Isa bekuasa ngatoh apa te tauꞌ depulah urang ari Sabat
12
Adai sekaleꞌ pas ari Sabat, ari sidaꞌ Yahudi nyemah Tuhan Allah, Isa abaꞌ kebala muret Ya mansaꞌ belayan ganom. Tegal lapar, kebala muret Ya nguleh leka ganom abaꞌ makai.a 2 Medaꞌ piyaꞌ kebala sidaꞌ Parisi te diyaꞌ madah, “Pedaꞌ! Kebala muret Wan nyaꞌ kreja ari Sabat, tunaꞌ Prator Tuhan Allah te detules Musa ngerot urang kreja ari toꞌ!”3 Uleh Isa nyawot sidaꞌ, “Nadai piyaꞌ kitaꞌ kalaꞌ maca alam Kitab Suci, apa te udah depulah Daod abaꞌ urang te abaꞌ ya jalai sidaꞌ lapar?b 4 Daod tamaꞌ ke Kemah Tuhan Allah. Ya ngameꞌ ruti te udah deserah ke Tuhan Allah, baroꞌ sidaꞌ berama makai ruti nyaꞌ. Tunaꞌ ruti nyaꞌ nitauꞌ depakai, bukai ari peroꞌ kebala imam mah te tauꞌ makaic. 5 Nadai piyaꞌ kitaꞌ kalaꞌ maca alam Prator Tuhan Allah te detules Musa, ngenap ari Sabat kebala imam bekerja de Rumah Kudos Tuhan Allah? Sidaꞌ ngelangar prator ari Sabat uleh sidaꞌ nadai kalaꞌ desalah.d 6 Ku madah ke kitaꞌ: Ditoꞌ adai te lebeh penteng ari Rumah Kudos Tuhan Allah. 7 Alam Kitab Suci madah, ‘Kaseh mah te Ku kedekaꞌ ukai kurban jelu.’e Enteꞌ kitaꞌ nyarok te depadah nyaꞌ, pesti kitaꞌ nadai kaꞌ nyalah urang te nadai salah. 8 Nema Anak Ensia bekuasa ngatoh apa te tauꞌ depulah urang ari Sabat.”
Isa nyemoh urang te temati jari sepiyak
9 Udah Isa angkat ari nyaꞌ, Ya tamaꞌ ke rumah te jalai sidaꞌ Yahudi nyemah Tuhan Allah. 10 Diyaꞌ adai sikoꞌ urang te temati jari sepiyak. Dua tiga ikoꞌ sidaꞌ Parisi te kaꞌ ngigaꞌ penyalah Isa nanyaꞌ Ya, jakoꞌ sida, “Tauꞌ nadai nyemoh urang ari Sabat?”
11 Isa nyawot, “Empama teh adai sikoꞌ ari entara kitaꞌ empu sikoꞌ dumba, abaꞌ dumba nyaꞌ laboh ke alam lubang pas ari Sabat, pesti ya kaꞌ narek dumba nyaꞌ keluar weh? 12 Nadai piyaꞌ ensia toꞌ lebeh penteng ari dumba? Kebaꞌ nyaꞌ tauꞌ mulah te bayek pas ari Sabat.”
13 Baroꞌ Isa madah ke urang te temati jari sepiyak nyaꞌ, “Ulor ke jari meh.” Urang nyaꞌ ngulor jari ya, abaꞌ jari nyaꞌ sintak semoh upa jari ya te sepiyak. 14 Medaꞌ apa te udah depulah Isa, kebala sidaꞌ Parisi angkat ari nyaꞌ abaꞌ sidaꞌ ngigaꞌ akal kati cara munoh Isa.
Isa Pelayan te depileh Tuhan Allah
15 Isa tauꞌ badaꞌ enteꞌ kebala sidaꞌ Parisi nyaꞌ kaꞌ munoh Ya. Udah nyaꞌ Ya angkat ari nyaꞌ abaꞌ mayoh urang nerudi Ya, baroꞌ Ya nyemoh ugaꞌ urang te pedeh. 16 Uleh Ya ngerot sidaꞌ nusoi sapa Ya ke urang bukai. 17 Ngau cara nyaꞌ temoꞌ mah apa te depadah Tuhan Allah ari Nabi Yesaya,
18 “Toꞌ mah Pelayan Ku te Ku pileh,
Urang te Ku kaseh abaꞌ te nyuroh ati Ku gaga.
Roh Ku kaꞌ Ku bereꞌ ke Ya,
abaꞌ Ya kaꞌ madah ke kebala bansa apa te udah Ku putos nyaꞌ adel.
