پرڀُو يسُوع رو ٻاھتر چيلون نَي ميلڻ
10
پَڇي پرڀُو يسُوع آپرَي چيلون ۾ ٻاھتر جِڻا چُونڊيا جڪون نَي ٻي ٻي ڪري آپ ݾون پيل اُوئون شھرون ھانَ گون ۾ ميليا، جيٿ آپنَي جاوڻو ھتو۔ 2 اُوئون چيلون نَي ميلڻ رَي ٽيم پرڀُو يسُوع اَي بات ݾمجھائِي ڪہ شاستر رو پرچار ڪرڻ آݪا ٿوڙيا ھَي۔ پَڇي پرڀُو يسُوع اُوئون نَي ڪھيو ڪہ، ”پوک تو گھڻِي ھَي، پڻ مزُور ٿوڙا ھَي۔ اِيئي رَي ڪري پوک رَي مالڪ نَي مِنٿ ڪرو ڪہ پوک رَي ݾارُو ٻيجا مزُور ميلَي۔ 3 ٿي جائو، ھُون ٿونَي اَي ڀِي ݾُڻائُون ھون ڪہ ٿي رڍون آݪِي ڪار ھو ھانَ ھُون ٿونَي بگڙون ۾ ميلون ھون۔ 4 ٿي آپ ڀيڙو ڪئين نِي لي جايا، نِي جھوݪِي، نِي ٿيلو، نِي ٻيجا جُتا ھانَ نِي مارگ ۾ ڪَي ݾون خبرچار پُوڇڻ ۾ ٽيم گُمايا۔ 5 جڪَي گھر ۾ جائو، تو پيل اُوئي گھر رِي خيريت رَي ݾارُو پراٿنا ڪريا۔ 6 جي اُوئي گھر ۾ ڪو اھڙو مِنک ھويو، تو ايشوَر رو ݾُک اُوئي نَي ملشَي۔ جي نِي ھويو، تو ايشوَر رو ݾُک ٿون ڪڍي پاڇو آشَي۔ 7 جڪو ٿونَي خُوشِي ݾون آوڻ ڏَي، اُوئي رَي گھري رھيا۔ اُوئي گھر ۾ کاوڻ پيئڻ رَي ݾارُو جڪو ڪئين ملَي ٿي او کايا پيئا، ڪيونڪہ مزُور آپرِي مزُورِي رو حقدار ھَي۔ ٿي ميموڻ ھوئي گھر گھر نِي جايا۔8 جي ٿي ڪَي شھر ۾ جائو ھانَ اوٿ را مِنک ٿونَي آپ ڪڍي ريوَڻ ڏَي، تو او جڪو ڪئين ٿونَي کاوڻ رَي ݾارُو ڏَي، او کايا۔ 9 جي اوٿ ڪو بيمار ھووَي، تو اُوئي نَي ݾاجا ڪريا۔ اوٿ رَي مِنکون نَي ݾُڻايا ڪہ، ’ايشوَر رِي بادشاھي ٿونرَي نيڙِي آئِي رِي۔‘ 10 پڻ جي ٿي ڪَي شھر ۾ جائو ھانَ اوٿ را مِنک ٿونَي آپ ڪڍي ريوَڻ نِي ڏَي، تو اُوئون رَي شھر ۾ جائي ڪھيا ڪہ، 11 ’مھي ٿونرَي شھر رِي مٽِي جڪو مھورَي پگون نَي لاگِي ھَي، ٿونرَي ݾومھو ڇنڊون ھون، پڻ ٿي اِترو ياد راکيا ڪہ ايشوَر رِي بادشاھي نيڙِي آئِي رِي۔‘ 12 ھُون ٿونَي ڪونھ ھون ڪہ اُوئي ڏِن جڏي ايشوَر دُنيا رو اِنصاف ڪرشَي، تو اُوئي شھر نَي سدُوم شھر ݾون ڀِي وڌيڪ سزا ملشَي۔“
توبھون نِي ڪرڻ آݪون تي ڏُک
