Sidaꞌ Yerosalem nyamot Isa upa nyamot raja
21
Pas Isa abaꞌ kebala muret Ya nyau semak Yerosalem, sidaꞌ blepa de kampong Betpage de Buket Saiton. Isa ngasoh dua ikoꞌ muret Ya 2 abaꞌ madah, “Angkat ke senikoꞌ ke kampong te de mua nyaꞌ, abaꞌ diyaꞌ lah senikoꞌ nemu sikoꞌ keledai inoꞌ te detancang, abaꞌ anak ya adai semak ya. Lepas ke keledai nyaꞌ abaꞌ sama baiꞌ ke Ku. 3 Enteꞌ adai urang te ngerara senikoꞌ, padah ke, ‘Tuhana perlu keledai toꞌ. Nadai lamaꞌ jalai Ya mulai lah.’ ”4 Utai toꞌ alah piyaꞌ isaꞌ nemoꞌ apa te depadah nabi,
5 “Padah ke urang te de kuta Sion,b
‘Pedaꞌ, Raja kitaꞌ datai ngusong kitaꞌ.
Ya renah ati abaꞌ numpang sikoꞌ keledai,
sikoꞌ anak keledai te ageꞌ biyak.’ ”c
6 Udah nyaꞌ angkat mah dua ikoꞌ muret Ya abaꞌ mulah nunaꞌ te depadah Isa. 7 Senikoꞌ ngemaiꞌ inai keledai nyaꞌ abaꞌ anak ya, baroꞌ ngalas ngau jubah senikoꞌ abaꞌ Isa dudok deatau ya. 8 Sebedau Isa mansaꞌ, mayoh amat urang diyaꞌ begugoꞌ ngidar kebala jubah sidaꞌ de jalai, abaꞌ adai gaꞌ te ngempat kebala rangau kayu abaꞌ ngidar de jalai ngau sidaꞌ nyunyong tingeꞌ Ya. 9 Adai mayoh urang te bejalai de mua Isa abaꞌ adai gaꞌ te nerudi Ya ari belakang. Sidaꞌ cerigah gaga blumaꞌ madah,
“Puji Al Maseh pureh Raja Daot!
Tuhan Allah mereꞌ berkat ke Ya te datai ngau kuasa Tuhan!
Puji Tuhan Allah te Ma tingeꞌ.”d
10 Breta Isa tamaꞌ ke Yerosalem, ugaꞌ kuta nyaꞌ rabat abaꞌ sidaꞌ madah, “Sapa piyaꞌ urang nyaꞌ?”
11 Urang banyau nyawot, “Nyaꞌ mah nabi Isa sidaꞌ kuta Nasaret de Wilayah Galelia.”
Isa nesar kebala urang te bejual de laman Rumah Kudos Tuhan Allah
12 Udah nyaꞌ Isa tamaꞌ ke laman Rumah Kudos Tuhan Allah abaꞌ nesar kebala ugaꞌ urang te bejual-bejagal diyaꞌ. Ya malek kebala mija te jalai urang nukar duet abaꞌ kebala bangku urang te nyual burong dara. 13 Isa madah ke sidaꞌ, “Alam Kitab Suci detules, ‘Rumah Ku toꞌ kaꞌ depadah rumah te ngau urang bradua.’e Uleh kitaꞌ pulah ngau ‘sarang pencuri!’ ”f
14 Udah nyaꞌ datai mah kebala urang te butaꞌ abaꞌ urang te lumpoh ngusong Isa de laman Rumah Kudos Tuhan Allah, diyaꞌ Isa nyemoh ugaꞌ sidaꞌ. 15 Uleh kebala kepalaꞌ imam abaꞌ urang te ahli alam Prator Musa sau medaꞌ utai te nyaroh te depulah Isa, abaꞌ ninga kebala miyak de Rumah Kudos Tuhan Allah madah, “Kami muji Wan Al Maseh pureh Raja Daot!”
