Yohanes 11

Isa ngidop ageꞌ Lasaros

Adai sikoꞌ urang te tengan pedeh, nama ya Lasaros. Ya diyau de Betania abaꞌ dua ikoꞌ menyadeꞌ ya Maria abaꞌ Marta. 2 (Maria nyaꞌ mah lah inoꞌ te kaꞌ nureꞌ binyak wangi ke kaki Isa, abaꞌ ngunos ngau bok ya.) 3 Snikoꞌ ngirem rita ke Isa upa pitoꞌ, “Tuhan, menyadeꞌ kmua te Wan kaseh, poh amat.” 4 Pas Isa ninga rita nyaꞌ, Ya madah, “Pemedeh toꞌ nadai nyuroh mati, uleh kaꞌ nganyaꞌ lampar besai kuasa Tuhan Allah, abaꞌ tegal pemedeh nyaꞌ Anak Tuhan Allah kaꞌ dajunyong tingeꞌ.” 5 Isa ma kaseh ke Marta, Maria abaꞌ Lasaros, 6 uleh pas Isa ninga rita Lasaros poh amat, Ya sengaja diyau dua ari ageꞌ de teban te jalai Ya tengan diyau. 7 Udah nyaꞌ baroꞌ Ya madah ke kebala muret Ya, “Boh kita ke Yudia ageꞌ.” 8 Kebala muret nyaꞌ nyawot Ya, “Guru, baroꞌ dua tiga ari te udah teh kebala sidaꞌ Yahudi te adai den kaꞌ nikam Wan ngau batu, abaꞌ entoꞌ Wan kaꞌ ken ageꞌ?” 9 Sawot Isa, “Alam sari toꞌ adai dua blas jam. Urang te bejalai tawas, kaki ya nadai tetanyal nema ya medaꞌ trang dunia. 10 Uleh enteꞌ urang bejalai malam, kaki ya tauꞌ tetanyal, nema niseꞌ trang de ya.” 11 Nyaꞌ mah te Isa padah kah.

Udah nyaꞌ Ya madah ageꞌ ke sidaꞌ, “Kawan kita Lasaros, nyau tinok. Uleh Ku kaꞌ angkat ken ngerak ya.” 12 Kebaꞌ kebala muret Ya madah, “Guru, enteꞌ ya tengan tinok, semoh ya lah.” 13 Uleh tinok te maksot Isa ditoꞌ nyaꞌ mati, uleh sangkaꞌ sidaꞌ Isa madah tinok te biasa. 14 Kebaꞌ nyaꞌ Isa madah pengamat ke sidaꞌ, “Lasaros nyau mati; 15 uleh Ku gaga gaꞌ Ku niseꞌ den, nema nyaꞌ lebeh bayek ngau kitaꞌ, isaꞌ kitaꞌ tauꞌ pecayaꞌ ke Ku. Boh kita angkat ken ngusong ya.” 16 Baroꞌ Tumas, te dagelar Didimos, madah ke kebala muret te kebukai, “Boh kita angkat gaꞌ abaꞌ Guruꞌ isaꞌ kita mati abaꞌ Ya.”

17 Pas Isa datai ke Betania, Lasaros udah empat ari dakubor. 18 Betania nadai jaoh ari Yerosalem, sekitar tiga kilomiter mah penyaoh. 19 Nyaꞌ ngasoh mayoh sidaꞌ Yahudi ngusong Marta abaꞌ Maria ngibor snikoꞌ tegal pemati Lasaros. 20 Pas Marta ninga urang madah Isa nyau kaꞌ datai, Ya angkat ngusong Isa, uleh Maria dudi de rumah. 21 Marta madah ke Isa, “Pak, enteꞌ Wan adai ditoꞌ jalai anoꞌ teh, pesti menyadeꞌ ku nadai mati. 22 Uleh ku tauꞌ badaꞌ, enteꞌ entoꞌ gaꞌ Tuhan Allah kaꞌ mreꞌ ke Wan kebala utai te Wan pintaꞌ ke Ya.”

