Yohanes Pemaneꞌ
3
Betaon-taon udah nyaꞌ, Yohanes Pemaneꞌ datai ke tanah luwah te beengkrangan te de dairah Yudia abaꞌ madah pesau ari Tuhan Allah. 2 Yohanes madah ngau goꞌ te sareng, jakoꞌ ya, “Dudi ke kebala dusa kitaꞌ, nema Pemrintah Tuhan Allah nyau semak!” 3 Yohanes toꞌ mah te demaksot uleh nabi Yesaya jalai ya madah,“Adai urang te madah ngau goꞌ te sareng de tanah luwah te beengkrangan,
‘Ageh ke jalai ke Tuhan,
bujor ke jalai ngau Ya.’ ”a
4 Yohanes Pemaneꞌ ngau selawar baju te depulah ari bulu unta abaꞌ sementeng ya ari kulet jelu, pemakai ya buntak abaꞌ ilap. 5 Mayoh urang ari Yerosalem, ari ugaꞌ dairah Yudia abaꞌ dairah sekamat Yordan, datai ninga Yohanes ngajar. 6 Sidaꞌ ngakoꞌ kebala dusa sidaꞌ, abaꞌ Yohanes maneꞌ sidaꞌ de sungai Yordan.
7 Uleh pas ya medaꞌ mayoh sidaꞌ Parisi abaꞌ sidaꞌ Saduki datai kiyaꞌ kaꞌ depaneꞌ gaꞌ, ya madah ke sidaꞌ, “Oi kitaꞌ pureh ular te bisa, sapa te madah kitaꞌ tauꞌ rari ari ukom Tuhan Allah te kaꞌ datai? 8 Enteꞌ kitaꞌ bamat-amat udah nudi kebala dusa kitaꞌ, anyaꞌ ke nyaꞌ ari cara idop kitaꞌ, sama upa pon kayu te ngasel buah te bayek. 9 Nang miker alam ati kitaꞌ kedireꞌ, ‘Kami selamat ari ukom Tuhan Allah nema Abraham puyang jagang kami!’ Ku madah ke kitaꞌ: Tuhan Allah tauꞌ mulah pureh Abraham ari kebala batu toꞌ! 10 Tuhan Allah kaꞌ ngukom kebala urang ari bansa Israel te nadai idop nunaꞌ penekaꞌ Ya, upa urang nebang kayu te rumau ngau kapak udah nyaꞌ debuai ke alam api.
11 Ku maneꞌ kitaꞌ ngau aiꞌ ngau tana kitaꞌ udah nudi kebala dusa kitaꞌ, uleh Ya te kaꞌ datai nyaꞌ lebeh bekuasa ari ku, datai ke mukaꞌ sepatu Ya mah ku nadai patot. Ya kaꞌ maneꞌ kitaꞌ ngau Roh Kudos abaꞌ ngau api. 12 Ya siap ngadel ugaꞌ ensia abaꞌ nyemeh urang te kenaꞌ ari urang te jat. Ya upa urang te beuma, nyemeh ganom te biseꞌ ari ampaꞌ ngau tampeꞌ. Ganom te biseꞌ kaꞌ Ya pajak ke alam durong, uleh Ya kaꞌ nunu ampaꞌ alam api te nitauꞌ padam.”
Isa depaneꞌ Yohanes
13 Pas tengan nyaꞌ datai mah Isa ari dairah Galelia abaꞌ mintaꞌ Yohanes maneꞌ Ya de sungai Yordan. 14 Uleh tunaꞌ sa Yohanes ngai abaꞌ madah, “Ku te alah Wan paneꞌ, uleh Wan te kaꞌ mintaꞌ ku maneꞌ Wan!”
15 Uleh Isa nyawot ya, “Pulah jaꞌ nunaꞌ te jakoꞌ Ku, nema ngau cara nyaꞌ mah nemoꞌ ugaꞌ te dekedekaꞌ Tuhan Allah.” Kebaꞌ nyaꞌ Yohanes maneꞌ Isa.