16 Kebaꞌ sidaꞌ nanyaꞌ, “Ninga nadai Wan te depadah kebala miyak nyaꞌ?”
Sawot Isa, “Auꞌ ninga Ku. Nadai piyaꞌ kitaꞌ kalaꞌ maca alam Kitab Suci? Diyaꞌ depadah, ‘Tuhan Allah udah ngajar kebala miyak abaꞌ miyak te ageꞌ nusu muji Ya!’ ”g
17 Udah nyaꞌ Isa nudi sidaꞌ, baroꞌ Ya angkat ari kuta Yerosalem ke kampong Betania abaꞌ bemalam diyaꞌ.
Isa ngutok pon ara te nadai bebuah
18 Lam panam pas Isa bebalek mansang ke kuta Yerosalem, Ya ngasa lapar. 19 Ya medaꞌ adai sepon pon ara de tisi jalai. Ya kiyaꞌ, uleh datai ke sigeꞌ mah Ya niseꞌ nemu buah, peroꞌ dawon gena mah. Isa madah ke pon ara nyaꞌ, “Belaboh ari entoꞌ, direꞌ nadai ngamoꞌ bebuah ageꞌ!” Tengan nyaꞌ pon ara nyaꞌ sintak tengkereng abaꞌ mati.
20 Pas kebala muret Isa medaꞌ piyaꞌ, sidaꞌ ampal abaꞌ nanyaꞌ ke Isa, “Kati pon ara nyaꞌ tauꞌ sintak tengkereng abaꞌ mati?”
21 Sawot Isa, “Ku madah ke kitaꞌ, enteꞌ kitaꞌ bamat-amat pecayaꞌ, kitaꞌ nadai peroꞌ tauꞌ mulah apa te udah Ku pulah ke pon ara nyaꞌ, kitaꞌ tauꞌ mulah te lebeh besai ageꞌ. Kitaꞌ tauꞌ madah ke buket toꞌ, ‘Angkat ari toꞌ pinah ke laot.’ Utai nyaꞌ nunaꞌ te depadah kitaꞌ. 22 Apa jaꞌ te kitaꞌ pradua enteꞌ kitaꞌ pecayaꞌ pesti kitaꞌ nerimaꞌ.”
Pemimpen Yahudi nanyaꞌ ari ni kuasa Isa
23 Udah nyaꞌ, Isa bebalek ageꞌ ke Rumah Kudos Tuhan Allah abaꞌ ngajar diyaꞌ. Tengan Ya ngajar, datai mah kebala kepalaꞌ imam abaꞌ kebala pemimpen Yahudi kiyaꞌ, sidaꞌ nanyaꞌ, “Ngau kuasa sapa bah Direꞌ mulah ugaꞌ nyaꞌ? Abaꞌ sapa bah te mereꞌ kuasa nyaꞌ ke Direꞌ?”
24 Sawot Isa, “Ku sigeꞌ kaꞌ gaꞌ nanyaꞌ kitaꞌ, enteꞌ kitaꞌ kaꞌ nyawot Ku, baroꞌ Ku kaꞌ madah ngau kuasa sapa Ku mulah ugaꞌ utai nyaꞌ. 25 Padah ke Ku, jalai Yohanes maneꞌ kebala urang, ya ngau kuasa ari Tuhan Allah sekaleꞌ ke ari ensia?”
Baroꞌ kebala kepalaꞌ imam abaꞌ kebala pemimpen Yahudi belaboh becakap abaꞌ sama direꞌ, “Asa kita madah, ‘Ari Tuhan Allah,’ Ya nyawot kita, ‘Enteꞌ piyaꞌ ngapa kitaꞌ nadai pecayaꞌ ke Yohanes?’ 26 Uleh asa kita madah, ‘Ari ensia,’ takot gaꞌ ke kebala urang, nema sidaꞌ pecayaꞌ enteꞌ Yohanes toꞌ nabi.”
27 Baroꞌ sidaꞌ nyawot Isa, “Kami nitauꞌ badaꞌ.”
Baroꞌ Isa madah, “Enteꞌ piyaꞌ Ku sigeꞌ ngai madah ke kitaꞌ ngau kuasa sapa Ku mulah ugaꞌ nyaꞌ.”
Kisah empama dua ikoꞌ anak urang te empu kebon Angor
28 Baroꞌ Isa nyamong cakap Ya ageꞌ abaꞌ kebala kepalaꞌ imam abaꞌ kebala pemimpen Yahudi, jakoꞌ Ya, “Dinga ke bamat-amat kisah empama toꞌ, kati enteꞌ menurot kitaꞌ: Adai sikoꞌ urang empu dua ikoꞌ anak laki. Ya angkat ngusong anak ya te tuai abaꞌ madah, ‘Nak, sari toꞌ angkat ke meh kreja ke kebon angor.’
29 Sawot miyak nyaꞌ, ‘Ah ngai ku pai.’ Udah nyaꞌ ya nesal baroꞌ ya angkat.
30 Baroꞌ Apai ya angkat ngusong anak ya te biyak abaꞌ madah piyaꞌ gaꞌ. Abaꞌ anak ya nyawot, ‘Auꞌ pai.’ Uleh ya nadai angkat.
