Pengamoꞌ urang kaꞌ nangkap abaꞌ munoh Isa
(Luk. 22:1-2)
14
Dua ari ageꞌ sidaꞌ Yahudi kaꞌ ngeramai ari besai Paskah, abaꞌ ari besai Ruti te nadai Beragi. Kebala kepalaꞌ imam agama Yahudi abaꞌ kebala urang te ahli alam Prator Musa bepekat kati cara nangkap abaꞌ munoh Isa, uleh nadai deketauꞌ urang banyau. 2 Sidaꞌ bepekat, jakoꞌ sidaꞌ, “Adu kita nangkap Isa pas urang tengan ngeramai ari besai Paskah, mali kebala urang belayaꞌ tegal nyaꞌ.”Urang inoꞌ nataꞌ binyak wangi ke palaꞌ Isa
3 Udah nyaꞌ, Isa abaꞌ kebala muret Ya angkat ke kampong Betania. Den adai sikoꞌ urang laki te nama Simon. Dulau teh ya gah kenaꞌ penyaket kulet kusta. Pas Isa dudok makai de rumah Simon, sikoꞌ urang inoꞌ datai ngusong Ya ngemaiꞌ sigeꞌ jebol te depulah ari batu pualam. Jebol nyaꞌ biseꞌ binyak wangi narwastua te ma mahal. Udah nyaꞌ ya matah ler jebol nyaꞌ abaꞌ nataꞌ binyak wangi nyaꞌ lubah-lubah ke atau palaꞌ Isa. 4 Uleh adai dua tiga ikoꞌ urang te medaꞌ nyaꞌ ranseng blumaꞌ begisek ke sama direꞌ jakoꞌ sidaꞌ, “Ngapa bah ya ngeruaꞌ binyak wangi nyaꞌ? 5 Binyak nyaꞌ bah tauꞌ dejual ngau rega lebeh ari tiga ratos duet dinar, abaꞌ duet rega binyak nyaꞌ tauꞌ deꞌ bereꞌ ke kebala urang te misken.” Baroꞌ sidaꞌ nganoꞌ inoꞌ nyaꞌ.
6 Uleh Isa madah, “Nang ngaru ya. Ngapa piyaꞌ kitaꞌ nganoꞌ inoꞌ toꞌ? Ya bah mulah te bayek ngau Ku. 7 Enteꞌ kitaꞌ bamat kaꞌ nulong urang mesken bah, sidaꞌ selareh adai nungaꞌ kitaꞌ, uleh Ku toꞌ nadai selareh abaꞌ kitaꞌ sengabot. 8 Inoꞌ toꞌ udah mulah apa te tauꞌ ya pulah. Ku bedau mati abaꞌ dekubor, uleh ya nyau datai ngeminyak tuboh Ku, sama upa ngeminyak bangkai Ku. 9 Ku madah ke kitaꞌ, pas Brita Bayek depadah de ugaꞌ dunia, apa te depulah inoꞌ toꞌ sigeꞌ detusoi ngau urang ngingat ya.”
Yudas kaꞌ nyerah Isa
(Luk. 22:3-6)
10 Baroꞌ Yudas Iskariot, salah sikoꞌ ari dua belas muret Isa, angkat ngusong kebala kepalaꞌ imam nema ya kaꞌ nyerah Isa ke sidaꞌ. 11 Kebala kepalaꞌ imam agama Yahudi gaga amat mah tengan nyaꞌ ninga te depadah Yudas. Sidaꞌ bedanyi kaꞌ mereꞌ duet ke ya. Udah nyaꞌ Yudas belaboh ngigaꞌ senta te pas ngau nyerah Isa ke sidaꞌ.
Isa makai de ari Paskah sidaꞌ Yahudi abaꞌ kebala muret Ya
(Luk. 22:7-14, 21-23)
12 Pas semaru belaboh ari besai Ruti te nadai Beragi, urang munoh dumba ngau ngeraya Paskah sidaꞌ Yahudi. Kebala muret Isa nanyaꞌ Ya, “Guru, dini Wan kaꞌ kami ngageh te depakai ngau ngeraya ari besai Paskah?”
