Isa nyemoh urang te lumpoh
9
Udah nyaꞌ Isa abaꞌ kebala muret Ya tamaꞌ ke alam prau besai. Sidaꞌ nyemerang danau pulai ke kuta Kapernaom, kuta te jalai Isa diyau. 2 Breta sidaꞌ datai ke kuta nyaꞌ, datai dua tiga ikoꞌ urang te merangong sikoꞌ urang lumpoh te tengan galeꞌ de atau tikai ya. Pas Isa medaꞌ iman sidaꞌ, Ya madah ke urang lumpoh nyaꞌ, “Nang saban nak, dusa meh udah deampon.”3 Diyaꞌ adai dua tiga ikoꞌ urang te ahli alam Prator Musa. Jakoꞌ alam ati sidaꞌ, “Ya toꞌ melicak Tuhan Allah.”
4 Uleh Isa tauꞌ badaꞌ iseꞌ ati sidaꞌ, kebaꞌ Ya madah, “Ngapa bah kitaꞌ miker te jat alam ati kitaꞌ? 5 Ni te lebeh mudah, madah ‘Dusa meh udah deampon,’ sekaleꞌ ke madah ‘Angkat abaꞌ bejalai’? 6 Uleh toꞌ isaꞌ kitaꞌ tauꞌ badaꞌ, de dunia toꞌ Anak Ensia bekuasa ngampon dusa. Udah nyaꞌ Isa madah ke urang lumpoh nyaꞌ, “Angkat, katong ke tikai meh abaꞌ pulai ke meh ke rumah meh!”
7 Baroꞌ urang lumpoh nyaꞌ sintak diri abaꞌ ya pulai ke rumah ya. 8 Pas kebala urang medaꞌ apa te udah tejadi, sidaꞌ ampal abaꞌ muji Tuhan Allah nema Tuhan Allah udah mereꞌ kuasa te upa nyaꞌ ke ensia.
Isa ngumai Matios penageh pajak
9 Udah nyaꞌ Isa angkat ari nyaꞌ. Tengan Isa bejalai, Ya medaꞌ sikoꞌ penageh pajak te nama Matios tengan dudok de kantor pajak ya. Isa madah ke ya, “Boh nerudi Ku!” Kebaꞌ nyaꞌ Matios angkat nerudi Isa.
10 Udah nyaꞌ pas Isa makai de rumah Matios, datai mah kebala penageh pajak abaꞌ kebala urang te jaiꞌ nama depedaꞌ sidaꞌ Yahudi dudok makai abaꞌ Isa abaꞌ kebala muret Ya. 11 Pas sidaꞌ Parisi medaꞌ utai nyaꞌ, sidaꞌ betanyaꞌ ke muret Isa, “Ngapa bah guru kitaꞌ makai abaꞌ kebala penageh pajak abaꞌ kebala urang te dusa?”
12 Ninga piyaꞌ, Isa nyawot sidaꞌ, “Ukai urang angas te perlu enteri, uleh urang te pedeh. 13 Kebaꞌ nyaꞌ pelajar ke reti ayat Kitab Suci toꞌ, ‘Kaseh mah te Ku kedekaꞌ ukai kurban jelu’.a Nema Ku datai nadai ngumai urang te ngangap direꞌ bayek, uleh ngumai urang te dusa.”
Pengajar te lamaꞌ abaꞌ pengajar te baru
14 Udah nyaꞌ kebala muret Yohanes Pemaneꞌ datai ngusong Isa abaꞌ nanyaꞌ, “Kami abaꞌ kebala sidaꞌ Parisi gah puasa uleh ngapa kebala muret Wan nadai?”
15 Isa nyawot sidaꞌ, “Kati enteꞌ jakoꞌ kitaꞌ? Tauꞌ nadai kebala temuai de gawai belaki bini tusah ati enteꞌ penganten te laki ageꞌ adai abaꞌ sidaꞌ? Pesti nadai! Uleh kaꞌ datai senta penganten te laki kaꞌ deameꞌ ari sidaꞌ. Tengan nyaꞌ mah sidaꞌ puasa.
16 Niseꞌ urang nampal baju te lamaꞌ ngau kayen te ageꞌ baru. Nema pesti mah kayen te baru nyaꞌ ngerakedot, nujot baju te lamaꞌ ngasoh carek empala besai. 17 Piyaꞌ gaꞌ niseꞌ urang te nuang angor baru ke badah aiꞌ angor te lamaꞌ. Nema badah nyaꞌ kaꞌ pecah, abaꞌ angor nyaꞌ tesiyoh. Angor baru alah detepoꞌ de alam badah aiꞌ angor te baru, isaꞌ badah nyaꞌ nadai pecah abaꞌ aiꞌ angor nyaꞌ nadai siyoh.”b
Isa nyemoh urang inoꞌ te saket dujoh abaꞌ ngidop ageꞌ miyak te mati
18 Tengan Isa becakap abaꞌ kebala muret Yohanes Pemaneꞌ, datai sikoꞌ pemimpen rumah te jalai sidaꞌ Yahudi nyemah Tuhan Allah. Ya tesungkor de mua Isa, abaꞌ madah, “Anak ku te inoꞌ baroꞌ nyau mah, uleh ku mintaꞌ Wan datai ken nyamah ya isaꞌ ya idop ageꞌ.”