13 پَڇي پرڀُو يسُوع ڪھيو ڪہ، ”اي خرازين ھانَ بيت صيدا شھر رَي مِنکون، ڏُک ھَي ٿون تي، ڪيونڪہ جڪو موٽا موٽا پرچا ٿون ۾ ڪيئا گيا ھَي، جي او صُور ھانَ صيدا شھر ۾ ڪيئا جائُون تو، تو اوٿ را مِنک کٿا اوڍي ھانَ ماٿَي ۾ راک گھاتي اُوئيج ٽيم توبھون ڪرون تو۔ 14 پڻ جڏي ايشوَر دُنيا رو اِنصاف ڪرشَي، تو اُوئي ڏِن ٿونَي صُور شھر ھانَ صيدا شھر ݾون ڀِي وڌيڪ سزا ملشَي۔ 15 اي ڪفرنَحُوم شھر، ڪِي تُو ݾمجَھي ھَي ڪہ تُو آڪاش تي کڻيو جائِي۔ نا، پڻ تُو نرگ ۾ نوکيو جائِي۔“ 16 پَڇي پرڀُو يسُوع اُوئون نَي ڪھيو ڪہ، ”جڪو ٿونرِي ݾُڻَي ھَي، ݾمجھو ڪہ او مھارِي بات ݾُڻَي ھَي ھانَ جڪو ٿونرِي بات ڪونھي ݾُڻتو، تو او مھارِي بات ڀِي ڪونھي منتو ھانَ جڪو مھارِي بات ڪونھي منتو، تو او ايشوَر نَي ڀِي ڪونھي منتو، جڪَي مھنَي ميليو ھَي۔“
ٻاھتر چيلون رو پاڇو آوڻ
17 پَڇي او ٻاھتر چيلا پرچار رو ڪوم پُورو ڪري خُوش ھوئي پاڇا آيا ھانَ پرڀُو يسُوع نَي ڪيوَڻ لاگا ڪہ، ”اي پرڀُو، ٿونرَي نون ݾون ڀُوت ڀِي مھورو حُڪم منَي ھَي۔“ 18 پرڀُو يسُوع اُوئون نَي ڪھيو ڪہ، ”مھَي شيطون نَي اِيئون کِرتو ڏيٺو ھَي، جون آڪاش ݾون بجلي کِرَي ھَي۔ 19 مھَي ٿونَي اِيئون ڀُوت ڪاڍڻ رو اِختيار ڏينو ھَي، جھڙَي نمُونَي ٿي ناگ ھانَ بِڇُو پگون ھيٺا لتاڙي مارو ھو۔ ٿي آپرَي دُشمن شيطون ݾون کٽي جاشو۔ ٿونَي ڪو ڀِي شئي نُقصون ڪونھي ڏَي۔ 20 پڻ ٿي اِيئي بات ۾ خُوش نِي ھويا ڪہ ڀُوت ٿونرو حُڪم منَي ھَي، پڻ اِيئي بات ۾ خُوش ھويا ڪہ ايشوَر ٿونَي ݾُرگ ۾ جاوڻ رو حق ڏينو ھَي۔“
پرڀُو يسُوع رو آپرَي چيلون ݾون خُوش ھوئڻ
21 اُوئي ٽيم پرڀُو يسُوع پويتر آتما رِي خُوشِي ݾون ڀريجي ايشوَر نَي ڪھيو ڪہ، ”اي پِتا، آڪاش ھانَ ڌرتي را مالڪ، ھُون ٿارو شُڪر ڪرون ھون ڪہ ٿَي اَي باتون ڏاھون ھانَ ݾمجھدار مِنکون ݾون لِڪائَي، پڻ اٻوجھ مِنکون تي ظاھر ڪيئَي۔ ھاوي اَبا، ٿَي اَي ݾجو آپرِي مرضِي ھانَ خُوشِي ݾون ڪيئو ھَي۔“
