Kisah empama urang te empu kebon angor
(Luk. 20:9-19)
12
Udah nyaꞌ Isa belaboh becakap ngau kisah empama jakoꞌ Ya, “Adai sikoꞌ urang namak angor de kebon ya. Udah nyaꞌ baroꞌ ya magar tisi kebon nyaꞌ. Ya ngali lubang ngau mulah teban merah buah angor, abaꞌ mulah suteꞌ menara ngau bejaga. Udah nyaꞌ ya nyiwa kebon angor nyaꞌ ke urang te ngintu kebon. Baroꞌ udah nyaꞌ ya angkat ke menua bukai. 2 Pas senta buah angor mudoh, ya ngutos sikoꞌ pemantoꞌ ya ngusong kebala urang te nyiwa kebon angor ya ngameꞌ asel pemagi ari kebon angor nyaꞌ. 3 Uleh kebala urang te nyiwa kebon angor nyaꞌ, nangkap pemantoꞌ nyaꞌ abaꞌ mangkong-maloꞌ ya. Udah nyaꞌ sidaꞌ ngasoh ya pulai puang. 4 Udah nyaꞌ, urang te empu kebon angor nyaꞌ ngutos ageꞌ sikoꞌ pemantoꞌ ya te kebukai ngusong kebala urang te nyiwa kebon nyaꞌ. Pemantoꞌ nyaꞌ sidaꞌ pangkong paloꞌ sampai bakal abaꞌ sidaꞌ ngemalu ya. 5 Baroꞌ urang te empu kebon angor nyaꞌ ngutos sikoꞌ ageꞌ pemantoꞌ te kebukai, uleh pemantoꞌ nyaꞌ sidaꞌ bunoh. Sidaꞌ mulah te serupa ke kebala pemantoꞌ te kebukai. Adai pemantoꞌ te depangkong paloꞌ sidaꞌ, abaꞌ adai te sidaꞌ bunoh. 6 Entoꞌ semoꞌ anak te ma ya kaseh mah te ageꞌ adai. Kepanyai ya ngutos anak ya nyaꞌ ngusong kebala sidaꞌ te nyiwa kebon angor nyaꞌ, nema piker ya sidaꞌ pesti mah mulah te bayek ke anak ya. 7 Uleh breta kebala sidaꞌ te nyiwa nyaꞌ medaꞌ miyak te deutos nyaꞌ datai, sidaꞌ madah ke pangan bukai, ‘Pedaꞌ! Te empu kebon toꞌ, ngutos anak ya kedireꞌ, anak ya toꞌ mah te empu kebon toꞌ jemah lah. Boh kita munoh ya, isaꞌ jemah lah kita te empu kebon toꞌ!’ 8 Kebaꞌ sidaꞌ nangkap anak te empu kebon angor nyaꞌ abaꞌ munoh ya. Udah nyaꞌ sidaꞌ muai bangkai ya keluar kebon angor nyaꞌ.”9 Udah Isa nusoi kisah empama nyaꞌ, Ya nanyaꞌ, “Entoꞌ apa te kaꞌ depulah urang te empu kebon angor nyaꞌ? Ku madah ke kitaꞌ, pesti ya datai abaꞌ munoh kebala urang te nyiwa kebon nyaꞌ. Udah nyaꞌ kebon nyaꞌ ya bereꞌ ke urang bukai. 10 Kitaꞌ pesti dah maca toꞌ alam Kitab Suci,
‘Batu te udah debuai kebala tukang,
nyaꞌ udah jadi batu dasar te ma penteng.
11 Tuhan Allah udah mulah utai toꞌ,
abaꞌ kita udah medaꞌ lampar nyaroh utai nyaꞌ.’ ”
12 Baroꞌ kebala pemimpen Yahudi berusaha kaꞌ nangkap Isa, nema sidaꞌ tauꞌ badaꞌ sidaꞌ mah te de maksot Isa ari kisah empama nyaꞌ. Uleh sidaꞌ takot ke urang banyau, kebaꞌ sidaꞌ angkat ari nyaꞌ nudi Isa diyaꞌ.
Kita alah mayar pajak sekaleꞌ ke nadai
(Luk. 20:20-26)
13 Udah nyaꞌ, kebala pemimpen bansa Yahudi ngasoh sidaꞌ Parisi abaꞌ kebala urang te nukong Herudes datai ngusong Isa. Sidaꞌ kaꞌ ngigaꞌ penyalah Isa ngau cakap Ya kedireꞌ. 14 Sidaꞌ datai ngusong Isa abaꞌ madah ke Ya, “Guru, kami tauꞌ badaꞌ Wan selareh madah utai te kenaꞌ. Wan teros terang ngajar upa kati penekaꞌ Tuhan Allah ke ensia. Wan nadai iboh ke apa te jakoꞌ urang upa kati pengajar Wan, nema Wan nadai nyemeh mipeh urang. Padah ke kami, enteꞌ nunaꞌ prator agama kita sidaꞌ Yahudi, kami alah mayar pajak ke Kaisar Ruma, sekaleꞌ ke nadai?”
