Isa decuba Ibles kepalaꞌ bala sitan
4
aBaroꞌ Isa debaiꞌ Roh Kudos ke tanah luwah te beengkrangan isaꞌ decuba Ibles kepalaꞌ bala Sitan. 2 Diyaꞌ Isa nadai makai sama sekaleꞌ selamaꞌ empat puloh ari empat puloh malam, kepanyai Ya ma lapar. 3 Baroꞌ datai mah Ibles te selareh encuba isaꞌ urang mulah penyalah, jakoꞌ ya, “Enteꞌ Wan Anak Tuhan Allah, suroh ke kebala batu toꞌ jadi ruti.”4 Uleh Isa nyawot ya, “Adai detules alam Kitab Suci, ‘Ensia idop nadai semoꞌ ari ruti gena, uleh ari ngenap pemadah te Tuhan Allah padah.’ ”b
5 Udah nyaꞌ Ibles ngemaiꞌ Isa ke Yerosalem, kuta suci, abaꞌ ngasoh Ya diri de atau bumong Rumah Kudos Tuhan Allah. 6 Baroꞌ Ibles madah, “Enteꞌ Wan Anak Tuhan Allah, laboh ke direꞌ Wan ke baroh nyen! Nema adai detules alam Kitab Suci,
‘Tuhan Allah kaꞌ mrintah kebala mlikat Ya isaꞌ nalau Wan
abaꞌ nyamot Wan ngau jari sidaꞌ,
isaꞌ kaki Wan nadai tacah batu.’ ”c
7 Isa madah, “Adai gaꞌ detules alam Kitab Suci, ‘Nang encuba Tuhan Allah direꞌ!’ ”d
8 Baroꞌ Ibles ngemaiꞌ Isa ke punyong buket te ma tingeꞌ abaꞌ nganyaꞌ ke Ya ugaꞌ pemrintah de dunia toꞌ te lampar kaya abaꞌ lampar mewah. 9 Ibles madah, “Ugaꞌ nyaꞌ kaꞌ ku bereꞌ ke Wan, enteꞌ Wan nyungkon nyemah ku.”
10 Isa madah, “Oi, Sitan,e rari direꞌ ari mua Ku! Adai detules alam Kitab Suci, ‘Direꞌ alah nyemah Tuhan, Allah direꞌ, abaꞌ peroꞌ Ya mah te alah direꞌ tunaꞌ.’ ”f
11 Baroꞌ Ibles angkat nudi Isa, udah nyaꞌ kebala mlikat datai ngelayan Isa.
Isa belaboh melayan de Galelia
12 Pas Isa ninga enteꞌ Yohanes Pemaneꞌ nyau depenyara, Ya pulai ke dairah Galelia. 13 Ya nudi kuta Nasaret abaꞌ diyau de kuta Kapernaum de tisi danau Galelia, de tanah Sebulon abaꞌ Naptali. 14 Isa mulah piyaꞌ isaꞌ temoꞌ mah pemadah Tuhan Allah te detusoi nabi Yesaya,
15 “Dinga kah, kitaꞌ te diyau de tanah Sebulon abaꞌ Naptali,
de sepanyai jalai mansang ke danau, dairah sebrang sungai Yordan,
Galelia teban urang te ukai Yahudi diyau.
16 Kebala urang te idop de teban te petang
udah medaꞌ trang te besai.
Kebala sidaꞌ te idop de dairah te petang abaꞌ detamet kuasa pemati,
udah medaꞌ trang nyaꞌ tumoh.”g
17 Tengan nyaꞌ mah, Isa belaboh madah pesau nyaꞌ ke kebala urang banyau, “Dudi ke kebala dusa kitaꞌ, nema Pemrintah Tuhan Allah nyau semak!”
Isa mileh kebala muret Ya te semaru
18 Pas Isa tengan bejalai de tisi danau besai Galelia, Ya medaꞌ dua ikoꞌ urang menyadeꞌ, senikoꞌ nyaꞌ Simon te degelar Petros abaꞌ Andrias menyadeꞌ ya. Senikoꞌ tengan nyala ikan de danau nyaꞌ, nema nyaꞌ mah kreja senikoꞌ ngenap ari. 19 Isa madah ke senikoꞌ, “Boh, nerudi Ku, belaboh ari sari toꞌ senikoꞌ nadai bekreja ngigaꞌ ikan ageꞌ, uleh Ku kaꞌ ngasoh senikoꞌ ngigaꞌ kebala urang isaꞌ pecayaꞌ ke Ku.” 20 Ninga piyaꞌ senikoꞌ sintak nudi jala abaꞌ nerudi Isa.
21 Udah nyaꞌ Isa bejalai ageꞌ. Nadai jaoh ari teban nyaꞌ, Ya medaꞌ dua ikoꞌ menyadeꞌ te kebukai Yakubos abaꞌ Yohanes, senikoꞌ anak Sibedios. Tengan nyaꞌ senikoꞌ abaꞌ apai senikoꞌ ageꞌ nyemaik jala alam prau. Isa ngumai senikoꞌ 22 abaꞌ senikoꞌ sintak nudi prau abaꞌ apai senikoꞌ, baroꞌ senikoꞌ nerudi Isa.
Isa ngajar abaꞌ nyemoh mayoh urang
23 Isa ngunyong ugaꞌ wilayah Galelia, Ya ngajar de kebala rumah te jalai sidaꞌ Yahudi nyemah Tuhan Allah, Ya madah Brita Bayek upa kati Pemrintah Tuhan Allah, abaꞌ nyemoh kebala urang ari brena macam pemedeh. 24 Brita apa te udah depulah Isa udah nyebar de ugaꞌ dairah Seria, kebaꞌ mayoh kebala urang te pedeh debaiꞌ ngusong Ya. Kebala urang te debaiꞌ ke Isa nyaꞌ, sidaꞌ te ngasa brena macam pemedeh abaꞌ merinsaꞌ, te kesarong, te gila babi, abaꞌ te lumpoh. Isa nyemoh ugaꞌ sidaꞌ. 25 Kebaꞌ mayoh urang nerudi Isa. Adai te ari Galelia, Dekapoles, Yerosalem, Yudia, abaꞌ ari sebrang sungai Yordan.