23 Isa nyawot ya, “Menyadeꞌ deꞌ kaꞌ idop ageꞌ.” 24 Sawot Marta ke Isa, “Ku tauꞌ badaꞌ ya kaꞌ idop ageꞌ senta kebala urang daidop ageꞌ de pemadoꞌ dunia toꞌ.” 25 Isa nyawot, “Ku mah te tauꞌ ngidop ageꞌ urang mati abaꞌ te mreꞌ idop; sapa jaꞌ te pecayaꞌ ke Ku kaꞌ idop, amat mah ya udah mati, 26 abaꞌ ngenap urang te idop abaꞌ pecayaꞌ ke Ku, nadai jong mati. Pecayaꞌ nadai deꞌ ke utai nyaꞌ?” 27 Sawot Marta, “Auꞌ, Tuhan, ku pecayaꞌ, enteꞌ Wan mah Al Maseh, Anak Tuhan Allah, te datai ke dunia toꞌ.”

28 Udah Marta madah piyaꞌ, ya angkat ngumai Maria menyadeꞌ ya abaꞌ ngisek ya, “Guru adai ditoꞌ abaꞌ Ya ngumai deꞌ.” 29 Ninga piyaꞌ Maria sintak diri abaꞌ angkat ngusong Isa. 30 Tengan nyaꞌ, Isa bedau datai ke kampong nyaꞌ. Ya ageꞌ de teban te jalai Marta betemu abaꞌ Ya. 31 Pas kebala sidaꞌ Yahudi te tengan ngibor Maria de rumah medaꞌ ya sintak diri abaꞌ angkat, sidaꞌ nrudi ya, nema miker enteꞌ ya angkat ke kubor kaꞌ nyabak den. 32 Pas Maria datai kiyaꞌ abaꞌ medaꞌ Isa, ya nyungkon nyemah Isa abaꞌ madah, “Tuhan, enteꞌ Wan adai ditoꞌ jalai anoꞌ teh pesti mah menyadeꞌ ku nadai mati.”

33 Pas Isa medaꞌ Maria abaꞌ kebala sidaꞌ Yahudi te datai nrudi ya nyabak, ati Ya ma mah riyu abaꞌ madah: 34 “Dini kitaꞌ ngubor bangkai ya?” Sidaꞌ nyawot, “Boh kita ken, pedaꞌ Wan!” 35 Isa teka nyabak. 36 Medaꞌ piyaꞌ kebala sidaꞌ Yahudi becakap abaꞌ sama direꞌ, “Pedaꞌ kah, saja ma mah Ya kaseh ke Lasaros!” 37 Uleh adai gaꞌ dua tiga ikoꞌ urang daentara sidaꞌ te madah, “Ya te ngasoh mata urang butaꞌ tauꞌ medaꞌ, nadai talah piyaꞌ Ya betinak isaꞌ Lasaros nadai mati?” 38 Ati Isa ma riyu ageꞌ, baroꞌ Ya nyemak kubor nyaꞌ. Kubor nyaꞌ upa gua te detutop ngau batu besai. 39 Baroꞌ Isa madah ke kebala urang te adai diyaꞌ, “Gansat kah batu nyaꞌ!” Uleh Marta, menyadeꞌ Lasaros nyaꞌ madah ke Isa, “Tuhan, udah empat ari ya de kubor, pesti mah ya nyau bau.” 40 Baroꞌ Isa nyawot, “Nadai piyaꞌ Ku udah madah ke deꞌ: Enteꞌ deꞌ pecayaꞌ, deꞌ kaꞌ medaꞌ lampar besai kuasa Tuhan Allah!” 41 Kebaꞌ sidaꞌ ngansat batu nyaꞌ. Udah nyaꞌ Isa engkadah ke atau abaꞌ madah, “Apai, Ku ngucap sukor ke Wan, nema Wan udah ninga Ku. 42 Ku tauꞌ badaꞌ enteꞌ Wan slareh ninga Ku, uleh Ku madah pitoꞌ nema adai urang banyau te diri ditoꞌ ngelileng Ku. Ku kaꞌ isaꞌ sidaꞌ pecayaꞌ, enteꞌ Wan mah te udah ngutos Ku.” 43 Udah madah piyaꞌ, Isa madah ngau goꞌ te sareng, “Lasaros, kluar meh!” 44 Baroꞌ Lasaros kluar, kaki abaꞌ jari ya ageꞌ datamet kayen te ngau malot bangkai, abaꞌ mua ya ageꞌ debalot ngau suteꞌ kayen. Isa madah ke kebala urang te diyaꞌ, “Bukaꞌ kah kebala kayen nyaꞌ abaꞌ ngaꞌ ke mah ya bejalai.”

