11
Udah Isa madah pesau ke dua belas muret Ya, Ya angkat ari nyaꞌ ke kebala kuta te adai de wilayah Galilea. Diyaꞌ Ya ngajar abaꞌ madah Brita Bayek ari Tuhan Allah.Isa madah sapa Direꞌ abaꞌ Ya muji Yohanes Pemaneꞌ
2 Pas tengan nyaꞌ Yohanes Pemaneꞌ adai alam penyara, abaꞌ ya ninga apa te udah depulah Isa Al Maseh. Kebaꞌ ya ngasoh dua tiga ikoꞌ muret ya angkat nanyaꞌ Isa. 3 Jakoꞌ sidaꞌ, “Wan piyaꞌ urang te kami entang te kaꞌ datai nyaꞌ? Skaleꞌ ke kami alah ngentang te kebukai?”
4 Sawot Isa, “Pulai abaꞌ tusoi ke Yohanes apa te udah kitaꞌ dinga abaꞌ pedaꞌ: 5 Urang butaꞌ medaꞌ, urang lumpoh bejalai, urang te tacah penyaket kulet kusta semoh, urang te bangal ninga, urang te mati idop ageꞌ, abaꞌ Brita Bayek ari Tuhan Allah detusoi ke kebala urang misken.a 6 Betuah amat urang te nadai gamaꞌ pecayaꞌ abaꞌ nudi Ku.”
7 Udah kebala muret Yohanes pulai, Isa madah sapa Yohanes nyaꞌ ke urang banyau jakoꞌ Ya, “Dulau teh kitaꞌ angkat ke tanah luah te beengkrangan kaꞌ medaꞌ apa? Kaꞌ medaꞌ rumpot desepu kudeꞌ kiyaꞌ-kitoꞌ? Nadai weh? 8 Enteꞌ piyaꞌ, kitaꞌ angkat kaꞌ medaꞌ apa? Urang te bebaju bayek? Pesti nadai, nema kebala urang te bebaju bayek diyau de teban te jalai raja. 9 Apa pengamat te kaꞌ kitaꞌ pedaꞌ ke den? Medaꞌ sikoꞌ nabi? Auꞌ, Ku madah ke kitaꞌ, Yohanes lebeh ari sikoꞌ nabi. 10 Nema ya te depadah Tuhan Allah de alam Kitab Suci,
‘Toꞌ mah utosan Ku, te Ku suroh dulau ari Direꞌ,
ya kaꞌ ngageh jalai ngau Direꞌ.’b
11 Ku madah ke kitaꞌ: De entara urang te udah idop de dunia toꞌ, bedau iseꞌ te lebeh ari Yohanes. Uleh amat piyaꞌ, amat mah urang te nadai gulong penteng de alam Pemrintah Tuhan Allah, ya lebeh ari Yohanes.” 12 Belaboh ari Yohanes melayan datai ke entoꞌ, Pemerintah Tuhan Allah kepaꞌ amat deserang. Abaꞌ kebala urang te nyerang kaꞌ ngerebot Pemerintah nyaꞌ. 13 Sebedau Yohanes datai, ugaꞌ nabi abaꞌ Prator Tuhan Allah te detules Musa udah madah kebala utai te kaꞌ tejadi. 14 Enteꞌ kitaꞌ pecayaꞌ ke apa te udah sidaꞌ padah, kitaꞌ pesti tauꞌ badaꞌ Yohanes Pemaneꞌ nyaꞌ mah nabi Elia te kaꞌ datai. 15 Sapa te adai peneng ngau ninga, dinga kah!”
16 Baroꞌ jakoꞌ Isa, “Upa sapa lah weh Ku nyemaꞌ urang rama pitoꞌ? Ku madah ke kitaꞌ sidaꞌ upa toꞌ, sidaꞌ toꞌ upa kebala miyak te dudok de teban urang te ramai, suteꞌ kelumpok miyak mangkis ke kelumpok bukai,
17 ‘Kami nyepu suleng ke kitaꞌ,
uleh kitaꞌ nadai bejuget!
