Yohanes Pemaneꞌ debunoh
14
Pas tengan nyaꞌ, Herodes Antipas raja Galelia nyaꞌ ninga kebala urang becakap ke apa te udah depulah Isa. 2 Herodes madah ke kebala pejabat ya, “Pesti toꞌ Yohanes Pemaneꞌ te udah idop ageꞌ! Kebaꞌ nyaꞌ Ya adai kuasa ngau mulah te nyaroh.”3-4 Nema sebedau nyaꞌ teh Herodes udah ngasoh kebala prajuret ya nangkap Yohanes Pemaneꞌ, masong ya abaꞌ majak ya ke alam penyara. Herodes mulah piyaꞌ nema ya ngai ninga Yohanes Pemaneꞌ ngerara ya. Yohanes Pemaneꞌ udah ngerara Herodes jakoꞌ ya, “Mali meh jadi ke Herodias ipar meh nyaꞌ.” Herodias toꞌ bini Pelipos menyadeꞌ Herodes. 5 Tunaꞌ des Herodes kaꞌ munoh Yohanes, uleh ya takot ke kebala urang banyau, nema sidaꞌ ngangap Yohanes toꞌ nabi.
6 Uleh pas ari ulang taon Herodes, anak Herudias te dara bejuget de mua kebala temuai abaꞌ nyaꞌ ngasoh ati Herudes gaga amat. 7 Kebaꞌ nyaꞌ Herodes bedanyi blumaꞌ besumpah kaꞌ mereꞌ apa jaꞌ te depintaꞌ ya.
8 Nema tegal deaji inai ya, miyak dara nyaꞌ madah, “Ku kaꞌ mintaꞌ palaꞌ Yohanes Pemaneꞌ detepoꞌ de lemidang baiꞌ ke ku entoꞌ!”
9 Ninga te depintaꞌ ya, ati Herudes ma mah riyu. Uleh nema ya udah bedanyi de mua kebala temuai, kebaꞌ ya mereꞌ printah isaꞌ te depintaꞌ miyak dara nyaꞌ debereꞌ. 10 Baroꞌ ya nyuroh kebala prajuret ya ke penyara mancong palaꞌ Yohanes. 11 Sidaꞌ ngemaiꞌ palaꞌ Yohanes ngau lemidang abaꞌ mereꞌ ke miyak dara nyaꞌ. Baroꞌ miyak dara nyaꞌ mereꞌ ke inai ya. 12 Udah nyaꞌ kebala muret Yohanes Pemaneꞌ datai ngameꞌ abaꞌ ngubor bangkai ya. Baroꞌ sidaꞌ angkat madah brita nyaꞌ ke Isa.
Isa mereꞌ limaꞌ ribu lebeh urang makai
13 Pas Isa ninga apa te udah nacah Yohanes Pemaneꞌ, Ya angkat abaꞌ kebala muret Ya nikeꞌ prau abaꞌ angkat ke teban te sunyeꞌ. Uleh kebala urang ninga Isa nyau angkat. Baroꞌ sidaꞌ angkat ari kebala kuta sidaꞌ mupoh Isa ari jalai darat. 14 Pas Isa turon ari prau, Ya medaꞌ urang uleh kepemayoh, tengan nyaꞌ timol pengaseh Ya ke sidaꞌ, abaꞌ Ya nyemoh kebala urang te pedeh.
15 Pas ari nyau slepat petang, kebala muret Isa datai abaꞌ madah ke Ya, “Guru, teban toꞌ sunyeꞌ abaꞌ ari toꞌ nyau kaꞌ petang. Suroh ke kebala sidaꞌ nyaꞌ angkat, isaꞌ sidaꞌ tauꞌ meli pemakai de kebala kampong.”
