Matios 1

KITAB INYEL

MATIOS

Tuson pureh Isa Al Maseh

Toꞌ mah tuson pureh kebala nama puyang jagang Isa Al Maseh,^a pureh Daot, pureh Abraham.

2 Abraham beranak ke Isak,

Isak beranak ke Yakob,

Yakob beranak ke Yehuda abaꞌ kebala menyadeꞌ ya,

3 Yehuda beranak ke Pires abaꞌ Serah, nama inai senikoꞌ Tamar.

Pires beranak ke Hesron,

Hesron beranak ke Ram,

4 Ram beranak ke Aminadap,

Aminadap beranak ke Nahason,

Nahason beranak ke Salmon,

5 Salmon beranak ke Buas, nama inai Buas Rahab,

Buas beranak ke Ubet, nama inai Ubet Rot,

Ubet beranak ke Isai,

6 Isai beranak ke raja Daot.

Daot beranak ke Salumo, inai Salumo abi bini Uria,

7 Salumo beranak ke Rehabiam,

Rehabiam beranak ke Abia,

Abia beranak ke Asa,

8 Asa beranak ke Yusapat,

Yusapat beranak ke Yuram,

Yuram beranak ke Usia,

9 Usia beranak ke Yutam,

Yutam beranak ke Ahas,

Ahas beranak ke Hiskia,

10 Hiskia beranak ke Manase,

Manase beranak ke Amon,

Amon beranak ke Yosia,

11 Yosia beranak ke Yekunya abaꞌ kebala menyadeꞌ ya jalai kebala sidaꞌ Israel debuai ke bansa Babel.

12 Udah sidaꞌ debuai ke Babel, Yekunya beranak ke Sealtel,

Sealtel beranak ke Serubabel,

13 Serubabel beranak ke Abihut,

Abihut beranak ke Elyakem,

Elyakem beranak ke Asor,

14 Asor beranak ke Sadok,

Sadok beranak ke Akem,

Akem beranak ke Eliut,

15 Eliut beranak ke Eliasar,

Eliasar beranak ke Matan,

Matan beranak ke Yakob,

16 Yakob beranak ke Yusop laki Maria, abaꞌ Maria toꞌ inai Isa te degelar Al Maseh.

17 Jadi, adai empat belas tuson pureh ari Abraham datai ke Daot, empat belas tuson pureh ari Daot datai ke sidaꞌ Israel debuai ke bansa Babel, abaꞌ empat belas pureh ari sidaꞌ Israel te debuai ke bansa Babel datai ke pengadai Al Maseh.

Pengadai Isa Al Maseh

18 Upa pitoꞌ mah kisah pengadai Isa Al Maseh. Jalai Maria inai Ya tengan betunang abaꞌ Yusop. Uleh sebedau senikoꞌ bejadi, Maria teka nyau nganong ari kuasa Roh Kudos. 19 Yusop, tunang Maria nyaꞌ urang te jujor abaꞌ bayek ati. Kebaꞌ nyaꞌ ya ngamoꞌ ngemalang tunang ya abaꞌ Maria ngau diyau-diyau, nema ya ngai ngemalu Maria de mua urang banyau. 20 Uleh tengan Yusop miker utai nyaꞌ, ya medaꞌ sikoꞌ mlikat Tuhan alam mimpi ya abaꞌ madah, “Yusop, pureh Daot, nang meh takot ngameꞌ Maria jadi bini meh, nema Miyak te dekanong ya ari Roh Kudos. 21 Maria kaꞌ ngadai sikoꞌ Miyak laki, abaꞌ meh alah mulah nama Ya Isa,^b nema Ya mah te kaꞌ nyelamat urang te deempu Ya ari kebala dusa sidaꞌ.”

22 Ugaꞌ utai nyaꞌ tejadi ngau nemoꞌ pemadah Tuhan ari nabi, 23 “Sikoꞌ urang inoꞌ dara kaꞌ nganong abaꞌ ngadai sikoꞌ miyak laki, abaꞌ sidaꞌ kaꞌ mulah nama Ya Imanuel.”^c (Reti Imanuel, “Tuhan Allah pabaꞌ kita.”)

24 Udah Yusop dani, ya mulah apa te deprintah mlikat Tuhan Allah ke ya. Ya ngameꞌ Maria jadi bini ya. 25 Uleh Yusop nadai bekamoh tinok abaꞌ Maria datai ke Maria ngadai Miyak laki nyaꞌ. Udah miyak nyaꞌ adai Yusop mulah nama Ya Isa.