Kami menanyi lagu tusah,
uleh kitaꞌ nadai bekenang.’
18 Ku madah piyaꞌ nema pas Yohanes Pemaneꞌ datai abaꞌ ya nadai makai nginom, sidaꞌ madah, ‘Ya desarong sitan.’ 19 Uleh pas Anak Ensia datai abaꞌ Ya makai nginom, sidaꞌ madah, ‘Pedaꞌ kah! Ya muloꞌ abaꞌ penginom, kawan kebala penageh pajak abaꞌ urang dusa te kebukai.’ Uleh amat piyaꞌ, pemanai ari Tuhan Allah udah pedaꞌ alam ugaꞌ urang te nyerah idop ke Ya.”
Isa nganoꞌ kebala kuta te nadai pecayaꞌ
20 Baroꞌ Isa belaboh nganoꞌ kebala kuta teban Ya mayoh mulah kebala utai te nyaroh, nema urang te diyaꞌ ngai nudi dusa. 21 Isa madah, “Rugi amat kitaꞌ kuta Kurasem! Rugi amat kitaꞌ kuta Betsaida! Nema enteꞌ de Tiros abaꞌ Sidon tejadi utai te nyaroh ari Tuhan Allah upa te tejadi de tengah kitaꞌ, udah lamaꞌ sidaꞌ nudi dusa abaꞌ ngau baju te ngau bekenang abaꞌ nepoꞌ abos de palaꞌ sidaꞌ tana sidaꞌ nesal. 22 Uleh Ku madah ke kitaꞌ, senta Tuhan Allah ngukom ugaꞌ urang, ukom te detangong sidaꞌ Tiros abaꞌ sidaꞌ Sidon lebeh lempong ari ukom te detangong kitaꞌ. 23 Abaꞌ kitaꞌ sidaꞌ Kapernaom! Kitaꞌ miker kitaꞌ kaꞌ deangkat ke sruga? Udah sah nadai mah! Kitaꞌ kaꞌ debuai ke neraka. Kebaꞌ kira kebala te nyaroh te udah depulah de tengah kitaꞌ nyaꞌ depulah de Sudom, sidaꞌ pesti ageꞌ adai datai ke entoꞌ! 24 Uleh Ku madah ke kitaꞌ, senta Tuhan Allah ngukom ugaꞌ urang, ukom te detangong sidaꞌ Sudom lebeh lempong ari ukom detangong kitaꞌ.”
Isa bradua abaꞌ ngumai urang datai ngusong Ya
25 Udah nyaꞌ Isa bradua jakoꞌ Ya, “O, Apai Ku, te empu langet abaꞌ bumi, Ku betrimaꞌ kaseh ke Wan nema ugaꞌ nyaꞌ Wan tapok ke ari urang bijak abaꞌ panai, uleh Wan anyaꞌ ke urang biasa. 26 Ku tauꞌ badaꞌ nyaꞌ mah te degaga Wan Pai.”
27 Baroꞌ Isa madah, “Ugaꞌ utai udah deserah Apai Ku ke Ku. Niseꞌ urang te ngelala Anak, bukai ari Apai. Abaꞌ niseꞌ urang te ngelala Apai bukai ari Anak, abaꞌ kebala urang te depileh Anak.
28 Boh ngusong Ku, ugaꞌ kitaꞌ te lelak, nema mayoh ngasa beban te kitaꞌ tangong, Ku kaꞌ mantoꞌ kitaꞌ isaꞌ penyuan kitaꞌ lantang. 29 Tunok ke printah Kuc abaꞌ belajar ke ari Ku. Nema Ku toꞌ lemah-lemot abaꞌ renah ati, abaꞌ kitaꞌ kaꞌ ngasa penyuan kitaꞌ lantang. 30 Nema tunok ke printah Ku nyaꞌ nyamai, abaꞌ pengajar te Ku suroh ke kitaꞌ nadai berat.”