Isa nyemoh urang te kenaꞌ penyaket kulet kusta
8
Pas Isa turon ari buket, mayoh amat kebala urang nerudi Ya. 2 Tengan nyaꞌ datai mah sikoꞌ urang te kenaꞌ saket kulet kusta ngusong Ya. Urang nyaꞌ nyungkon nyemah Ya blumaꞌ madah, “Pak, enteꞌ Wan kaꞌ, Wan tauꞌ nyemoh ku.”3 Baroꞌ Isa ngulor jari Ya, nyamah urang nyaꞌ blumaꞌ madah, “Kaꞌ Ku nyemoh meh, Semoh mah!” Sekelen nyaꞌ mah gaꞌ urang nyaꞌ semoh ari penyaket ya. 4 Udah nyaꞌ Isa madah ke urang nyaꞌ, “Nang meh nusoi utai toꞌ ke urang bukai. Uleh angkat ke meh ngusong imam isaꞌ ya mresa meh. Udah nyaꞌ baiꞌ ke kurban pesemah ke Tuhan Allah upa te deprintah Musa. Nyaꞌ ngau bukti ke kebala urang enteꞌ meh bamat-amat nyau semoh.”a
Isa nyemoh pemantoꞌ kepalaꞌ prajuret Ruma
5 Pas Isa datai ke Kapernaom, kepalaꞌ prajuret Ruma datai ngusong Isa, abaꞌ mintaꞌ tulong. 6 Jakoꞌ ya, “Pak, pemantoꞌ ku pedeh. Ya galeꞌ de rumah nema ya lumpoh abaꞌ ya poh amat.”
7 Isa madah, “Ku kaꞌ angkat nyemoh ya.”
8 Uleh kepalaꞌ prajuret nyaꞌ nyawot Ya, “Pak, ku nadai patot nerimaꞌ Wan de rumah ku, uleh ku pecayaꞌ enteꞌ Wan madah ‘semoh,’ pemantoꞌ ku pesti semoh. 9 Nema ku kedireꞌ sigeꞌ de baroh pangan bukai, abaꞌ de baroh ku adai gaꞌ kebala prajuret. Enteꞌ ku madah ke sikoꞌ prajuret, ‘Angkat!’ ya angkat. Abaꞌ ke sikoꞌ ageꞌ, ‘Datai!’ baroꞌ ya datai. Abaꞌ ke pemantoꞌ ku, ‘Pulah ke toꞌ!’ baroꞌ ya mulah nyaꞌ.”
10 Pas Isa ninga apa te depadah kepalaꞌ prajuret nyaꞌ Ya ma ampal. Baroꞌ Ya madah ke kebala urang te nerudi Ya, “Saja luar biasa iman ya toꞌ. Ku madah ke kitaꞌ, de entara sidaꞌ Israel jaꞌ, bedau kalaꞌ Ku nemu iman te pemesai toꞌ! 11 Ku madah ke kitaꞌ, mayoh urang kaꞌ datai ari ugaꞌ dunia toꞌ, ari Timor abaꞌ Barat kaꞌ dudok makai abaꞌ puyang jagang kita Abraham, Isak abaꞌ Yakob de Pemerintah Tuhan Allah. 12 Uleh kebala sidaꞌ Yahudi te tunaꞌ des adai de Pemerintah Tuhan Allah empala debuai ke teban te ma petang. Diyaꞌ sidaꞌ nyabak abaꞌ lampar ngasa pemedeh sampai begetar-beganyar.”
13 Udah nyaꞌ Isa madah ke kepalaꞌ prajuret nyaꞌ, “Pulai ke meh! Nema meh pecayaꞌ ke Ku, pemantoꞌ meh semoh.” Tengan nyaꞌ mah pemantoꞌ ya semoh.
Isa nyemoh entua Petros abaꞌ kebala urang bukai
14 Udah nyaꞌ Isa angkat ke rumah Petros. Diyaꞌ Ya medaꞌ entua Petros te inoꞌ tengan kredan galeꞌ de peninok ya. 15 Isa nyamah jari ya, abaꞌ ya sintak semoh. Udah nyaꞌ ya angkat ngadoh Isa makai.