13 Udah nyaꞌ Isa ngutos dua ikoꞌ muret Ya abaꞌ madah ke senikoꞌ, “Angkat ke senikoꞌ ke kuta. Den lah senikoꞌ betemu abaꞌ urang laki te ngemaiꞌ labah biseꞌ aiꞌ. Terudi ke ya, 14 abaꞌ padah ke urang te empu rumah nyaꞌ, ‘Guru nanyaꞌ, dini teban te tauꞌ ngau Ya abaꞌ kebala muret Ya makai ari Paskah?’ 15 Baroꞌ urang te empu rumah nyaꞌ, kaꞌ nunyok suteꞌ teban te luah de tingkat atau. Ya udah ngageh teban nyaꞌ lengkap. Diyaꞌ mah senikoꞌ ngageh pemakai ngau kita lah. ”
16 Baroꞌ dua ikoꞌ muret Isa nyaꞌ angkat ke kuta. Diyaꞌ senikoꞌ nemu ugaꞌ nyaꞌ percis upa te depadah Isa ke senikoꞌ. Baroꞌ senikoꞌ ngageh te depakai ngau ngeraya Paskah.
17 Nyau malam, Isa abaꞌ dua belas muret Ya datai ke rumah nyaꞌ. 18 Pas tengan sidaꞌ makai berama diyaꞌ, Isa madah, “Ku madah bamat ke kitaꞌ, adai sikoꞌ ari entara kitaꞌ te kaꞌ nyerah Ku ke kebala munsoh Ku. Urang nyaꞌ tengan makai breta Ku.”
19 Pas ninga nyaꞌ kebala muret Isa ma riyu. Sikoꞌ-sikoꞌ sidaꞌ madah ke Isa, “Tuhan urang nyaꞌ pesti ukai ku!”
20 Sawot Isa, “Ya nyaꞌ sikoꞌ ari entara kitaꞌ te dua belas toꞌ, te encalop ruti abaꞌ Ku ke pingan toꞌ. 21 Anak Ensia pesti mah kaꞌ mati upa te udah detules alam Kitab Suci, uleh aja merinsaꞌ amat mah idop urang te nyerah Anak Ensia. Lebeh bayek enteꞌ ya nadai deadai ke dunia toꞌ.”
Danyi baru Tuhan Allah abaꞌ ensia
(Luk. 22:15-20)
22 Pas sidaꞌ tengan makai Isa ngameꞌ ruti abaꞌ bradua ngucap sukor ke Tuhan Allah. Baroꞌ ya mungaꞌ ruti nyaꞌ ngau jari Ya abaꞌ mereꞌ ke kebala muret Ya blumaꞌ madah, “Nah, ameꞌ ke ruti toꞌ abaꞌ pakai. Toꞌ mah tuboh Ku.”
23 Udah nyaꞌ Ya ngameꞌ cawan te beiseꞌ aiꞌ angor abaꞌ ngucap sukor ke Tuhan Allah. Baroꞌ Ya mereꞌ cawan nyaꞌ ke sidaꞌ abaꞌ sidaꞌ beganteꞌ nginom aiꞌ angor ari cawan nyaꞌ. 24 Baroꞌ Isa madah ke sidaꞌ, “ Toꞌ mah darah Ku, darah toꞌ ngau kelaiꞌ danyi baru Tuhan Allah abaꞌ ensia abaꞌ desioh ngau ngampon dusa urang mayoh. 25 Ku madah ke kitaꞌ, belaboh ari sari toꞌ, Ku nadai kaꞌ nginom aiꞌ angor toꞌ ageꞌ. Ku kaꞌ nginom aiꞌ angor ageꞌ lah nungoꞌ senta Pemrintah Tuhan Allah datai.”
