KITAB INYEL
MATIOS
PENULAU BECAKAP
KitabMatios toꞌ Brita Bayek te detules Matius, sikoꞌ ari dua belas muret Isa. Kitab toꞌ madah ke kita Brita Bayek enteꞌ Isa toꞌ mah Al Maseh Raja penyelamat te dedanyi Tuhan Allah. Ari Isa nyaꞌ mah Tuhan Allah nepat apa te udah dedanyi Ya de alam Perjanjian Lamaꞌ ke urang te deempu Ya. Isa adai ari bansa Yahudi abaꞌ idop upa sidaꞌ Yahudi. Uleh Brita Bayek nyaꞌ nadai peroꞌ ngau sidaꞌ Yahudi jaꞌ, uleh ngau ugaꞌ urang te de dunia.
KitabMatios toꞌ detuson terator; belaboh ari pengadai Isa, baroꞌ Ya depaneꞌ, Ya decuba Ibles kepalaꞌ bala sitan abaꞌ Ya belaboh melayan de Galelia. De Galelia, Ya ngajar abaꞌ nyemoh urang. Udah nyaꞌ, kitab toꞌ nusoi upa kati pejalai Isa ari Galelia ke Yerosalem abaꞌ apa te deasa Isa de mingu pemadoꞌ sebedau Ya mati. De Yerosalem Isa mayoh ngasa pemedeh, mati, uleh udah nyaꞌ Ya idop ageꞌ.
Pengajar te paleng kepaꞌ deajar Isa alam kitab Matios toꞌ, upa kati Pemrintah Tuhan Allah. Pemrintah te jakoꞌ Ya nadai sama abaꞌ Pemrintah te depiker sidaꞌ Yahudi. Pemrintah Tuhan Allah adai alam ati urang te patoh abaꞌ ngakoꞌ Isa ngau Raja. Pemrintah Tuhan Allah nyau adai de tengah kita, uleh jemah lah senta Isa datai ngau Raja, baroꞌ utai nyaꞌ bamat-amat pedaꞌ.
Isa lampar panai nyelas Prator Musa. Isa ngajar upa pitoꞌ:
1. Isa kotbah de buket. Ditoꞌ Isa ngajar kati sikap urang te pecayaꞌ ke Ya, apa te alah urang pulah, apa te kaꞌ detrimaꞌ sidaꞌ ari Tuhan Allah, abaꞌ upa kati pemansang idop kebala urang te deempu Tuhan Allah (pasal 5-7.)
2. Isa madah ke dua belas muret Ya, kati cara sidaꞌ ngreja tugas te depecayaꞌ ke sidaꞌ (pasal 10.)
3. Isa ngajar urang ngau kisah empama upa kati Pemrintah Tuhan Allah (pasal 13.)
4. Isa ngajar kati jadi muret Ya (pasal 18.)
5. Isa ngajar upa kati jaman pemadoꞌ abaꞌ kati penatai Anak Ensia jemah lah (pasal 24-25.)