Kisah empama urang te ngunsai beneh
13
Sari nyaꞌ gaꞌ Isa nudi rumah nyaꞌ angkat ke tisi danau abaꞌ dudok diyaꞌ. 2 Mayoh amat kebala urang datai ke menatai begugoꞌ ngelileng Ya. Medaꞌ piyaꞌ Ya angkat dudok de prau, uleh urang banyau nyaꞌ diri de darat. 3 Baroꞌ Isa ngajar mayoh utai ke sidaꞌ ngau kisah empama, jakoꞌ Ya, “Adai sikoꞌ urang te beuma angkat ngunsai beneh. 4 Pas ya ngunsai, adai beneh te laboh de jalai. Baroꞌ datai burong abaꞌ beneh nyaꞌ depakai pames. 5 Beneh keduaꞌ laboh de tanah te bebatu te nadai mayoh tanah, bala beneh nyaꞌ deras matok, nema tanah mimet. 6 Uleh pas mataari nyau tingeꞌ, kebala sumok nyaꞌ layos, udah nyaꞌ rangkai abaꞌ mati nema urat ya nadai dalam. 7 Adai keduaꞌ laboh de tengah belayan dureꞌ. Belayan dureꞌ nyaꞌ tumoh abaꞌ melet kebala sumok nyaꞌ sampai mati. 8 Adai gaꞌ beneh te laboh de tanah te bayek, beneh nyaꞌ tumoh galak abaꞌ bebuah, adai te seratos kaleꞌ lipat, adai te nam puloh kaleꞌ lipat, abaꞌ adai te tiga puloh kaleꞌ lipat.” 9 Udah Isa nusoi kisah empama nyaꞌ, Ya madah, “Sapa te adai peneng ngau ninga, dinga kah!”10 Udah nyaꞌ kebala muret Isa datai abaꞌ nanyaꞌ ke Ya, jakoꞌ sidaꞌ “Ngapa bah Wan ngajar urang banyau ngau kisah empama?”
11 Isa nyawot sidaꞌ, “Meliyaꞌ teh Tuhan Allah bedau kaꞌ nganyaꞌ upa kati Pemrintah Ya. Entoꞌ kitaꞌ desadi Tuhan Allah ngetauꞌ upa kati Pemrintah Ya nyaꞌ, uleh urang banyau nyaꞌ nadai. 12 Nema Tuhan Allah kaꞌ namah pemenauꞌ ke urang te kaꞌ nyarok, uleh ke urang te ngai nyarok, Tuhan Allah kaꞌ ngameꞌ pemenauꞌ te desangkaꞌ urang nyaꞌ empu ya. 13 Nyaꞌ mah te ngasoh Ku ngajar urang banyau ngau kisah empama, nema amat sidaꞌ medaꞌ uleh sidaꞌ nadai bamat-amat merati, abaꞌ amat sidaꞌ ninga uleh sidaꞌ nadai nyarok. 14 Ngau cara nyaꞌ temoꞌ mah apa te udah depadah Nabi Yesaya,
‘Sidaꞌ kaꞌ ninga sengabot
uleh nadai nyarok
sidaꞌ kaꞌ medaꞌ sengabot
uleh nitauꞌ badaꞌ apa te sidaꞌ pedaꞌ.
15 Nema urang de bansa toꞌ ma degel ati,
peneng sidaꞌ nyau berat nadai kaꞌ ninga,
abaꞌ mata sidaꞌ nyau bekamet nyuroh sidaꞌ nitauꞌ medaꞌ.
