سنتون را ڪوم 26

پولُوس رو اَگرپا نَي آپرَي بارَي ۾ ݾُڻاوڻ

اَگرپا بادشاھ پولُوس نَي ڪھيو ڪہ، ”ٿنَي موڪل ھَي ڪہ تُو آپرَي بارَي ۾ ڪئين ݾُڻا۔“ اِيئي تي پولُوس ھاٿ رو اِشارو ڪيئو ھانَ آپرَي بچا ۾ اِيئون ڪيوَڻ لاگو ڪہ، ‏2 ”اي اَگرپا بادشاھ، ھُون آپنَي تموم گھڻو ڀاگ آݪو ݾمجھون ھون ڪہ آج ٿونرَي ݾومھو اُوئون ݾجَي باتون رَي بارَي ۾ بݪتِي ڏي ݾگھون ھون، جڪَي رو ڏوھ مھَي تي يھُوديون لگايو ھَي۔ ‏3 ٿونَي تو يھُوديون رَي ݾجَي ريتون رواجون ھانَ مسئلون رَي بارَي ۾ ݾُٺَي نمُونَي خبر ھَي۔ اِيئي رَي ڪري ھُون ٿونَي مِنٿ ڪرون ھون ڪہ مھارِي بات ڌھيون ڏي ݾُڻيا۔ ‏4 ݾجَي يھُوديون نَي خبر ھَي ڪہ ھُون جوانِي ݾون لي آپرِي زندگِي ۾، آپرَي مُلڪ ھانَ يروشلم شھر ۾ ڪيڪر رھيو۔ ‏5 او شرُوع ݾون مھنَي اوݪکَي ھَي ھانَ جي اُوئون رِي مرضِي ھَي، تو او اِيئي بات رِي گواھِي ڏي ݾگھَي ھَي ڪہ ھُون آپرَي ڌرم رَي ݾجون ݾون پڪَي ھانَ سخت فريسي پَنٿ رَي قانُون تي بيتو آيو ھون۔ ‏6 پڻ مھَي تي ھمَي رُگو اِيئي رَي ڪري ڪيس بَي پڙيو ڪہ ھُون ايشوَر رَي اُوئي واعدَي رِي اُميد راکون ھون، جڪو اُوئي مھورَي ٻاپ ڏاڏون ݾون ڪيئو ھتو۔ ‏7 اَي او واعدو ھَي، جڪَي نَي پُورو ھوئڻ رِي اُميد آپڻَي يھُودي قوم رَي ٻارھون قبيلون نَي ھَي ھانَ او پُورَي من ݾون ڏِن رات ايشوَر رِي ڀگتي ڪرتا رَي ھَي۔ اي بادشاھ، اِيئي اُميد رَي ڪري، يھُودي مھَي تي الزوم ھڻَي پڙيا۔ ‏8 ٿي ݾجائِي مِنک جڪو ايٿ ھو، اَي بات ڪيئون ڪونھي منتا ڪہ ايشوَر مِنکون نَي مُوئوڙون ݾون ڀڙي جيتا ڪري ݾگھَي ھَي؟ ‏9 ھيڪ اھڙو ٽيم ڀِي ھتو، جڏي ھُون يسُوع ناصرِي رَي نون رِي ھر نمُونَي گِلا ڪرڻ آپرو فرض ݾمجھتو۔ ‏10 اِيئي رَي ڪري مھَي يروشلم ۾، ايشوَر رَي موٽَي پُوجاريون رِي موڪل ݾون تموم گھڻا وِشواسي قيد ڪرايا۔ جڏي اُوئون نَي ٺُپ مارڻ رِي سزا ڏينِي جاوتِي، تو ھُون ڀِي اَي صلاح ڏيتو۔ ‏11 اُوئي ݾون ٽاݪ مھَي ݾجَي ڀگتي گھرون ۾ تموم گھڻا گُھمرا اُوئون نَي سزا ڏيرائِي ھانَ اُوئون نَي مجبُور ڪيئا ڪہ او پرڀُو يسُوع رَي خلاف بات ڪرَي۔ مھنَي اُوئون تي اترِي تو ريݾ آوتِي ڪہ ھُون ٻيجَي شھرون ۾ ڀِي جائي اُوئون نَي تنگ ڪرتو۔“

