Matios 5

Urang te betuah

Pas Isa medaꞌ urang banyau nyaꞌ, Ya nikeꞌ ke buket abaꞌ dudok. Udah nyaꞌ datai mah kebala muret Isa begugoꞌ ngelileng Ya. 2 Baroꞌ Isa belaboh ngajar sidaꞌ, jakoꞌ Ya,

3 “Betuah amat urang te niseꞌ utai, te idop peroꞌ bapegai ke Tuhan Allah,

nema sidaꞌ nyaꞌ mah te idop de alam Pemrintah Tuhan Allah.

4 Betuah amat urang te tusah,

nema sidaꞌ kaꞌ deibor.

5 Betuah amat urang te renah ati,

nema sidaꞌ kaꞌ nerimaꞌ te udah dedanyi Tuhan Allah.

6 Betuah amat urang te bamat-amat kaꞌ nunaꞌ kedekaꞌ Tuhan Allah, upa urang te lapar abaꞌ awos ke te depakai,

nema sidaꞌ kaꞌ depuas.

7 Betuah amat urang te nglebang abaꞌ pangan bukai,

nema Tuhan Allah kaꞌ nglebang ke sidaꞌ.

8 Betuah amat urang te breseh ati,

nema sidaꞌ kaꞌ medaꞌ Tuhan Allah.

9 Betuah amat urang te ngemaiꞌ damai ke pangan bukai,

nema sidaꞌ kaꞌ desebot kebala anak Tuhan Allah.

10 Betuah amat urang te ngasa pemedeh tegal nunaꞌ kedekaꞌ Tuhan Allah,

nema sidaꞌ nyaꞌ te idop alam Pemrintah Tuhan Allah.

11 Betuah amat kitaꞌ te depenadai, depedeh, depejaiꞌ tegal kitaꞌ nerudi Ku. 12 Kebala nabi te dulau ari kitaꞌ sigeꞌ ngasa pemedeh upa piyaꞌ, kebaꞌ nyaꞌ ati kitaꞌ alah bamat-amat gaga, nema upah kitaꞌ besai de sruga.”

Garam dunia abaꞌ trang dunia

13 “Kitaꞌ mah garam dunia. Enteꞌ garam nyaꞌ nyau tabar, tauꞌ nadai ya desuroh masen ageꞌ? Niseꞌ guna ageꞌ bukai ari debuai abaꞌ datijak urang.

14 Kitaꞌ mah terang dunia. Kuta te adai de atau buket nadai talah tapok. 15 Piyaꞌ gaꞌ, niseꞌ urang nungon kelita baroꞌ nungkop ngau kulak. Uleh ya kaꞌ nepoꞌ kelita nyaꞌ de atau teban te tingeꞌ, isaꞌ ugaꞌ te de rumah nyaꞌ tampak. 16 Piyaꞌ gaꞌ, kitaꞌ alah jadi terang de mua urang. Idop bayek kah isaꞌ urang bukai medaꞌ kebala pemulah kitaꞌ te bayek abaꞌ sidaꞌ muji Apai kitaꞌ te de sruga.”

Isa abaꞌ Prator Tuhan Allah te detules Musa

17 “Nang kitaꞌ miker, Ku datai ke dunia toꞌ ngau ngapos Prator Tuhan Allah te detules Musa abaꞌ kitab kebala nabi. Ku datai nadai ngapos nyaꞌ, uleh nemoꞌ ugaꞌ te detules alam nyaꞌ abaꞌ nunyok reti te pengamat. 18 Ku madah ngau pengamat ke kitaꞌ, selamaꞌ langet abaꞌ bumi bedau lenyau, datai ke suteꞌ mah niseꞌ te debalang ari Prator Tuhan Allah te detules Musa, bayek urop bayek titek, sampai ugaꞌ te detules alam Prator nyaꞌ tejadi. 19 Enteꞌ adai urang te nadai patoh ke salah suteꞌ Prator Tuhan Allah te detules Musa amat mah utai nyaꞌ engkaꞌ met, abaꞌ ngajar urang bukai isaꞌ nadai patoh gaꞌ, urang nyaꞌ dudok de Pemrintah Tuhan Allah te paleng baroh. Uleh urang te patoh ke Prator Tuhan Allah te detules Musa abaꞌ ngajar urang bukai isaꞌ patoh gaꞌ, urang nyaꞌ dudok de Pemrintah Tuhan Allah te paleng tingeꞌ. 20 Kebaꞌ Ku madah ngau pengamat ke kitaꞌ, kitaꞌ nitauꞌ tamaꞌ ke Pemrintah Tuhan Allah enteꞌ kitaꞌ nadai setia nunaꞌ te dekenekaꞌ Tuhan Allah lebeh ari kebala urang te ahli alam Prator Musa abaꞌ kebala sidaꞌ Parisi.”

