Kebala sidaꞌ majos ngusong Isa
2
Udah Isa adai de kuta Betlehem de dairah Yudia de jeman Raja Herudes, datai mah kebala sidaꞌ majos ari Timor ke Yerosalem. 2 Sidaꞌ betanyaꞌ ke kebala urang, “Dini weh Miyak te baroꞌ adai nyaꞌ, te kaꞌ jadi raja sidaꞌ Yahudi? Kami udah medaꞌ piyanau Ya tumoh bong ke Timor, te ngau tana pengadai Ya. Abaꞌ kami kaꞌ datai nyemah Ya.”3 Pas Raja Herudes ninga utai nyaꞌ, ya abaꞌ ugaꞌ urang te de Yerosalem ma saban. 4 Baroꞌ Herudes ngemaiꞌ kebala kepalaꞌ imam abaꞌ urang te ahli alam Prator Musa betemu. Ya nanyaꞌ sidaꞌ dini Al Maseh kaꞌ adai.
5 Sidaꞌ nyawot, “De kuta Betlehem, de dairah Yudia, upa te udah detules alam kitab nabi,
6 ‘O sidaꞌ kuta Betlehem, de dairah Yudia,
entoꞌ kuta kitaꞌ temasok kuta penteng de entara kebala kuta penteng te mrintah Yudia,
nema ari kuta kitaꞌ mah kaꞌ adai sikoꞌ urang pemimpen,
te kaꞌ mimpen Israel, urang te deempu Ku.’ ”a
7 Baroꞌ diyau-diyau Raja Herudes ngumai kebala sidaꞌ majos nyaꞌ abaꞌ nanyaꞌ sidaꞌ kemaya percis piyanau nyaꞌ semaru pedaꞌ. 8 Udah nyaꞌ ya nyuroh sidaꞌ ke kuta Betlehem, jakoꞌ ya, “Angkat abaꞌ gigaꞌ bamat-amat ke Miyak nyaꞌ. Enteꞌ kitaꞌ udah nemu Ya, padah ke ku, isaꞌ ku datai gaꞌ nyemah Ya.”
9 Udah ninga te depadah Raja Herudes, sidaꞌ angkat. Sidaꞌ medaꞌ ageꞌ piyanau te sama te udah depedaꞌ sidaꞌ bong ke Timor, abaꞌ sidaꞌ bejalai nunaꞌ piyanau nyaꞌ. Piyanau nyaꞌ begansat de mua sidaꞌ sampai badoꞌ pas de teban Miyak nyaꞌ diyau. 10 Pas sidaꞌ medaꞌ piyanau nyaꞌ, gaga amat mah sidaꞌ. 11 Baroꞌ kebala sidaꞌ majos tamaꞌ ke rumah nyaꞌ abaꞌ medaꞌ Miyak nyaꞌ abaꞌ Maria inai Ya, baroꞌ nyungkon nyemah Ya. Sidaꞌ mukaꞌ badah te ngau nepoꞌ reta bena abaꞌ mereꞌ pesemah, mas, kemenyan, abaꞌ mor ke Ya. 12 Nema Tuhan Allah udah ngerot kebala sidaꞌ majos bebalek ke Raja Herudes alam mimpi, kebaꞌ kebala sidaꞌ pulai ke teban asal sidaꞌ ari jalai te kebukai.
Yusop ngemaiꞌ Isa abaꞌ Maria rari ke Meser
13 Udah kebala sidaꞌ majos nyaꞌ angkat, mlikat Tuhan Allah nganyaꞌ direꞌ ke Yusop alam mimpi abaꞌ madah, “Angkat, baiꞌ ke Miyak nyaꞌ abaꞌ inai Ya, rari ke Meser abaꞌ diyau den sampai Ku madah ke meh ageꞌ, nema Raja Herudes kaꞌ ngigaꞌ abaꞌ kaꞌ munoh Ya.”
14 Baroꞌ Yusop dani, abaꞌ malam nyaꞌ mah gaꞌ ya ngemaiꞌ Miyak nyaꞌ abaꞌ Maria inai Miyak nyaꞌ, abaꞌ sidaꞌ rari ke Meser. 15 Sidaꞌ diyau de Meser datai ke Raja Herudes mati. Utai nyaꞌ tejadi isaꞌ temoꞌ apa te udah depadah Tuhan Allah ari sikoꞌ nabi, “Ku ngumai Anak Ku keluar ari Meser.”b
Kebala miyak laki de Betlehem debunoh
16 Pas Raja Herudes tauꞌ badaꞌ direꞌ deakal sidaꞌ majos nyaꞌ, ya ranseng amat. Udah nyaꞌ Raja Herudes mrintah kebala prajuret ya isaꞌ munoh ugaꞌ miyak laki de Betlehem abaꞌ sekamat nyaꞌ, nyaꞌ mah kebala miyak te umor dua taon ke baroh. Raja Herodes ngitong umor nyaꞌ nunaꞌ te depadah sidaꞌ majos ke ya semaru sidaꞌ medaꞌ piyanau nyaꞌ.
17 Kebaꞌ temoꞌ mah apa te udah depadah Tuhan Allah ari nabi Yeremia,
18 “De kuta Rama kedinga goꞌ urang nyabak,
bekenang uleh ke priyu.
Rahel nyabak ke kebala anak ya abaꞌ ya ngai deibor,
nema sidaꞌ niseꞌ ageꞌ.”c
Yusop ngemaiꞌ Isa abaꞌ Maria pulai ke Israel
19 Yusop ageꞌ de Meser pas Raja Herudes mati. Baroꞌ sikoꞌ mlikat Tuhan Allah nganyaꞌ direꞌ ke Yusop alam mimpi. 20 Mlikat nyaꞌ madah, “Dani! Baiꞌ ke Miyak nyaꞌ abaꞌ inai Ya, pulai ke tanah Israel, nema sidaꞌ te kaꞌ munoh Miyak nyaꞌ nyau mati.” 21 Yusop dani, baroꞌ ngemaiꞌ Miyak nyaꞌ abaꞌ inai Ya pulai ke tanah Israel.
22 Uleh Yusop ninga enteꞌ Arkilaos, anak Raja Herudes, te jadi raja dairah Yudia, kebaꞌ Yusop takot angkat ken. Ninga piyaꞌ Yusop angkat ke dairah Galelia, nema udah depadah Tuhan Allah alam mimpi. 23 Datai ke dairah Galelia, ya diyau de kuta te nama Nasaret. Ngau cara nyaꞌ temoꞌ mah apa te depadah Tuhan Allah ari kebala nabi, senta Al Maseh datai, Ya kaꞌ desebot, “Sidaꞌ Nasaret.”