Kisah empama urang te kreja de kebon angor
20
Isa madah ageꞌ, “Pemrintah Tuhan Allah toꞌ upa kisah empama urang te empu kebon angor. Lam panam, urang te empu kebon angor angkat ngigaꞌ kebala urang te bekreja de kebon ya. 2 Udah ya bepekat abaꞌ urang te bekreja ke ya, upah sidaꞌ sari upa sengket mah sedinar sari, baroꞌ ya ngasoh sidaꞌ belaboh bekreja de kebon angor ya.3 Lam-lam kurang lebeh jam semilan, urang te empu kebon angor angkat abaꞌ medaꞌ adai kebala urang bukai te nugau de pasar. 4 Ya madah ke sidaꞌ, ‘Angkat ke kitaꞌ bekreja de kebon angor ku abaꞌ ku kaꞌ mereꞌ upah te patot ke kitaꞌ.’ 5 Baroꞌ sidaꞌ nyaꞌ angkat.
Kurang lebeh jam dua belas abaꞌ jam tiga ujong ari, ya keluar ageꞌ abaꞌ mulah te upa tadeꞌ. 6 Kurang lebeh jam limaꞌ malam ari, ya angkat ageꞌ ke pasar abaꞌ medaꞌ dua tiga ikoꞌ urang diri nugau de pasar. Baroꞌ ya madah, ‘Ngapa piyaꞌ kitaꞌ nugau ditoꞌ sari-ari?’
7 Sawot sidaꞌ, ‘Niseꞌ urang te kaꞌ ngasoh kami kreja.’
Baroꞌ ya madah, ‘Asa piyaꞌ angkat ke kitaꞌ kreja de kebon angor ku.’
8 Pas nyau slepat petang urang te empu kebon angor nyaꞌ madah ke manor ya, ‘Kumai ke ugaꞌ sidaꞌ te bekreja nyaꞌ abaꞌ bayar ke upah sidaꞌ, belaboh ari te datai paleng lawon sampai ke te paleng lekau.’a
9 Baroꞌ datai mah kebala sidaꞌ te belaboh kreja kurang lebeh jam limaꞌ malam ari, abaꞌ ugaꞌ sidaꞌ sama nerimaꞌ upah sedinar. 10 Udah nyaꞌ datai mah sidaꞌ te paleng lekau belaboh kreja, sangkaꞌ sidaꞌ upah sidaꞌ lebeh mayoh, uleh sidaꞌ deupah sedinar mah gaꞌ. 11 Pas sidaꞌ nerimaꞌ upah sidaꞌ, sidaꞌ merunya ke urang te empu kebon angor nyaꞌ. 12 Sidaꞌ madah, ‘Kebala urang te lawon belaboh, peroꞌ sejam mah kreja. Uleh wan ngupah sidaꞌ sama abaꞌ ngupah kami te mati-mati kreja sari nyantok tacah panas.’
13 Uleh urang te empu kebon angor nyaꞌ nyawot sikoꞌ ari sidaꞌ, ‘Menyadeꞌ, ku nadai endai adel ke kitaꞌ! Piyaꞌ ni kita udah bepekat sedinar mah upah sari? 14 Nah, ameꞌ ke upah kitaꞌ abaꞌ angkat ke ari toꞌ. Ku kaꞌ mereꞌ upah ke urang te datai pemadoꞌ sama abaꞌ ke kitaꞌ. 15 Nitauꞌ piyaꞌ ku mulah penekaꞌ ku ngau apa te deempu ku? Iri piyaꞌ kitaꞌ medaꞌ ku awas?’
16 Ku madah ke kitaꞌ kebala urang te pemadoꞌ kaꞌ jadi kebala urang te semaru abaꞌ te semaru kaꞌ jadi te pemadoꞌ.”
Isa madah te ketiga kaleꞌ upa kati pemati Ya
17 Pas Isa bejalai mansang ke Yerosalem, Ya ngumai dua belas muret Ya abaꞌ becakap abaꞌ sidaꞌ kedireꞌ. Ya madah, 18 “Dinga kah, entoꞌ kita ke Yerosalem. Den lah Anak Ensia kaꞌ deserah ke kebala kepalaꞌ imam abaꞌ kebala urang te ahli alam Prator Musa, abaꞌ sidaꞌ kaꞌ ngukom mati Ya. 19 Abaꞌ sidaꞌ kaꞌ nyerah Ya ke kebala urang te ukai bansa Yahudi. Ya kaꞌ deplicak, deprisa, desaleb, abaꞌ ari ketiga Ya kaꞌ deidop ageꞌ.”
