Suwayak
19
Udah Isa ngajar ugaꞌ nyaꞌ, Ya nudi Galelia angkat ke dairah Yudia te de seberang sungai Yordan. 2 Mayoh kebala urang nerudi Ya abaꞌ den Ya nyemoh kebala urang te pedeh.3 Baroꞌ datai mah kebala sidaꞌ Parisi kaꞌ encuba Ya. Sidaꞌ nanyaꞌ, “Tauꞌ nadai urang nyuwayak bini ngau alasan apa jaꞌ?”
4 Sawot Isa, “Nadai piyaꞌ kitaꞌ kalaꞌ maca alam Kitab Suci, enteꞌ Tuhan Allah ari semaru mulah laki abaꞌ inoꞌ?a 5 Abaꞌ madah, ‘Kebaꞌ nyaꞌ urang laki kaꞌ angkat nudi apai abaꞌ inai ya abaꞌ ya kaꞌ suteꞌ abaꞌ bini ya, nyaꞌ te ngasoh senikoꞌ nyau suteꞌ tuboh.’b 6 Senikoꞌ nadai ageꞌ dua, uleh suteꞌ. Kebaꞌ nyaꞌ apa te udah desuteꞌ Tuhan Allah nitauꞌ desuwayak ensia.”
7 Baroꞌ kebala sidaꞌ Parisi madah, “Enteꞌ piyaꞌ ngapa Musa nyuroh urang mereꞌ surat suwayak enteꞌ urang nyuwayak bini sidaꞌ?”c
8 Sawot Isa, “Nyaꞌ tegal penegel ati kitaꞌ ngasoh ya nyadi kitaꞌ nyuwayak bini kitaꞌ, aja des ari semaru saja nitauꞌ mah. 9 Uleh Ku madah ke kitaꞌ, sapa jaꞌ kitaꞌ te nyuwayak bini kitaꞌ bukai ari tegal besinah, baroꞌ kawen abaꞌ inoꞌ te ke bukai, ya besinah.”
10 Kebala muret Isa madah, “Enteꞌ urang belaki bini nyau piyaꞌ mudel, kasa mah nadai kawen.”
11 Uleh Isa madah ke sidaꞌ, “Nadai ugaꞌ urang nerimaꞌ pengajar nyaꞌ, peroꞌ urang te udah detentu Tuhan Allah mah te nerimaꞌ. 12 Adai urang te nitauꞌ kawen nema tegal ya adai upa piyaꞌ. Adai gaꞌ urang te nitauꞌ kawen nyaꞌ tegal depulah urang bukai. Abaꞌ adai gaꞌ urang te ngai kawen isaꞌ tauꞌ ngelayan Tuhan Allah. Sapa te talah nerimaꞌ pengajar toꞌ trimaꞌ ke mah.”
Isa bradua ke kebala miyak
13 Baroꞌ kebala urang ngemaiꞌ miyak ngusong Isa, isaꞌ Ya ngeletak jari de atau sidaꞌ abaꞌ bradua ke sidaꞌ. Uleh kebala muret Isa nganoꞌ kebala sidaꞌ te ngemaiꞌ kebala miyak nyaꞌ. 14 Uleh Isa madah, “Isaꞌ mah kebala miyak datai ngusong Ku! Nang ngerot sidaꞌ, nema urang te upa toꞌ lah te idop alam Pemrintah Tuhan Allah.” 15 Baroꞌ Isa ngeletak jari Ya de atau palaꞌ sidaꞌ abaꞌ bradua ke sidaꞌ, udah nyaꞌ Ya angkat ari nyaꞌ.
Urang kaya pedeh tamaꞌ alam Pemrintah Tuhan Allah
16 Adai sekaleꞌ sikoꞌ pemudaꞌ datai ngusong Isa abaꞌ nanyaꞌ, “Guru, utai te bayek te upa kati te alah ku pulah ke isaꞌ ku tauꞌ jong idop abaꞌ Tuhan Allah sengabot?”
17 Sawot Isa, “Ngapa meh nanyaꞌ Ku utai te bayek? Peroꞌ Suteꞌ mah te bayek. Enteꞌ meh kaꞌ jong idop abaꞌ Tuhan Allah sengabot, patoh ke printah Tuhan Allah.”
18 Sawot urang nyaꞌ, “Printah te ni?”
Isa madah, “Nang munoh, nang besinah, nang encuri, nang madah utai te bulaꞌ tentang urang,d 19 hormat ke apai abaꞌ inai meh, kaseh ke sama direꞌ ensia upa meh ngaseh direꞌ.”e
20 Sawot pemudaꞌ nyaꞌ, “Ugaꞌ nyaꞌ udah ugaꞌ mah ku pulah, apa ageꞌ te ke bukai?”
21 Sawot Isa, “Enteꞌ meh kaꞌ niseꞌ jalai mejah, angkat ke meh jual ke ugaꞌ te deempu meh, duet nyaꞌ bereꞌ ke urang mesken, ngau cara nyaꞌ meh kaꞌ buleh upah de sruga. Udah nyaꞌ meh datai kitoꞌ abaꞌ terudi ke Ku.”
22 Breta urang nyaꞌ ninga Isa madah piyaꞌ, angkat mah ya ngau ati tusah nema ya ngerakau reta ya te lampar mayoh.
23 Baroꞌ Isa madah ke kebala muret Ya, “Ku madah ke kitaꞌ, lampar pedeh urang kaya tamaꞌ ke alam Pemrintah Tuhan Allah. 24 Skaleꞌ ageꞌ Ku madah ke kitaꞌ, lebeh mudah sikoꞌ unta tamaꞌ lubang jarom, ari pada urang kaya tamaꞌ alam Pemrintah Tuhan Allah.”
25 Breta kebala muret ninga nyaꞌ sidaꞌ ampal abaꞌ madah, “Enteꞌ piyaꞌ sapa te tauꞌ selamat?”
26 Isa nilek sidaꞌ blumaꞌ Ya madah, “Bagi ensia, nyaꞌ nitauꞌ mah, uleh bagi Tuhan Allah niseꞌ te nitauꞌ depulah Ya.”
Upah nerudi Isa
27 Baroꞌ Petros madah ke Isa, “Tuhan kami udah nudi ugaꞌ utai isaꞌ tauꞌ nerudi Wan, apa upah kami lah?”
28 Sawot Isa, “Pecayaꞌ jaꞌ, de dunia te baru Anak Ensia kaꞌ dudok de bangku raja empu Ya te luar biasa, abaꞌ Ya mah te empu kuasa te ma besai. Kitaꞌ te nerudi Ku kaꞌ dudok de dua belas bangku raja abaꞌ kitaꞌ mrintah dua belas suku bansa Israel. 29 Abaꞌ ngenap urang te udah nudi rumah, nudi kebala menyadeꞌ te laki abaꞌ te inoꞌ, nudi apai inai, nudi kebala miyak, abaꞌ nudi kebala uma sidaꞌ tegal Ku, urang nyaꞌ kaꞌ nerimaꞌ seratos kaleꞌ lipat abaꞌ tauꞌ jong idop abaꞌ Tuhan Allah sengabot. 30 Uleh mayoh urang te deangap urang nadai gulong penteng entoꞌ, jemah lah nyaꞌ mah te jadi urang paleng penteng. Abaꞌ mayoh urang te deangap urang paleng penteng entoꞌ, jemah lah nyaꞌ mah te jadi urang te nadai penteng.”f