Pengajar kati mulah te bayek
6
Isa nyamong pengajar Ya ageꞌ, jakoꞌ Ya, “Ati-ati! Nang kitaꞌ mamer pemayek kitaꞌ de mua urang bukai isaꞌ sidaꞌ merati kitaꞌ. Enteꞌ kitaꞌ mulah piyaꞌ, kitaꞌ nadai buleh upah ari Apai kitaꞌ te de sruga.2 Kebaꞌ nyaꞌ, enteꞌ kitaꞌ mereꞌ kebala utai ke urang mesken, nang mamer utai nyaꞌ upa te depulah kebala urang te budi-budi bayek. Sidaꞌ gah mereꞌ utai ke urang te mesken de kebala rumah te jalai sidaꞌ Yahudi nyemah Tuhan Allah abaꞌ de jalai besai, isaꞌ de puji urang. Ku madah ke kitaꞌ: Nema sidaꞌ udah depuji urang, nyaꞌ mah upah sidaꞌ. 3 Uleh enteꞌ kitaꞌ mereꞌ kebala utai ke urang mesken, nang sampai jari kibaꞌ kitaꞌ tauꞌ badaꞌ apa te depulah jari kanan kitaꞌ. 4 Maksot Ku, pemereꞌ kitaꞌ nyaꞌ nadai perlu de ketauꞌ urang bukai. Apai kitaꞌ te de sruga medaꞌ te depulah kitaꞌ ngau cara diyau-diyau, abaꞌ Ya kaꞌ mereꞌ upah ke kitaꞌ.”
Pengajar kati bradua
5 “Abaꞌ asa kitaꞌ bradua, nang upa kebala urang te budi-budi bayek. Sidaꞌ gah bradua blumaꞌ diri de rumah teban jalai sidaꞌ Yahudi nyemah Tuhan Allah abaꞌ de kebala simpang jalai besai isaꞌ depuji urang. Ku madah ke kitaꞌ: Nema sidaꞌ udah depuji urang, nyaꞌ mah upah sidaꞌ. 6 Uleh enteꞌ kitaꞌ bradua, tamaꞌ ke pangken kitaꞌ abaꞌ tikop ke pintu. Bradua ke diyau-diyau diyaꞌ ke Apai kitaꞌ te adai de teban te nadai deketauꞌ urang. Apai kitaꞌ medaꞌ te depulah kitaꞌ diyau-diyau nyaꞌ abaꞌ Ya kaꞌ mereꞌ upah ke kita.
7 Enteꞌ kitaꞌ bradua, nang upa urang te nadai ngelala Tuhan Allah. Sidaꞌ bradua ngulang cakap te sama. Sangkaꞌ sidaꞌ enteꞌ pradua sidaꞌ panyai, pradua sidaꞌ pesti detinga. 8 Uleh kitaꞌ nang upa sidaꞌ, nema sebedau kitaꞌ mintaꞌ ke Apai kitaꞌ, Ya udah tauꞌ badaꞌ apa te deperlu kitaꞌ. 9 Enteꞌ kitaꞌ bradua, padah upa pitoꞌ,
‘Apai kami te de sruga,
kami bradua isaꞌ ugaꞌ urang nyunyong tingeꞌ Wan te kudos.
10 Kami bradua isaꞌ Wan datai jadi Raja mrintah alam idop ugaꞌ urang,
abaꞌ isaꞌ penekaꞌ Wan tejadi de bumi upa de sruga.
11 Bereꞌ ke pemakai ke kami te bayah ngau sari toꞌ.
12 Ampon ke penyalah kami, upa kami ngampon urang te udah mulah penyalah ke kami.
13 Nang Wan ngengaꞌ kami mulah dusa enteꞌ kami tengan decuba,
uleh lepas ke kami ari kuasa te jat.a
[Nema peroꞌ Wan mah Raja te bekuasa abaꞌ te patot dejunyong tingeꞌ belama raya. Amen.]’b
14 Nema enteꞌ kitaꞌ ngampon penyalah urang ke kitaꞌ, Apai kitaꞌ te de sruga sigeꞌ kaꞌ ngampon kitaꞌ. 15 Uleh enteꞌ kitaꞌ ngai ngampon penyalah urang, Apai kitaꞌ te de sruga sigeꞌ ngai ngampon penyalah kitaꞌ.”
