Isa ngutos tujoh puloh muret
10
Baroꞌ udah nyaꞌ Tuhan Isa nunyok tujoh puloh muret te kebukai, abaꞌ ngutos sidaꞌ dua-dua ikoꞌ dulau ari Ya ke ugaꞌ kuta abaꞌ teban te kaꞌ dagusong Ya.
2 Isa madah ke sidaꞌ: “Te daketau amat mayoh, uleh te bekreja siket. Kebaꞌ nyaꞌ pintaꞌ kah ke Urang te empu ketau nyaꞌ, isaꞌ Ya ngutos kebala urang te ngetau.
3 Angkat kitaꞌ ken! Uleh kitaꞌ alah tauꞌ badaꞌ, Ku ngutos kitaꞌ upa anak dumba ke tengah serigala.
4 Nang ngemaiꞌ kebala dumpet abaꞌ tas bekal abaꞌ sepatu te bukai, nang rinah lamaꞌ becakap asa betemu abaꞌ urang de jalai.
5 Enteꞌ kitaꞌ tamaꞌ ke sebuah rumah padah kah dulau: ‘Engkremaꞌ Tuhan Allah mereꞌ idop penoh damai alam bilek toꞌ.’
6 Abaꞌ asa diyaꞌ adai urang te gaga nerimaꞌ idop penoh damai ari Tuhan Allah nyaꞌ, baroꞌ ya ngasa idop penoh damai nyaꞌ diyaꞌ. Uleh asa urang ngai nerimaꞌ idop penoh damai nyaꞌ, Tuhan Allah nadai mereꞌ idop penoh damai alam bilek nyaꞌ.
7 Diyau kah alam rumah urang te kaꞌ nerimaꞌ kitaꞌ, pakai inom kah apa te dajuaꞌ urang diyaꞌ ke kitaꞌ, nema urang te bekreja patot nerimaꞌ upah. Nang bepinah ulah, entap jaꞌ diyaꞌ.
8 Abaꞌ asa kitaꞌ tamaꞌ ke alam suteꞌ kuta abaꞌ kitaꞌ datrimaꞌ diyaꞌ pakai kah apa te deageh ke kitaꞌ.
9 Abaꞌ semoh kah kebala urang te pedeh de kuta nyaꞌ, abaꞌ padah ke ugaꞌ urang, nadai lamaꞌ ageꞌ Pemerintah Tuhan Allah adai de tengah sidaꞌ.
10 Uleh asa kitaꞌ tamaꞌ ke suteꞌ kuta abaꞌ kitaꞌ nadai datrimaꞌ urang diyaꞌ, angkat kah kitaꞌ ke teban te jalai kebala urang mayoh begugoꞌ. Padah ke urang te de kuta nyaꞌ,
11 kitaꞌ kaꞌ nepas debu ari kuta sidaꞌ te lekat de kaki kitaꞌ, nyaꞌ ngau tana ke sidaꞌ jemah lah Tuhan Allah kaꞌ ngukom sidaꞌ. Uleh amat piyaꞌ padah gaꞌ ke sidaꞌ, isaꞌ sidaꞌ tauꞌ badaꞌ nadai lamaꞌ ageꞌ Pemerintah Tuhan Allah adai de tengah sidaꞌ.
12 Ku madah ke kitaꞌ: Senta Tuhan Allah ngukom ugaꞌ urang, ukom te detangong urang Sudoma lebeh lempong ari ukom te detangong urang de kuta nyaꞌ.”
Isa nginsah kebala urang de kebala kuta
13 “Rugi amat kitaꞌ urang kuta Kurasem! Rugi amat kitaꞌ urang kuta Betsaida! Nema kebala utai te nyaroh ari Tuhan Allah udah mayoh Ku pulah de tengah kitaꞌ, uleh kitaꞌ ngai nudi kebala dusa. Bataꞌ enteꞌ urang de kuta Tiros abaꞌ kuta Sidon medaꞌ utai te nyaroh te Ku pulah ke nyaꞌ, udah lamaꞌ sidaꞌ nudi abaꞌ nesal ke dusa sidaꞌ.
