<<    <     Markos     15     >    >> 
Isa debaiꞌ ngadap Platos
15
Lam-lam panam kebala kepalaꞌ imam, kebala pemimpen sidaꞌ Yahudi, kebala urang te ahli de alam kitab te datules Musa abaꞌ kebala anggota te bukai ari Pengadel Agama mulah rapat. Sidaꞌ nyuroh kebala urang masong Isa. Baroꞌ sidaꞌ ngiring Isa ngusong Platos, te jadi gubernur tengan nyaꞌ. Sidaꞌ nyerah Isa ke ya. 2 Platos nanyaꞌ ke Isaꞌ “Kati amat mah Wan Raja sidaꞌ Yahudi?” Isa nyawot ya, “Direꞌ mah te madah piyaꞌ.” 3 Udah nyaꞌ kebala kepalaꞌ imam nudoh Isa mayoh mulah utai te jat. 4 Baroꞌ Platos nanyaꞌ ageꞌ ke Isa, “Ngai Direꞌ ngelawan te datudoh sidaꞌ piyaꞌ? Dinga kah sidaꞌ nudoh Direꞌ mulah mayoh utai te jat.” 5 Uleh datai ke siket Isa ngai nyawot Platos ageꞌ, nyaꞌ ngasoh Platos ampal amat. 6 Ngenap kaleꞌ sidaꞌ Yahudi ngeraya Paskah, sengket Platos ngelepas sikoꞌ urang te daukom ari penyara. Kebala sidaꞌ Yahudi tauꞌ mileh sapa jaꞌ urang te dalepas nyaꞌ. 7 Tengan nyaꞌ adai sikoꞌ urang te nama Barabas tengan dekurong alam dapenyara. Barabas dapenyara abaꞌ kebala kawan ya. Sidaꞌ detangkap tegal ngelawan pemrintah Ruma abaꞌ tegal munoh kebala urang. 8 Kebaꞌ datai mah urang banyau de mua Platos, sidaꞌ mintaꞌ ke Platos isaꞌ ya ngelepas sikoꞌ urang te dapenyara upa sengket. 9 Platos nanyaꞌ ke sidaꞌ, “Kati, kitaꞌ kaꞌ enteꞌ ku ngelepas Raja sidaꞌ Yahudi toꞌ ke kitaꞌ?” 10 Platos tauꞌ amat badaꞌ kebala kepalaꞌ imam udah nyerah Isa ke ya nema sidaꞌ iri ati ke Isa. 11 Ninga Platos madah piyaꞌ, kebala kepalaꞌ imam ngumok urang banyau isaꞌ mintaꞌ Platos ngelepas Barabas. 12 Baroꞌ Platos nyawot urang banyau, “Jadi, asa ku ngelepas Barabas, apa te kitaꞌ kedekaꞌ ku pulah kah ke urang te kitaꞌ sebot ke Raja sidaꞌ Yahudi toꞌ?” 13 Ninga apa te jakoꞌ Platos, sidaꞌ mangkes, “Paku ke Ya lah de kayu saleb!” 14 Udah nyaꞌ Platos nanyaꞌ ageꞌ, “Ngapa? Apa pemenyat te udah Ya pulah kah?” Uleh sidaꞌ empala kuat mangkes, “Paku kah Ya de kayu saleb!” 15 Platos kaꞌ ngasoh ati kebala urang banyau gaga. Kebaꞌ nyaꞌ ya ngelepas Barabas. Baroꞌ ya ngasoh urang nyimat Isa ngau tali. Udah nyaꞌ ya nyerah Isa ke kebala prajuret Ruma isaꞌ sidaꞌ maku Ya de kayu saleb. 16 Udah nyaꞌ kebala prajuret ngireng Isa ke laman de alam istana Platos. Sidaꞌ ngumai ugaꞌ prajuret Ruma te kebukai begugoꞌ den. 17 Udah nyaꞌ prajuret Ruma nyarok ke Ya jubah ungu. Sidaꞌ gaꞌ mulah mahkota ari kebala dan te bedureꞌ abaꞌ nepoꞌ de atau palaꞌ Isa. 18 Udah nyaꞌ kebala prajuret nyaꞌ mreꞌ salam hormat ke Isa, budi-budi sidaꞌ hormat ke Ya. Sidaꞌ madah, “Idop, Raja sidaꞌ Yahudi!” 19 Sidaꞌ mangkong-maloꞌ palaꞌ Isa ngau kayu abaꞌ ngeludah Ya. Baroꞌ sidaꞌ budi-budi nyungkon nyemah Ya. 20a Udah sidaꞌ badoꞌ mlicak Isa, kebala prajuret nyaꞌ nyiah jubah ungu ari Isa. Baroꞌ sidaꞌ nyarok baju Ya ageꞌ.