Enteꞌ nadai piyaꞌ,
mata sidaꞌ kaꞌ medaꞌ,
peneng sidaꞌ ninga,
abaꞌ ati sidaꞌ nyarok abaꞌ bebalek ke Ku,
abaꞌ Ku kaꞌ nyuroh sidaꞌ semoh.’a
16 Uleh betuah amat mata kitaꞌ nema udah medaꞌ abaꞌ peneng kitaꞌ nema kitaꞌ udah ninga. 17 Ku madah ke kitaꞌ, mayoh nabi abaꞌ urang te kenaꞌ, kaꞌ medaꞌ apa te kitaꞌ pedaꞌ entoꞌ, uleh sidaꞌ nadai medaꞌ, abaꞌ sidaꞌ kaꞌ ninga te kitaꞌ dinga entoꞌ, uleh sidaꞌ nadai ninga.
18 Kebaꞌ nyaꞌ dinga ke reti kisah empama urang te ngunsai beneh nyaꞌ. 19 Beneh te laboh de tisi jalai nyaꞌ, upa urang te ninga pengajar Pemrintah Tuhan Allah uleh nadai nyarok. Baroꞌ Kepalaꞌ bala sitan datai ngameꞌ apa deunsai alam ati sidaꞌ. 20 Beneh te laboh de tanah te bebatu nyaꞌ, upa urang te ninga apa te jakoꞌ Tuhan Allah abaꞌ sintak nerimaꞌ ngau ati gaga. 21 Uleh apa te jakoꞌ Tuhan Allah nyaꞌ nadai beurat de alam ati sidaꞌ nyaꞌ nyuroh sidaꞌ nadai tan lamaꞌ. Asa adai te medeh sidaꞌ tegal patoh ke Tuhan Allah, sidaꞌ sintak rari ari Tuhan Allah. 22 Beneh te laboh de belayan dureꞌ nyaꞌ, upa kebala urang te ninga apa te jakoꞌ Tuhan Allah, uleh saban ke pengidop sidaꞌ abaꞌ sidaꞌ kaꞌ idop nyamai de dunia toꞌ. Ugaꞌ nyaꞌ nekol apa te jakoꞌ Tuhan Allah tumoh alam ati sidaꞌ, nyaꞌ ngasoh sidaꞌ nadai bebuah. 23 Beneh te laboh de tanah te bayek nyaꞌ, upa kebala urang te udah ninga abaꞌ nyarok te jakoꞌ Tuhan Allah. Nyaꞌ nyuroh sidaꞌ bebuah, adai te seratos kaleꞌ lipat, adai te nam puloh kaleꞌ lipat, abaꞌ adai te tiga puloh kaleꞌ lipat.”
Kisah empama lalang abaꞌ ganom.
24 Udah nyaꞌ, Isa nusoi ageꞌ kisah empama ke urang banyau jakoꞌ Ya, “Pemrintah Tuhan Allah toꞌ upa urang te beuma ngunsai beneh te bayek de uma ya. 25 Uleh pas malam senta urang tinok, munsoh datai ngunsai beneh lalang de entara ganom nyaꞌ, baroꞌ ya rari. 26 Pas ganom nyaꞌ tumoh tingeꞌ abaꞌ nyau trebet, pedaꞌ mah lalang de entara ganom.
27 Baroꞌ kebala urang te bekreja nyaꞌ datai ngusong urang te empu uma nyaꞌ abaꞌ madah, “Pak, nadai piyaꞌ wan ngunsai beneh te bayek de uma wan, uleh ngapa entoꞌ adai lalang diyaꞌ? Ari ni lalang nyaꞌ?”
28 Urang te empu uma nyaꞌ nyawot, ‘Pesti munsoh ku te ngunsai beneh lalang nyaꞌ.’
Baroꞌ kebala urang te bekreja nyaꞌ nanyaꞌ ageꞌ, ‘Pak, kaꞌ wan jalai kami angkat encabot kebala lalang nyaꞌ?’