14 Uleh senta Tuhan Allah ngukom ugaꞌ urang, ukom te detangong urang Tiros abaꞌ urang Sidon lebeh lempong ari ukom te detangong urang de kuta nyaꞌ.
15 Abaꞌ kitaꞌ urang Kapernaom, piker kitaꞌ Tuhan Allah kaꞌ ningeꞌ abaꞌ nerimaꞌ kitaꞌ de sruga? Udah sah nadai mah! Tuhan Allah kaꞌ muai kitaꞌ ke neraka.”
16 Baroꞌ Isa madah ke kebala muret Ya: “Urang te kaꞌ ninga kitaꞌ, bereti ya ninga Ku. Abaꞌ urang te ngai ke kitaꞌ, bereti ya ngai gaꞌ ke Ku, abaꞌ urang te ngai ke Ku, ya ngai gaꞌ ke Ya te ngutos Ku.”
Tujoh puloh muret pulai ageꞌ
17 Udah nyaꞌ, tujoh puloh muret nyaꞌ pulai ngau ati gaga abaꞌ madah ke Isa: “Tuhan, bala sitan sampai tunok ke kami breta kami muru ngau nama Wan.”
18 Isa madah ke sidaꞌ: “Ku udah medaꞌ Kepalaꞌ bala sitan laboh ari langet upa kilat.
19 Kitaꞌ alah tauꞌ badaꞌ Ku udah mereꞌ kuasa ke kitaꞌ ngau nijak ular abaꞌ kala, abaꞌ kuasa ngau ngalah penguat Kepalaꞌ bala sitan sampai niseꞌ te tauꞌ medeh kitaꞌ.
20 Uleh amat piyaꞌ nang kitaꞌ peroꞌ gaga nema bala sitan nyaꞌ tunok ke kitaꞌ, uleh gaga kah nema Tuhan Allah nyatat nama kitaꞌ de sruga.”
Isa gaga amat
21 Tengan nyaꞌ gaga amat mah Isa nema Ya penoh Roh Kudos, Ya madah: “O, Apai Ku, Te empu langet abaꞌ bumi, Ku betrimaꞌ kaseh ngusong Wan nema ugaꞌ toꞌ Wan tapok kah ari urang pintar abaꞌ urang te panai, uleh Wan anyaꞌ ke urang te met. Ku tauꞌ badaꞌ nyaꞌ mah te degaga Wan Pai.”
22 Isa madah ke urang te diyaꞌ: “Tuhan Allah, Apai Ku udah mereꞌ ugaꞌ utai ke Ku. Niseꞌ urang te tauꞌ badaꞌ sapa Anak bukai ari Apai, abaꞌ niseꞌ te tauꞌ badaꞌ sapa Apai bukai ari Anak abaꞌ urang te dapileh Anak isaꞌ tauꞌ badaꞌ sapa Apai.”
23 Udah nyaꞌ Isa malek ke kebala muret Ya abaꞌ madah: “Betuah amat kitaꞌ nema udah medaꞌ te kitaꞌ pedaꞌ entoꞌ.
24 Kitaꞌ alah tauꞌ badaꞌ mayoh nabi abaꞌ raja te dulau kaꞌ medaꞌ apa te kitaꞌ pedaꞌ entoꞌ, uleh sidaꞌ nadai medaꞌ, abaꞌ sidaꞌ kaꞌ ninga te kitaꞌ dinga entoꞌ uleh sidaꞌ nadai ninga.”
Idop kaseh ke pangan bukai
25 Tengan Isa ngajar, diri sikoꞌ urang te ahli de alam kitab te datules Musa, ya kaꞌ encuba Isa. Ya nanyaꞌ: “Guru, apa te alah ku pulah kah isaꞌ ku tauꞌ jong idop abaꞌ Tuhan Allah sengabot?”