16 Uleh Isa nyawot sidaꞌ, “Adu ngasoh sidaꞌ angkat, kitaꞌ mah te alah mereꞌ sidaꞌ makai.”
17 Sawot sidaꞌ, “Te adai de kami toꞌ peroꞌ limaꞌ uteꞌ ruti abaꞌ dua ikoꞌ ikan mah.”
18 Baroꞌ Isa madah, “Baiꞌ kitoꞌ ruti abaꞌ ikan nyaꞌ.” 19 Udah nyaꞌ Isa ngasoh kebala urang banyau nyaꞌ dudok de atau rumpot. Baroꞌ Ya nyapai limaꞌ ruti abaꞌ dua ikoꞌ ikan nyaꞌ, baroꞌ Ya engkadah ke langet ngucap sukor ke Tuhan Allah. Udah nyaꞌ Ya mungaꞌ ruti nyaꞌ abaꞌ mereꞌ ke kebala muret Ya, baroꞌ kebala muret Ya magi ke urang banyau nyaꞌ. 20 Ugaꞌ sidaꞌ makai sampai kenyang. Udah nyaꞌ kebala muret Isa ngumpol plebeh ari pemakai sidaꞌ, adai dua belas ragaꞌ penoh. 21 Pemayoh urang te abaꞌ makai diyaꞌ kurang lebeh limaꞌ ribu urang laki, nadai ngasi kebala urang inoꞌ abaꞌ kebala miyak.
Isa bejalai de atau aiꞌ
22 Udah nyaꞌ Isa ngasoh kebala muret Ya nikeꞌ ke prau abaꞌ dulau geꞌ angkat ari Ya nyemerang danau, abaꞌ Ya ngasoh kebala urang banyau pulai. 23 Nyau urang banyau nyaꞌ angkat, Isa nikeꞌ ke buket abaꞌ bradua diyaꞌ kedireꞌ. Diyaꞌ Ya diyau kedireꞌ datai ke malam. 24 Tengan nyaꞌ prau te dengau kebala muret Isa, nyau de tengah danau. Prau sidaꞌ belingak-lingok tacah glumang aiꞌ abaꞌ ribot te datai ari mua sidaꞌ. 25 Nyau dinaari Isa datai ngusong kebala muret Ya, abaꞌ Ya bejalai de atau aiꞌ. 26 Pas sidaꞌ medaꞌ Isa bejalai de atau aiꞌ, sidaꞌ ma takot blumaꞌ mangkes, “Antu!”
27 Uleh Isa lansong nyawot sidaꞌ, “Tenang! Ku toꞌ Isa. Nang takot!”
28 Baroꞌ Petros madah, “Tuhan enteꞌ amat nyaꞌ Wan, suroh ke ku ngusong Wan bejalai de atau aiꞌ.”
29 Sawot Isa, “Kitoꞌ mah!” Udah nyaꞌ Petros turon ari prau abaꞌ bejalai de atau aiꞌ ngusong Isa. 30 Uleh pas Petros ngasa lampar betat kudeꞌ de danau nyaꞌ, ya takot abaꞌ tengelam, baroꞌ ya ngangau Isa, “Tuhan, talau ke ku!”
31 Isa sintak ngulor jari Ya abaꞌ megai jari Petros, blumaꞌ madah, “Lampar met iman meh Petros. Ngapa meh ragu ke Ku?”
32 Baroꞌ Isa abaꞌ Petros nikeꞌ ke prau, abaꞌ kudeꞌ sigeꞌ badoꞌ mah. 33 Udah nyaꞌ kebala muret Isa te adai alam prau nyaꞌ nyungkon nyemah Ya. Sidaꞌ madah, “Amat mah Wan Anak Tuhan Allah.”
Isa nyemoh urang te pedeh de Genesaret
34 Pas sidaꞌ datai ke sepiyak danau, sidaꞌ turon de dairah Genesaret. 35 Breta kebala urang te diyaꞌ medaꞌ Isa nyau datai kiyaꞌ, sidaꞌ bepesau ke ugaꞌ dairah de sekamat nyaꞌ enteꞌ Isa nyau datai kiyaꞌ. Kebaꞌ urang datai ngemaiꞌ ugaꞌ urang te pedeh ngusong Isa. 36 Sidaꞌ mintaꞌ isaꞌ Ya nyadi sidaꞌ nyamah ujong jubah Ya. Abaꞌ ugaꞌ urang te nyamah ujong jubah Ya semoh.