29 Ya nyawot, ‘Nang, nema enteꞌ lalang nyaꞌ decabot, ilaꞌ ganom nyaꞌ abaꞌ tecabot gaꞌ. 30 Isaꞌ mah lalang nyaꞌ tumoh bekamoh datai ke senta rama ngetau. Pas rama ngetau lah ku madah ke kebala urang te ngetau: Kumpol ke dulau lalang nyaꞌ, tamet, baroꞌ tunu. Udah nyaꞌ kumpol ke ganom nyaꞌ, baroꞌ pajak ke alam durong ku.’ ”
Kisah empama igeꞌ ensawi abaꞌ ragi
31 Udah nyaꞌ Isa nusoi ageꞌ kisah empama ke urang banyau, jakoꞌ Ya, “Pemrintah Tuhan Allah toꞌ upa igeꞌ ensawi te deameꞌ urang, baroꞌ detamak ya de kebon ya.b 32 Igeꞌ ensawi beneh te paleng engkaꞌ met. Uleh asa nyau tumoh, ya tauꞌ lebeh besai ari kebala te detamak te bukai. Ya jadi pon kayu te besai, sampai kebala burong besarang de kebala dan ya.”c
33 Udah nyaꞌ Isa nusoi kisah empama te kebukai ke urang banyau, jakoꞌ Ya, “Pemrintah Tuhan Allah toꞌ upa ragi te deameꞌ urang inoꞌ detunyau kamoh aiꞌ abaꞌ tiga guni besai tepong ganom sampai ya ngeremai ugaꞌ.”
34 Ugaꞌ nyaꞌ deajar Isa ke urang banyau ngau kisah empama. Abaꞌ datai ke suteꞌ mah niseꞌ te deajar ya ke sidaꞌ nadai ngau kisah empama. 35 Isa mulah piyaꞌ ngau nemoꞌ apa te depadah nabi,
“Ku kaꞌ becakap ngau kisah empama,
abaꞌ Ku kaꞌ madah kebala utai te detapok belaboh ari dunia toꞌ depulah.”d
Isa nyelas reti kisah empama lalang abaꞌ ganom
36 Udah nyaꞌ Isa nudi urang banyau nyaꞌ, baroꞌ Ya tamaꞌ rumah. Kebala muret Ya datai abaꞌ madah, “Guru, cuba Wan nyelas ke kami reti kisah empama lalang de entara ganom nyaꞌ.”
37 Isa nyawot sidaꞌ, “Urang te ngunsai beneh te bayek nyaꞌ Anak Ensia. 38 Uma nyaꞌ dunia toꞌ. Beneh te bayek nyaꞌ kebala urang te deempu Tuhan Allah abaꞌ idop alam Pemrintah Ya. Lalang nyaꞌ kebala urang te deempu Ibles kepalaꞌ bala sitan. 39 Munsoh te ngunsai beneh lalang nyaꞌ Ibles. Rama ngetau nyaꞌ, pemadoꞌ jeman toꞌ, kebala urang te ngetau nyaꞌ kebala mlikat.
40 Upa lalang dekumpol abaꞌ debuai ke alam api, upa piyaꞌ gaꞌ senta pemadoꞌ jeman toꞌ lah: 41 Anak Ensia kaꞌ ngasoh kebala mlikat Ya ngumpol kebala urang te ngasoh urang mulah dusa, abaꞌ ugaꞌ urang te mulah te jat abaꞌ ngeluar sidaꞌ ari Pemrintah Ya. 42 Ugaꞌ sidaꞌ kaꞌ debuai ke alam api te bediyong, diyaꞌ sidaꞌ kaꞌ nyabak abaꞌ lampar ngasa pemedeh sampai begetar beganyar. 43 Pas tengan nyaꞌ mah gaꞌ kebala urang te kenaꞌ kaꞌ besinar upa mataari de alam Pemrintah Apai sidaꞌ. Sapa te adai peneng ngau ninga, dinga kah!”
