Rumah Kudos Tuhan Allah kaꞌ daruboh
13
Jalai Isa abaꞌ kebala muret Ya angkat ari Rumah Kudos Tuhan Allah, sikoꞌ muret Ya madah, “Guru, pedaꞌ kah! Kebala batu toꞌ saja bayek, piyaꞌ gaꞌ kebala Rumah toꞌ!” 2 Isa nyawot ya, “Pedaꞌ kah bamat-amat Rumah toꞌ, adai lah senta datai ke sigeꞌ mah niseꞌ batu te dengaꞌ betipan ageꞌ. Ugaꞌ toꞌ kaꞌ daruboh.”Pemedeh nrudi Isa
3 Udah nyaꞌ Isa abaꞌ kebala muret Ya angkat nikeꞌ ke buket Saiton. Diyaꞌ Ya dudok de teban te tauꞌ ngau Ya medaꞌ Rumah Kudos Tuhan Allah. Baroꞌ Petros, Yakubos, Yohanes, abaꞌ Andrias datai becakap abaꞌ Isa. 4 Jakoꞌ sidaꞌ, “Guru, padah ke kami, kmaya Rumah Kudos Tuhan Allah toꞌ kaꞌ daruboh? Apa tana te tauꞌ kami pedaꞌ enteꞌ senta nyaꞌ nyau datai?” 5 Isa nyawot sidaꞌ, “Ati-ati jaꞌ nang sampai urang ngasoh kitaꞌ pecayaꞌ ke kebala utai te nadai bamat. 6 Mayoh urang kaꞌ datai abaꞌ madah direꞌ, ‘Ku mah Al Maseh, Raja Penyelamat te dedanyi Tuhan Allah.’ Sidaꞌ kaꞌ ngasoh mayoh urang nrudi pengajar te salah. 7 Asa kitaꞌ ninga urang beperang sama direꞌ abaꞌ ninga brita kaꞌ tejadi perang, nang kitaꞌ saban. Nema ugaꞌ utai nyaꞌ alah dulau datai. Amat piyaꞌ, nyaꞌ ukai gaꞌ breti nyau pemadoꞌ jaman. 8 Bansa te suteꞌ kaꞌ nyerang bansa te kebukai. Menua te suteꞌ kaꞌ ngelawan menua te kebukai. Diyaꞌ-ditoꞌ kaꞌ tejadi gempa bumi abaꞌ urang niseꞌ kebala te depakai, uleh pemedeh nyaꞌ baroꞌ blaboh mah. Nyaꞌ sama upa urang inoꞌ te pedeh perot kaꞌ beranak.
9 Uleh kitaꞌ alah ati-ati, kitaꞌ kaꞌ detangkap abaꞌ debaiꞌ ngadap kebala pemimpen agama abaꞌ kitaꞌ kaꞌ depangkong paloꞌ de kebala rumah te jalai sidaꞌ Yahudi nyemah Tuhan Allah. Kebala urang kaꞌ nangkap abaꞌ ngemaiꞌ kitaꞌ ngadap kebala urang te bekuasa, kebala raja. Ugaꞌ nyaꞌ kitaꞌ kaꞌ asa kah nema kitaꞌ toꞌ muret Ku. Uleh nyaꞌ mah senta ngau kitaꞌ nusoi Ku ke sidaꞌ. 10 Abaꞌ Brita Bayek ari Tuhan Allah alah depadah dulau ke kebala bansa. 11 Enteꞌ kebala urang nangkap kitaꞌ abaꞌ maiꞌ kitaꞌ ngadap kebala pemimpen isaꞌ deadel, nang saban ke apa te alah kitaꞌ padah kah. Uleh padah kah apa te depadah Roh Kudos alam ati kitaꞌ tengan nyaꞌ. Nema ukai kitaꞌ kedireꞌ te becakap nyaꞌ, uleh Roh Kudos te ngasoh kitaꞌ madah utai nyaꞌ.
12 Jemahlah adai kebala menyadeꞌ te kaꞌ nyerah menyadeꞌ direꞌ isaꞌ debunoh. Adai gaꞌ apai te kaꞌ nyerah anak ya isaꞌ debunoh. Kebala anak sigeꞌ adai te ngelawan apai inai ya. Sidaꞌ kaꞌ ngasoh urang munoh apai inai sidaꞌ. 13 Ugaꞌ urang kaꞌ areh ke kitaꞌ nema kitaꞌ muret Ku. Uleh urang te betan datai ke pemadoꞌ pesti daslamat.”
