سنتون را ڪوم 25

پولُوس رِي قيصر بادشاھ نَي اپيل

نُوئَي گوَرنر فيستُس رو صُوبَي ۾ پُگڻ ݾون تينون ڏِنون ݾون پَڇي، او قيصريا شھر ݾون ھوئي يروشلم شھر ڏيݾا گيو۔ ‏2 اوٿ ايشوَر را موٽا پُوجاري ھانَ يھُودي اَگووڻ اُوئي ڪڍي آيا ھانَ پولُوس تي الزوم ھڻڻ لاگا۔ ‏3 اُوئون گوَرنر نَي مِنٿ ڪِي ڪہ او پولُوس نَي يروشلم شھر ۾ اَڻاوَي۔ اُوئون اَي اِيئي رَي ڪري ڪھيو، ڪيونڪہ اُوئون پولُوس نَي مارگ ۾ لِڪي مارڻ رِي رِٿا ڪِي ھتِي۔ ‏4 پڻ فيستُس ڪھيو ڪہ، ”پولُوس تو قيصريا شھر ۾ قيد ھَي ھانَ ھُون آپ اوٿ جاوڻ آݪو ھون۔ ‏5 اِيئي رَي ڪري ٿون ۾ جڪو اَگووڻ ھَي، او مھَي ڀيڙا قيصريا ۾ ھالَي ھانَ جي اُوئي مِنک ۾ ڪو ڏوھ ھَي، تو اوٿ اُوئي تي ڪيس ڪريا۔“

‏6 پَڇي فيستُس آٺ ڏِن يروشلم شھر ۾ رھيو ھانَ پَڇي قيصريا شھر ڏيݾا گيو۔ اوٿ ٻيجَي ڏِن او فيصلو ڪرڻ ٻيٺو ھانَ پولُوس نَي اوٿ لي آوڻ رو حُڪم ڏينو۔ ‏7 جڏي پولُوس نَي اوٿ لي آيا، تو يھُودي جڪو يروشلم شھر ݾون آيوڙا ھتا ھانَ او اُوئي رَي چوڌاري اُڀا ھانَ اُوئي تي تموم گھڻا ڏوھ ھڻڻ لاگا، پڻ ڪو ڀِي ڏوھ ثابت ڪري ڪونھي ݾگھيا۔ ‏8 پولُوس آپرَي بارَي ۾ ڪيتو رھيو ڪہ، ”مھَي يھُودي شريعت، ايشوَر رَي گھر ھانَ قيصر بادشاھ رَي خلاف ڪئين ڪونھي ڪيئو۔“ ‏9 فيستُس يھُوديون نَي خُوش ڪرڻ رَي ݾارُو ڪرتو، اِيئي رَي ڪري اُوئي پولُوس ݾون پُوڇو ڪہ، ”ڪِي ٿارِي مرضِي ھَي ڪہ تُو يروشلم شھر ڏيݾا جاوَي ڪہ ھُون اوٿ ٿارَي اِيئي ڪيس رو فيصلو ڪرون؟“ ‏10 پولُوس ڪھيو ڪہ، ”ھُون رُومي بادشاھ قيصر رَي ڪورٽ ۾ حاضر ھون، اِيئي رَي ڪري مھارَي ڪيس رو فيصلو ڀِي ايٿ ھوئڻ کپَي۔ ٿونَي تو ݾجِي خبر ھَي ڪہ مھَي يھُوديون رو ڪو ڀِي ڏوھ ڪونھي ڪيئو۔ ‏11 جي ھُون ڏوھي ھون جون مھَي ڪو اھڙو ڪوم ڪيئو ھَي، جڪَي رِي سزا موت ھَي، تو ھُون مرڻ رَي ݾارُو تيار ھون۔ پڻ جي اِيئون را الزوم ڪُوڙا ھَي، تو ڪينَي ڪو ڀِي حق ڪونھي ڪہ او مھنَي اِيئون رَي حوالي ڪرَي۔ اِيئي رَي ڪري ھُون قيصر بادشاھ نَي اپيل ڪرون ھون۔“ ‏12 اِيئي تي فيستُس آپرَي صلاح ڪارون ݾون صلاح ڪري ڪھيو ڪہ، ”ٿَي قيصر بادشاھ نَي اپيل ڪِي ھَي، تو تُو اُوئي ڪڍي جائِي۔“

