KITAB INYEL
LUKAS
Penulau Becakap
Kitab Inyel Lukas datules ngau madah Isa toꞌ Penyelamat te dedanyi Tuhan Allah ke bansa Israel abaꞌ ke ugaꞌ urang te adai de dunia toꞌ. Lukas toꞌ enteri, ya bekawan abaꞌ Rasol Paulos abaꞌ snikoꞌ madah brita bayek ari Tuhan Allah (Kol. 4:14; 2 Tim. 4:11; Flm. 1:24). Lukas nules pengidop Isa upa kebala urang te nules sejarah asal usol abaꞌ adat basa, te udah tejadi de jaman dulau. Kebaꞌ semaru Lukas nginsor apa te depadah Isa ari kebala urang te abaꞌ Ya. Nyau dah Lukas nginsor ugaꞌ nyaꞌ, baroꞌ ya nules Kitab Inyel toꞌ ke Tiopilos. Tiopilos toꞌ urang te pecayaꞌ ke Isa, reti nama ya alam baasa Yunani *kawan Allah*. Adai urang te madah Tiopilos bekreja de pemerintah Ruma, adai kedaꞌ madah ya urang te tepanang abaꞌ ya ngungkos urang te nules abaꞌ ngidar Kitab Inyel Lukas.
Alam kitab toꞌ, Lukas nyelas ngapa Isa datai ke alam dunia toꞌ. Isa datai kaꞌ ngigaꞌ abaꞌ nyelamat ugaꞌ urang te dusa (Luk. 19:10). Alam Kitab Inyel Lukas toꞌ adai kebala cuntoh Tuhan Isa nganyaꞌ pemayek Ya ke kebala urang misken, ke kebala urang te deangap urang te nadai penteng, ke kebala urang inoꞌ te balu, ke kebala urang te pedeh, ke kebala urang te bukai urang Yahudi abaꞌ ke kebala miyak.