پويتر سِنون ڏيوَڻ آݪَي يُوحنا رو پرچار
3
ڪئينڪہ ݾالون ݾون پَڇي پويتر سِنون ڏيوَڻ آݪو يُوحنا يھُوديا صُوبَي رَي رڻ پَٽ ۾ آيو ھانَ اَي پرچار ڪرڻ لاگو ڪہ، 2 ”توبھون ڪرو، ڪيونڪہ آڪاش رِي بادشاھي نيڙِي آئِي رِي۔“ 3 اَي اوج يُوحنا ھَي جڪَي رَي بارَي ۾ يسعياھ نبِي ڪھيو ھتو ڪہ،”رڻ پَٽ ۾ پرچار ڪرڻ آݪَي رو ھيلو ݾُڻيجَي پڙيو ڪہ،
’پرميشوَر رَي ݾارُو مارگ تيار ڪرو
ھانَ اُوئي رَي ݾارُو مارگ ݾِڌا ڪرو۔‘“
4 يُوحنا اُونٺ رَي باݪون را ٺاھيوڙا گاڀا پيرتو ھانَ ڪݪيون تي چوٻڙَي رو پَٽو ٻونڌتو۔ او تيڏ ھانَ جھنگ رِي ماکِي کاوتو۔ 5 يروشلم شھر، يھُوديا رو ݾجو علائقو ھانَ يردن دريا رَي آݾَي پاݾَي را مِنک يُوحنا ڪڍي آوتا۔ 6 اَي ݾجائِي مِنکون رَي رُوبرو آپرا پاپ منتا ھانَ يُوحنا ݾون يردن دريا ۾ پويتر سِنون ليتا۔ 7 جڏي يُوحنا ڏيٺو ڪہ تموم گھڻا فريسي ھانَ صدُوقي پَنٿ آݪا پويتر سِنون ليوَڻ آوَي پڙيا، تو اُوئون نَي ڪھيو ڪہ، ”اي ناگ رَي ٻچون، ٿونَي ڪَي ݾُڻايو ڪہ ٿي اُوئي سزا ݾون بچي جاشو، جڪو ايشوَر ميلڻ آݪو ھَي؟ 8 ٿي اھڙا ڪوم ڪرو، جڪَي ݾون خبر پڙَي ڪہ ٿون واقعي توبھون ڪِي ھَي۔ 9 اَي نِي ݾمجھو ڪہ مھي اڀراھيم را اولاد ھون، اِيئي رَي ڪري بچي جاشون۔ ھُون ٿونَي ڪونھ ھون ڪہ ايشوَر اِيئون پٿرون ݾون ڀِي اڀراھيم رَي ݾارُو اولاد پيدا ڪري ݾگھَي ھَي۔ 10 ياد راکو، ايشوَر اھڙِي سزا ڏيوَڻ رَي ݾارُو تيار ھَي، جون مِنک بَڻون رَي پاݪ تي ڪُھاڙو راکَي ھَي ھانَ جڪو بَڻ ݾُٺو ڦل ڪونھي ڏيتو، اُوئي نَي باڍي باݾڏي ۾ نوکَي ھَي۔ 11 ھُون تو ٿونَي توبھون رَي ݾارُو پوڻي ݾون پويتر سِنون ڏيئون ھون، پڻ جڪو مھَي ݾون پَڇي آشَي، او ٿونَي باݾڏي ھانَ پويتر آتما ݾون پويتر سِنون ڏيشَي۔ او مھَي ݾون وڌيڪ قُدرت آݪو ھَي ھانَ ھُون تو اُوئي را جُتا کڻڻ جھڙو ڀِي ڪونھي ھون۔ 12 اُوئي رو ڇاجڙو اُوئي رَي ھاٿ ۾ ھَي ڪہ او ڪڻڪ نَي بوھ ݾون ݾُٺَي نمُونَي ڌار ڪرَي۔ او ڪڻڪ نَي آپرَي گُدوم ۾ راکشَي، پڻ بوھ نَي اھڙَي باݾڏي ۾ ٻاݪشَي جڪو ڪڏي ڀِي ٻُجَھي ڪونھي۔“
پرڀُو يسُوع رو پويتر سِنون ليوَڻ
13 پَڇي پرڀُو يسُوع گليل صُوبَي ݾون يردن دريا تي يُوحنا ݾون پويتر سِنون ليوَڻ آيو۔ 14 پڻ يُوحنا اُوئي نَي اَي ڪئي پاليو ڪہ، ”مھنَي تو ٿَي ݾون پويتر سِنون ليوَڻ کپَي، پڻ تُو مھَي ڪڍي آيو ھَي؟“ 15 اِيئي تي پرڀُو يسُوع اُوئي نَي ڪھيو ڪہ، ”ھڻون تُو اِيئوج ھوئڻ ڏي، ڪيونڪہ اِيئي نمُونَي آپي ٻيئي ايشوَر رِي ݾجِي مرضِي پُورِي ڪرشون۔“ پَڇي يُوحنا پرڀُو يسُوع نَي پويتر سِنون ڏيوَڻ رَي ݾارُو راجِي ھويو۔