Petros madah direꞌ nadai ngelala Isa
(Luk. 22:31-34)
26 Udah sidaꞌ menanyi suteꞌ lagu ngau muji Tuhan Allah, sidaꞌ angkat ke buket Saiton.
27 Baroꞌ Isa madah ke kebala muret Ya, “Ugaꞌ kitaꞌ kaꞌ rari nudi Ku. Nema alam Kitab Suci detules pemadah Tuhan Allah upa pitoꞌ, ‘Ku kaꞌ munoh gemala nyaꞌ abaꞌ kebala dumba nyaꞌ kaꞌ pamar-piyar.’ ’b 28 Uleh asa Ku udah idop ageꞌ lah, Ku dulau lah ari kitaꞌ ke Galelia.”
29 Petros madah, “Biyar mah sidaꞌ te ke bukai nudi Wan, ku nadai ngamoꞌ nudi Wan!”
30 Isa madah, “Ku madah ke meh, sari toꞌ, malam toꞌ mah gaꞌ, sebedau manok engkukok dua kaleꞌ, udah tiga kaleꞌ meh madah direꞌ nadai ngelala Ku.”
31 Uleh Petros empala tegas nyawot Isa, “Biyar mah ku mati abaꞌ Wan, ku nadai ngamoꞌ madah direꞌ nadai ngelala Wan.” Kebala muret Isa te kebukai sigeꞌ madah piyaꞌ gaꞌ.
Isa bradua de kebon Getsemani
(Luk. 22:39-46)
32 Baroꞌ Isa abaꞌ kebala muret Ya datai ke suteꞌ kebon te nama Getsemani. Isa madah ke kebala muret Ya, “Ditoꞌ mah kitaꞌ dudok, Ku kaꞌ angkat bradua.”
33 Isa ngemaiꞌ Petros, Yohanes, abaꞌ Yakubos abaꞌ Ya. Ya belaboh ngasa reyu abaꞌ saban. 34 Ya madah ke sidaꞌ, “Ati Ku ancor nema tusah, asa nyau kaꞌ mati. Ditoꞌ mah kitaꞌ bejaga, nang tinok!”
35 Isa bejalai niba jaoh geꞌ baroꞌ belutot bradua sampai mua Ya ngenaꞌ tanah. Ya mintaꞌ ke Tuhan Allah enteꞌ tauꞌ Ya nadai alah ngasa pemedeh nyaꞌ. 36 Ya madah, “O Abba, o Apai, Wan talah mulah apa jaꞌ. Enteꞌ tauꞌ ameꞌ ke pemedehc toꞌ ari Ku, uleh nang nunaꞌ penekaꞌ Ku, pulah jaꞌ nunaꞌ penekaꞌ Wan.”
37 Udah nyaꞌ Isa bebalek ageꞌ ngusong tiga ikoꞌ muret Ya, abaꞌ medaꞌ sidaꞌ tengan tinok. Ya madah ke Simon Petros, “Simon, ngapa meh tinok? Nadai piyaꞌ meh talah bejaga abaꞌ Ku sejam jaꞌ?” 38 Baroꞌ Isa madah ke sidaꞌ, “Bejaga abaꞌ bradua ke kitaꞌ isaꞌ kitaꞌ nadai laboh enteꞌ pas decuba. Ati kitaꞌ amat mah kaꞌ mulah utai te kenaꞌ, uleh tuboh kitaꞌ lemah.”
39 Udah nyaꞌ Isa angkat ageꞌ ke teban te jalai Ya bradua teh, abaꞌ Ya bradua sama upa te tadeꞌ. 40 Abaꞌ pas Ya bebalek ageꞌ, Ya nemu sidaꞌ tengan tinok, nema mata sidaꞌ nyau berat amat. Kebaꞌ sidaꞌ nitauꞌ badaꞌ kati nyawot Isa jalai Ya ngerara sidaꞌ.