پولُوس رو وِشواس

(سنتون را ڪوم 9‏:1‏-19، 22‏:6‏-16)

‏12 پَڇي پولُوس ڪھيو ڪہ،”ھيڪ گُھمرو ھُون ايشوَر رَي موٽَي پُوجاريون ݾون اِختيار ھانَ موڪل رو خط لي دمشق شھر ڏيݾا جاوتو پڙيو، ‏13 تو اي بادشاھ، مھَي ٻيپار رَي ٽيم مارگ ۾ ݾُورج ݾون ڀِي وڌيڪ تيز اُجاݪو ڏيٺو، جڪو آڪاش ݾون آيو ھانَ او مھارَي ھانَ مھارَي ساٿيون رَي چوڌاري چمڪيو۔ ‏14 مھي ݾجائِي ڌرتي تي کِريا ھانَ مھَي عبراني ٻولِي ۾ ھيڪ آواز ݾُڻيو ڪہ، ’سائُول، اي سائُول، تُو مھنَي ڪيئون تنگ ڪرَي ھَي؟ اِيئون ڪرڻ ݾون ٿارو آپرو نُقصون ھوشَي۔‘ ‏15 مھَي پُوڇو ڪہ، ’پرڀُو، تُو ڪُڻ ھَي؟‘ پرڀُو يسُوع ڪھيو ڪہ، ’ھُون يسُوع ھون، جڪَي نَي تُو تنگ ڪرَي ھَي۔ ‏16 پڻ ھمَي تُو اُٺي اُڀ، ڪيونڪہ مھَي ٿنَي اِيئي رَي ڪري درشن ڏينو ھَي ڪہ ٿنَي آپرِي شيوا رَي ݾارُو راکون ڪہ ٿَي جڪو ڪئين آج مھارَي بارَي ۾ ڏيٺو ھانَ جڪو ڪئين ھُون ٿنَي بتائين، تُو اُوئون باتون رِي گواھِي مِنکون ۾ ڏَي۔ ‏17 ھُون ٿنَي يھُوديون ھانَ ٻيجَي قومون ݾون، جڪون ڪڍي ھُون ٿنَي ميلڻ آݪو ھون، ٿنَي بچاوتو رئين۔ ‏18 ٿنَي اُوئون رَي اونکَي کولڻَي ھَي ھانَ اُوئون نَي انڌارَي ݾون ڪاڍي اُجاݪَي ڏيݾا ھانَ شيطون رَي ھاٿون ݾون ڇوڙائي ايشوَر ڏيݾا لي آوڻا ھَي۔ اِيئي نمُونَي مھَي تي وِشواس راکڻ ݾون اُوئون را پاپ معاف ھوشَي ھانَ او ايشوَر رَي چُونڊيوڙَي مِنکون ڀيڙا مِلي جاشَي۔‘ ‏19 اي اَگرپا بادشاھ، اِيئي رَي ڪري مھَي پُورَي من ݾون آڪاش ݾون درشن ڏيوَڻ آݪَي رِي بات منِي۔ ‏20 مھَي پيل دمشق شھر رَي مِنکون نَي، پَڇي يروشلم شھر ھانَ ݾجَي يھُوديا علائقَي ۾ ريوَڻ آݪون نَي ھانَ پَڇي ٻيجَي قومون نَي جائي ݾُڻايو ڪہ، ’توبھون ڪرو ھانَ آپرا من ايشوَر ݾون لگائو ھانَ اھڙا ڪوم ڪر،و جڪَي ݾون خبر پڙَي ڪہ ٿون ݾاچِي توبھون ڪِي ھَي۔‘ ‏21 اِيئي باتون رَي ڪري يھُوديون مھنَي ايشوَر رَي گھر ۾ جھاليو ھانَ پَڇي مارڻ رِي ڪوشش ڪِي۔ ‏22 پڻ ايشوَر آج ڏِن توڻي مھارو مددگار ھَي۔ اِيئي رَي ڪري ھُون ݾاجو ݾُورو ھون ھانَ ݾجَي نِنيون موٽون آگھي گواھِي ڏيئون ھون۔ ھُون اوج باتون ݾُڻائُون ھون جڪَي رَي بارَي ۾ مُوسيٰ ھانَ نبيون پيل ݾُڻايو ھتو ڪہ اَي ضرُور ھوشَي ‏23 ڪہ مَسيح ڏُک ڏيکشَي ھانَ مري جاشَي۔ او پيلڪو مِنک ھوشَي، جڪو مُوئوڙون ݾون جيتو ھوشَي ھانَ اِيئي نمُونَي او يھُوديون ھانَ ٻيجِي قوم نَي مُگتي رَي اُجاݪَي رَي بارَي ۾ ݾُڻاشَي۔“ ‏24 جڏي پولُوس آپرَي بارَي ۾ اِيئون ڪيتو پڙيو، تو فيستُس زور ݾون ڪھيو ڪہ، ”اي پولُوس، تُو ڪالھو ھويو رو، تموم گھڻِي ڄاڻ ٿنَي ڪالھو ڪيئو رو۔“ ‏25 پولُوس ڪھيو ڪہ، ”فيستُس سائين، ھُون ڪالھو ڪونھي، ھُون ݾاچَي ھانَ ݾمجھ آݪَي باتون ڪرون پڙيو۔ ‏26 اي بادشاھ، ٿي اِيئي باتون رَي بارَي ۾ ݾُٺَي نمُونَي ݾمجھو ھو ھانَ ھُون بِنا ٻِي ٿون ݾون باتون ڪري ݾگھون ھون۔ اَي اِيئي رَي ڪري ھَي ڪہ مھنَي ڀروسو ھَي ڪہ اَي باتون ٿون ݾون لِڪيوڙَي ڪونھي، ڪيونڪہ اَي باتون ڪَي اُوڻَي کُوڻَي ۾ ڪونھي ھوئَي۔ ‏27 اَگرپا بادشاھ، ڪِي ٿي نبيون نَي منو ھو؟ مھنَي خبر ھَي ڪہ ٿي منو ھو۔“ ‏28 اِيئي تي اَگرپا بادشاھ پولُوس نَي ڪھيو ڪہ، ”واھ، تُو تو ٿوڙَي ٽيم ۾ باتون ݾُڻائي ڪوشش ڪرَي پڙيو ڪہ ھُون ڀِي مَسيح تي وِشواس راکون۔“ ‏29 پولُوس ڪھيو ڪہ، ”ٿوڙَي جون گھڻَي ٽيم رِي بات ڪونھي، پڻ ھُون تو ايشوَر ݾون پراٿنا ڪرون پڙيو ڪہ نِي رُگو تُو، پڻ جِترا ڀِي آج مھارَي باتون ݾُڻَي پڙيا، او مھَي آݪِي ڪار پرڀُو يسُوع تي وِشواس راکڻ آݪا ھوئي جاوَي، پڻ مھَي آݪِي ڪار قيد نا۔“ ‏30 اِيئي ݾون پَڇي اَگرپا بادشاھ، اُوئي رِي ٻين برنيڪَي، گوَرنر فيستُس ھانَ اُوئي ڀيڙا ٻيٺوڙا باقي مِنک اُٺيا ‏31 ھانَ اُوئي جگھا ݾون ٻاھر جائي ھيڪَي ٻيجَي نَي ڪيوَڻ لاگا ڪہ، ”اِيئي مِنک اھڙو ڪو ڀِي ڏوھ ڪونھي ڪيئو، جڪَي رَي ڪري اِيئي نَي قيد جون موت رِي سزا ڏينِي جاوَي۔“ ‏32 پَڇي اَگرپا بادشاھ فيستُس نَي ڪھيو ڪہ، ”جي اِيئي قيصر بادشاھ نَي اپيل نِي ڪِي ھووَنت، تو مھي اِيئي نَي ڦِٽو ڪرون تو۔“