پولُوس رِي اَگرپا بادشاھ ݾون مُلاقات

‏13 ڪئينڪہ ڏِنون ݾون پَڇي اَگرپا بادشاھ ھانَ اُوئي رِي ٻين برنيڪا، قيصريا شھر ۾ نُوئَي گوَرنر فيستُس ݾون مِلڻ آيا۔ ‏14 او تموم گھڻا ڏِن اوٿ رھيا۔ فيستُس، بادشاھ نَي پولُوس رَي ڪيس رَي بارَي ۾ ݾُڻايو ڪہ، ”ايٿ پولُوس نون رو ھيڪ مِنک ھَي، جڪَي نَي فِيلڪس قيد ۾ ڇوڙي گيو ھَي۔ ‏15 جڏي ھُون يروشلم شھر ۾ ھتو، تو ايشوَر رَي موٽَي پُوجاريون ھانَ يھُودي اَگووڻون اُوئي تي ڪيس ڪيئو ھانَ مھنَي مِنٿ ڪرتا رھيا ڪہ اُوئي نَي سزا رو حُڪم ڏينو جاوَي۔ ‏16 پڻ مھَي اُوئون نَي ڪھيو ڪہ، ’رُومي قانُون تي جترِي توڻي ڪَي مِنک تي ڏوھ ڏيوَڻ آݪون رَي ݾومھو آپرَي بارَي ۾ ݾُڻاوڻ رو موقعيو نِي ملَي، اُترِي توڻي اُوئي نَي سزا ڪونھي ملتِي۔‘ ‏17 پَڇي جڏي او مِنک ايٿ آيا، تو مھَي گھڻِي دير ڪونھي ڪِي ھانَ ٻيجَي ڏِن فيصلو ڪرڻ ٻيٺو ھانَ پولُوس نَي اَڻايو۔ ‏18 جڏي اُوئي تي ڪيس ڪرڻ آݪا مھَي ڪڍي آيا، تو جون مھَي ݾوچو ھتو، اُوئون اُوئي تي اھڙو ڪو ڀِي ڏوھ ڪونھي لگايو، جڪَي ۾ او ڏوھي ھووَي۔ ‏19 او آپرَي ڌرم ھانَ ڪَي يسُوع نون رَي مِنک رَي بارَي ۾ بَحث ڪرتا رھيا۔ الزوم ھڻڻ آݪا ڪَي ھَي ڪہ، ’او مُوئو رو۔‘ پڻ پولُوس ڪَي ھَي ڪہ، ’او جيتو ھَي۔‘ ‏20 مھنَي اَي بات ݾمجھ ۾ ڪونھي آئِي ڪہ ڪيڪر اِيئون باتون رَي بارَي ۾ خبر ليئون۔ اِيئي رَي ڪري مھَي پولُوس ݾون پُوڇو ڪہ، ’ڪِي تُو يروشلم شھر ڏيݾا جاوڻ رَي ݾارُو خُوش ھَي ڪہ اِيئون باتون رو فيصلو اوٿ ھووَي؟‘ ‏21 تو پولُوس اپيل ڪِي ڪہ، ’مھارو فيصلو قيصر بادشاھ ڪرَي۔‘ اِيئي رَي ڪري مھَي حُڪم ڏينو ڪہ، ’جترِي توڻي اُوئي نَي قيصر بادشاھ ڪڍي نِي ميلون، اُترِي توڻي او قيد ۾ ھوشَي۔‘“ ‏22 اَگرپا بادشاھ فيستُس نَي ڪھيو ڪہ، ”مھارِي مرضِي ھَي ڪہ ھُون ڀِي اِيئي مِنک رِي بات ݾُڻون۔“ فيستُس ڪھيو ڪہ، ”ٺيڪ ھَي، تو پَڇي ݾووارَي ٿي اُوئي رَي باتون ݾُڻشو۔“

‏23 ٻيجَي ڏِن اَگرپا بادشاھ ھانَ برنيڪا موٽَي مونَ ݾون درٻار ۾ آيا ھانَ رُومي فوج را موٽا آفيسر ھانَ شھر را خاص اَگووڻ ڀِي اُوئون ڀيڙا ھتا۔ پَڇي فيستُس، پولُوس نَي اوٿ اَڻايو۔ ‏24 پَڇي فيستُس ڪھيو ڪہ، ”اي اَگرپا بادشاھ ھانَ ݾجَي مِنکون، جڪو مِنک ٿونرَي ݾومھو اُڀو ھَي، اِيئي رِي دانھن ايٿ رَي ھانَ يروشلم رَي تموم گھڻَي يھُوديون مھنَي ڏينِي ھَي۔ او اِيئي بات تي زور ݾون ڪيتا رھيا ڪہ اِيئي نَي جيتو نِي ڇوڙو۔ ‏25 پڻ مھنَي خبر پڙِي ڪہ اِيئي ڪو ڀِي ڏوھ ڪونھي ڪيئو، جڪَي رَي ڪري اِيئي نَي موت رِي سزا ملَي۔ پَڇي جڏي اِيئي قيصر بادشاھ نَي اپيل ڪِي، تو مھَي اِيئي نَي اوٿ ميلڻ رو فيصلو ڪيئو۔ ‏26 پڻ مھنَي اِيئي رَي بارَي ۾ اھڙِي ڪَي خاص بات رِي خبر ڪونھي ھَي، جڪو ھُون قيصر بادشاھ نَي لِکون۔ اِيئي رَي ڪري آج مھَي ٿون ݾجون رَي ݾومھو ھانَ خاص ڪري اَگرپا بادشاھ ڪڍي اِيئي نَي اَڻايو ھَي۔ ھوئي ݾگھَي ھَي ڪہ جانچ ڪرڻ ݾون پَڇي ڪَي اھڙِي بات رِي خبر پڙَي جڪو لِکي جاوَي۔ ‏27 اَي بات مھنَي ݾُٺِي ڪونھي لاگتِي ڪہ ھُون ھيڪَي قيدي نَي تو ميلون، پڻ جڪو الزوم اُوئي تي لاگوڙا ھَي، اُوئون نَي ݾُٺَي نمُونَي نِي لِکون۔“