Isa desaleb
20b Udah nyaꞌ sidaꞌ ngemaiꞌ Isa kluar nema sidaꞌ kaꞌ maku Isa de kayu saleb. 21 Breta sidaꞌ bejalai, mansaꞌ sikoꞌ urang te nama Simon. Ya ari desa kaꞌ ke kuta. Simon asal ya ari kuta Kirene. Nama anak ya Aleksander abaꞌ Rupos. Kebala prajuret nyaꞌ mukong Simon ngemaiꞌ saleb Isa.
22 Kebala prajuret nyaꞌ ngemaiꞌ Isa ke suteꞌ teban te nama Golguta. Reti nama nyaꞌ teh "Keruntok". 23 Sidaꞌ encuba mreꞌ Isa nginom angor te decampor ke mor, uleh Ya ngai nginom nyaꞌ. 24 Udah nyaꞌ baroꞌ sidaꞌ maku Ya dekayu saleb. Sidaꞌ ngelamong batu ngau ngigaꞌ sapa te empu jubah Isa nyaꞌ. 25 Jalai sidaꞌ maku Isa de kayu saleb baroꞌ jam semilan lam. 26 Kebala prajuret nyaꞌ nules de suteꞌ papan abaꞌ nepoꞌ de atau palaꞌ Isa, “Raja sidaꞌ Yahudi” nyaꞌ mah te detudoh sidaꞌ ke Isa.
27 De tisi Isa sidaꞌ nyaleb dua ikoꞌ urang te mulah pemenyat, sikoꞌ de sepiyak kanan sikoꞌ de sepiyak kibaꞌ Ya. [ 28 Ngau cara nyaꞌ mah apa te datules alam Kitab Suci tulu amat tejadi, “Kebala urang kaꞌ ngangap Ya sama abaꞌ kebala urang te mulah pemenyat.”a]
29 Kebala urang te mansaꞌ nyaꞌ mlicak Isa. Blumaꞌ ngilek-ngilek palaꞌ, sidaꞌ madah, “Woi! Wan kaꞌ ngeruboh Rumah Kudos Tuhan Allah abaꞌ kaꞌ mulah ageꞌ alam tiga ari weh? 30 Turon ari saleb nyaꞌ, slamat ke direꞌ!”
31 Piyaꞌ gaꞌ kebala kepalaꞌ imam abaꞌ kebala urang te ahli alam kitab te datules Musa mlicak Isa. Sidaꞌ betimal madah, “Urang bukai Ya slamat kah, uleh Ya nitauꞌ nyelamat direꞌ! 32 Enteꞌ Ya bamat-amat Al Maseh, Raja sidaꞌ Israel, ngaꞌ kah Ya entoꞌ turon ari saleb, isaꞌ kita medaꞌ baroꞌ tauꞌ pecayaꞌ!” Piyaꞌ gaꞌ dua ikoꞌ urang te desaleb de sepiyak kibaꞌ abaꞌ kanan Isa gaꞌ mlicak Ya.