19 Ya nadai kaꞌ belayaꞌ abaꞌ begoꞌ sareng,
abaꞌ urang nadai ninga goꞌ Ya de sekamat jalai besai.
20 Buloh te telepeꞌ nadai ngamoꞌ depatah Ya,
abaꞌ kelita te cudor nadai ngamoꞌ depadam Ya.f
Ya kaꞌ mulah piyaꞌ datai ke te adel nyaꞌ menang ari te nadai adel.
21 Abaꞌ Ya mah te deagam kebala bansa.”g
Sidaꞌ Parisi nudoh Isa ngau kuasa Belsebol
22 Udah nyaꞌ kebala urang ngemaiꞌ sikoꞌ urang butaꞌ abaꞌ bisoꞌ ngusong Isa nema ya desarong roh jat. Isa nyemoh urang nyaꞌ sampai ya tauꞌ medaꞌ abaꞌ becakap ageꞌ. 23 Ugaꞌ urang ampal medaꞌ apa te depulah Isa, sidaꞌ madah, “Ni naꞌ mah Ya toꞌ pureh Raja Daot te dedanyi nyaꞌ.”
24 Uleh pas sidaꞌ Parisi ninga nyaꞌ, sidaꞌ madah, “Ya tauꞌ nesar bala sitan peroꞌ ngau kuasa Belsebol, kepalaꞌ bala sitan.”
25 Uleh Isa tauꞌ badaꞌ pemiker sidaꞌ kebaꞌ Ya madah ke sidaꞌ, “Enteꞌ alam suteꞌ pemrintah kebala urang te diyaꞌ bemusoh bunoh pesti mah pemrintah nyaꞌ punas. Piyaꞌ gaꞌ enteꞌ alam kuta abaꞌ keluarga, kebala urang te diyaꞌ areh ke pangan, pesti sidaꞌ nadai betan lamaꞌ. 26 Upa piyaꞌ mah gaꞌ alam pemrintah Ibles. Enteꞌ Ibles kepalaꞌ bala sitan nesar roh jat, nyaꞌ sama mah abaꞌ ya ngelawan direꞌ abaꞌ enteꞌ piyaꞌ pesti mah pemrintah nyaꞌ nadai betan lamaꞌ. 27 Enteꞌ Ku muru bala sitan ngau kuasa Belsebol, ngau kuasa sapa kebala muret kitaꞌ muru sitan? Ku madah ke kitaꞌ, apa te udah depulah kebala muret kitaꞌ kedireꞌ mah te ngau bukti enteꞌ te detudoh kitaꞌ ke Ku toꞌ salah. 28 Uleh nema Ku muru sitan ngau kuasa Tuhan Allah, nyaꞌ ngau bukti Pemrintah Tuhan Allah adai de tengah kitaꞌ.
29 Niseꞌ te tauꞌ tamaꞌ ke rumah urang te kuat abaꞌ ngerampas kebala reta bena ya enteꞌ urang te kuat nyaꞌ nadai detamet dulau. Enteꞌ urang nyaꞌ udah detamet baroꞌ mah tauꞌ tamaꞌ abaꞌ ngerampas bala reta bena ya.
30 Sapa te nadai abaꞌ Ku, breti ngelawan Ku. Sapa te nadai ngumpol dumba abaꞌ Ku, breti ya nyuroh kebala dumba pamar-piyar. 31 Ku madah ke kitaꞌ, ugaꞌ dusa te depulah urang abaꞌ dusa melicak tauꞌ deampon. Uleh enteꞌ melicak Roh Kudos nadai tauꞌ deampon. 32 Enteꞌ urang melicak Anak Ensia, ageꞌ ya tauꞌ deampon. Uleh enteꞌ urang melicak Roh Kudos, ya nadai ageꞌ tauꞌ deampon belaboh ari entoꞌ datai ke jemah lah!
33 Enteꞌ kitaꞌ namak pon te bayek, pesti mah buah ya bayek. Enteꞌ kitaꞌ namak pon te nadai bayek, pesti mah nadai bayek gaꞌ buah ya. Nema bayek ke nadai pon nyaꞌ dekelala ari buah ya. 34 Woi kitaꞌ pureh ular te bisa! Kati kitaꞌ tauꞌ madah kebala utai te bayek, enteꞌ kitaꞌ kedireꞌ jat? Nema apa te pansot ari mulot, nyaꞌ timol ari alam ati. 35 Enteꞌ urang te bayek ati, pesti mah kebala cakap te pansot ari mulot ya nyaꞌ bayek gaꞌ. Enteꞌ urang te jat ati, pesti mah kebala cakap te pansot ari mulot ya nyaꞌ jat gaꞌ.