26 Isa nyawot ya: “Apa te depadah de alam kitab te datules Musa? Apa te debaca direꞌ den?”
27 Urang nyaꞌ nyawot Ya: “Kaseh kah Tuhan Allah direꞌ ngau ugaꞌ iseꞌ ati, ugaꞌ idop, ugaꞌ penganal abaꞌ ugaꞌ pemiker direꞌ, abaꞌ kaseh kah sama direꞌ ensia upa ngaseh direꞌ kedireꞌ.”b
28 Isa nyawot ya: “Amat mah te jakoꞌ direꞌ, pulah kah upa nyaꞌ isaꞌ direꞌ tauꞌ jong idop abaꞌ Tuhan Allah sengabot.”
29 Uleh ya kaꞌ ngamat-amat direꞌ, ya nanyaꞌ ke Isa: “Urang bukai te upa kati te alah ku kaseh kah?”
30 Isa nyawot ya: “Adai sikoꞌ urang Yahudi turon ari kuta Yerosalem ke kuta Yeriko, de tengah jalai ya dapringen kebala perampok, apa te debaiꞌ ya derampas abaꞌ sidaꞌ mangkong-maloꞌ ya sampai nyau kaꞌ mati, udah nyaꞌ sidaꞌ nudi ya.
31 Nadai lamaꞌ udah nyaꞌ mansaꞌ sikoꞌ urang imam agama Yahudi, ya medaꞌ urang nyaꞌ, uleh ya mansaꞌ ari sepiyak jalai.
32 Udah nyaꞌ mansaꞌ ageꞌ sikoꞌ urang Liwi, ya medaꞌ urang nyaꞌ, uleh ya sigeꞌ mansaꞌ ari sepiyak jalai gaꞌ.
33 Baroꞌ udah nyaꞌ mansaꞌ sikoꞌ urang Samaria,c breta ya medaꞌ urang nyaꞌ, timol pengaseh de alam ati ya.
34 Urang Samaria nyaꞌ ngusong kiyaꞌ, ya mreseh kebala bakal ngau aiꞌ angor abaꞌ ngunsot ngau binyak, udah nyaꞌ ya engkabong bakal nyaꞌ ngau kaen, ya ngatong urang nyaꞌ ke atau keledai ya, baroꞌ ya ngemaiꞌ urang nyaꞌ ke rumah te deageh ngau urang bemalam abaꞌ ngintu eh.
35 Ari suteꞌ, ya nyuaꞌ duet dua dinard ke urang te empu rumah nyaꞌ, udah nyaꞌ ya madah: ‘Intu kah ya nyaꞌ, enteꞌ wan blanya lebeh ari duet toꞌ, nungoꞌ ku bebalek lah ku nganti.’ ”
36 Udah Isa nusoi kisah nyaꞌ, Ya nanyaꞌ: “Jakoꞌ direꞌ, sapa ari tiga ikoꞌ urang toꞌ te bamat-amat kaseh ke urang te derampok nyaꞌ?”
37 Jakoꞌ urang nyaꞌ: “Urang te timol pengaseh de alam ati ya ke urang te udah derampok nyaꞌ.” Udah nyaꞌ Isa madah: “Angkat, pulah kah upa piyaꞌ.”
Isa ngusong Marta abaꞌ Maria
38 Tengan Isa abaꞌ kebala muret Ya mansang ke Yerosalem, sidaꞌ tamaꞌ ke suteꞌ kampong. De kampong nyaꞌ adai Marta te gaga nerimaꞌ sidaꞌ de rumah ya.
39 Marta adai sikoꞌ menyadeꞌ inoꞌ te nama Maria. Maria toꞌ dudok semak kaki Isa abaꞌ ninga te jakoꞌ Ya.
40 Uleh Marta sibok amat ngageh kebala utai ke sidaꞌ, kebaꞌ ya ngusong Isa abaꞌ madah: “Tuhan, nadai weh Wan medaꞌ menyadeꞌ ku ngengaꞌ ku kedireꞌ ngageh kebala utai? Tulong padah ke ya isaꞌ ya mantoꞌ ku.”
41 Uleh Tuhan Isa nyawot ya: “Marta, Marta, deꞌ saban abaꞌ medeh direꞌ ngau mayoh leman.
42 Peroꞌ sleman jaꞌ te penteng: Maria udah mileh te paleng penteng te nitauꞌ deameꞌ ari ya.”