Pemedeh te ma amat abaꞌ kebala urang te budi-budi jadi Al Maseh
14 Udah nyaꞌ Isa becakap ageꞌ, “Kitaꞌ kaꞌ medaꞌ sikoꞌ urang te paleng jat te nyuroh ugaꞌ utai punas. Urang nyaꞌ kaꞌ diri abaꞌ ngejaiꞌ teban te tunaꞌ nitauꞌ detamaꞌ ya. (Te maca toꞌ alah nyarok bamat-amat ke utai toꞌ.) Pas nyaꞌ lah, kebala sidaꞌ de Yudia alah rari ke daerah te bebuket. 15 Urang te adai de atap rumah nang turon ke alam rumah ngameꞌ kebala utai. 16 Urang te tengan de uma nang pulai ke rumah ngameꞌ kebala selawar baju ya. 17 Uleh kaseh badaꞌ kebala inoꞌ te tengan nganong abaꞌ te nusu miyak rama nyaꞌ. 18 Bradua kah ke Tuhan Allah isaꞌ utai toꞌ nadai tejadi rama ujan. 19 Ku madah piyaꞌ, nema rama nyaꞌ kebala urang ma mah pemedeh. Bedau kalaꞌ urang ngasa pemedeh te upa nyaꞌ blaboh ari Tuhan Allah mulah dunia toꞌ sampai ke entoꞌ. Jemah lah sigeꞌ nadai urang ngamoꞌ ngasa pemedeh upa toꞌ ageꞌ.a 20 Enteꞌ pemedeh nyaꞌ nadai dejangkaꞌ Tuhan Allah, niseꞌ urang tan idop. Uleh tegal kebala urang te dapileh Ya, Tuhan Allah ngemanos rama nyaꞌ.
21 Enteꞌ adai urang madah ke kitaꞌ, ‘Pedaꞌ Al Maseh, Raja Penyalamat adai ditoꞌ! Pedaꞌ Ya adai den!’ Nang kitaꞌ pecayaꞌ ke te depadah sidaꞌ.” 22 Nema sidaꞌ nyaꞌ ukai Al Maseh abaꞌ nabi. Sidaꞌ nyaꞌ Al Maseh abaꞌ nabi te nesat urang. Sidaꞌ mayoh mulah utai te nyaroh ngau sidaꞌ nipu kebala urang te dapileh Tuhan Allah. 23 Kitaꞌ alah ati-ati. Ku dah madah ugaꞌ utai toꞌ ke kitaꞌ sebedau ugaꞌ toꞌ tejadi.
Penatai Ensia te datai ari Tuhan Allah
24 Isa nyamong cakap Ya ageꞌ, “Udah masa pemedeh nyaꞌ, mataari nadai kaꞌ besinar ageꞌ, abaꞌ bulan nadai bedawar ageꞌ. 25 Kebala piyanau kaꞌ laboh ari langet, abaꞌ kebala utai te adai de langet nadai tentu rudu. 26 Senta nyaꞌ mah kebala urang kaꞌ medaꞌ Ensia te datai ari Tuhan Allah, Ya kaꞌ datai de atau awan ngau kuasa te lampar besai abaꞌ besinar trang.b 27 Udah nyaꞌ Ya kaꞌ nyuroh kebala mlikat Ya ngumpol kebala urang te Ya pileh. Sidaꞌ kaꞌ dakumpol Ya ari ugaꞌ teban te de bumi, ari batas bumi te suteꞌ sampai ke batas bumi te bukai.
28 Belajar kah ari pon ara. Asa kebala kantok ya nyau pansot, kitaꞌ tauꞌ badaꞌ nadai lamaꞌ ageꞌ kaꞌ rama buah. 29 Piyaꞌ gaꞌ asa kitaꞌ medaꞌ ugaꞌ te Ku padah ke kitaꞌ tadeꞌ nyaꞌ tejadi, kitaꞌ tauꞌ badaꞌ senta nyaꞌ nyau kaꞌ datai. 30 Ku madah ke kitaꞌ ugaꞌ nyaꞌ tejadi sebedau kebala urang jaman toꞌ mati ugaꞌ. 31 Langet abaꞌ bumi kaꞌ lenyau, uleh apa te Ku padah kah kenaꞌ sengabot.
32 Uleh niseꞌ urang tauꞌ badaꞌ kmaya ari abaꞌ senta utai nyaꞌ datai lah. Kebala mlikat de sruga nitauꞌ badaꞌ, Anak sigeꞌ nitauꞌ badaꞌ, proꞌ Apai Ku mah te tauꞌ badaꞌ.”
Isa ngajar urang isaꞌ bejaga sengabot
33 Isa madah ageꞌ ke sidaꞌ, jakoꞌ Ya, “Ati-ati ke kitaꞌ nyaga direꞌ, nema kitaꞌ nitauꞌ badaꞌ kmaya senta utai nyaꞌ kaꞌ datai. 34 Penatai Ensia te datai ari Tuhan Allah tauꞌ dasemaꞌ ke upa sikoꞌ urang te angkat ke menua bukai. Sebedau ya nudi rumah, ya madah tugas ke kebala pemantoꞌ ya. Ya madah ke ugaꞌ pemantoꞌ ya apa te alah sidaꞌ pulah kah slamaꞌ ya angkat. Udah nyaꞌ ya madah ke te nyaga pintu, ‘Jaga kah pintu bamat-amat datai ke senta ku pulai ageꞌ!’ 35 Kebaꞌ nyaꞌ kitaꞌ alah slareh siap, nema kitaꞌ nitauꞌ badaꞌ kmaya te empu rumah nyaꞌ datai ageꞌ. Ya tauꞌ datai pas baroꞌ petang, malam, tengah malam, jaoh malam, abaꞌ dinaari. 36 Kebaꞌ kitaꞌ alah bejaga, isaꞌ enteꞌ ya nadai mang-mang datai, ya nadai nemu kitaꞌ tengan tinok. 37 Apa te Ku padah ke kitaꞌ entoꞌ, Ku padah kah ke ugaꞌ urang gaꞌ: Kitaꞌ alah bejaga sengabot!”