Isa dejunyong tingeꞌ de atau buket te ma tingeꞌ
17
Nam ari udah nyaꞌ Isa ngemaiꞌ Petros, Yakubos abaꞌ Yuhanes menyadeꞌ ya angkat ke buket te ma tingeꞌ. Diyaꞌ sidaꞌ kedireꞌ mah. 2 Tengan nyaꞌ sidaꞌ medaꞌ mua Isa bebaleꞌ terang upa mataari abaꞌ baju Ya puteh bedawar. 3 Nadai mang-mang diyaꞌ pedaꞌ dua ikoꞌ urang, Musa abaꞌ nabi Elia tengan becakap abaꞌ Isa.4 Baroꞌ Petros madah ke Isa, “Tuhan haja gaga kami diyau ditoꞌ Wan. Enteꞌ Wan kaꞌ, ku kaꞌ mulah langkau ngau kitaꞌ tiga, sebuah ngau Wan, sebuah ngau Musa abaꞌ sebuah ngau nabi Elia.”
5 Tengan Petros madah piyaꞌ, nadai mang-mang awan te ma terang turon ngelikop sidaꞌ abaꞌ ari alam awan nyaꞌ tinga goꞌ te madah, “Toꞌ mah Anak Ku te Ku kaseh. Ku gaga amat mah ke Ya. Tinga ke te jakoꞌ Ya!”a
6 Breta sidaꞌ ninga goꞌ nyaꞌ, sidaꞌ ma takot sampai tesungkor ke tanah. 7 Uleh Isa datai negoꞌ sidaꞌ blumaꞌ madah, “Diri ke kitaꞌ, nang takot!” 8 Breta sidaꞌ engkadah, sidaꞌ medaꞌ peroꞌ Isa kedireꞌ mah te diyaꞌ.
9 Pas sidaꞌ turon ari buket, Isa madah ke sidaꞌ, “Adu kitaꞌ nusoi te udah kitaꞌ pedaꞌ nyaꞌ ke urang bukai sebedau Anak Ensia deidop ageꞌ.”
10 Baroꞌ kebala muret Isa nanyaꞌ ke Ya, “Enteꞌ piyaꞌ ngapa kebala urang te ahli alam Prator Musa madah, nabi Elia alah dulau datai sebedau Al Maseh datai?”b
11 Sawot Isa, “Amat mah nabi Elia alah datai dulau, abaꞌ ya kaꞌ ngageh kebala utai. 12 Uleh Ku madah ke kitaꞌ, nabi Elia nyau datai, uleh urang nadai ngelala ya, sidaꞌ mulah kebala utai penekaꞌ sidaꞌ mah ke ya. Piyaꞌ gaꞌ te kaꞌ depulah sidaꞌ ke Anak Ensia, Ya lampar mayoh ngasa pemedeh uleh sidaꞌ.
13 Pas tengan nyaꞌ nyarok mah kebala muret Isa enteꞌ Ya tengan becakap ke Yohanes Pemaneꞌ.
Isa nyemoh miyak te de sarong sitan
14 Breta Isa abaꞌ kebala muret Ya bebalek ngusong urang banyau, datai mah sikoꞌ urang laki nyungkon nyemah Ya. 15 Ensia nyaꞌ madah, “Tuhan, kaseh ke anak ku. Ya gila babi abaꞌ ma pedeh. Ya gah tamaꞌ api abaꞌ laboh ke aiꞌ. 16 Ku udah ngemaiꞌ ya ke kebala muret Wan uleh sidaꞌ nadai talah nyemoh ya.”
17 Ninga piyaꞌ Isa nyawot, “Kitaꞌ toꞌ bamat-amat urang te nadai pecayaꞌ abaꞌ idop tesat! Sampai kemaya lah Ku alah sabar diyau de entara kitaꞌ baroꞌ kitaꞌ bamat-amat pecayaꞌ ke Ku?” Baroꞌ Isa madah, “Baiꞌ kitoꞌ miyak nyaꞌ!” 18 Baroꞌ Isa nyuroh sitan te adai alam miyak nyaꞌ keluar. Sitan nyaꞌ keluar abaꞌ tengan nyaꞌ mah miyak nyaꞌ semoh.
19 Udah nyaꞌ kebala muret Isa datai ngusong Ya. Pas tengan sidaꞌ kedireꞌ, sidaꞌ nanyaꞌ Ya, “Pak ngapa kami nitauꞌ muru sitan nyaꞌ?”
20 Sawot Isa, “Nyaꞌ tegal iman kitaꞌ met amat. Ku madah ke kitaꞌ enteꞌ iman kitaꞌ ngameꞌ pemesai igeꞌ ensawi mah, kitaꞌ tauꞌ madah ke buket toꞌ, ‘Pinah ken!’ Pesti mah buket nyaꞌ pinah. Niseꞌ utai te nitauꞌ kitaꞌ pulah! [ 21 Sitan te jenes toꞌ peroꞌ tauꞌ deburu ngau bradua abaꞌ puasa mah.]”
Isa becakap ke pemati Ya
22 Pas Isa abaꞌ kebala muret Ya begugoꞌ de Galelia, Ya madah ke sidaꞌ, “Anak Ensia kaꞌ deserah ke penekaꞌ kebala urang te bekuasa, 23 abaꞌ sidaꞌ kaꞌ munoh Ya, uleh ari ketiga Ya kaꞌ deidop ageꞌ.” Ninga Isa madah piyaꞌ kebala muret Ya ma mah tusah.
Isa mayar pajak Rumah Kudos Tuhan Allah
24 Pas Isa abaꞌ kebala muret Ya datai ke Kapernaom, kebala penageh pajak Rumah Kudos Tuhan Allah datai nanyaꞌ Petros, “Kati guru meh, mayar pajak Rumah Kudos Tuhan Allah sekaleꞌ ke nadai?”c
25 Sawot Petros, “Auꞌ mayar Ya.”
Breta Petros tamaꞌ ke rumah, Isa sintak nanyaꞌ Petros, jakoꞌ Ya, “Petros, enteꞌ jakoꞌ meh ari ni kebala raja de bumi toꞌ ngumpol kebala pajak? Ari keluarga ya kedireꞌ sekaleꞌ ke ari urang bukai?”
26 Sawot Petros, “Ari urang bukai!”
Baroꞌ Isa madah, “Enteꞌ piyaꞌ, keluarga ya nadai alah mayar pajak weh. 27 Uleh isaꞌ kita nadai nyuroh kebala penageh pajak nyaꞌ ranseng, angkat ke meh ke danau abaꞌ kayel ke ikan den. Ikan te semaru uleh kayel meh, bukaꞌ ke nyawa, diyaꞌ lah meh nemu suteꞌ duet kereng te empat dirham. Ameꞌ ke nyaꞌ abaꞌ bayar ke pajak tua ke sidaꞌ.”