41 Udah Isa bradua te ke tiga kaleꞌ, Ya bebalek ageꞌ ngusong sidaꞌ. Ya madah ke sidaꞌ, “Ageꞌ kitaꞌ tinok abaꞌ blepa? Nyangkaꞌ mah! Toꞌ nyau mah senta Anak Ensia deserah ke kebala urang te dusa. 42 Ayoh diri, boh kita angkat! Pedaꞌ nyaꞌ mah urang te kaꞌ nyerah Ku!”
Isa detangkap
(Luk. 22:47-53)
43 Tengan Isa ageꞌ becakap datai mah Yudas sikoꞌ ari dua belas muret Ya. Yudas datai detrudi kebala urang banyau te ngemaiꞌ isau abaꞌ kayu. Sidaꞌ desuroh kebala kepalaꞌ imam, kebala urang te ahli alam Prator Musa, abaꞌ kebala pemimpen Yahudi. 44 Yudas te kaꞌ nyerah Isa, udah madah kelaiꞌ ke sidaꞌ te ni Isa. Ya madah, “Urang te ku siyom ke pipi nyaꞌ mah Isa. Tangkap ke Ya, abaꞌ jaga ke Ya bayek-bayek!”
45 Pas Yudas datai kiyaꞌ, ya lansong ngusong Isa abaꞌ madah, “Rabi!” Baroꞌ ya nyiom pipi Isa. 46 Baroꞌ kebala urang te abaꞌ Yudas nangkap Isa abaꞌ masong Ya. 47 Uleh sikoꞌ urang te adai diyaꞌ nyintak isau abaꞌ mantap pemantoꞌ Imam Besai kenaꞌ peneng ya sampai putos. 48 Isa madah ke sidaꞌ, “Kitaꞌ miker Ku toꞌ perampok, ngasoh kitaꞌ datai lengkap kaꞌ nangkap Ku ngemaiꞌ isau abaꞌ kayu? 49 Bataꞌ ngenap ari mah Ku dudok ngajar de laman Rumah Kudos Tuhan Allah abaꞌ kitaꞌ nadai nangkap Ku. Uleh ugaꞌ toꞌ alah tejadi isaꞌ nemoꞌ apa te detules alam kitab kebala nabi.”
50 Baroꞌ ugaꞌ muret nyaꞌ nudi Ya abaꞌ ngelari direꞌ.
51 Adai sikoꞌ pemudaꞌ te peroꞌ beselimpor kayen puteh ngau ya nutop tuboh direꞌ, nerudi Isa. Pas Kebala urang te desuroh kebala kepalaꞌ imam kaꞌ nangkap ya, 52 ya nyiah kayen nyaꞌ belumaꞌ rari telanyang.
Isa de mua Pengadel Agama Yahudi
(Luk. 22:54-55, 63-71)
53 Udah nyaꞌ Isa debaiꞌ ke rumah Imam Besai. Ugaꞌ kepalaꞌ imam agama Yahudi, pemimpen sidaꞌ Yahudi, abaꞌ urang te ahli alam Prator Musa tengan begugoꞌ diyaꞌ. 54 Petros nerudi Isa ari jaoh abaꞌ tamaꞌ ke laman rumah Imam Besai. Diyaꞌ ya dudok semak api ungon bekinoꞌ abaꞌ kebala urang te nyaga diyaꞌ. 55 Kebala kepalaꞌ imam abaꞌ ugaꞌ Pengadel Agama berusaha ngigaꞌ urang te kaꞌ ngemulaꞌ apa te depulah Isa, isaꞌ adai alasan ngau sidaꞌ ngukom mati Isa. Uleh datai ke suteꞌ mah sidaꞌ nadai nemu bukti. 56 Mayoh urang becakap bulaꞌ nudoh Isa, uleh te detudoh sidaꞌ belawan abaꞌ te depadah pangan bukai.
