KITAB INYEL
YOHANES
PENULAU BECAKAP
Alam Brita Bayek te depadah uleh Yohanes toꞌ, Isa depadah Pemadah Tuhan Allah (pasal 1). Ya udah adai sebedau dunia dapulah abaꞌ jong adai datai ke jemah. Ya bamat-amat udah jadi ensia abaꞌ diyau de tengah kita. Upa te depadah alam bukoꞌ toꞌ, Brita Bayek toꞌ datules ngau maksot isaꞌ kebala urang te maca tauꞌ pecayaꞌ enteꞌ Isa mah Raja Penyelamat te udah dedanyi. Ya nyaꞌ Anak Tuhan Allah, isaꞌ urang te pecayaꞌ ke Ya tauꞌ jong idop abaꞌ Tuhan Allah sengabot (20:31).
De pasal 2-12, Yohanes nules apa te deajar Isa abaꞌ tujoh tana te nyaroh te dapulah Isa. Tujoh tana te nyaroh nyaꞌ: Maleꞌ aiꞌ jadi aiꞌ angor (2:1-12); Nyemoh anak pegawai pemrintah (4:43-54); Nyemoh urang de kulam Betesda (5:1-18); Limaꞌ ribu urang dabreꞌ makai (6:1-15); Bejalai de atau aiꞌ (6:16-21); Urang te butaꞌ breta adai dasemoh (9:1-12); abaꞌ ngidop Lasaros ageꞌ (11:38-44). Kebala utai te nyaroh ari Tuhan Allah nyaꞌ nunyok enteꞌ Isa mah Raja Penyelamat te udah dedanyi, abaꞌ Ya Anak Tuhan Allah. Daentara kebala utai te nyaroh ari Tuhan Allah te dapulah Isa adai gaꞌ kebala pengajar te depadah Ya ke urang banyau. Breta kebala urang ninga pengajar Isa, adai urang te pecayaꞌ ke Isa abaꞌ jadi muret Ya. Uleh adai gaꞌ te ngelawan Ya abaꞌ ngai pecayaꞌ ke Ya.
De pasal 13-17 Yohanes nules pas Isa kaꞌ detangkap, abaꞌ kati Ya nyiap abaꞌ nguat ati sidaꞌ malam nyaꞌ.
De pasal pemadoꞌ 18-21, datules kati Isa detangkap abaꞌ dasidang, kati Ya desaleb, mati abaꞌ idop ageꞌ, abaꞌ kati Ya nganyaꞌ direꞌ ke kebala muret Ya udah Ya idop ageꞌ.
Alam Brita Bayek toꞌ, Yohanes madah adai pemreꞌ te ma penteng, pemreꞌ nyaꞌ idop baru abaꞌ Isa Al Maseh. Ugaꞌ urang te pecayaꞌ ke Isa Al Maseh ngau jalai ke Tuhan Allah tauꞌ buleh idop baru blaboh ari dunia toꞌ datai ke jemah. Isa mah te nganyaꞌ Tuhan Allah, abaꞌ te mreꞌ Idop.
Tujoh kaleꞌ alam kitab toꞌ, Isa madah kisah empama Ya ke direꞌ. Ya madah “Ku mah Ruti” (6:35, 41, 48, 51); “Ku mah trang dunia” (8:12); “Ku mah pintu” (10:7, 9); “Ku gemala te bayek” (10:11, 14); “Ku mah te tauꞌ ngidop ageꞌ urang mati abaꞌ te mreꞌ idop” (11:25); “Ku mah jalai, Ku mah te kenaꞌ, abaꞌ Ku mah idop” (14:6); abaꞌ “Ku mah pon angor te bamat” (15:1, 5).