Kebala utai te ngasoh kita najes de mua Tuhan Allah
15
Udah nyaꞌ datai dua tiga ikoꞌ sidaꞌ Parisi abaꞌ urang te ahli alam Prator Musa ari Yerosalem ngusong Isa. Sidaꞌ madah, 2 “Ngapa bah kebala muret Wan ngelangar prator adat basa puyang jagang kita? Sidaꞌ makai nadai bebasok jari!”3 Isa nyawot sidaꞌ, “Ngapa kitaꞌ ngelangar printah Tuhan Allah, tegal prator adat basa puyang jagang kitaꞌ gaꞌ? 4 Tuhan Allah madah, ‘Hormat ke apai abaꞌ inai kitaꞌ,’a abaꞌ ‘Sapa te ngutok apai abaꞌ inai direꞌ alah deukom mati.’b 5 Uleh kitaꞌ ngajar, tauꞌ madah ke apai inai upa pitoꞌ, ‘Ku nitauꞌ mantoꞌ apai abaꞌ inai ku ageꞌ, nema reta bena ku te kaꞌ ku bereꞌ ke senikoꞌ udah ku bereꞌ ke Tuhan Allah.’ 6 Nyaꞌ breti kitaꞌ ngajar urang nadai hormat ke apai inai direꞌ. Kitaꞌ ngelangar ukom Tuhan Allah nema kitaꞌ lebeh patoh ke adat basa puyang jagang kitaꞌ. 7 Eh! Kitaꞌ te budi-budi bayek! Amat mah te denebuat nabi Yesaya ke kitaꞌ,
8 ‘Bansa toꞌ muji Ku ngau mulot sidaꞌ gena,
uleh ati sidaꞌ jaoh ari Ku.
9 Peracuma mah sidaꞌ nyemah Ku,
nema te deajar sidaꞌ nyaꞌ printah ensia, ukai printah Tuhan Allah.’ ”c
10 Udah nyaꞌ Isa ngumai urang banyau abaꞌ madah ke sidaꞌ, “Dinga ke te jakoꞌ Ku isaꞌ kitaꞌ nyarok! 11 Ukai te tamaꞌ ke mulot te ngasoh urang najes, uleh te pansot ari mulot nyaꞌ te ngasoh urang najes.”
12 Baroꞌ kebala muret Isa datai abaꞌ madah ke Ya, “Wan tauꞌ badaꞌ sidaꞌ Parisi ranseng ninga te jakoꞌ Wan nyaꞌ?”
13 Sawot Isa, “Sidaꞌ nyaꞌ upa utai te nadai detamak Apai Ku te de sruga, abaꞌ jemah lah kaꞌ decabot Ya. 14 Adu kitaꞌ iboh ke sidaꞌ nyaꞌ. Sidaꞌ nyaꞌ upa urang butaꞌ te ngireng urang butaꞌ. Enteꞌ urang butaꞌ te ngireng urang butaꞌ, pesti mah senikoꞌ tepurok alam lubang.”
15 Baroꞌ Petros madah ke Ya, “Jelas ke kami reti kisah empama te jakoꞌ Wan nyaꞌ.”
16 Sawot Isa, “Urang bukai nadai nyarok, kitaꞌ nadai nyarok gaꞌ. Tunaꞌ des nyau kitaꞌ nyarok apa te Ku padah ke nyaꞌ. 17 Pesti kitaꞌ tauꞌ badaꞌ enteꞌ ugaꞌ utai te tamaꞌ alam mulot, turon ke perot, baroꞌ keluar ageꞌ pas kitaꞌ biraꞌ. 18 Uleh apa te pansot ari mulot, datai ari ati abaꞌ nyaꞌ mah te najes urang. 19 Nema ari alam ati timol kebala pemiker te jat, munoh, besinah, cabul, ncuri, ngemulaꞌ tentang urang abaꞌ mejaiꞌ urang. 20 Kebala utai nyaꞌ mah te ngasoh urang najes. Uleh makai nadai bebasok jari, nyaꞌ nadai ngasoh urang najes.”
