Sapa te paleng penteng alam Pemrintah Tuhan Allah
18
Pas tengan nyaꞌ kebala muret Isa datai ngusong Ya abaꞌ nanyaꞌ, “Sapa te paleng penteng alam Pemrintah Tuhan Allah?”2 Baroꞌ Isa ngumai sikoꞌ miyak te ageꞌ met abaꞌ nyuroh ya diri de tengah sidaꞌ. 3 Baroꞌ jakoꞌ Ya, “Ku madah ke kitaꞌ, kitaꞌ alah maleꞌ pemiker kitaꞌ upa miyak. Asa nadai, kitaꞌ nitauꞌ tamaꞌ ke alam Pemrintah Tuhan Allah. 4 Urang te paleng penteng alam Pemrintah Tuhan Allah nyaꞌ, urang te ngemaroh direꞌ upa miyak toꞌ. 5 Abaꞌ urang te nerimaꞌ urang te upa miyak toꞌ tegal Ku, breti nerimaꞌ Ku.”
Kebala utai te nyuroh urang mulah dusa
6 “Enteꞌ adai urang te nyuroh sikoꞌ ari miyaka te pecayaꞌ ke Ku laboh ke alam dusa, ageꞌ kasa enteꞌ batu besai detamet ke ler urang nyaꞌ abaꞌ ya detengelam ke laot ari pada ya deukom jemah lah. 7 Mrinsaꞌ amat mah idop urang de dunia toꞌ nema kebala utai ngasoh sidaꞌ laboh ke alam dusa. Amat mah utai nyaꞌ alah adai, uleh mrinsaꞌ amat mah urang te mulah piyaꞌ.
8 Enteꞌ jari kitaꞌ nyuroh kitaꞌ dusa, kempat abaꞌ buai kah. Enteꞌ kaki kitaꞌ nyuroh kitaꞌ dusa, kempat abaꞌ buai ke gaꞌ. Lebeh bayek kitaꞌ idop abaꞌ Tuhan Allah ngau jari abaꞌ kaki sepiyak, ari pada jari abaꞌ kaki kitaꞌ lengkap uleh kitaꞌ debuai ke api neraka. 9 Abaꞌ enteꞌ mata kitaꞌ ngasoh kita dusa, kruweng abaꞌ buai ke nyaꞌ. Lebeh bayek kitaꞌ idop abaꞌ Tuhan Allah ngau sigeꞌ mata, ari pada mata kitaꞌ lengkap uleh debuai ke api neraka.
10 Ati-ati nang kitaꞌ menadai sikoꞌ ari miyak te ageꞌ met toꞌ. Ku madah ke kitaꞌ adai mlikat sidaꞌ de sruga te selareh adai de mua Apai Ku. [ 11 Nema Anak Ensia datai ngau nyelamat urang te idop tesat!]”
Kisah empama dumba te lenyau
12 “Enteꞌ adai urang empu seratos ikoꞌ dumba, uleh sikoꞌ dumba nyaꞌ lenyau, apa te kaꞌ depulah urang te empu dumba? Pesti mah ya nudi te semilan puloh semilan ikoꞌ nyaꞌ de buket abaꞌ angkat ngigaꞌ te lenyau nyaꞌ weh? 13 Abaꞌ enteꞌ ya nemu dumba nyaꞌ, pesti ya lebeh gaga ke dumba te sikoꞌ nyaꞌ ari pada ke dumba te semilan puloh semilan ikoꞌ te nadai lenyau nyaꞌ. 14 Upa piyaꞌ mah gaꞌ Apai kitaꞌ te de sruga, datai ke sikoꞌ mah Ya ngai adai kebala miyak lenyau.”
Cara ngerara menyadeꞌ seiman te salah
15 Enteꞌ adai kebala menyadeꞌ seiman meh te mulah dusa ke meh, rara ke ya empat mata. Enteꞌ ya ninga ajar meh, meh dah mantoꞌ ya bedamai ageꞌ abaꞌ meh. 16 Asa ya ngai ninga meh, baiꞌ ke dua tiga ikoꞌ urang te kebukai ngusong ya ngau saksi. Nema alam Kitab Suci depadah, ‘Enteꞌ adai urang te madah urang salah, alah adai dua tiga ikoꞌ urang te ngau saksi enteꞌ te depadah urang nyaꞌ amat salah, isaꞌ te depadah nadai deragu urang.’b 17 Enteꞌ ya ngai ninga sidaꞌ, umom ke de jemat. Abaꞌ enteꞌ ya ngai ninga jemat, angap jaꞌ ya upa penageh pajak abaꞌ urang te nadai ngelala Tuhan Allah.”