15 Uleh Isa tauꞌ badaꞌ enteꞌ sidaꞌ budi-budi bayek. Ya madah ke sidaꞌ, Ngapa bah kitaꞌ kaꞌ ngigaꞌ penyalah Ku? Baiꞌ kitoꞌ suteꞌ duet kereng dinar nyaꞌ!”
16 Baroꞌ sidaꞌ mereꞌ suteꞌ duet kereng dinar ke Isa. Isa nanyaꞌ sidaꞌ, “Gamar abaꞌ nama sapa toꞌ?”
Sawot sidaꞌ, “Kaisar.”
17 Baroꞌ Isa madah, “Enteꞌ piyaꞌ, bereꞌ ke Kaisar apa te empu Kaisar, abaꞌ bereꞌ ke Tuhan Allah apa te empu Tuhan Allah.”
Sidaꞌ ma ampal ninga Ya madah piyaꞌ.
Sidaꞌ Saduki nadai pecayaꞌ enteꞌ urang mati tauꞌ idop ageꞌ
(Luk. 20:27-40)
18 Adai sekaleꞌ dua tiga ikoꞌ urang ari kelumpok Saduki datai ngusong Isa. Kebala sidaꞌ Saduki nadai pecayaꞌ enteꞌ urang mati tauꞌ idop ageꞌ. Sidaꞌ madah ke Isa, 19 “Guru, Musa meliyaꞌ teh mereꞌ prator upa pitoꞌ ke kita, ‘Enteꞌ urang laki bebini uleh mati bedau naꞌ adai anak, menyadeꞌ laki ya mah te alah jadi ke awak bini ya. Nema ngau cara nyaꞌ mah menyadeꞌ ya tauꞌ mereꞌ pureh ke menyadeꞌ ya te tuai te nyau mati nyaꞌ.’ 20 Empama teh adai tujoh ikoꞌ sidaꞌ menyadeꞌ laki ugaꞌ. Sikoꞌ te tuai bebini. Uleh laki nyaꞌ mati bedau adai anak. 21 Baroꞌ menyadeꞌ laki ya te kedua jadi ke balu menyadeꞌ direꞌ te tuai nyaꞌ. Uleh ya sigeꞌ mati sebedau adai anak. Upa piyaꞌ gaꞌ menyadeꞌ ya te ketiga, 22 abaꞌ kebala menyadeꞌ ya te kebukai, datai ke menyadeꞌ ya te ketujoh. Nyau kelamaꞌ inoꞌ nyaꞌ sigeꞌ mati. 23 Kati jemah lah pas senta urang mati idop ageꞌ, inoꞌ toꞌ jadi ke sapa? Nema sidaꞌ tujoh menyadeꞌ nyaꞌ udah ugaꞌ mah jadi ke ya nyaꞌ.”
24 Isa nyawot sidaꞌ, “Kitaꞌ salah, nema kitaꞌ nadai nyarok iseꞌ Kitab Suci abaꞌ nitauꞌ badaꞌ apa te Tuhan Allah talah pulah. 25 Pas senta Tuhan Allah ngidop kebala urang ageꞌ lah, ugaꞌ urang kaꞌ idop upa mlikat de sruga nadai belaki bini ageꞌ. 26 Enteꞌ kitaꞌ bamat-amat nanyaꞌ kati urang mati kaꞌ tauꞌ idop ageꞌ, pesti kitaꞌ udah maca alam Kitab te detules Musa. De alam Kitab nyaꞌ, adai kisah belayan dureꞌ te beapi uleh nadai angos. Diyaꞌ detules, Tuhan Allah madah ke Musa, ‘Ku mah Tuhan Allah te desemah Abraham, desemah Isak, abaꞌ desemah Yakob.’ 27 Ya ukai Tuhan Allah te desemah urang mati. Ya Tuhan Allah te desemah urang idop. Kitaꞌ toꞌ tulu amat nadai nyarok!”
Printah te paleng penteng
(Luk. 10:25-28)
28 Udah nyaꞌ sikoꞌ urang te ahli alam Prator Musa ninga Isa abaꞌ kebala sidaꞌ Saduki besual jawab. Ya tauꞌ badaꞌ Isa udah nyawot sidaꞌ ngau bayek. Baroꞌ ya nyemak Isa abaꞌ nanyaꞌ, “Printah apa te paleng penteng alam Prator Musa?”