Pemintaꞌ inai Yakubos abaꞌ Yohanes
20 Baroꞌ bini Sebedios abaꞌ dua ikoꞌ anak ya Yakubos abaꞌ Yohanes datai ngusong Isa. De mua Isa ya nyungkon nyemah mintaꞌ utai ke Ya.
21 Isa nanyaꞌ, “Apa te dekedekaꞌ wan boꞌ?”
Sawot ya, “Ku kaꞌ dua ikoꞌ anak ku toꞌ dudok de sepiyak kanan abaꞌ kibaꞌ Wan asa Wan nyau mrintah jadi Raja lah.”
22 Isa madah ke senikoꞌ nyaꞌ, “Senikoꞌ nitauꞌ badaꞌ apa te senikoꞌ pintaꞌ. Talah piyaꞌ senikoꞌ nginom ari cawan pemedeh te kaꞌ Ku inom?”
Sawot senikoꞌ, “Talah kemua.”
23 Isa madah, “Amat mah senikoꞌ kaꞌ nginom cawan Ku, uleh ukai Ku te ngatoh sapa te dudok de sepiyak kanan abaꞌ kibaꞌ Ku. Apai Ku udah mutos sapa te kaꞌ dudok diyaꞌ, abaꞌ Ya udah ngageh teban nyaꞌ ngau sidaꞌ.”
24 Breta sepuloh muret te kebukai ninga piyaꞌ, sidaꞌ ranseng ke senikoꞌ nyaꞌ. 25 Uleh Isa ngumai sidaꞌ abaꞌ madah, “Kitaꞌ udah tauꞌ badaꞌ, enteꞌ pemrintah kebala bansa te nadai ngelala Tuhan Allah ngerinas rakyat sidaꞌ. Abaꞌ kebala urang te bepangkat nekan sidaꞌ. 26 Uleh kitaꞌ nang piyaꞌ. Asa kitaꞌ kaꞌ jadi urang besai de entara kitaꞌ, kitaꞌ alah jadi pelayan. 27 Abaꞌ asa kitaꞌ kaꞌ jadi urang te paleng penteng, kita alah upa ulon. 28 Sama upa Anak Ensia datai nadai delayan, uleh ngelayan abaꞌ mereꞌ idop Ya ngau nebos mayoh urang.”
Isa nyemoh dua ikoꞌ urang te butaꞌ
29 Pas Isa abaꞌ kebala muret Ya keluar ari kuta Yeriko, mayoh urang nerudi Isa. 30 Adai dua ikoꞌ urang butaꞌ te dudok de tisi jalai ninga enteꞌ Isa toꞌ mansaꞌ, baroꞌ senikoꞌ ngangau, “Tuhan, pureh Raja Daot, kaseh ke kemua!”
31 Uleh urang mayoh nyaꞌ ngerara senikoꞌ abaꞌ ngasoh nikoꞌ sunyeꞌ. Uleh senikoꞌ empala sareng jakoꞌ senikoꞌ, “Tuhan, pureh Raja Daot, kaseh ke kemua!”
32 Baroꞌ Isa mentan abaꞌ ngumai senikoꞌ. Ya madah, “Apa te senikoꞌ kaꞌ Ku pulah ke senikoꞌ?”
33 Sawot senikoꞌ, “Tuhan, kemua kaꞌ tauꞌ medaꞌ.”
34 Ninga piyaꞌ Isa ma mah kaseh ke senikoꞌ, baroꞌ Ya nyamah mata senikoꞌ abaꞌ sekelen nyaꞌ mah senikoꞌ tauꞌ medaꞌ abaꞌ nerudi Ya.