Kisah empama reta te alam tanah abaꞌ mutiara te brega
44 Baroꞌ Isa madah ageꞌ, jakoꞌ Ya, “Pemrintah Tuhan Allah toꞌ upa reta te ma brega detapok urang alam tanah. Reta nyaꞌ detemu sikoꞌ urang baroꞌ ya ngubor reta nyaꞌ ageꞌ alam tanah. Udah nyaꞌ nema ya lampar gaga, urang nyaꞌ angkat nyual ugaꞌ te deempu ya, baroꞌ meli tanah nyaꞌ.
45 Pemrintah Tuhan Allah toꞌ, tauꞌ gaꞌ upa sikoꞌ urang te bedagang, te ngigaꞌ mutiara te ma brega. 46 Breta ya nemu mutiara nyaꞌ, ya beburoh angkat abaꞌ nyual ugaꞌ utai te deempu ya, baroꞌ ya meli mutiara nyaꞌ.”
Kisah empama pukat te dejentang
47 Baroꞌ Isa madah ageꞌ, “Pemrintah Tuhan Allah upa pukat te dejentang de danau, baroꞌ buleh brena macam ikan. 48 Udah pukat nyaꞌ penoh, pukat nyaꞌ debanter kebala urang te mukat abaꞌ debaiꞌ ke darat. Udah nyaꞌ sidaꞌ dudok abaꞌ mileh kebala ikan nyaꞌ, te bayek detepoꞌ alam ragaꞌ te nadai bayek debuai. 49 Piyaꞌ gaꞌ pemadoꞌ jeman toꞌ lah, kebala mlikat kaꞌ datai mileh urang te jat abaꞌ urang te kenaꞌ. 50 Baroꞌ kebala urang te jat nyaꞌ kaꞌ debuai ke alam api te bediyong. Diyaꞌ sidaꞌ kaꞌ nyabak abaꞌ lampar ngasa pemedeh sampai begetar beganyar.”
51 Baroꞌ Isa nanyaꞌ kebala muret Ya, “Kati! Nyarok nadai kitaꞌ ke reti kisah empama toꞌ?”
Sawot sidaꞌ, “Auꞌ Guru, nyarok mah kami.”
52 Udah nyaꞌ Isa madah, “Kebaꞌ nyaꞌ ngenap urang te ahli alam Prator Musa te udah nerimaꞌ pengajar Pemrintah Tuhan Allah, ya upa urang te empu rumah ngeruah reta te baru abaꞌ lamaꞌ ari badah te ngau ya nepoꞌ.”
Isa dekengai de kampong direꞌ
53 Udah Isa badoꞌ ngajar kebala kisah empama nyaꞌ, Ya angkat ari nyaꞌ. 54 Ya pulai ke kampong Nasaret teban jalai Ya besai. Diyaꞌ, Ya ngajar urang banyau de rumah teban jalai sidaꞌ Yahudi nyemah Tuhan Allah. Sidaꞌ ma ampal ninga Ya abaꞌ madah, “Ari ni bah Ya toꞌ buleh pemanai abaꞌ kuasa ngau mulah utai te nyaroh upa toꞌ? 55 Ukai piyaꞌ Ya toꞌ anak tukang kayu? Ukai piyaꞌ ya toꞌ anak Maria, abaꞌ kebala menyadeꞌ Ya nyaꞌ, Yakubos, Yusop, Simon abaꞌ Yudas? 56 Nadai piyaꞌ kebala menyadeꞌ Ya te inoꞌ nyaꞌ ageꞌ diyau de kuta toꞌ gaꞌ abaꞌ kita? Ari ni bah Ya buleh ugaꞌ toꞌ?” 57 Kebaꞌ nyaꞌ sidaꞌ ngai pecayaꞌ ke Isa.
Baroꞌ Isa madah ke sidaꞌ, “Sikoꞌ nabi depanang diyaꞌ-ditoꞌ, uleh nadai de kampong abaꞌ rumah direꞌ.”
58 Abaꞌ tegal sidaꞌ ngai pecayaꞌ ke Isa, kebaꞌ Ya nadai mayoh mulah kebala utai te nyaroh diyaꞌ.