29 Sawot Isa, “Toꞌ mah printah te paleng penteng, ‘Tinga ke bansa Israel, Tuhan Allah nyaꞌ mah sikoꞌ-ikoꞌ Tuhan te alah kitaꞌ semah. 30 Kaseh ke Tuhan Allah direꞌ ngau ugaꞌ iseꞌ ati, ugaꞌ idop, ugaꞌ pemiker, abaꞌ ugaꞌ penganal direꞌ’a 31 Printah te paleng penteng te kedua nyaꞌ, ‘Kaseh ke sama direꞌ ensia upa ngaseh direꞌ kedireꞌ.’ Dua uteꞌ printah toꞌ mah te paleng penteng ari ugaꞌ printah te adai.”
32 Baroꞌ urang te ahli alam Prator Musa madah, “Kenaꞌ mah Guru, amat mah te jakoꞌ Wan nyaꞌ, Tuhan Allah nyaꞌ sikoꞌ mah. Niseꞌ Tuhan Allah te kebukai. 33 Abaꞌ kita alah ngaseh Tuhan Allah ngau ugaꞌ ati kita, ngau ugaꞌ pemiker kita, ngau ugaꞌ penganal kita. Kita sigeꞌ alah kaseh ke sama direꞌ ensia upa ngaseh direꞌ kedireꞌ. Patoh ke dua uteꞌ printah nyaꞌ lebeh penteng ari mereꞌ kurban te udah detunu abaꞌ kurban te kebukai ke Tuhan Allah.”b
34 Isa medaꞌ ma mah bayek sawot ensia nyaꞌ, kebaꞌ Ya madah, “Direꞌ amper tauꞌ jadi anggota Pemrintah Tuhan Allah.” Udah nyaꞌ, niseꞌ ageꞌ urang te berani betanyaꞌ ke Isa.
Isa abaꞌ Raja Daot
(Luk. 20:41-44)
35 Jalai Isa ngajar urang banyau de Rumah Kudos Tuhan Allah, Ya nanyaꞌ, “Ngapa kebala urang te ahli alam Prator Musa tauꞌ madah enteꞌ Al Maseh nyaꞌ pureh Raja Daot? 36 Raja Daot jaꞌ depimpen Roh Kudos nyebot Al Maseh Tuhan ya. Nema Raja Daot madah,
‘Tuhan Allah madah ke Tuhan ku:
Dudok ke Direꞌ de sepiyak kanan Ku,
sampai Ku ngasoh kebala munsoh Direꞌ
ngau pangal kaki Direꞌ.’
37 Enteꞌ Raja Daot nyebot Al Maseh Tuhan ya, kati Ya tauꞌ depadah pureh Raja Daot?”
Urang mayoh te adai diyaꞌ gaga amat ninga Isa ngajar.
Isa ngajar isaꞌ ati-ati ke urang te ahli alam Prator Musa
(Luk. 20:45-47)
38 Baroꞌ Isa nyamong ageꞌ cakap Ya, Ya madah, “Ati-ati kitaꞌ ke kebala urang te ahli alam Prator Musa. Sidaꞌ keran bejalai kiyaꞌ-kitoꞌ ngau jubah panyai. Sidaꞌ gaga asa kebala urang de jalai hormat ke sidaꞌ. 39 Enteꞌ sidaꞌ datai ke teban te jalai kita nyemah Tuhan Allah abaꞌ teban urang gawai, sidaꞌ keran dudok de mua. 40 Sidaꞌ nipu kebala balu, isaꞌ sidaꞌ tauꞌ ngameꞌ reta bena empu kebala balu nyaꞌ. Ngau napok pemenyat direꞌ, sidaꞌ asa bradua panyai-panyai. Jemah lah pesti mah sidaꞌ kaꞌ nerimaꞌ ukom te lebeh berat.”
Pesemah inoꞌ balu te misken
(Luk. 21:1-4)
41 Adai sekaleꞌ Isa de Rumah Kudos Tuhan Allah, Ya dudok semak badah te ngau nepoꞌ duet pesemah abaꞌ medaꞌ kati kebala urang majak duet ke alam badah nyaꞌ. Mayoh urang kaya majak duet kiyaꞌ abaꞌ sidaꞌ mereꞌ mayoh. 42 Udah nyaꞌ sikoꞌ inoꞌ balu misken datai ke teban nyaꞌ. Ya majak dua uteꞌ duet kereng te paleng met ke badah pesemah nyaꞌ. 43 Kebaꞌ Isa ngumai kebala muret Ya abaꞌ madah ke sidaꞌ, “Ku madah ke kitaꞌ, balu misken toꞌ, lebeh mayoh mereꞌ ari pada sidaꞌ te kebukai. 44 Nema ugaꞌ sidaꞌ mereꞌ ari plebeh duet sidaꞌ. Uleh balu toꞌ, ya mereꞌ ari peniseꞌ ya, nyaꞌ mah engkaꞌ duet ya.”