19 Udah nyaꞌ Isa abaꞌ kebala muret Ya diri abaꞌ nerudi urang nyaꞌ.
20 De tengah jalai datai sikoꞌ urang inoꞌ te saket dujoh selamaꞌ dua belas taon. Inoꞌ nyaꞌ nerudi belakang Isa abaꞌ nyamah ujong jubah Isa. 21 Inoꞌ nyaꞌ mulah piyaꞌ nema jakoꞌ alam ati ya, “Enteꞌ ku tauꞌ nyamah ujong jubah Isa jaꞌ, pesti ku semoh.”
22 Baroꞌ Isa malek ke blakang abaꞌ madah, “Nang wan saban boꞌ! Nema wan pecayaꞌ ke Ku, kebaꞌ wan semoh.” Sekelen nyaꞌ mah gaꞌ ya semoh.
23 Pas Isa abaꞌ kebala muret Ya datai ke rumah pemimpen nyaꞌ, sidaꞌ medaꞌ kebala urang te nebah kebala musek abaꞌ mayoh urang nyabak ke miyak nyaꞌ. 24 Baroꞌ Isa madah ke urang te diyaꞌ, “Keluar ugaꞌ kitaꞌ! Miyak toꞌ nadai mati, ya bayah tinok mah.” Uleh sidaꞌ ketawaꞌ ke Ya. 25 Udah kebala urang te diyaꞌ desuroh keluar, Isa tamaꞌ ke alam pangken miyak nyaꞌ abaꞌ megai jari ya. Baroꞌ miyak nyaꞌ angkat. 26 Brita nyaꞌ tesebar de ugaꞌ dairah nyaꞌ.
Isa nyemoh dua ikoꞌ urang te butaꞌ
27 Udah nyaꞌ Isa nyamong ageꞌ pejalai Ya. De tengah jalai dua ikoꞌ urang butaꞌ nerudi Ya. Senikoꞌ mangkes-nguwes blumaꞌ madah ke Isa, “Pureh Raja Daot!c Tulong, kaseh ke kemua!”
28 Pas Isa tamaꞌ ke sebuah rumah, baroꞌ dua urang butaꞌ nyaꞌ datai ngusong Ya. Isa nanyaꞌ senikoꞌ, “Pecayaꞌ piyaꞌ senikoꞌ Ku tauꞌ nyemoh senikoꞌ?”
Sawot senikoꞌ, “Pecayaꞌ Pak.”
29 Kebaꞌ blumaꞌ negoꞌ mata senikoꞌ, Isa madah, “Nema senikoꞌ pecayaꞌ Ku tauꞌ nyemoh senikoꞌ, semoh mah!” 30 Baroꞌ senikoꞌ tauꞌ medaꞌ ageꞌ. Isa ngentaknal senikoꞌ jakoꞌ Ya, “Nang nusoi utai toꞌ ke urang bukai.”
31 Uleh senikoꞌ angkat ke ugaꞌ dairah nyaꞌ blumaꞌ nusoi apa te udah Isa pulah ke senikoꞌ.
Isa nyemoh sikoꞌ urang te bisoꞌ
32 Pas dua ikoꞌ urang butaꞌ nyaꞌ angkat, sikoꞌ urang bisoꞌ te desarong roh jat debaiꞌ ngusong Isa. 33 Isa nesar roh jat nyaꞌ abaꞌ tengan nyaꞌ gaꞌ urang nyaꞌ tauꞌ becakap ageꞌ. Urang banyau te diyaꞌ ampal blumaꞌ madah, “Bedau kalaꞌ kami medaꞌ utai te upa pitoꞌ de Israel!”
34 Uleh kebala sidaꞌ Parisi madah, “Ya muru kebala roh jat ngau kuasa te debereꞌ Ibles kepalaꞌ bala roh jat.”
Isa kaseh medaꞌ urang banyau
35 Isa angkat bekelileng ari suteꞌ kuta ke kuta te kebukai abaꞌ ari suteꞌ kampong ke kampong te kebukai. Ya ngajar de kebala rumah te jalai sidaꞌ Yahudi nyemah Tuhan Allah, abaꞌ madah Brita Bayek upa kati Pemrintah Tuhan Allah, abaꞌ nyemoh kebala urang ari brena macam pemedeh. 36 Pas Isa medaꞌ kebala urang banyau nyaꞌ, timol pengaseh Ya ke sidaꞌ, nema sidaꞌ tusah abaꞌ niseꞌ te nulong sidaꞌ, upa dumba te niseꞌ gemala. 37 Baroꞌ Isa madah ke kebala muret Ya, “Te deketau toꞌ mayoh, uleh te ngetau siket. 38 Kebaꞌ nyaꞌ pintaꞌ ke urang te empu uma nyaꞌ, isaꞌ Ya ngirem kebala urang te ngetau.”d