Isa nulong inoꞌ te bukai sidaꞌ Yahudi nyaꞌ nema ya pecayaꞌ ke Isa
21 Udah nyaꞌ Isa angkat ari nyaꞌ ke dairah Tiros abaꞌ Sidon. 22 Baroꞌ datai mah sikoꞌ urang inoꞌ sidaꞌ Kanaan ari dairah nyaꞌ ngusong Isa blumaꞌ ngangau, “Kaseh ke ku, o Tuhan, pureh Raja Daot, nema anak ku te inoꞌ desarong sitan abaꞌ ya ma mah pedeh.”
23 Uleh Isa sama sekaleꞌ nadai nyawot ya. Baroꞌ kebala muret Ya datai ngusong Ya abaꞌ madah, “Guru, suroh ke inoꞌ nyaꞌ rari, ya nyaꞌ nitauꞌ sunyeꞌ de belakang kita!”
24 Sawot Isa, “Ku deutos peroꞌ ke kebala dumba te lenyau ari bansa Israel.”
25 Uleh inoꞌ nyaꞌ nyemak Ya abaꞌ nyungkon nyemah Ya blumaꞌ madah, “Tuhan, talau ke ku.”
26 Uleh Isa nyawot, “Nadai bayek ngameꞌ pemakai kebala miyak ngau mereꞌ ukoi.”d
27 Sawot inoꞌ nyaꞌ, “Amat mah te jakoꞌ Wan nyaꞌ, uleh ukoi sigeꞌ makai teda urang te empu ya te laboh ari mija.”
28 Baroꞌ Isa madah ke ya, “O boꞌ, lampar besai iman wan! Apa te wan pintaꞌ udah tejadi.” Pas tengan nyaꞌ gaꞌ anak ya semoh.
Mayoh urang te pedeh desemoh Isa
29 Udah nyaꞌ Isa angkat ari nyaꞌ niti tisi danau Galelia abaꞌ nikeꞌ ke buket abaꞌ dudok diyaꞌ. 30 Udah nyaꞌ urang mayoh betelunson datai ngusong Ya ngemaiꞌ kebala urang te lumpoh, timpang, butaꞌ, bisoꞌ abaꞌ brena macam pemedeh te ke bukai, baroꞌ ngelekaꞌ sidaꞌ de mua Isa abaꞌ Isa nyemoh ugaꞌ sidaꞌ. 31 Kebaꞌ kebala urang te diyaꞌ ma ampal medaꞌ urang te bisoꞌ tauꞌ begoꞌ, urang timpang semoh, urang lumpoh bejalai abaꞌ urang butaꞌ medaꞌ. Baroꞌ sidaꞌ muji Tuhan Allah bansa Israel.
Isa mereꞌ makai empat ribu urang lebeh
32 Baroꞌ Isa ngumai kebala muret Ya abaꞌ madah, “Kaseh badaꞌ urang banyau nyaꞌ. Nyau tiga ari sidaꞌ nerudi Ku abaꞌ sidaꞌ niseꞌ te depakai. Ku nadai nyadi sidaꞌ pulai lapar, mali sidaꞌ ke lupot dejalai.”
33 Sawot kebala muret Ya, “Katilah, teban toꞌ jawoh ari urang, dini kita kaꞌ meli ruti ngau urang te pemayoh toꞌ?”
34 Isa nanyaꞌ, “Berapa uteꞌ ruti te adai de kitaꞌ?”
Sawot sidaꞌ, “Tujoh uteꞌ abaꞌ ikan te engkaꞌ met adai dua tiga ikoꞌ.”
35 Baroꞌ Isa ngasoh urang banyau nyaꞌ dudok de tanah. 36 Udah nyaꞌ Ya ngameꞌ tujoh uteꞌ ruti abaꞌ ikan nyaꞌ, ngucap sukor, mungaꞌ abaꞌ mereꞌ ke kebala muret Ya, baroꞌ kebala muret magi ke urang banyau. 37 Abaꞌ ugaꞌ sidaꞌ makai sampai kenyang. Udah nyaꞌ urang ngumpol plebeh ruti adai tujoh ragaꞌ. 38 Te abaꞌ makai diyaꞌ empat ribu urang laki, nadai ngasi kebala urang inoꞌ abaꞌ kebala miyak. 39 Baroꞌ Isa nyuroh urang banyau nyaꞌ pulai. Ya nikeꞌ prau abaꞌ angkat ke dairah Magadan.