57 Baroꞌ dua tiga ikoꞌ urang diri madah utai te bulaꞌ te depulah Isa. Sidaꞌ madah pitoꞌ, 58 “Kami ninga Ensia toꞌ madah pitoꞌ, ‘Ku kaꞌ ngancai Rumah Kudos Tuhan Allah te depulah ensia. Alam tiga ari, Ku kaꞌ mulah Rumah Kudos Tuhan Allah te kebukai, te nadai depulah ensia.’ ” 59 Uleh apa te depadah sidaꞌ nyaꞌ belawan gaꞌ abaꞌ pangan bukai.
60 Baroꞌ Imam Besai diri de tengah kebala urang banyau abaꞌ nanyaꞌ Isa, “Kati, nitauꞌ piyaꞌ Wan nyawot te detudoh sidaꞌ nyaꞌ ke Wan?”
61 Uleh Isa sunyeꞌ mah, sama sekaleꞌ Ya nadai nyawot. Baroꞌ Imam Besai nanyaꞌ Ya ageꞌ, “Meh toꞌ Al Maseh, Anak Tuhan Allah te Ma Tingeꞌ?”
62 Isa nyawot ya, “Auꞌ Ku mah Ya abaꞌ kitaꞌ kaꞌ medaꞌ Anak Ensia dudok de sepiyak kanan te Ma Kuasa abaꞌ datai de atau awan ari surga.”
63 Kebaꞌ Imam Besai nyaꞌ minsak baju direꞌ nema Ya ngangap Isa melicak Tuhan Allah. Imam Besai madah, “Nadai perlu kebala saksi ageꞌ. 64 Kitaꞌ udah ninga Ya melicak Tuhan Allah! Kati Ya toꞌ kenaꞌ sekaleꞌ ke salah?” Ugaꞌ sidaꞌ madah Ya salah abaꞌ patot deukom mati.
65 Baroꞌ dua tiga ikoꞌ urang belaboh namet mata Isa ngau kayen, sidaꞌ ngeludah Ya, abaꞌ mangkong maloꞌ Ya. Sidaꞌ madah, “Eh nabi, padah ke kami sapa te mangkong Meh?” Baroꞌ kebala penyaga belaboh mangkong-maloꞌ Ya gaꞌ.
Petros madah direꞌ nadai ngelala Isa
(Luk. 22:56-62)
66 Tengan nyaꞌ Petros ageꞌ adai de laman. Udah nyaꞌ sikoꞌ pemantoꞌ te inoꞌ te bekreja de rumah Imam Besai, datai kiyaꞌ. 67 Pas ya medaꞌ Petros tengan nginoꞌ tuboh direꞌ semak api, inoꞌ nyaꞌ merati Petros bamat-amat. Baroꞌ ya madah ke Petros, “Meh sigeꞌ kawan Isa, sidaꞌ Nasaret nyaꞌ.”
68 Uleh Petros madah, “Ku nadai ngelala Urang nyaꞌ, abaꞌ ku nadai nyarok te depadah deꞌ!” Udah nyaꞌ Petros angkat ke laman mua semak pintu gerbang. Tengan nyaꞌ gaꞌ manok engkukok.
69 Pelayan inoꞌ nyaꞌ medaꞌ Petros ageꞌ, ya madah ke kebala urang te diri diyaꞌ, “Urang toꞌ salah sikoꞌ muret Isa.” 70 Uleh Petros tengek ngai ngakoꞌ direꞌ ngelala Isa. Nadai lamaꞌ udah nyaꞌ, kebala urang diyaꞌ madah gaꞌ ke Petros, “Meh pesti salah sikoꞌ ari sidaꞌ nyaꞌ, nema meh sidaꞌ Galelia.”
71 Baroꞌ Petros madah, “Brani sumpah, amat mah ku nadai ngelala Urang te kitaꞌ cakap ke nyaꞌ.”
72 Tengan nyaꞌ manok renyau engkukok te kedua kaleꞌ. Kebaꞌ Petros ingat Isa udah madah ke ya, “Sebedau manok engkukok dua kaleꞌ, meh udah tiga kaleꞌ madah direꞌ nadai ngelala Ku.” Udah nyaꞌ Petros ma riyu blumaꞌ ya nyabak sikok-sikok.