Kilɛ ya Ezayi yiri
6
Saannaa Oziyasia ya xu yee lemu ge, nɛ Kafɔɔ ɲa wʼa tiin saanra koo la na lemu ya tuun xuuni ge. Wu fadeŋɛ ki ɲɔwaŋa ki bi Kilɛ Pɛɛŋɛ pugbɔhɔ ki ɲi. 2 Mɛlɛkɛ piimu pʼa byi Serafɛɛn ge, pee paa niyereye yi bye wu ɲuɲɔ na. Wa bɛɛri ɲɛ ni kapaya gbaara ni: Kapaya shuun shuun wu bi taga pu ɲahaya yi tɔ tɔ, na shuun shuun wa taga tɔɔyɔ ye tɔ tɔ, pʼi yìri ni shuun shuun wusamaa ni. 3 Pee Serafɛɛn pu bi yi yu puyɛ mu na:«Kashɛn Keye yi Fɔɔ Tɛhɛnɛ Baa Kilɛ ɲɛ Fɛfɛɛrɛ wo, Fɛfɛɛrɛ wo, Fɛfɛɛrɛ wo.
Ɲiŋɛ ki bɛɛri ya ɲi wu nɔɔrɔ wu na.»
4 A Kilɛ-Pɛɛgɛ pugbɔhɔ ki kuɲɔyɔ yi nɔhɔshanma pʼi jɛlɛ lee mujuu li na, a ki bɛɛri di ɲi wurege na. 5 Ayiwa a nɛ jo: «Bɔɔngɔ ki ɲɛ nɛ wogo! Nʼa kori! Bani nɛ ɲɛ sipya wemu ɲɔsɛɛyɛ yʼa nɔhɔ ge. Nɛ tiin sipyii tɛ ni piimu bɛ wo ɲɔsɛɛyɛ yʼa nɔhɔ ge, a nɛ ɲìi kʼi dɛrɛɛ Saan wu ɲa, Kashɛn Keye yi Fɔɔ Tɛhɛnɛ Baa Kilɛ we.»
6 Ga a Serafɛn wa di sharaya taga nagaan la lɔ saraya yi tawologo ki ni, na yìri pa nɛ mu ni lee ni wu keŋɛ ni. 7 A wu ba lee kpɔn nɛ ɲɔ ki na na jo:
«Le lʼa kpɔn ma ɲɔsɛɛyɛ yi na ge,
ma nahama pʼa lɔ laha ma ɲuŋɔ ni, ma jurumu wʼa yafa ma mu».
8 Lee kadugo na a nɛ Kafɔɔ mujuu logo wu na yu na: «Nɛ ma jɔgɔ tun wɛ? Jɔgɔ wu da ba shɛ wèe wo tuduro ti na wɛ?» A nɛ wu pye: «Nɛ we, nɛ tun.»
9 Ayiwa a wu nɛ pye:
«Shɛ, mʼa shɛ yi jo pii sipyii pii mu na:
‹Yee na ba yi logo, na logo, ga yʼi wa da ba yi ɲaha cɛ wɛ!
Yee na ba wii, na wii, ga yʼi wa da yaaga bɛ ɲa wɛ.›b
10 Pii sipyii pii ɲuwegee waha,
mʼa pu ɲuwegee ki tɔ, mʼa pu ɲìi ki fyɛn,
kɔnhɔ pu ganha ba ɲaa pu ɲìi ki nɛ wɛ,
pu ganha ba nuri pu ɲuwegee ki ni wɛ,
pu fungɔnyɔ yi ganha ba keree ɲaha cɛni wɛ,
kɔnhɔ pu ganha bu guri ba nɛ Kilɛ mu, pʼi juuŋɔ wɛ.»
11 A nɛ jo: «Lee na ba bye yaha mu
fo tuun wekɛ ni wɛ Kafɔɔ?» A wu nɛ pye:
«Fo na shɛ kulogoo ki pye kʼa kyɛɛgi xɔ, na bye sipyii baa.
Fo na shɛ piyɛyɛ yi pye sipyii baa.
Fo na shɛ pu ɲiŋɛ ki pye kʼa kyɛɛgi, na ɲɛri tawaga.
12 Fo Tɛhɛnɛ Baa Kilɛ ga ba sipyii pu sanha lii fiige ki na,
na fiige ki kabaya niɲɛhɛyɛ ɲɛri tawaya.
13 Ali fiige ki sipyii pu taaga kɛ wogo bɛ mɛhɛ gori ki funŋɔ ni,
na na ba pee ɲuŋɔ tugo.
Ga ba pu ma terebɛnti tige ni shɛni tige kɔn
yi ɲuyɔ yi na gori yaha mɛ nibiriye ɲiŋɛ ki ni wɛ,
mu na kee tiɲuŋɔ ke ɲɛ fɛfɛɛrɛ shi wu wo tirige shɛɛn pee.»