Kebala sidaꞌ Parisi abaꞌ Saduki mintaꞌ tana
16
Udah nyaꞌ datai mah kebala sidaꞌ Parisi abaꞌ Saduki kaꞌ encuba Isa. Sidaꞌ mintaꞌ isaꞌ Ya nganyaꞌ tana te nyaroh ari Tuhan Allah.2 Uleh Isa nyawot, “Pas malam ari enteꞌ kitaꞌ medaꞌ langet warna mirah, kitaꞌ madah, ‘Bayek ari pagi lah,’ 3 abaꞌ pas lam enteꞌ kitaꞌ medaꞌ langet mirah abaꞌ mereꞌ petang, kitaꞌ madah, ‘Jaiꞌ ari toꞌ.’ Tana langet tauꞌ kitaꞌ badaꞌ, piyaꞌ gaꞌ enteꞌ kitaꞌ medaꞌ kebala utai te tejadi tengan toꞌ. Uleh kebala tana jeman toꞌ, kitaꞌ nadai nyarok. 4 Urang te idop jeman toꞌ lampar jat abaꞌ nadai setia. Sidaꞌ mintaꞌ tana, uleh ke sidaꞌ sama sekaleꞌ nadai debereꞌ tana bukai ari tana nabi Yunos.”
Baroꞌ Isa angkat nudi sidaꞌ.
Ragi sidaꞌ Parisi abaꞌ Saduki
5 Pas Isa abaꞌ kebala muret nyemerang danau, kebala muret Ya kelupa ngemaiꞌ ruti. 6 Isa madah ke sidaꞌ, “Ati-ati kitaꞌ ke ragi sidaꞌ Parisi abaꞌ Saduki.”
7 Ninga Isa madah piyaꞌ kebala muret Isa madah ke pangan bukai, “Ya madah piyaꞌ nema kita nadai ngemaiꞌ ruti.”
8 Isa tauꞌ badaꞌ apa te sidaꞌ cakap, kebaꞌ Ya madah, “Ngapa kitaꞌ becakap ke kitaꞌ niseꞌ ngemaiꞌ ruti? Ngapa bah lampar met iman kitaꞌ? 9 Kati bedau gaꞌ kitaꞌ nyarok? Nadai piyaꞌ kitaꞌ ingat ke limaꞌ ruti te ngau limaꞌ ribu urang nyaꞌ, abaꞌ berapa ragaꞌ plebeh te kitaꞌ kumpol ke udah nyaꞌ? 10 Abaꞌ nadai piyaꞌ kitaꞌ ingat ke tujoh ruti te ngau mereꞌ empat ribu urang, berapa ragaꞌ plebeh pemakai te kitaꞌ kumpol ke nyaꞌ? 11 Nadai kati mah kitaꞌ nadai nyarok enteꞌ ukai ruti te Ku maksot. Ku madah ke kitaꞌ, ati-ati ke ragi sidaꞌ Parisi abaꞌ Saduki.”
12 Kepanyai nyarok mah sidaꞌ enteꞌ Isa nyuroh sidaꞌ ati-ati ke pengajar sidaꞌ Parisi abaꞌ Saduki, ukai ati-ati ke ragi te ngau mulah ruti.
Petros madah sapa pengamat Isa
13 Baroꞌ Isa abaꞌ kebala muret Ya angkat ke dairah Kaisarea Plipi. Diyaꞌ Ya nanyaꞌ kebala muret Ya, “Enteꞌ jakoꞌ urang, sapa Anak Ensia nyaꞌ?”
14 Sawot sidaꞌ, “Adai te madah Yohanes Pemaneꞌ, adai te madah nabi Elia, adai te madah nabi Yeremia abaꞌ nabi te ke bukai.”
15 Baroꞌ Isa nanyaꞌ ageꞌ, “Enteꞌ jakoꞌ kitaꞌ sapa Ku toꞌ?”
16 Sawot Simon Petros, “Wan toꞌ Al Maseh, Anak Tuhan Allah te idop!”
17 Isa madah, “Betuah amat meh Simon anak Yunos, nema ukai ensia te madah nyaꞌ ke meh, uleh Apai Ku te de sruga. 18 Abaꞌ Ku madah ke meh: Nama meh entoꞌ Petros.a De atau batu karang toꞌ, Ku kaꞌ niri jemat Ku abaꞌ sebayan nadai bekuasa de sidaꞌ. 19 Ke meh kaꞌ Ku bereꞌ ke kunci Pemrintah Tuhan Allah. Apa te detamet meh de dunia, te tamet de sruga abaꞌ apa te delepas meh de dunia toꞌ, kaꞌ telepas de sruga.”b
20 Baroꞌ Isa ngerot kebala muret Ya madah ke urang enteꞌ Ya nyaꞌ Al Maseh.
Isa madah kati pemati Ya abaꞌ apa sarat nerudi Ya
21 Belaboh ari nyaꞌ, Isa madah ke kebala muret Ya enteꞌ Ya alah angkat ke Yerosalem abaꞌ den Ya mayoh ngasa pemedeh ari kebala urang tuai bansa Yahudi, kebala kepalaꞌ imam abaꞌ urang te ahli alam Prator Musa. Baroꞌ debunoh, uleh ari ketiga Ya kaꞌ deidop ageꞌ.
22 Uleh Petros ngerantak Isa ke tisi abaꞌ nganoꞌ Ya, jakoꞌ ya, “Tuhan, engkremaꞌ Tuhan Allah ngejaoh utai nyaꞌ ari Wan! Utai nyaꞌ sama sekaleꞌ nadai nacah Wan.”
23 Baroꞌ Isa malek ke Petros abaꞌ madah, “Rari ari toꞌ Ibles! Meh ngaral Ku. Pemiker meh nyaꞌ pemiker ensia ukai pemiker Tuhan Allah!”
24 Baroꞌ Isa madah ke kebala muret Ya, “Ngenap urang te kaꞌ jadi muret Ku nitauꞌ idop nunaꞌ penekaꞌ ati direꞌ, alah siap nangong saleb, abaꞌ alah bamat-amat abaꞌ Ku. 25 Nema sapa urang te kaꞌ berusaha ngintu idop direꞌ de dunia toꞌ, ya nitauꞌ jong idop abaꞌ Tuhan Allah sengabot, uleh sapa urang te kaꞌ nyerah idop ya nema pecayaꞌ ke Ku, ya pesti jong idop abaꞌ Tuhan Allah sengabot. 26 Niseꞌ guna urang buleh ugaꞌ utai de dunia toꞌ enteꞌ ya nitauꞌ jong idop abaꞌ Tuhan Allah sengabot. Nema idop abaꞌ Tuhan Allah nitauꞌ debayar ngau ugaꞌ utai te adai de dunia toꞌ. 27 Ku madah piyaꞌ nema nadai lamaꞌ ageꞌ Anak Ensia kaꞌ datai alam kuasa te lampar besai abaꞌ kebala mlikat Ya, pas nyaꞌ mah Ya kaꞌ malas urang nunaꞌ apa te udah sidaꞌ pulah.c 28 Ku madah ke kitaꞌ, de entara kitaꞌ te adai ditoꞌ, adai te nadai mati sebedau medaꞌ Anak Ensia datai ngau Raja.”