ge.
21 Bɔɔngɔ ki ɲɛ yee wogo,
yee piimu pʼa yiyɛ wii fungɔnyɔ fɛɛ,
na yiyɛ wii kaɲahacɛmɛɛ ge.
22 Bɔɔngɔ ki ɲɛ yee wogo,
yee piimu pu ɲɛ ŋmanaa duvɛn gbaa ni ge,
yee piimu pu ɲɛ ŋmanaa
kafugo yagbaya yi tuuyo yi wo surigaŋaa ki ni ge.
23 Yee ya can kaan nahama fɛɛ mu,
bani pu ma yee ɲɔyɔ fɔrɔgɔ,
yee ma ganha na kaɲɛŋɛɛ fɛɛ pu wo kaɲɛŋɛɛ ki shuu pu na.
24 Lee wuu na, ba na ya waha sòrogo wɛ,
ba naɲiŋɛ ya ɲawaya sòrogo wɛ,
mu na yee wo niyɛ yi da ba fɔnhɔ.
Yee wo fyɛɛnrɛ ti na ba gari kafɛɛgɛ na ba kafunnuŋɔ ɲɛ wɛ.
Bani yee ya she Kashɛn Keye yi Fɔɔ Tɛhɛnɛ Baa Kilɛ wo saliya wu ni.
Yee ya Izirayɛli wo Fɛfɛɛrɛ Kilɛ wu wo jomɔ pu fanha.
Kilɛ wo loyire le
25 Lee na, Tɛhɛnɛ Baa Kilɛ luu ya yiri wu sipyii pu tàan.
Wʼa wu keŋɛ ki yirige pu fɛni, na pu kpɔn.
Faaboboyo yʼa jɛlɛ.
Sipyixuyo yi ɲɛ kakuuyo yi ni ba gara ɲɛ wɛ.
Lee bɛ na, wu luu sanha ɲiŋɛ wɛ,
wu keŋɛ ki wa yirige yaha sanha.
26 Kafɔɔ na ba darapo nɔri taliige wo shi shɛɛn pu mu.
Wʼa siwii taga pu yiri na yìri ɲiŋɛ ki tɛhɛnɛ li na,
Pu piiri, na fyaala na ma, tɔvuyo na.
27 Wa shishiin da ba ganha pu ni wɛ,
wa shishiin da ba guruŋɔ wɛ.
Wa shishiin ya ŋmunɔ wɛ, ali ŋmunɔrɔ bɛ ya wa shɔ wɛ.
Wa shishiin wo kirige ya sanha laha wu sɛrɛɛ na wɛ,
wa shishiin wo tanhaya mɛɛrɛ bɛ di ya kɔn wɛ.
28 Pu ŋmaya yi ɲɔyɔ wa firigi,
Pu sindaaya yi bɛɛri bɛ dʼa durugo yaha.
Pu shɔnyɔ yi fereye yi ɲɛ ba faakagereye ɲɛ wɛ,
pu kashɛn wotoriyo yi gɔrɔyɔ yi tɔrɔ ya wɛri ba kafɛnaɲile ɲɛ wɛ.
29 Pu mɛɛ ɲɛ ba cɛnrizhɔ wuu ɲɛ wɛ,
pʼa guuri ba cɛnripepinyɛ ɲɛ wɛ.
Pu ma guuri, na pu xaara co na gaaŋi,
wa shishiin da da wu ti shɔ wɛ.
30 Kee caŋa ke, pu na ba din ke fiige ke na
ba suumɔ lɔhɔ ya dinni wɛ.
Ma bu fiige ki wii, mʼa ki ta nibiige ni ɲakpaan.
Ɲahaya yi na ba kpɛɛngɛ ki tɔ, na ki ɲɛri nibiige.