22 پَڇي پرڀُو يسُوع مِنکون نَي ڪھيو ڪہ، ”مھارَي پِتا، مھنَي ھر ھيڪ شئي رِي اِختياري ڏينِي ھَي۔ پِتا ݾون ٽاݪ ڪينَي ڀِي خبر ڪونھي ڪہ ڏيڪرو ڪُڻ ھَي ھانَ ڏيڪرَي ݾون ٽاݪ ڪينَي ڀِي خبر ڪونھي ڪہ پِتا ڪُڻ ھَي۔ ايشوَر نَي رُگو اوج مِنک اوݪکَي ھَي، جڪَي نَي ڏيڪرو ظاھر ڪرَي۔“ 23 پَڇي پرڀُو يسُوع چيلون ڏيݾا پاڇل ڦوري، اُوئون نَي آپرَي مُونھ ڪھيو ڪہ، ”ڌن ھَي، ٿي جڪو اَي ݾجو ڪئين ڏيکو پڙيا۔ 24 ڪيونڪہ ھُون ٿونَي ݾاچِي ڪونھ ھون ڪہ تموم گھڻا نبِي ھانَ بادشاھ، اِيئي اُميد ۾ ھتا ڪہ جڪو ڪئين ٿي ڏيکو پڙيا، او جووَي، پڻ او جوئي ڪونھي ݾگھيا ھانَ جڪو باتون ٿي ݾُڻو پڙيا او ݾُڻَي، پڻ او ݾُڻي ڪونھي ݾگھيا۔“
نيڪ مِنک سامري رو مِثال
25 ھيڪ ڏِن ھيڪ ڌرمي گُرو آيو ھانَ پرڀُو يسُوع رو آزمُوتو ليوَڻ رَي ݾارُو ڪيوَڻ لاگو ڪہ، ”گُرو جِي، ھُون ڪِي ڪرون ڪہ مھنَي اَمر جيوَن ملَي؟“ 26 پرڀُو يسُوع اُوئي نَي بݪتِي ڏينِي ڪہ، ”شريعت ۾ ڪِي لِکيوڙو ھَي؟ تُو پڙھڻ ݾون ڪِي ݾمجَھي ھَي؟“ 27 اُوئي پرڀُو يسُوع نَي بݪتِي ڏينِي ڪہ، ”تُو پرميشوَر آپرَي ايشوَر نَي آپرِي پُورِي دِل، پُورِي جان، پُورِي طاقت ھانَ آپرِي پُورِي ݾمجھ ݾون پريم ڪر ھانَ آپرَي پاڙَي آݪَي ݾون آپ جِترو پريم ڪر۔“ 28 اِيئي تي پرڀُو يسُوع اُوئي نَي ڪھيو ڪہ، ”ٿَي صحيح بݪتِي ڏينِي ھَي۔ تُو اِيئوج ڪر، تو ٿنَي اَمر جيوَن ملشَي۔“ 29 او ڌرمي گُرو ھتو، اِيئي رَي ڪري آپرِي ھوشياري بتاوڻ رَي ݾارُو پرڀُو يسُوع نَي ڪيوَڻ لاگو ڪہ، ”تو پَڇي مھارو پاڙَي آݪو ڪُڻ ھَي؟“ 30 پرڀُو يسُوع اُوئي نَي ݾمجھاوڻ رَي ݾارُو اَي مِثال ڏينو ڪہ، ”ھيڪ يھُودي ھتو جڪو يروشلم شھر ݾون يريحُو شھر ڏيݾا جاوتو پڙيو، تو مارگ ۾ اُوئي نَي ڌاڙيل ڦِري آيا ھانَ اُوئون اُوئي را گاڀا اُتاري ليئا ھانَ اُوئي نَي ماري اَڌ مُوئو ڪري ڇوڙي بُوئا گيا۔ 31 پَڇي اِيئون ھويو ڪہ ايشوَر رو ھيڪ پُوجاري اُوئي مارگ ݾون لنگھيو۔ جڏي اُوئي، اُوئي زخمي نَي ڏيٺو، تو او اُوئي نَي لاش ݾمجھي پاݾو ڏي بُوئو گيو ڪہ اُوئي نَي ھاٿ لگاوڻ ݾون ڪيٿ پليت نِي ھوئي جاوَي۔ 32 اِيئي نمُونَي ھيڪ لاوِي قوم رو مِنک ڀِي آيو جڪو ايشوَر رو شيواداري ھتو۔ او ڀِي اُوئي نَي لاش ݾمجھي پاݾو ڏي بُوئو گيو۔