Pemimpen sidaꞌ Yahudi bapekat kaꞌ munoh Isa

(Mat. 26:1-5; Mrk. 14:1-2; Luk. 22:1-2)

45 Tengan nyaꞌ, mayoh kebala sidaꞌ Yahudi te datai ngibor Maria pecayaꞌ medaꞌ apa te udah dapulah Isa. 46 Uleh adai gaꞌ dua tiga ikoꞌ te angkat ngusong kebala urang ari klumpok Parisi abaꞌ nusoi ke sidaꞌ, apa te udah dapulah Isa. 47 Baroꞌ kebala kepalaꞌ imam abaꞌ kebala urang Parisi bapekat abaꞌ Pengadel Agama Yahudi, sidaꞌ madah, “Apa te alah kita pulah kah? Nema Urang toꞌ mayoh mulah tana. 48 Asa kita ngengaꞌ Ya pitoꞌ sengabot, ilaꞌ ugaꞌ urang kaꞌ pecayaꞌ ke Ya, abaꞌ pemrintah Ruma kaꞌ ngutos prajuret sidaꞌ abaꞌ kaꞌ ngancor Rumah Kudos Tuhan Allah abaꞌ ugaꞌ bansa kita!” 49 Uleh sikoꞌ urang daentara sidaꞌ te nama Kayapas, Imam Besai tengan nyaꞌ madah, “Kitaꞌ nadai nyarok apa te tengan tejadi, 50 cuba kitaꞌ piker; ari pada bansa kita punas, lebeh bayek sikoꞌ urang mati nganti bansa kita.” 51 Apa te depadah Kayapas nadai ari pemiker ya kedireꞌ. Taon nyaꞌ Kayapas jadi Imam Besai abaꞌ ya madah pesau ari Tuhan Allah enteꞌ Isa kaꞌ mati ngau bansa Yahudi. 52 Abaꞌ nadai proꞌ ngau bansa nyaꞌ uleh ngau kebala anak Tuhan Allah te pamar piyar. Isa mati ngumpol abaꞌ nyuteꞌ ugaꞌ sidaꞌ jadi urang te daempu Ya. 53 Blaboh ari sari nyaꞌ kebala pemimpen sidaꞌ Yahudi mutos kaꞌ munoh Isa.

54 Kebaꞌ nyaꞌ Isa nadai ageꞌ gulong nganyaꞌ direꞌ de mua sidaꞌ Yahudi. Isa nudi Yudia, udah nyaꞌ Ya angkat ke kuta Epraim te semak tanah luah te baengkerangan. Diyaꞌ Ya diyau abaꞌ kebala muret Ya.

55 Tengan nyaꞌ ari besai Paskah sidaꞌ Yahudi nyau semak. Sebedau ari besai nyaꞌ mayoh urang ari kebala kampong datai ke Yerosalem mreseh direꞌ nunaꞌ Prator Tuhan Allah te datules Musa, isaꞌ tauꞌ ngeraya ari Paskah. 56 Sidaꞌ ngigaꞌ Isa abaꞌ blumaꞌ diri delaman Rumah Kudos Tuhan Allah, sidaꞌ madah ke sama direꞌ, “Kati pemiker kitaꞌ, datai nadai Ya ke Paskah toꞌ?” 57 Tengan nyaꞌ, kebala kepalaꞌ imam abaꞌ kebala urang ari klumpok Parisi nyuroh enteꞌ adai urang te medaꞌ Isa, alah madah ke sidaꞌ isaꞌ sidaꞌ tauꞌ nangkap Ya.