18 Ku madah ke kitaꞌ, apa te kitaꞌ tamet ke de dunia toꞌ kaꞌ tetamet de sruga abaꞌ apa te kitaꞌ lepas ke de dunia toꞌ kaꞌ telepas de sruga.c
19 Abaꞌ kitaꞌ alah tauꞌ badaꞌ enteꞌ adai dua ikoꞌ urang de dunia toꞌ bepekat bradua mintaꞌ apa jaꞌ, pemintaꞌ senikoꞌ kaꞌ debereꞌ Apai Ku te de sruga. 20 Nema dini adai dua tiga ikoꞌ urang begugoꞌ tegal Ku, diyaꞌ Ku adai de tengah sidaꞌ.”
Kisah empama pemantoꞌ te ngai ngampon pemantoꞌ te kebukai
21 Udah nyaꞌ datai Petros abaꞌ nanyaꞌ Isa, “Tuhan sampai berapa kaleꞌ ku alah ngampon enteꞌ urang mulah dusa ke ku? Tujoh kaleꞌ?”
22 Sawot Isa, “Nadai! Ku madah ke meh nadai tujoh kaleꞌ, uleh tujoh puloh kaleꞌ tujoh kaleꞌ.
23 Nema Pemrintah Tuhan Allah toꞌ upa medaꞌ raja te kaꞌ britong abaꞌ pemantoꞌ ya te nguros duet. 24 Pas ya nyau kaꞌ belaboh britong, debaiꞌ ke ya sikoꞌ urang te mayoh amat utang.d 25 Uleh nema urang nyaꞌ nadai talah mayar utang ya, raja nyaꞌ mrintah isaꞌ ensia nyaꞌ abaꞌ kebala anak bini ya abaꞌ ugaꞌ te deempu ya dejual ngau mayar utang.
26 Kebaꞌ urang nyaꞌ nyungkon nyemah raja blumaꞌ ya madah, ‘Kaseh ke ku toꞌ, ku mintaꞌ wan sabar lai, ku bedanyi mayar ugaꞌ utang ku nyaꞌ.’ 27 Ninga piyaꞌ, reyu mah raja nyaꞌ ninga ya, kebaꞌ raja ngelepas ya abaꞌ ngapos ugaꞌ utang ya.
28 Uleh breta urang nyaꞌ keluar, ya betemu abaꞌ pemantoꞌ te kebukai te nadai gulong mayohe brutang ke ya. Ya nangkap abaꞌ nyekak urang nyaꞌ blumaꞌ ya madah, ‘Bayar ke utang meh ke ku!’
29 Kebaꞌ nyungkon nyemah mah urang nyaꞌ blumaꞌ ya madah, ‘Kaseh ke ku toꞌ, ku mintaꞌ wan sabar dulau, ku bedanyi mayar ugaꞌ utang ku nyaꞌ.’
30 Uleh ya ngai, empala ya majak urang nyaꞌ ke penyara sampai urang nyaꞌ ngelunas utang ya.
31 Breta pemantoꞌ te kebukai medaꞌ piyaꞌ sidaꞌ ma reyu abaꞌ ngelapor utai nyaꞌ ke raja. 32 Raja nyaꞌ ngasoh ngumai pemantoꞌ te mayoh utang nyaꞌ abaꞌ madah ke ya, ‘Eh pemantoꞌ te jat, ugaꞌ utang meh udah ku apos nema meh nyungkon nyemah ku. 33 Nadai piyaꞌ meh alah kaseh gaꞌ ke kawan meh nyaꞌ upa te udah ku pulah ke meh?’ 34 Kebaꞌ ranseng mah raja nyaꞌ ke pemantoꞌ nyaꞌ abaꞌ ya depajak ke alam penyara, diyaꞌ ya depangkong-paloꞌ sampai ugaꞌ utang ya lunas.
35 Upa piyaꞌ gaꞌ, Apai Ku te de sruga kaꞌ mulah utai te upa de pulah raja nyaꞌ ke kitaꞌ, enteꞌ kitaꞌ nadai bamat-amat ngampon urang bukai.”