36 Uleh Ku madah ke kitaꞌ, senta Tuhan Allah nyidang dunia toꞌ, ngenap urang alah betangong jawab ke ugaꞌ cakap sidaꞌ te niseꞌ reti. 37 Nema kebala cakap kitaꞌ kedireꞌ mah te dengau mutos salah sekaleꞌ ke nadai kitaꞌ.”
Kebala urang te ahli alam Prator Musa abaꞌ sidaꞌ Parisi mintaꞌ Isa mulah utai te nyaroh
38 Udah nyaꞌ datai dua tiga ikoꞌ sidaꞌ te ahli alam Prator Musa abaꞌ sidaꞌ Parisi, sidaꞌ madah ke Isa, “Guru, kami kaꞌ medaꞌ Wan mulah utai te nyaroh ari Tuhan Allah.”
39 Isa nyawot sidaꞌ, “Urang te idop de jaman toꞌ lampar jaiꞌ abaꞌ nadai setia. Sidaꞌ mintaꞌ tana, uleh ke sidaꞌ sama sekaleꞌ nadai debereꞌ tana bukai ari tana nabi Yunos. 40 Yunos diyau alam perot ikan besai selamaꞌ tiga ari tiga malam. Piyaꞌ gaꞌ Anak Ensia, Ya kaꞌ diyau alam kubor selamaꞌ tiga ari tiga malam.h 41 Jemah lah senta Tuhan Allah ngukom ugaꞌ urang, sidaꞌ Niniwi kaꞌ diri abaꞌ kitaꞌ te de jaman toꞌ, abaꞌ sidaꞌ kaꞌ madah penyalah kitaꞌ. Nema kebala sidaꞌ Niniwi nyaꞌ nudi kebala dusa sidaꞌ jalai sidaꞌ ninga kotbah Yunos, uleh Ku madah ke kitaꞌ, entoꞌ urang te adai ditoꞌ bah lebeh ageꞌ ari nabi Yunos, uleh kitaꞌ ngai nudi kebala dusa kitaꞌ.i 42 Piyaꞌ gaꞌ senta Tuhan Allah ngukom ugaꞌ urang, ratu ari selatan kaꞌ diri abaꞌ kitaꞌ te de jaman toꞌ, abaꞌ ya kaꞌ madah penyalah kitaꞌ gaꞌ. Nema ratu nyaꞌ sangop datai ari ujong bumi kaꞌ ninga pemanai Raja Salomo, uleh Ku madah ke kitaꞌ, entoꞌ urang te adai ditoꞌ bah lebeh ageꞌ ari Raja Salomo, uleh kitaꞌ ngai ninga Ya.”j
Sitan bebalek ageꞌ
43 Baroꞌ Isa madah, “Enteꞌ sitan rari ari ensia, ya angkat ke teban tanah te rangkai, ngigaꞌ teban te jalai belepa. Uleh nema ya nadai nemu teban jalai ya belepa 44 kebaꞌ nyaꞌ ya madah, ‘Ku kaꞌ bebalek ageꞌ ke rumah ku, ke ensia te udah jalai ku diyau.’ Pas ya bebalek, sitan nyaꞌ medaꞌ rumah nyaꞌ nyau breseh abaꞌ udah delagaꞌ. 45 Baroꞌ ya angkat abaꞌ ngemaiꞌ tujoh sitan te kebukai te lebeh jaiꞌ ageꞌ ari ya, sidaꞌ tamaꞌ ke rumah nyaꞌ, ke ensia te udah jalai ya diyau. Kebaꞌ idop urang nyaꞌ lebeh parah ageꞌ ari ya te semaru. Piyaꞌ mah gaꞌ te kaꞌ tejadi ke kebala urang te jat de jaman toꞌ.”
Inai abaꞌ kebala menyadeꞌ Isa
46 Tengan Isa ageꞌ becakap abaꞌ kebala urang banyau nyaꞌ, datai mah inai abaꞌ kebala menyadeꞌ Ya. Sidaꞌ diri de luar abaꞌ kaꞌ becakap abaꞌ Ya. 47 Sikoꞌ ari entara urang banyau te diyaꞌ madah ke Isa, “Guru, nyen inai abaꞌ kebala menyadeꞌ Wan adai de luar. Sidaꞌ kaꞌ becakap abaꞌ Wan.”