33 پڻ ھيڪ پرديسي جڪو سامريا علائقَي رو ھتو، پينڏو ڪرتو اُوئي مارگ ݾون لنگھيو ھانَ جڏي اُوئي زخمي نَي ڏيٺو، تو اُوئي سامري نَي دايا آئِي۔ 34 پَڇي او نيڙو گيو ھانَ اُوئي رَي ڦٽون تي تيل ھانَ انگُورون رو رس لگايو ھانَ ڦٽون تي پٽِي ٻونڌِي۔ پَڇي اُوئي نَي آپرَي گڏَي تي چاڙھي مُسافرخونَي ۾ لي گيو ھانَ اوٿ اُوئي رِي سار ݾنڀال ڪِي۔ 35 ٻيجَي ڏِن اُوئي سامري چوندِي را ٻي ݾِڪا ڪاڍي مُسافرخونَي آݪَي نَي ڏينا ھانَ اُوئي نَي ڪھيو ڪہ، ’اِيئي مِنک رِي دوا ڪري ھانَ جڪو ڀِي وڌيڪ خرچو لاگو، تو او ڀِي ھُون پاڇو آئي ڏئين۔‘“
36 پَڇي پرڀُو يسُوع ڪھيو ڪہ، ”ھمَي تُو ڪِي ݾمجَھي ھَي، او مِنک جڪو ڌاڙيلون ۾ ڦاٿو، اُوئون تينون ۾ ڪُڻ اُوئي رو پاڙَي آݪو ھويو؟“ 37 ڌرمي گُرو بݪتِي ڏينِي ڪہ، ”او جڪَي اُوئي تي دايا ڪِي۔“ پرڀُو يسُوع اُوئي نَي ڪھيو ڪہ، ”جا ھانَ تُو ڀِي اِيئوج ڪر۔“
پرڀُو يسُوع رو مريم ھانَ مارٿا رَي گھري جاوڻ
38 پرڀُو يسُوع ھانَ اُوئي را چيلا بيتا بيتا ھيڪَي گون ۾ آيا، جيٿ مارٿا نون رِي ھيڪِي لُگائِي اُوئون نَي آپرَي گھري دعوت ڏينِي۔ 39 مارٿا رِي ھيڪ ٻين ھتِي جڪَي رو نون مريم ھتو۔ مريم، پرڀُو يسُوع رَي پگون ڪڍي ٻيݾي اُوئي رَي باتون ݾُڻڻ لاگِي۔ 40 پڻ مارٿا تموم گھڻَي ڪوم رَي ڪري پريشون ھوئِي ھانَ اُوئي پرڀُو يسُوع نَي ڪھيو ڪہ، ”اي پرڀُو، ٿونَي مھارو خيال ڪونھي آوتو ڪہ مھارِي ٻين مھنَي ڪوم ڪار ۾ ھيکلِي ڇوڙِي رِي؟ اُوئي نَي ڪو ڪہ او ڪوم ۾ مھارِي مدد ڪرَي۔“ 41 پڻ پرڀُو يسُوع بݪتِي ڏينِي ڪہ، ”مارٿا، اي مارٿا، تُو تو تموم گھڻَي باتون رِي گڻتِي ڪرَي ھَي۔ 42 پڻ ھيڪ بات ضرُوري ھَي ھانَ مريم او خاص بات چُونڊِي ھَي، جڪو اُوئي ݾون ڪڏي ڀِي کوݾيجَي ڪونھي۔“