31 Sapa ari entara senikoꞌ nyaꞌ te nunaꞌ kedekaꞌ apai ya?”
Sawot sidaꞌ, “Anak ya te tuai.”
Isa madah ke sidaꞌ, “Ku madah ke kitaꞌ, kebala penageh pajak abaꞌ pelacor dulau lah ari kitaꞌ tamaꞌ ke alam Pemrintah Tuhan Allah. 32 Yohanes datai nganyaꞌ ke kitaꞌ kati idop te dekedekaꞌ Tuhan Allah, uleh kitaꞌ nadai pecayaꞌ ke pengajar ya, uleh kebala penageh pajak abaꞌ pelacor pecayaꞌ ke pengajar ya. Amat mah kitaꞌ udah medaꞌ ugaꞌ toꞌ, kitaꞌ ngai maleꞌ pemiker kitaꞌ abaꞌ nadai kaꞌ pecayaꞌ ke pengajar Yohanes.”
Kisah empama urang te ngintu kebon Angor
33 Udah nyaꞌ Isa madah ageꞌ, “Tinga ke kisah empama toꞌ: Adai sikoꞌ urang te empu tanah, tanah nyaꞌ ya tamak ke angor. Baroꞌ ya magar kebon angor nyaꞌ abaꞌ mulah teban te ngau merah angor abaꞌ ngentak menara te ngau bejaga. Udah nyaꞌ ya nyuroh kebala urang ngintu kebon angor nyaꞌ, baroꞌ ya angat ke bansa bukai.h 34 Pas buah angor nyau kaꞌ mudoh, ya nyuroh kebala pelayan ya ngusong urang te ngintu kebon angor ya, ngameꞌ jatah empu ya.
35 Uleh urang te ngintu kebon ya nangkap kebala pelayan nyaꞌ, te sikoꞌ sidaꞌ pangkong paloꞌ, te sikoꞌ debunoh, abaꞌ te sikoꞌ ageꞌ detikam ngau batu sampai mati. 36 Udah nyaꞌ urang te empu tanah nyaꞌ nyuroh kebala pelayan ya lebeh mayoh ari te semaru datai kiyaꞌ, uleh sidaꞌ depulah upa piyaꞌ gaꞌ. 37 Kepanyai urang te empu tanah nyaꞌ ngutos anak ya ngusong sidaꞌ. Ya madah, ‘Pesti mah sidaꞌ nyaꞌ hormat ke anak ku.’
38 Uleh breta urang te ngintu kebon angor nyaꞌ medaꞌ miyak nyaꞌ, sidaꞌ madah ke pangan bukai, ‘Ya toꞌ mah lah te empu wares apai ya, boh kita munoh ya isaꞌ wares nyaꞌ empu kita.’ 39 Kebaꞌ sidaꞌ nangkap ya abaꞌ nibar ya ke luar kebon, baroꞌ munoh ya.
40 Entoꞌ Ku nanyaꞌ ke kitaꞌ, enteꞌ urang te empu kebon angor nyaꞌ bebalek, apa te kaꞌ depulah ya ke kebala urang te ngintu kebon angor nyaꞌ?”
41 Sawot sidaꞌ, “Pesti ya kaꞌ munoh kebala urang te jat nyaꞌ. Baroꞌ ya nyuroh kebala urang bukai ngintu kebon angor nyaꞌ, te kaꞌ nyerah jatah empu ya.”
42 Isa nanyaꞌ, “Nadai piyaꞌ kitaꞌ kalaꞌ maca alam Kitab Suci,
‘Batu te udah debuai kebala tukang,
nyaꞌ udah jadi batu dasar te ma penteng.
Tuhan Allah udah mulah utai toꞌ,
abaꞌ kita udah medaꞌ lampar nyaroh utai nyaꞌ.’i
43 Kebaꞌ nyaꞌ Ku madah ke kitaꞌ hak kitaꞌ alam Pemrintah Tuhan Allah kaꞌ deameꞌ ari kitaꞌ abaꞌ kaꞌ debereꞌ ke kebala urang te mulah apa te dekedekaꞌ Tuhan Allah alam Pemrintah Ya. [ 44 Sapa te laboh ke batu nyaꞌ kaꞌ ancor abaꞌ sapa te detingang batu nyaꞌ kaꞌ rincet.]”