16 Pas ari nyau kaꞌ tikop petang, mayoh kebala urang datai ngemaiꞌ kebala urang te desarong roh jat abaꞌ kebala urang te pedeh. Baroꞌ Isa nyuroh roh jat nyaꞌ rari ari sidaꞌ. Abaꞌ Ya nyemoh ugaꞌ kebala urang te pedeh. 17 Utai nyaꞌ tejadi isaꞌ temoꞌ te depadah nabi Yesaya,
“Ya nangong pemedeh kita
abaꞌ nyemoh ugaꞌ penyaket kita.”b
Nadai mudah nerudi Isa
18 Adai sekaleꞌ Isa medaꞌ urang mayoh amat ngugoꞌ Ya, Ya madah ke kebala muret Ya, “Boh kita nyemerang danau.”
19 Baroꞌ datai mah sikoꞌ urang te ahli alam Prator Musa, ya madah, “Guru, ku kaꞌ nerudi Wan kikai jaꞌ Wan angkat!”
20 Isa nyawot ya, “Serigala adai peniyau abaꞌ burong adai sarang, uleh Anak Ensia niseꞌ rumah direꞌ ngau Ya blepa.”
21 Baroꞌ sikoꞌ urang te gah nerudi Isa madah, “Pak, ku ijen lai weh kaꞌ pulai ngubor apai ku.”
22 Isa nyawot ya, “Terudi ke Ku, abaꞌ isaꞌ mah urang mati ngubor sama direꞌ te mati.”
Isa ngemadoꞌ kudeꞌ abaꞌ glumang aiꞌ
23 Udah nyaꞌ Isa nikeꞌ prau besai abaꞌ kebala muret Ya nerudi Ya. 24 Nyau prau sidaꞌ jaoh ari tebeng, nadai mang-mang datai mah kudeꞌ te lampar betat nacah danau, nyaꞌ ngasoh aiꞌ beglumang besai abaꞌ aiꞌ tamaꞌ prau sidaꞌ. Pas tengan nyaꞌ Isa tengan tinok lenyaꞌ. 25 Kebala muret beburoh ngerak Ya abaꞌ madah, “Tuhan, tulong! Mati kita!”
26 Isa nyawot sidaꞌ, “Ngapa bah kitaꞌ lampar takot? Kitaꞌ toꞌ nadai gulong pecayaꞌ ke Ku.” Udah nyaꞌ Isa diri abaꞌ nyuroh kudeꞌ abaꞌ glumang aiꞌ nyaꞌ badoꞌ. Kebaꞌ badoꞌ mah kudeꞌ abaꞌ glumang aiꞌ nyaꞌ abaꞌ danau nyaꞌ tenang.
27 Kebala muret Ya ampal. Sidaꞌ becakap abaꞌ pangan, “Sapa bah ensia toꞌ datai ke kudeꞌ abaꞌ glumang aiꞌ patoh ke Ya?”
Isa muru roh jat ari dua ikoꞌ urang
28 Pas Isa abaꞌ kebala muret Ya datai ke seberang danau de dairah urang Gadara. Diyaꞌ datai mah dua ikoꞌ urang te desarong Sitan ari kubor ngusong Isa. Senikoꞌ nyaꞌ garang, sampai urang nadai berani mansaꞌ teban nyaꞌ. 29 Senikoꞌ mangkes-nguwes blumaꞌ madah, “Oi Anak Tuhan Allah, kaꞌ Wan kati kami toꞌ? Kati Wan, kaꞌ mrisa kami bedau naꞌ senta?”
30 Nadai jaoh ari nyaꞌ adai mayoh kebala babi te tengan ngigaꞌ pemakai. 31 Kebala roh jat nyaꞌ ngemon ke Isa, jakoꞌ sidaꞌ “Enteꞌ Wan muru kami, suroh ke kami tamaꞌ ke alam kebala babi nyen.”
32 Isa madah ke sidaꞌ, “Rari!” Baroꞌ kebala roh jat nyaꞌ rari ari senikoꞌ nyaꞌ, tamaꞌ ke alam kebala babi, udah nyaꞌ kebala babi nyaꞌ rari ke tisi tebeng laboh ke danau, mati tengelam. 33 Kebala urang te nyaga babi nyaꞌ beburoh beguai ke kuta, sidaꞌ nusoi ugaꞌ apa te udah tejadi ke dua ikoꞌ urang te udah desarong roh jat nyaꞌ. 34 Kebaꞌ mayoh urang ari kuta nyaꞌ angkat ngusong Isa. Pas sidaꞌ betemu abaꞌ Isa, sidaꞌ nesak Ya angkat ari dairah sidaꞌ.