Isa mereꞌ Kuasa ke dua belas rasol Ya
10
Adai sekaleꞌ Isa ngumai dua belas muret Ya begugoꞌ abaꞌ mereꞌ kuasa ke sidaꞌ ngau muru kebala roh jat abaꞌ nyemoh brena macam pemedeh. 2 Nama dua belas rasol Ya nyaꞌ: Simon te degelar Petros abaꞌ menyadeꞌ ya Andrias, Yakubos abaꞌ menyadeꞌ ya Yohanes anak Sebedios. 3 Udah nyaꞌ Pelipos, Bartolumios, Tumas, Matios penageh pajak, Yakubos anak Alpios, abaꞌ Tadios. 4 Baroꞌ Simon ari kelumpok Silot abaꞌ Yudas Iskariot te kaꞌ nyual Isa jemah lah.Isa ngutos dua belas rasol Ya
5 Baroꞌ Isa ngutos dua belas rasol Ya. Sebedau sidaꞌ angkat, Ya bepesau ke sidaꞌ jakoꞌ Ya, “Nang kitaꞌ angkat ke dairah urang te bukai Yahudi, abaꞌ nang tamaꞌ ke kebala kuta sidaꞌ Samaria. 6 Uleh angkat ke kitaꞌ ngusong sidaꞌ Israel nema sidaꞌ nyau upa kebala dumba te tesat. 7 Angkat abaꞌ padah ke sidaꞌ, ‘Pemrintah Tuhan Allah nyau semak.’ 8 Semoh ke kebala urang te pedeh, idop ke kebala urang te mati, semoh ke kebala urang te tacah penyaket kulit kusta, abaꞌ buru ke kebala roh jat. Kitaꞌ udah nerimaꞌ kuasa nyaꞌ nadai mayar, kebaꞌ nyaꞌ bereꞌ gena ke nyaꞌ ke urang. 9 Nang ngemaiꞌ duet mas, duet pirak, abaꞌ duet temaga. 10 Nang kitaꞌ ngemaiꞌ tas, ngemaiꞌ pegareꞌ, ngemaiꞌ sepatu ganti abaꞌ tungkat, nema urang te kreja patot buleh upah.
11 Enteꞌ kita datai ke kuta abaꞌ ke kampong, gigaꞌ ke urang te kaꞌ nerimaꞌ kitaꞌ. Diyau diyaꞌ ke kitaꞌ sampai kitaꞌ angkat ageꞌ. 12 Abaꞌ pas kitaꞌ tamaꞌ kerumah sidaꞌ padah ke dulau, ‘Engkremaꞌ Tuhan Allah mreꞌ idop penoh damai alam bilek toꞌ.’ 13 Enteꞌ urang alam rumah nyaꞌ nerimaꞌ kitaꞌ, idop penoh damai adai de sidaꞌ. Uleh enteꞌ sidaꞌ nadai nerimaꞌ kitaꞌ, idop penoh damai nyaꞌ pulai ageꞌ ke kitaꞌ. 14 Enteꞌ adai urang te ngai nerimaꞌ abaꞌ ngai ninga kitaꞌ, dudi ke rumah abaꞌ kuta nyaꞌ abaꞌ tepas ke debu diyaꞌ te lekat de kaki kitaꞌ. Nyaꞌ ngau tana ke sidaꞌ Tuhan Allah kaꞌ ngukom sidaꞌ jemah lah. 15 Ku madah ngau pengamat ke kitaꞌ: Senta Tuhan Allah ngukom ugaꞌ urang, ukom te detangong sidaꞌ Sudom abaꞌ Gomora lebeh lempong ari ukom te detangong sidaꞌ kuta nyaꞌ.”a
Penusah te kaꞌ datai abaꞌ nang takot ngakoꞌ Isa
16 Udah nyaꞌ Isa madah ageꞌ, “Dinga kah! Ku ngutos kitaꞌ upa dumba ke tengah srigala, kebaꞌ nyaꞌ kitaꞌ alah anal nyaga direꞌ upa ular, abaꞌ tulos upa burong dara. 17 Uleh ati-ati ke kitaꞌ, nema kitaꞌ kaꞌ detangkap abaꞌ debaiꞌ ke teban te ngau nyidang urang. Kitaꞌ kaꞌ desimat sidaꞌ de rumah te jalai sidaꞌ Yahudi nyemah Tuhan Allah. 18 Kitaꞌ kaꞌ debaiꞌ ke mua kebala gubernor abaꞌ kebala raja nema kitaꞌ muret Ku. Utai nyaꞌ alah piyaꞌ isaꞌ kitaꞌ tauꞌ nusoi Ku ke sidaꞌ abaꞌ ke kebala urang te nadai ngelala Tuhan Allah. 19 Uleh enteꞌ kitaꞌ detangkap, nang kitaꞌ saban ke apa te kaꞌ kitaꞌ cakap, abaꞌ kati cara kitaꞌ becakap. Nema tengan nyaꞌ apa te alah kitaꞌ cakap kah kaꞌ depadah ke kitaꞌ. 20 Nema apa te kitaꞌ cakap ke tengan nyaꞌ nadai ari kitaꞌ kedireꞌ, uleh ari Roh Kudos te deutos Apai te de sruga.
