Nang nyalah urang
7
Udah nyaꞌ Isa madah, “Nang kitaꞌ nyalah urang, isaꞌ kitaꞌ nadai desalah Tuhan Allah. 2 Nema upa kitaꞌ nyalah urang bukai, upa piyaꞌ mah Tuhan Allah kaꞌ nyalah kitaꞌ. Abaꞌ ukor te dengau kitaꞌ ngukor urang bukai, nyaꞌ kaꞌ dengau Tuhan Allah ngukor kitaꞌ. 3 Ngapa bah kitaꞌ medaꞌ sepok kayu de mata kawan kitaꞌ, uleh balok te besai de mata kitaꞌ, kitaꞌ nadai medaꞌ? 4 Kati kitaꞌ tauꞌ madah ke kawan kitaꞌ, ‘Kitoꞌ ku nguleh sepok kayu de mata direꞌ.’ Uleh balok de mata kitaꞌ kedireꞌ jaꞌ, kitaꞌ nadai medaꞌ? 5 Eh urang te budi-budi bayek, uleh ke dulau balok de mata kitaꞌ, isaꞌ pemedaꞌ kitaꞌ rantas, abaꞌ isaꞌ kitaꞌ tauꞌ nguleh sepok kayu de mata kawan kitaꞌ.”Kebala urang te nadai patot nerimaꞌ pengajar Tuhan Allah
6 “Nang kitaꞌ mereꞌ barang te kudos ke ukoi, isaꞌ ukoi nyaꞌ nadai bebalek nangkap kitaꞌ. Abaꞌ nang kitaꞌ nibar mutiara ke babi, isaꞌ nadai detunyau-tijak sidaꞌ.”a
Pradua te desawot
7 “Mintaꞌ jaꞌ ke Tuhan Allah, pesti Ya mereꞌ ke kitaꞌ. Gigaꞌ jaꞌ, pesti kitaꞌ nemu. Ketok jaꞌ, pesti pintu debukaꞌ ke kitaꞌ. 8 Nema ugaꞌ urang te mintaꞌ, pesti mah ya nerimaꞌ, ugaꞌ urang te ngigaꞌ pesti mah ya nemu, abaꞌ ugaꞌ urang te ngetok pesti mah pintu debukaꞌ ke ya. 9 Adai piyaꞌ de entara kitaꞌ te mereꞌ batu ke anak direꞌ, enteꞌ ya mintaꞌ ruti? 10 Abaꞌ mereꞌ ular, enteꞌ ya mintaꞌ ikan? 11 Enteꞌ kitaꞌ te nadai bayek jaꞌ tauꞌ mereꞌ utai te bayek ke anak kitaꞌ, apa klageꞌ Apai kitaꞌ te de sruga! Ya lebeh ageꞌ mereꞌ te bayek ke kebala urang te mintaꞌ ke Ya.”
Jalai te kenaꞌ
12 “Kebala utai te kitaꞌ kedekaꞌ urang bukai pulah ke kitaꞌ, pulah ke dulau upa piyaꞌ ke sidaꞌ. Nyaꞌ mah iseꞌ ari Prator Tuhan Allah te detules Musa abaꞌ kitab kebala nabi.
13 Tamaꞌ jaꞌ ari pintu te met nyaꞌ, nema pintu abaꞌ jalai te mansang ke neraka besai abaꞌ luah, abaꞌ mayoh urang te tamaꞌ ari nyaꞌ. 14 Uleh pintu te mansang ke idop te kenaꞌ lampar met abaꞌ jalai nyaꞌ pedeh. Siket mah urang te tauꞌ nemu jalai nyaꞌ.”
Ati-ati ke kebala nabi te nesat urang
15 “Ati-ati kitaꞌ ke kebala nabi te nesat urang. Sidaꞌ datai ke kitaꞌ bayek-bayek upa dumba, uleh te pengamat sidaꞌ nyaꞌ serigala te ganas. 16 Kitaꞌ tauꞌ ngelala sidaꞌ ari apa te depulah sidaꞌ, upa pon kayu dekelala ari buah ya. Pon te bedureꞌ nadai bebuah ke buah angor, piyaꞌ gaꞌ rumpot te bedureꞌ nadai bebuah ke buah ara. 17 Piyaꞌ gaꞌ ngenap pon te galak bebuah ke buah te bayek, uleh pon te nadai galak bebuah ke buah te nadai bayek. 18 Pon te galak nitauꞌ bebuah ke buah te nadai bayek, piyaꞌ gaꞌ pon te nadai galak nitauꞌ bebuah ke buah te bayek. 19 Ngenap pon te nadai bebuah ke buah te bayek, pesti detebang abaꞌ detibar ke alam api. 20 Piyaꞌ gaꞌ kebala nabi te nesat urang. Sidaꞌ tauꞌ dekelala ari apa te depulah sidaꞌ.
21 “Nadai ugaꞌ urang te ngumai Ku, ‘Tuhan, Tuhan,’ kaꞌ tamaꞌ ke alam Pemrintah Tuhan Allah. Uleh peroꞌ kebala urang te nunaꞌ kenekaꞌ Apai Ku te de sruga mah te tamaꞌ ke alam Pemerintah Tuhan Allah. 22 De ari pemadoꞌ mayoh urang te kaꞌ madah ke Ku, ‘Tuhan, Tuhan,’ nadai piyaꞌ kami udah benebuat ngau kuasa Wan? Nadai piyaꞌ kami udah muru kebala roh jat ngau kuasa Wan? Abaꞌ udah mulah utai te nyaroh ngau kuasa Wan? 23 Tengan nyaꞌ mah Ku kaꞌ tros terang madah ke sidaꞌ, ‘Ku nadai kalaꞌ ngelala kitaꞌ! Rari ari toꞌ, kitaꞌ te mulah pemejat!’ ”
Urang te bijak abaꞌ urang te budu
24 “Ngenap urang te ninga abaꞌ nunaꞌ pengajar Ku, ya sama abaꞌ urang bijak, te mulah rumah de atau batu. 25 Baroꞌ ari ujan parah, ranah abaꞌ kudeꞌ te betat amat nacah rumah nyaꞌ, uleh rumah nyaꞌ nadai ruboh nema dediri de atau batu. 26 Ngenap urang te ninga, uleh nadai nunaꞌ pengajar Ku toꞌ, ya sama abaꞌ urang te budu, te mulah rumah de atau engkrangan. 27 Baroꞌ ari ujan parah, ranah abaꞌ kudeꞌ te betat amat nacah rumah nyaꞌ, kebaꞌ rumah nyaꞌ ruboh, mis punas.”
Kuasa Isa