Isa idop ageꞌ
(Luk. 24:1-12)
16
Breta ari sabat udah, Maria Makdala, Salumi, abaꞌ Maria inai Yakubos, meli kebala utai te ngau ngemiyak bangkai Isa. 2 Lam panam ari mingu pas mataari tumoh, sidaꞌ angkat ke kubor. 3 Sidaꞌ becakap jakoꞌ sidaꞌ, “Sapa weh te tauꞌ nalau kita ngansat batu te ngau nutop pintu kubor nyaꞌ?” 4 Uleh pas sidaꞌ datai kiyaꞌ, sidaꞌ medaꞌ batu besai nyaꞌ udah degansat. 5 Baroꞌ sidaꞌ tamaꞌ ke alam kubor, sidaꞌ tekanyat abaꞌ ma takot medaꞌ sikoꞌ urang pemudaꞌ te ngau jubah puteh dudok de sepiyak kanan sidaꞌ.6 Uleh pemudaꞌ nyaꞌ madah ke sidaꞌ, “Nang takot! Ku tauꞌ badaꞌ Kitaꞌ ngigaꞌ Isa sidaꞌ Nasaret te desaleb nyaꞌ, Ya niseꞌ ditoꞌ Ya udah idop ageꞌ. Pedaꞌ! Toꞌ mah teban sidaꞌ mengaleꞌ Ya. 7 Entoꞌ angkat ke kitaꞌ padah ke Petros abaꞌ kebala muret Ya te kebukai. Padah ke Ya nyau dulau ke Galelia; den kitaꞌ kaꞌ medaꞌ Ya lah, upa te udah depadah Ya ke kitaꞌ.”a 8 Baroꞌ kebala urang inoꞌ nyaꞌ keluar ari kubor nyaꞌ, sidaꞌ beguai nema sidaꞌ begetar abaꞌ takot. Sidaꞌ niseꞌ madah kebala utai ke urang nema sidaꞌ ageꞌ takot.
Isa nganyaꞌ direꞌ ke kebala muret Ya
[ 9 Udah Isa idop ageꞌ, lam-lam ari mingu Ya nganyaꞌ direꞌ ke Maria Makdalena. (Isa udah muru tujoh sitan ari ya.) 10 Baroꞌ Maria Makdalena angkat nusoi utai nyaꞌ ke kebala muret Isa. Tengan nyaꞌ sidaꞌ benong tusah abaꞌ nyabak. 11 Uleh pas sidaꞌ ninga Isa nyau idop ageꞌ, abaꞌ Maria udah medaꞌ Ya, sidaꞌ nadai pecayaꞌ.
12 Udah nyaꞌ Isa nganyaꞌ direꞌ ke dua ikoꞌ muret Ya ngau mua te bedau kalaꞌ senikoꞌ pedaꞌ. Tengan nyaꞌ senikoꞌ bejalai ke suteꞌ kampong. 13 Baroꞌ senikoꞌ bebalek abaꞌ nusoi ke kebala kawan te kebukai, uleh sidaꞌ nadai gaꞌ pecayaꞌ ke senikoꞌ.
14 Kepanyai, Isa nganyaꞌ direꞌ ke sebelas muret Ya, pas sidaꞌ tengan makai. Ya nganoꞌ sidaꞌ nema sidaꞌ ngai pecayaꞌ abaꞌ ati sidaꞌ ma degel, nema sidaꞌ nadai pecayaꞌ ke kebala urang te udah medaꞌ Ya idop ageꞌ. 15 Baroꞌ Ya madah ke sidaꞌ, “Angkat ke ugaꞌ dunia abaꞌ tusoi ke Brita Bayek ari Tuhan Allah ke ugaꞌ urang. 16 Ngenap urang te pecayaꞌ abaꞌ depaneꞌ kaꞌ deselamat, uleh sapa te nadai pecayaꞌ kaꞌ deukom. 17 Kebala tana toꞌ kaꞌ adai de urang te pecayaꞌ, sidaꞌ kaꞌ muru sitan ngau kuasa nama Ku, sidaꞌ kaꞌ becakap ngau kebala baasa te bedau sidaꞌ kelala. 18 Enteꞌ sidaꞌ megai ular abaꞌ nginom racon, sidaꞌ nadai mati. Abaꞌ sidaꞌ kaꞌ ngeletak jari sidaꞌ de atau urang te pedeh, abaꞌ urang nyaꞌ semoh.”
19 Udah Tuhan Isa madah piyaꞌ ke sidaꞌ, Ya terangkat ke sruga, baroꞌ dudok de sepiyak kanan Tuhan Allah. 20 Kebaꞌ kebala muret Ya angkat kiyaꞌ-kitoꞌ nusoi Brita Bayek ari Tuhan Allah. Tuhan Isa ngasoh sidaꞌ talah mulah kebala utai te nyaroh sampai kebala urang pecayaꞌ enteꞌ Brita Bayek te sidaꞌ tusoi nyaꞌ bamat-amat kenaꞌ.]