Nang ranseng ke pangan bukai

21 “Kitaꞌ udah ninga apa te deajar ke puyang jagang kita meliyaꞌ, ‘Nang munoh, sapa te munoh alah deukom.’ 22 Uleh Ku madah ke kitaꞌ: Urang te ranseng ke urang bukai, alah deukom. Urang te melicak urang bukai, alah debaiꞌ ke pengadel agama. Abaꞌ urang te madah urang bukai budu mawa, patot debuai ke alam api neraka.

23 Kebaꞌ nyaꞌ, enteꞌ kitaꞌ tengan mereꞌ kurban pesemah de mesbah ke Tuhan Allah, uleh kitaꞌ sintak ingat adai de entara kebala menyadeꞌ kitaꞌ te pedeh ati ka kitaꞌ, 24 dudi ke pesemah nyaꞌ de mua mesbah. Baroꞌ angkat ngusong menyadeꞌ kitaꞌ nyaꞌ abaꞌ bedamai kah. Udah nyaꞌ, tauꞌ mah kitaꞌ bebalek ageꞌ abaꞌ mereꞌ pesemah ke Tuhan Allah.

25 Enteꞌ adai urang te ngadu kitaꞌ ke akem isaꞌ kitaꞌ desidang, sigat ke bedamai abaꞌ ya pas kitaꞌ tengan sama bejalai mansang ngusong akem. Enteꞌ kitaꞌ nadai bedamai dulau, urang nyaꞌ kaꞌ nyerah kitaꞌ ke akem, baroꞌ akem nyerah kitaꞌ ke plisi, abaꞌ plisi majak kitaꞌ ke penyara. 26 Ku madah ngau pengamat ke kitaꞌ, kitaꞌ nitauꞌ keluar ari penyara nyaꞌ enteꞌ kitaꞌ bedau mayar ugaꞌ duet te detuntot akem ke kitaꞌ.”

Nang baraꞌ

27 “Kitaꞌ udah ninga pengajar te madah, ‘Nang baraꞌ.’ 28 Uleh Ku madah ke kitaꞌ: Ngenap urang te nilek urang inoꞌ blumaꞌ napsu ke ya, urang nyaꞌ udah baraꞌ abaꞌ inoꞌ nyaꞌ alam ati ya. 29 Enteꞌ mata kanan kitaꞌ te nyuroh kitaꞌ mulah dusa, kruweng ke mata nyaꞌ abaꞌ buai! Lebeh bayek kitaꞌ niseꞌ ageꞌ salah suteꞌ anggota tuboh, ari pada ugaꞌ tuboh kitaꞌ debuai ke alam api neraka. 30 Enteꞌ jari kanan kitaꞌ te nyuroh kitaꞌ mulah dusa, kempat abaꞌ buai kah! Lebeh bayek kitaꞌ niseꞌ ageꞌ salah suteꞌ anggota tuboh kitaꞌ, ari pada ugaꞌ tuboh kitaꞌ tamaꞌ ke api neraka.”

Nang suwayak

31 “Kitaꞌ udah ninga pengajar te madah, ‘Ngenap urang laki te nyuwayak bini direꞌ, alah mereꞌ surat suwayak ke ya. 32 Uleh Ku madah ke kitaꞌ: Kebala laki nitauꞌ nyuwayak bini, bukai ari enteꞌ bini ya baraꞌ. Enteꞌ bini ya nadai baraꞌ uleh laki ya nyuwayak ya, laki ya nyuroh bini ya baraꞌ enteꞌ bini ya belaki ageꞌ. Abaꞌ urang laki te jadi ke inoꞌ te udah suwayak nyaꞌ, baraꞌ gaꞌ.”