21 Kaꞌ adai lah senta kebala urang kaꞌ nyerah menyadeꞌ direꞌ te pecayaꞌ ke Ku isaꞌ debunoh. Apai kaꞌ nyerah anak direꞌ isaꞌ debunoh. Kebala anak kaꞌ ngelawan apai inai direꞌ, abaꞌ nyerah sidaꞌ isaꞌ debunoh. 22 Kitaꞌ kaꞌ dekareh ugaꞌ urang nema kitaꞌ muret Ku, uleh urang te betan datai ke pemadoꞌ kaꞌ deselamat. 23 Enteꞌ kitaꞌ de pedeh de suteꞌ kuta, rari ke kitaꞌ kuta te kebukai. Ku madah ke kitaꞌ: Bedau naꞌ udah kitaꞌ ngunyong ugaꞌ kebala kuta Israel, nyau mah Anak Ensia datai.
24 Muret nadai lebeh ari guru ya, abaꞌ pemantoꞌ nadai lebeh ari tuan ya. 25 Nyangkaꞌ mah enteꞌ sikoꞌ muret upa guru ya, abaꞌ sikoꞌ pemantoꞌ upa tuan ya. Enteꞌ Ku jaꞌ kepalaꞌ keluarga, depadah sidaꞌ Belsebol,b apa klageꞌ kitaꞌ anggota keluarga Ku. Pesti kitaꞌ depejaiꞌ lebeh ageꞌ!
26 Uleh amat piyaꞌ, nang kitaꞌ takot ke sidaꞌ. Nema niseꞌ utai te detapok, te nadai pedaꞌ, abaꞌ niseꞌ utai te detutop te nadai debukaꞌ. 27 Apa te Ku padah ke kitaꞌ de teban te petang, padah ke nyaꞌ de teban te tampak, abaꞌ apa te Ku gisek ke peneng kitaꞌ, padah ke nyaꞌ de mua ugaꞌ urang. 28 Nang kitaꞌ takot ke urang te peroꞌ tauꞌ munoh tuboh, uleh nadai bekuasa munoh semengat kitaꞌ. Tuhan Allah te alah kitaꞌ takot kah, nema Ya bekuasa munoh tuboh abaꞌ semengat kitaꞌ alam api neraka. 29 Dua ikoꞌ burong pipet enteꞌ dejual murah amat mah rega. Uleh amat piyaꞌ, datai ke sikoꞌ mah niseꞌ te laboh ke tanah enteꞌ nadai dekedekaꞌ Apai kitaꞌ. 30 Abaꞌ kitaꞌ, bok de palaꞌ kitaꞌ jaꞌ udah deitong Ya ugaꞌ. 31 Kebaꞌ nyaꞌ nang takot! Kitaꞌ bah lebeh penteng ari kebala burong pipet!
32 Ngenap urang te ngakoꞌ direꞌ pecayaꞌ ke Ku de mua ensia, Ku sigeꞌ kaꞌ ngakoꞌ ya de mua Apai Ku te de sruga. 33 Uleh sapa te ngai ngakoꞌ Ku de mua ensia, Ku sigeꞌ ngai ngakoꞌ ya de mua Apai Ku te de sruga.”
Pengajar Isa tauꞌ ngasoh urang belayaꞌ
34 “Nang kitaꞌ ngira Ku datai ngemaiꞌ damai de bumi. Ku datai bukai ngemaiꞌ damai uleh ngemaiꞌ pedang. 35 Ku datai kaꞌ ngemaiꞌ pelayaꞌ kebaꞌ,
‘Kebala anak te laki kaꞌ ngelawan apai ya,
abaꞌ kebala anak te inoꞌ kaꞌ ngelawan inai ya,
menantu te inoꞌ kaꞌ ngelawan entua ya te inoꞌ.
36 Abaꞌ munsoh sidaꞌ nyaꞌ kebala urang te adai alam rumah sidaꞌ.’ ”c
Kati cara nerudi Isa
37 Sapa te kaseh ke apai inai ya lebeh ari kaseh ke Ku, ya nadai patot jadi muret Ku, abaꞌ sapa te kaseh ke anak ya te laki abaꞌ te inoꞌ lebeh ari kaseh ke Ku, ya nadai patot jadi muret Ku. 38 Abaꞌ urang te ngai nangong saleb ya abaꞌ nerudi Ku, ya nadai patot jadi muret Ku. 39 Urang te kaꞌ berusaha ngintu idop direꞌ de dunia toꞌ, ya nitauꞌ jong idop abaꞌ Tuhan Allah sengabot, uleh urang te kaꞌ nyerah idop ya nema pecayaꞌ ke Ku, ya pesti jong idop abaꞌ Tuhan Allah sengabot.
40 Urang te nerimaꞌ kitaꞌ, breti ya nerimaꞌ Ku. Abaꞌ urang te nerimaꞌ Ku, breti ya nerimaꞌ gaꞌ Tuhan Allah te ngutos Ku. 41 Urang te nerimaꞌ nabi, nema urang nyaꞌ amat nabi, kaꞌ nerimaꞌ upah upa te debereꞌ Tuhan Allah ke nabi. Abaꞌ urang te nerimaꞌ urang te kenaꞌ nema urang nyaꞌ amat kenaꞌ, kaꞌ nerimaꞌ upah upa te debereꞌ Tuhan Allah ke urang te kenaꞌ. 42 Abaꞌ sapa jaꞌ te mereꞌ aiꞌ celap secawan jaꞌ ke sikoꞌ urang te deangap urang nadai penteng, nema ya muret Ku, urang nyaꞌ pesti nerimaꞌ upah ari Tuhan Allah tegal apa te ya pulah.”