Pengajar kati puasa
16 “Enteꞌ kitaꞌ puasa, nang sengaja mulah mua direꞌ upa urang te reyu, nunaꞌ te gah depulah urang te budi-budi bayek. Sidaꞌ mulah mua direꞌ piyaꞌ, isaꞌ urang tauꞌ badaꞌ sidaꞌ tengan puasa. Ku madah ke kitaꞌ: Nema sidaꞌ udah depuji urang, nyaꞌ mah upah sidaꞌ. 17 Uleh enteꞌ kitaꞌ puasa, empungas ke mua kitaꞌ abaꞌ binyak ke bok kitaꞌ, 18 isaꞌ niseꞌ urang te tauꞌ badaꞌ kitaꞌ puasa, bukai ari Apai kitaꞌ te nadai pedaꞌ nyaꞌ. Ya medaꞌ te depulah kitaꞌ diyau-diyau nyaꞌ, abaꞌ Ya kaꞌ mereꞌ upah ke kitaꞌ.”
Pengajar kati nimon reta bena
19 “Nang kitaꞌ nimon reta bena de bumi toꞌ. De bumi toꞌ sampok abaꞌ tegeran ngerusak ya abaꞌ pencuri mungkar abaꞌ encuri ya. 20 Uleh timon ke reta bena kitaꞌ de sruga. De sruga sampok abaꞌ tegeran nadai ngerusak ya, abaꞌ pencuri nadai mungkar abaꞌ encuri ya. 21 Nema dini reta bena kitaꞌ adai, diyaꞌ mah ati abaꞌ pemiker kitaꞌ.
22 Mata toꞌ kelita tuboh. Enteꞌ mata kitaꞌ bayek, terang mah ugaꞌ tuboh kitaꞌ. 23 Enteꞌ mata kitaꞌ nadai bayek, petang mah ugaꞌ tuboh kitaꞌ. Enteꞌ terang te adai de tuboh kitaꞌ nyaꞌ petang, lampar pemetang idop kitaꞌ!
24 Kitaꞌ nitauꞌ ngelayan dua tuan. Nema asa piyaꞌ, pesti kitaꞌ lebeh kaseh ke tuan te sikoꞌ ari te bukai abaꞌ pesti kitaꞌ setia ke tuan te sikoꞌ ari te bukai. Piyaꞌ gaꞌ kitaꞌ nitauꞌ ngelayan Tuhan Allah blumaꞌ gila duet.”
Nang saban
25 “Ku madah ke kitaꞌ, nang saban ke pengidop kitaꞌ, apa te kaꞌ kitaꞌ pakai inom, abaꞌ nang saban ke tuboh kitaꞌ, ke apa te kaꞌ kitaꞌ ngau. Nadai piyaꞌ idop kitaꞌ toꞌ lebeh penteng ari apa te kitaꞌ pakai abaꞌ tuboh kitaꞌ toꞌ lebeh penteng ari selawar baju te kitaꞌ ngau? 26 Cuba kitaꞌ pedaꞌ kebala burong. Sidaꞌ nadai namak abaꞌ nadai ngetau, abaꞌ niseꞌ nimon pemakai alam durong, amat piyaꞌ debereꞌ Apai kitaꞌ te de sruga makai. Nadai piyaꞌ kitaꞌ jaoh lebeh brega ari kebala burong nyaꞌ? 27 Sapa piyaꞌ de entara kitaꞌ te tauꞌ namah umor kitaꞌ panyai geꞌ tegal saban?
28 Abaꞌ ngapa piyaꞌ kitaꞌ saban ke selawar baju te kaꞌ kitaꞌ ngau? Cuba kitaꞌ medaꞌ kebala bunga te tumoh de babas, nadai bekreja abaꞌ nadai nenon. 29 Uleh Ku madah ke kitaꞌ Raja Salomo amat kaya nadai ngau baju te pemayek kebala bunga nyaꞌ. 30 Enteꞌ Tuhan Allah ngelagaꞌ kebala bunga nyaꞌ, te sari toꞌ adai abaꞌ pagi lah kaꞌ detibar ke alam api, apa klageꞌ kitaꞌ, uleh kitaꞌ nadai pecayaꞌ ke Ya. 31 Kebaꞌ nyaꞌ nang kitaꞌ saban abaꞌ madah, apa te kaꞌ kami pakai, apa te kaꞌ kami inom, abaꞌ apa te kaꞌ kami ngau? 32 Nema peroꞌ kebala urang te nadai ngelala Tuhan Allah mah te selareh ngigaꞌ ugaꞌ nyaꞌ. Apai kitaꞌ te de sruga tauꞌ badaꞌ enteꞌ kitaꞌ perlu ugaꞌ nyaꞌ. 33 Uleh te paleng penteng kitaꞌ alah bamat-amat ngigaꞌ kedekaꞌ Tuhan Allah Raja kitaꞌ nyaꞌ, abaꞌ nunaꞌ penekaꞌ Ya. Abaꞌ ugaꞌ nyaꞌ debereꞌ Ya ke kitaꞌ. 34 Kebaꞌ nyaꞌ, nang kitaꞌ saban ke ari pagi. Nema ngenap ari adai penusah kedireꞌ. Penusah sari nyangkaꞌ mah sari.