Isa mati
33 Udah nyaꞌ sekitar jam dua blas tengah ari, daerah nyaꞌ sintak petang datai ke jam tiga ujong ari. 34 Pas jam tiga ujong ari Isa madah ngau goꞌ te sareng, “Eloi, Eloi, lamaꞌ sabakhtani?” Reti te jakoꞌ Ya nyaꞌ, “Allah Ku, Allah Ku, ngapa Wan nudi Ku?” 35 Adai kebala urang diyaꞌ ninga Isa mangkes. Sidaꞌ madah, “Dinga kah! Ya ngumai Nabi Elia!” 36 Beburoh sikoꞌ urang te diyaꞌ angkat ngameꞌ ibos abaꞌ encalop ke angor masam. Baroꞌ ya namet ibos nyaꞌ de ujong tungkat abaꞌ nyurong ke Isa, blumaꞌ madah, “Boh kita nungoꞌ! Cuba kita medaꞌ kati nabi Elia datai nadai mantoꞌ Ya turon ari saleb nyaꞌ.” 37 Udah nyaꞌ Isa mangkes ngau goꞌ te sareng baroꞌ Ya mati. 38 Tengan nyaꞌ gaꞌ tirai de Rumah Kudos Tuhan Allah carek tebelah dua ari atau datai ke baroh. 39 Tengan nyaꞌ, sikoꞌ kepalaꞌ prajuret diri ngadap saleb Isa medaꞌ kati Isa mati. Kepalaꞌ prajuret nyaꞌ sigeꞌ madah, “Urang toꞌ bamat-amat Anak Tuhan Allah!” 40 Adai gaꞌ kebala inoꞌ te medaꞌ ugaꞌ utai nyaꞌ ari jaoh. Tiga ikoꞌ daentara sidaꞌ nyaꞌ, Maria sidaꞌ Makdala,b Salumi, abaꞌ Maria inai Yakubos te biyak abaꞌ Yoses. 41 Kebala inoꞌ nyaꞌ udah nrudi Isa abaꞌ mantoꞌ Ya jalai Ya de Galelia. Adai abaꞌ sidaꞌ mayoh gaꞌ kebala inoꞌ te kebukai te udah datai ke Yerosalem abaꞌ Isa.
Isa de kubor
42 Tengan nyaꞌ ari blaboh malam, abaꞌ ari nyaꞌ gaꞌ sidaꞌ Yahudi besiap, nungoꞌ penatai ari Sabat Yahudi. 43 Kebaꞌ nyaꞌ Yusop, sidaꞌ Arimatia, sikoꞌ urang anggota Pengadel Agama Yahudi te dahormat, te ngentang Pemrintah Tuhan Allah, ya merani direꞌ ngadap Platos abaꞌ mintaꞌ bangkai Isa. 44 Platos ampal ninga Isa nyau mati. Kebaꞌ ya nyuroh urang ngumai kepalaꞌ prajuret nyaꞌ abaꞌ nanyaꞌ ya, “Kati, amat mah Isa nyau mati?” 45 Nyau udah ninga pemadah ari kepalaꞌ prajuret nyaꞌ amat mah Isa nyau mati, baroꞌ Platos nyadi Yusop ngemaiꞌ bangkai Isa. 46 Sebedau nyaꞌ Yusop udah meli kayen puteh. Udah nyaꞌ ya nuron bangkai Isa ari kayu saleb abaꞌ malot ngau kayen puteh nyaꞌ. Udah nyaꞌ Yusop nepoꞌ bangkai Isa alam suteꞌ kubor te udah dekali de buket batu. Udah nyaꞌ ya ngansat sigeꞌ batu besai te ngau nutop pintu kubor nyaꞌ. 47 Pas jalai nyaꞌ teh Maria sidaꞌ Makdalena abaꞌ Maria inai Yoses gaꞌ adai diyaꞌ. Sidaꞌ mrati teban Yusop nepoꞌ bangkai Isa.