Nang besumpah

33 “Kitaꞌ udah ninga gaꞌ apa te deajar ke puyang jagang kita meliyaꞌ, ‘Enteꞌ kitaꞌ udah besumpah de mua Tuhan Allah, nang kitaꞌ ngelangar. Pulah ke te udah kitaꞌ sumpah ke nyaꞌ ke Tuhan Allah.’ 34 Uleh Ku madah ke kitaꞌ: Nang sama sekaleꞌ besumpah demi sruga, nema sruga teban Tuhan Allah dudok mrintah dunia toꞌ. 35 Nang besumpah demi bumi, nema bumi teban Tuhan Allah betijak. Nang besumpah demi Yerosalem, nema Yerosalem nyaꞌ kuta empu Raja Besai, 36 abaꞌ nang gaꞌ kitaꞌ besumpah demi palaꞌ direꞌ, nema kitaꞌ niseꞌ kuasa muteh abaꞌ ngitam selamar bok. 37 Enteꞌ ‘auꞌ’ padah jaꞌ ‘auꞌ’, enteꞌ ‘nadai’ padah jaꞌ ‘nadai’, nema apa te lebeh ari nyaꞌ datai ari Ibles kepalaꞌ bala Sitan.”

Nang malas te jat ngau jat

38 “Kitaꞌ udah ninga pengajar te madah, ‘Mata ganti mata’ abaꞌ gigi ganti gigi.’ 39 Uleh Ku madah ke kitaꞌ: Nang kitaꞌ ngelawan urang te mulah jat ke kitaꞌ. Enteꞌ urang nampar pipi kanan kitaꞌ, bereꞌ ke gaꞌ pipi kibaꞌ kitaꞌ ke ya. 40 Enteꞌ adai urang te nuntot kitaꞌ ke pengadel abaꞌ kaꞌ ngameꞌ selawar baju kitaꞌ, bereꞌ ke gaꞌ jubah kitaꞌ. 41 Enteꞌ adai urang mukong kitaꞌ bejalai jaoh nangong barang ya, bejalai ke kitaꞌ dua kaleꞌ lipat ari te depintaꞌ ya. 42 Enteꞌ urang mintaꞌ utai ke kitaꞌ, bereꞌ kah. Abaꞌ nang kitaꞌ ngai enteꞌ urang kaꞌ minyau utai ke kitaꞌ.”

Kaseh ke munsoh kitaꞌ

43 “Kitaꞌ udah ninga pengajar te madah, ‘Kaseh ke sama direꞌ ensia’ abaꞌ ‘kareh ke munsoh kitaꞌ.’ 44 Uleh Ku madah ke kitaꞌ: Kaseh ke munsoh kitaꞌ abaꞌ pradua ke urang te medeh kitaꞌ. 45 Enteꞌ kitaꞌ mulah piyaꞌ, kitaꞌ bamat-amat jadi anak Apai kitaꞌ te de sruga. Nema Ya mah te numoh mataari ke urang te bayek abaꞌ ke urang te jat, Ya gaꞌ te nuron ujan ke urang te idop nunaꞌ penekaꞌ Ya abaꞌ urang te nadai idop nunaꞌ penekaꞌ Ya. 46 Enteꞌ kitaꞌ peroꞌ kaseh ke urang te kaseh ke kitaꞌ, patot nadai kitaꞌ nerimaꞌ upah? Nadai! Nema penageh pajak sigeꞌ mulah piyaꞌ gaꞌ. 47 Abaꞌ enteꞌ kitaꞌ peroꞌ bayek ke kebala kawan kitaꞌ, adai piyaꞌ lebeh kitaꞌ ari urang bukai? Niseꞌ! Nema kebala urang te nadai ngelala Tuhan Allah sigeꞌ mulah piyaꞌ gaꞌ. 48 Kaseh Apai kitaꞌ te de sruga niseꞌ pejah, kebaꞌ nyaꞌ tunyok ke gaꞌ kaseh kitaꞌ te niseꞌ pejah upa kaseh Ya.”